Jenesesi 8
8
Vunguwa wa mahindje
1Mbwenye Mulugu kamudiwanle Nowe vamohi na vinyama ja mukokolani na jifuwo jejo jali na Nowe mmwadeyani mule. Mwa enne Mulugu ohowombiha nipevo ilambo yatene ya vati, mahindje roma welela. 2Mihindje dapunle mahindje okumela vati dohofungeya. Eto majanela a zulu kohofungeya eto muzongwe okumela zulu ohomiyala. 3Mwa enne, mahindje mwilamboni kovunguwagave vang'ono vang'ono. Evale kakwakwanaga malambo 150, mahindje kohovunguwa pama. 4Nagafiyile diya 17, mwedi wanetanu na mbinli, mwadeya ohodowa garati mwango da ilambo ya Ararati.#8:4 diya 17, mwedi wanetanu na mbinli: Mwadeya ohomala malambo 150 ambelruwaga vazulu va mahindje. Eto mwadeya ule agagaratile vazulu va mwango vale, atu na anavinyama kali mmwadeyani mule kohomala malambo 220 kadedihaga ira mahindje kaumme eto ira teya ivuvure pama. (Jenesesi 8:14-19) Ku wonga kuma siku novolowa fiyeda siku nokuma, vohomala malambo 370, inafwanyeya yagali yaka yompumbula na malambo matanu.
5Evale mahindje kovunguwagave. Mbwenye nagafiyile siku noroma, mwedi wanekumi, mwango datene dohoromaga kumelela. 6Vagamanle malambo mamohiwa 40, mulombwana Nowe ohulaga janela nasakanyile liye vamwadeyani vale. 7Agahulile, ohomukumihedavo nakungu. Evale nakungule odowaga, liye welagawo, dowaga liye welagawo fiyeda mahindje welela.
8Noira eno, mulombwana Nowe ohokumiha eto kangayiwa ira idowe yaone akala mahindje kohowelela vati. 9Evale kangayiwa ile yagadowile, tchaonile voimela. Noira eno, yohowelela wa Nowe mmwadeyani mwakoka mwene mwasiwa ilambo yatene ya vati yalive yokuneleyene na mahindje. Evale Nowe ohotapula ndanda naye, liye watchela kangayiwa ile, ivolotchiha mmwadeyani akoka.
10Evale liye ohodediha ante malambo amohiwa matanu na menli. Noira eno, ohoiruma kangayiwa akoka. 11Ora ya tchiguwo, kangayiwa ile yohozaga yagalumile ntakuru nititi na mutengo wa azeti, zana wa mulombwana Nowe. Noira enne, mulombwana Nowe ohoiziwa ira mahindje kohowelela mwilamboni ya vati. 12Evale liye ohodediha ante malambo amohiwa matanu na menli, noira eno ohoiruma kangayiwa akoka. Mbwenye fendo yenne kangayiwa ile tchawelile. 13Mulombwana Nowe aganna yaka 601, mwedi oroma wa yaka eto siku noroma mahindje matenene kohowelela mwilamboni ya vati. Evale Nowe ohoparapasulaga zulu wa mwadeya, liye kumiheda unde muru waye, patamela mwilamboni. Agapatamenle, afwanyilege teya yagavuvurile.
Kuma wa Nowe mmwadeyani
14Mwa enne kagakwakwanne malambo 27 a mwedi wanembinli, ilambo ya vati yatene yohoumma pama. 15Evale Mulugu ohowonga na Nowe eraga: 16<<Weyo podi kumamo mmwadeyani vamohi na muhiyanawo, ahimawo vamohi na ahiyaniwene. 17Eto ukumihemo jatene ja ingumi jili mmwadeyani, vinyama datene, mbalrame, jifuwo, na jomburunuwa jatene jinamburunuwa vati ira jiwendawendege mwilamboni ya vati, jirelane, jizale mwilamboni ya vati.>> 18Evale Nowe ohokuma na muhiyanaye, anaye vamohi na ahiyaniwene. 19Eto vingumi datene dali mmwadeyani mule dohokuma, roma vinyama, jomburunuwa, na mbalrame datene nnafwanyeya mwilamboni dohokuma mmwadeyani mule milogo na milogo.
20Evale Nowe ohomanga ibuwa ya mukuto ira avelele mikuto wa Yehova.#8:20 Nowe ohomanga ibuwa ya mukuto: Ibuwa ti nimburo nohelavo mukuto. Katukula mabwe, aliwa hela vamohive, aliwa helavo mukuto wewa. Muwari mwa vinyama datene dapama na mbalrame datene dapama, liye oholanda imohi, imohi, liye pa, avelelaga mukuto otumeya vazulu va ibuwa vale. 21Mwa enne nukela wapama wa mukuto ule wohonfwanya Yehova. Evale Yehova ohoumbuwela mmirimani mwaye ira: <<Miyo dihiiziwa ira atu anafuna za baliwa anoza kakayena jofuna jiwa jotakala romana uhimani wewa. Mbwenye kuma peno eni kadiza diwelela akoka tembelrelra teya na mwasa wa atu eto kadiza diwelela tolotcha jatene ja ingumi na makalelo nnga virile miyo. 22Kuma peno fiyeda mala wa ilambo ya vati,#8:22 fiyeda mala wa ilambo ya vati: Muwari mowonga mazu anne, Mulugu ohorumela ira ilambo ya vati inoza imale. So nivwile ira kuma tempu ya Nowe fiyeda mala wa ilambo ya vati, Mulugu kaza atolotcha ilambo ya vati na mahindje akoka mbwenye unerege hiya tempu yorumbwa muzongwe na tempu ya ilimwe, hiyaniha na jengo jaireyile tempu Mulugu atolotchile liye ilambo na mahindje madjindji. unerege oneya tempu yozala na tempu yohanda, viha no didila, tempu ya ilimwe na tempu yodidila, ntana na mahiyu. Jatene jeji jinerege dowave fiyeda mala wa ilambo ya vati.>>
Iliyochaguliwa sasa
Jenesesi 8: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral