MATIUS 21
21
Yesus ḇyeḇeyaker ḇe Yerusalem
21:1-11
(Mrk. 11:1-10; Luk. 19:28-38; Yoh. 12:12-15)
1Fafisu Yesus ma manfamyan ḇyesi sfanam kwar Yerusalem ma srama ro Betfage ro urek Zaitun, Yesus iwan snon risuru ro manfamyan ḇyesi kuker anun: 2“Muraḇe mnu ḇero ḇarpon muḇedi, ma ro diwa nari musrow keledai bin oso ḇyeḇefes ma mkun ḇyedi isya ro risḇyedi. Muper keledai ani ma muyuni muma faro Aya. 3Ma rofyor snonkaku ono sifuken mu, mokofen faro si: Manseren ḇyefanduni. Nari isiḇer i fasaw wer.”
4Roi ḇeḇesya ine ryarirya insa ḇardi nabiya ḇyaryas ani imnis:
5 #
Za. 9:9
“Mkokofen faro imfun Sion:
Mamkada, Wairek bedi ryama faro au,
Ikada fyafir ma ḇyeaḇaḇen ma dek ro keledai oso,
keledai kuḇ babo.”
6Inja manfamyan ansuya sura ma sufrur raris moḇ rosai Yesus ḇyuk kwar faro su. 7Suyun keledai bin ani fnoḇek mkun ḇyedi, ma sḇor keledai ani dokor ḇyedi kuker sansun sena ma Yesus dek fa kyain roi. 8Kawasa ḇeḇor sḇor sansun sena ro sampakya, ma ḇesesya wer skaruk airam ono fa skekna ro sampak ya kako. 9#Mzm. 118:26 Ma kawasa ḇeḇor ḇesoi sya ḇembran ro ḇarpon ma ḇarpur Yesus ssibras, soḇo:
“Aski faro Rumkun Daud,
I ḇesma ḇok ḇerama kuker Manseren snori,
aski ro moḇ ḇekaki syadi!”
10Rofyor syun ro Yerusalem, mnu ḇeba ani imbrus ma kawasa ansi sikofen, ḇo soḇo: “Snonkaku saisoine?”
11Ma kawasa ḇeḇor ansi skarem: “Ine nabi Yesus ro Nazaret ro sup Galilea.”
Yesus fyasren Allah Rum ḇyedi
21:12-17
(Mrk. 11:15-19; Luk. 19:45-48; Yoh. 2:13-16)
12Raimnai Yesus syun ro Allah Rum ḇyedi ma iyaw snonkaku kam ḇefarḇaḇyan ro Allah Rum ḇyedi rawndi sya. Pyamḇar meja-meja sḇuksadwer pipi na ma bangku-bangku ro snonkaku ḇeḇoḇ manjawa sya. 13#Yes. 56:7; Yer. 7:11 Raimnai Yesus ikofen faro si: “Fas-fas isya: Rum Ayedi nari snir iḇe rum-nadi. Ḇape mkokada mkofrur iḇe nas snonkaku ḇemamun.”
14Rarirya ḇepraf sya ma manis sya srama faroi ro Allah Rum ḇyedi ma ḇyuk pararei faro si. 15Ḇape rofyor mananir imam-imam ma ḇefawi nananem Refo Yahudi smam aḇyair kanandor ifrur na ma romawa-romawa ḇebras ro Allah Rum ḇyedi sya: “Aski faro Rumkun Daud!”
16 #
Mzm. 8:3
Sisnesna namsor, ma sikofen faroi: “Wamnaf romawa sine roi sikofen na?” Yesus ikofen faro si: “Yamnaf; mkowasya ḇaimke: Ro sḇadon romawa makḇoi ma romawa ḇeyinem sus fasos kwar sanandik?”
17Raimnai ibur si ma isasyar ro mnu ya fa ryaḇe Betania ma denef ro dia.
Yesus ifras ara knam oso
21:18-22
(Mrk. 11:12-14, 20-26)
18Ro arwori ro maran kyaḇer wer ḇe Yerusalem, Yesus ibiser. 19Fanam nyanya Yesus myam ara knam oso inja imbran yoḇi fa syewar bon roi, ḇape ismai royo ḇa derer fyabairam monda. Inja Yesus ikofen faro ai knam ani: “Wapok wamarem wer ḇa isof fyoro-fyoro!” Ma ro fafisu ani beri ara knam ani myas.
20Manfamyan ḇyesi smam roi ḇeḇesya ani sikandor, ma sikofen: “Rariso isof ara knam ani myas fasaw beri?”
21 #
Mat. 17:20; 1 Kor. 13:2 Yesus kyarem faro si: “Yakofen faro mko, kaku ḇeri rofyor mkokyar ma mkoḇe ḇirḇarḇa, nari mkofrur roi ḇeraris yafrur faro ara knam ani, dererḇa ḇoi rofyor mkokofen faro bon ine: Wakḇaken ma rwop randa wamsawer ro soren! nari ndarirya. 22Ma rosairya wer mkor ro nadi kuker kakyar, nari mkosmai na.”
Fakfuken ḇekur papoik Yesus
21:23-27
(Mrk. 11:27-33; Luk. 20:1-8)
23Raimnai Yesus syun ḇe Allah Rum ḇyedi, ma fafisu fyarkor ro dia, mananir imam-imam kuker ḇeḇarara-ḇeḇarara er Yahudi srama faroi, ma sifuken: “Kuker papoik rosaiso bukfrur roi ḇera dine na? Ma manseiso ḇeḇuk papoik ani faro Au?”
24Yesus kyarem faro si: “Aya kako nari yaḇuk fakfuken oso faro mko ma rofyor mkokarem i faro Aya, nari Aya kako yakkofen faro mko kuker papoik rosaiso yaḇuki ifrur roi annane kam ya. 25Ḇakḇuk masi sren Yohanes ryama kero? Ryaker boiyaswake roḇa ryaker snonkakuke?”
Sawos yae faro si, ma sikofen: “Rofyor kokofen: Ryamaker boiyaswa, nari ikofen faro ko: Rarirya ido, snaro mkokyar faro i ḇa? 26Ḇape rofyor kokofen, ḇo koḇo: Ryamaker snonkaku, komkak kawasa ḇeḇor ansi, snar sikam skara Yohanes ani nabi rirya.” 27Raimnai skarem faro Yesus: “Inko fawiḇa.”
Inja Yesus ikofen faro si: “Rarirya ido, Aya kako yakkofen faro mkoḇa kuker papoik rosaiso yaḇuki ifrur roi annane kam ya.”
Sarḇer ro romawa risuru
21:28-32
28“Ḇape mko kara rariso: Snon oso ḇena romawa risuru. Rya faro romawa rak ya ma ikofen: Romawa jedi ras ine rwa wafararur ro yaf anggur. 29Romawa ani kyarem: Mḇoi, mami. Ḇape rya ḇa. 30Inja sinan ani ryawer faro romawa ḇeḇesuru ya ma ikofen rarirya kako. Ma romawa ani kyarem bo doḇe! Yamewer. Ḇape ḇarpurya fyafko ma rya. 31Mansei ro fandu romawa ansu ya ḇeḇeuser kmari marisen ḇyedi?”
Skarem, ḇo soḇo: “Romawa ḇeḇesuru ya.”
Yesus ikofen faro si: “Yakofen faro mko, kaku ḇeri ḇeyor som ma bin ḇefrur farḇuk nari spon mko fa ssun ro Allah Ḇaḇesasoser ḇyedi. 32#Luk. 3:12, 7:29-30 Snar Yohanes ryama fa fyasnai nyan ḇenapes faro mko, ḇape mko kyar i ḇa. Ḇape ḇeyor som ma bin-bin ḇefrur farḇakḇuk sikada sikyar faroi. Ḇape mkomam i ḇesyaḇo mkofafko ḇa ma mkokyar faro i ḇa kako.”
Sarḇer ro ḇefararur ro yaf anggur
21:33-46
(Mrk. 12:1-12; Luk. 20:9-19)
33 #
Yes. 5:1-2
“Mkomnaf sarḇer oso ḇese wer. Snon ḇena saprop oso dom yaf anggur raimnai kyeri ḇo dar werek i. Raimnai ḇyai der moḇ ḇekafos anggur ma ḇyawes kaderen ḇekaki fa sḇukwaren yaf ani. Raimnai ḇyeasas yaf ani faro ḇeḇuk sasureffa sifararur ro yaf ani ḇoi ryaḇe sup ḇese. 34Fafisu afufanggur ya fyanam, iwan manfamyan ḇyesi faro ḇefararur ro yaf ani fa ssun rarwas ḇyedi ro anggur bon anna. 35Ḇape ḇefararur ro yaf ani sfor manfamyan ḇyesi: siprer sia, smun sia ma sso sia kuker karui. 36Ḇarpur ya tuan ani iwan manfamyan ono ḇese wer, sibor syadi ro ḇepon ansi, ḇape si kako sifrur si raris min sesi. 37Ḇarpurya iwan romawa ḇyedi faro si, ḇo ikofen: Roma ḇyedi nari sararyof i. 38Ḇape rofyor ḇefararur ro yaf ansi smam rumkun ḇyani, sawos yae faro si: Roma ine iso nari ḇeḇewaris yaf ine, mkorama komun i, insa kona waris ḇyedi. 39Inja sfori ma sisawen i ḇe yaf ya ḇandiri posa smun i.
40Rofyor tuan ḇena yaf ani ryama, rosaiso nari ifrur faro ḇefararur ro yaf ani?”
41Sikofen faro i: “Nari myun snonkaku ḇeḇarḇor ansi ma yaf anggur ani nari ḇyuki faro ḇeḇuk sasuref ono ḇese, sikada nari ssḇuk bon ro yaf ani faroi ro fafisu afuf ya.”
42 #
Mzm. 118:22-23
Yesus ikofen faro si: “Mkowasya ḇaimke fas-fas ro Refo:
Ḇefawi nananem ḇaḇawes rum, karui sisawen ya
iso ḇeḇe karui dopir:
roi ḇeḇesya ine ryama ro Manseren mun ḇyedi,
roi ḇefrur kanandor ro ḇarpon komkasna.
43Rarirya yakofen faro mko, nari Allah Ḇaḇesasoser ḇyedi ḇye ḇeyun bur mko ma nari ḇye ḇeḇuk faro er oso ḇeḇuk bon faro Ḇaḇesasoser ani.
[44Mansesi ḇesapi ro karui ani, nari sekis-kis ma mansesi karui ani ḇyarek epen sya nari semnuk-mnuk.]”
45Fafisu mananir imam-imam ma snon Farisi ansi simnaf sarḇer Yesus ḇyani, sifawi siso Yesus syarḇer si. 46Inja ssewar nyan insa sfori, ḇape simkak kawasa ḇeḇor ansi, snar kawasa ḇeḇor ansi karkara sena I nabi rirya.
Iliyochaguliwa sasa
MATIUS 21: LAIBHW
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
