MATIUS 20
20
Sarḇer ro snonkaku ḇesma ḇaḇyak ro yaf anggur
20:1-16
1“Snar Ḇaḇesasoser ro Boiyaswa imnis tuan ḇena rum oso isasyar ro arwo prim kaku fa syewar snonkaku ono fa sifararur ro yaf anggur ḇyedi. 2Rofyor nyawosi kuker snonkaku ansi kwar ro ḇaḇyak sedi dinar oser ro ras oser, posa iwan siḇe yaf anggur ḇyedi. 3Indokada oras siw arwo isasyar wer ma isrow snonkaku ono sarores monda ro pasar. 4Ikofen faro si: Mkora mkakfararur kako ro yaf anggur ayedi, ma nari yaḇak pyum mko. Ma sikako sakra. 5Indokada oras samfur seser risuru ma oras kior mandira ya kako isasyar ma syewar ḇefararur ono wer. 6Indokada oras rim mandira isasyar wer ma isrow snonkaku ono wer, inja ikofen faro si: Snaro mkarores monda ro dine ro ras ḇesiper ine? 7Sikofen faroi: Snar snonkaku ono ssḇuk fararur faro nko ḇa. Ikofen faro si: Mkora kako ḇe yaf anggur ayedi.
8 #
Im. 19:13; Ul. 24:15 Fafisu mandira kwar tuan ani ikofen faro manwadwaren yaf ya: Wor ḇefararur ansi ma baksi, bak ḇepon ḇesun papupes sya isof ḇesun ḇepon sya. 9Inja ḇefararur ro indokada oras rim sya srama ḇyaksi ma oser-oser isma dinar oser. 10Ḇarpur ya ḇefararur ḇepon ansi sakrama, skara soḇo nari sismai syadi, ḇape sikako oser-oser ismai dinar oser kako. 11Fafisu sisma ḇaḇyak sedi, sikada surem faro tuan ani, 12soḇo: Ḇesun papupes sine sifararur oras oser monda ḇesyaḇo baksi imnis kuker inko, ḇefararur marḇak ras ḇesiper ma ḇerires dares pnas ro ori. 13Ḇape tuan ani kyarem faro oso ro si, ḇo ḏoḇo: Naek, yafrur sasar faro au ḇa. Rariso kuna wosi kwar kuker ḇaḇyak dinar oser ro ras oser? 14Wun rarwas ḇedi ḇo wabur; yamarisen yaḇuk faro ḇesun papupes ani imnis kuker yaḇuk faro au. 15Ipyumḇake yafrur marisen ro sneri kuker nana yena? Roḇaido wamsor, snar yafrur pyum?
16 #
Mat. 19:30; Mrk. 10:31; Luk. 13:30 Rarirya kako snonkaku ḇepupes sya nari spon ma ḇepon sya nari spur.”
Ḇaryas ḇeḇekior ro kandera ḇekur Yesus
20:17-19
(Mrk. 10:32-34; Luk. 18:31-34)
17Fafisu Yesus ryaḇe Yerusalem, dor ḇardi manfamyan samfur seser risuru ḇyesi ma ikofen faro si ro nyanya faduri: 18“Knikine kora ḇe Yerusalem ma Rumkun Snonkaku nari sḇoḇi faro mananir imam-imam ma ḇefawi nananem Refo Yahudisya, ma nari ssḇuk samamyai marmar faro i. 19Ma nari ssḇuki faro er-er ḇefawi Allah ḇa sya, insa sonef i, siprer i ma spai i ro aprop, ma ro ras ḇeḇekior ya nari ḇyeḇeḇawes.”
Yakobus ma Yohanes sna suḇedi fararyor ḇyedi
20:20-28
(Mrk. 10:35-45)
20Raimnai Zebedeus mandaḇen ḇyesu fnoḇek sna suḇedi skora faro Yesus, ma sna suḇedi ḇyan suba ro ḇarpon ḇyedi fa dor roi oso ro i.
21Yesus ikofen: “Rosai wamarisen ya?”
Kyarem, ḇo ḏoḇo: “Buk sasoser, insa romawa ayesuine sukain ro Ḇaḇesasoser bedi, sumindi ro ḇar raku ma sumin ya ro ḇar rasar ḇedi.” 22Ḇape Yesus kyarem, ḇo ikofen: “Mkofawi ḇa rosaiso mkor ya. Mḇoi nari mkakinem sek aninem yinem ya?” Sukofen faro Yesus: “Mḇoi rarirya.”
23Yesus ikofen faro si: “Sek aninem yedi, mḇoi nari mkakinem i, ḇape kankain ro ḇar raku ma ḇar rasar ayedi, yapok fa yaḇuki ḇa. Ine nari ḇyeḇeḇuk faro snonkaku mansesi Kma yedi fyasos kwar sya.”
24Manfamyan samfur ḇese ansi simnaf rarirya simsor faro mambekanaek ansu ya. 25#Mat. 23:11; Mrk. 9:35; Luk. 22:25-26 Ḇape Yesus dor si ma ikofen: “Mkofawi ḇaḇesasoser er-er sya, ssḇuk sasoser faro kawasa kuker ḇramin mankarmomen ma ḇeḇarara-ḇeḇarara sya sewayam si kuker pakakrek. 26Rariryaḇa fandu mko. Mansei ḇemarisen ḇeba ro fandu mko, iḇye duf farmyan mko, 27ma mansei ḇemarisen ḇeḇemananir fandu mko, iḇye ḇye manfamyan ḇe mko; 28imnis raris Rumkon Snonkaku ryama insa suf farmyan i ḇa, mḇoi insa duf farmyan ma insa ḇyuk kankenem ḇyedi fa ḇyukḇak namuk kawasa ḇeḇor.”
Yesus ḇyuk pararei faro snon ḇepraf risuru
20:29-34
(Mrk. 10:46-52; Luk. 18:35-43)
29Ro fafisu Yesus kuker manfamyan ḇyesi sisasyar ro mnu Yerikho, kawasa sibor semarani ḇo siso i. 30Snon ḇepraf risuru suisya sukain ro nyan andir ya, ma sumnaf, Yesus imbranuk, inja suyor ḇo suyoḇo: “Manseren, Rumkun Daud, waswar nu!”
31Ḇape kawasa ḇeḇor ansi sewef su insa suḇefasis. Ḇesyaḇo insape ssubras syadi wer, suyoḇo: “Manseren, romawa Daud, waswar nu!”
32Inja Yesus dores kan ma dor su. Ikofen: “Rosaiso mumarisen insa yafrur faro mu?”
33Sukarem, ḇo suyoḇo: “Manseren, numarisen insa numam wer.”
34Rarirya saswar ya dek ro Yesus sneri, inja pyan ro sumkasna ma ro fafisu ya kako sumam beri ma suso I.
Iliyochaguliwa sasa
MATIUS 20: LAIBHW
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
