MATIUS 22
22
Sarḇer ḇekur munara fakawawin
22:1-14
(Luk. 14:15-24)
1Raimnai Yesus dawos wer kuker sarḇer faro si: 2“Ḇaḇesasoser ro Boiyaswa imnis raris wairek oso, ḇefrur munara fakawawin faro rumkun ḇyedi. 3Iwan manfamyan ḇyesi fa sra sor snonkaku dor kwar fa ḇeso munara fakawawin ani, ḇape simewer sramari. 4Iwan manfamyan ono ḇese wer, kuker ananun: Mko kofen faro snonkaku yor ansi: Kaku ḇeri, roḇean ayena yafasos na kwar, sapi snoman ma rofanfan yesi seḇekaruk kwar; nakam neḇefasos kwar, inja mkorama ḇemunara fakawawin ine. 5Ḇape snonkaku dor ansi sefandun iba; ono sraḇe yaf sena, ono sraḇe sasewar sena, 6ma ono wer sfor manfamyan ansi, sḇewayam ma smun si. 7Rarirya wairek ani imsor, ma iwan sarar ḇyesi fa sra smun ḇemamun ansi ma sikun mnu sedi. 8Posa kwar ikofen faro manfamyan ḇyesi: Munara fakawawin ya ḇyeḇefasos kwar, ḇape snonkaku yor ansi sisyusḇa.
9Inja mkora wer ḇenyan farsam nakam ma mkor snonkaku mkosrow ro diwa sya, mkun si faro munara fakawawin ine.
10Rarirya manfyan ansi sra siryur snonkaku kam sisrow ro nyan diḇo, snonkaku ḇeḇarḇor ma snonkaku ḇepyum, isof sim munara fakawawin ani ifo kuker dakam ansi.
11Fafisu wairek ani syun fa isrow dakam ansi, myam snon oso daksansun sansun munara ḇa, 12inja ikofen faroi: Ne, naek, snaro swun ro dine ḇoi waksansun sansun munara ḇa? 13#Mat. 8:12, 25:30; Luk. 13:28 Ḇape snon ani ḇyefasis monda. Inja wairek ani ikofen faro manfamyan ḇyesi: Mkofes wemin ma ḇramin ḇyesya ma mkosawen snon ani ḇemoḇ ḇepampan syadi, ro diwa kankanes ma arkfafais nakor naisya.
14Snar sibor seḇeyor, ḇape skinfir sya sibor ḇa.”
Ḇaḇyak som faro Kaisar
22:15-22
(Mrk. 12:13-17; Luk. 20:20-26)
15Ḇarpurya snon farisi ono sra sna awi fa ssewar nyan rariso sifrowes Yesus kuker fakfuken oso. 16Siwan manfamyan sesi fnoḇek snon Herodian ono fa sifuken I: “Guru, inkofawi, Au snonkaku ḇenapes ma kuker napnapes ḇuk farkarkor ro Allah nyan ḇyena ma Au wamkak ḇa faro mansei rya wer, snar au swewar snonsnon ḇa. 17Wakofen faro nko karkara bedi: Inja koḇak som faro Kaisarke roḇa?”
18Ḇape Yesus ifawi sne ḇeḇarḇor sena inja, ikofen: “Snaro mkofrowes Aya, ne snonkaku ḇeḇarḇor? 19Mkofasnai faro Aya pipi faro som ani.”
Inja ssun faroi dinar oser. 20Ma ifuken faro si: “Kakop ma fas-fas mansei ḇyedi sine?”
21Skarem, ḇo soḇo: “Kakop ma fas-fas Kaisar.”
Raimnai Yesus ikofen faro si: “Mkoḇuk faro Kaisar rosai Kaisar dor ro mko ma mkoḇuk faro Allah rosai Allah dor ro mko.”
22Simnaf rarirya sikandor ma sisusu bur Yesus ma sibur beri.
Saduki ono sifuken ro yar aḇiḇer
22:23-33
(Mrk. 12:18-27; Luk. 20:27-40)
23 #
Kis. 23:8
Ro ras ani Saduki ono sra faro Yesus, ḇena karkara, aḇiḇer ya isya ḇa. 24#Ul. 25:5 Sifuken faro I: “Guru, Moses ikofen, rofyor snon oso imar bur swari ḇoi suna romawaḇa, ḇedar ḇyedi ḇyuk bin ani insa ssuyaḇen romawa oso sadwer naek ḇyedi ḇemar ani. 25Rarirya ro fandu inko mambekanaek rifik sisya. Ḇepon ya fyakawin, ḇape nya romawa osoḇa ḇo imar. Inja naek ḇyedi fyakawin bin ani insa ssuyaḇen sadwer naek ḇyedi ḇemar ani. 26Rarirya kako ḇeḇesuru ma ḇeḇekior ya isof ḇeḇefik ya. 27Ḇarpur ya sikam simar, ma bin ani kako dakmar. 28Inja mansei ro fandu mambekanaek rifik ansi nari befakawin bin ani ro fafisu aḇiḇer ya? Snar sikam sfakawin kuker bin ani kwar.”
29Yesus kyarem faro si: “Mkosasar bos, snar mkofawi Refo ḇa, ma rarirya kako Allah papoik ḇyena! 30Snar ro fafisu aḇiḇer ya snonkaku sfakawin ḇa, ḇoi sikenem imnis malaikat ro boiyaswa. 31Ḇape ro mnuk aḇiḇer fandu ḇemar si mkowasya ḇake rosai Allah ikofen, radine: 32#Kel. 3:6 Aya ine Allah Abraham, Allah Ishak ma Allah Yakub? Snar I Allah faro snonkaku ḇemar sya ḇa, ḇoi I Allah faro snonkaku ḇekenem sya.”
33Kawasa ḇeḇor ḇemnaf ansi sikandor farkarkor ḇyena.
Sasoser ḇeba syadi
22:34-40
(Mrk. 12:28-34; Luk. 10:25-28)
34Fafisu snon Farisi sya simnaf, Yesus isisen wark snon Saduki sya sisḇasna, inja siryur 35ma oso ro si, isoine snon ḇefawi nananem Refo Yahudi, ifuken sas Yesus: 36“Ne, Guru, sasoser rosaiso ḇeba syadi ro sasoser Refo Yahudi?”
37 #
Ul. 6:5
Yesus kyarem faroi: “Waswar Manseren, Allah ḇedi, kuker snembri ḇesiper ma kuker rur bedi ḇesiper ma kuker karkara ḇena ḇesiper. 38Ine sasoser ḇepon ma ḇeba syadi. 39#Im. 19:18 Ma sasoser ḇeḇesuru ḇemnis kuker sasoser ḇepon ani iso ine: Waswar min besi imnis waswar mankundaw. 40Sasoser ansuine suiso ḇeḇeknam sasoser nakam ro Refo Yahudi ma syap nabi-nabi.”
Yesus ma Daud sunayae su rariso
22:41-46
(Mrk. 12:35-37; Luk. 20:41-44)
41Fafisu snon Farisi ono sisya siryur, Yesus ifuken faro si, doḇo: 42“Rariso karkara mkoḇena ro Wairek? Mansei rumkun ḇyedi rya?”
Sikofen faro I: “Daud rumkun ḇyedi rya.”
43Yesus ikofen faro si: “Rofyor rarirya ido, snaro Daud ikofen kuker sḇayoi Rur ya ma dap iḇe Manseren ḇyedi, ro fafisu ikofen:
44 #
Mzm. 110:1
Manseren ikofen kwar faro Manseren yedi:
kwainkada ro ḇar raku Yedi,
isof Yarir mbroḇ besi fa waref epen si.
45Inja rofyor Daud dapiḇe Manseren ḇyedi, rariso dapi ḇe rumkun ḇyedi wer?”
46Snonkaku osoḇa kyarem faro I, ma randak ro ras ani snonkaku osoḇa beri ḇemku fa ḇefakfuken roi ono faro I.
Iliyochaguliwa sasa
MATIUS 22: LAIBHW
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
