MATIUS 15
15
Allah sasoser ḇyena ma Yahudi rari sena
15:1-20
(Mrk. 7:1-23)
1Ḇarpur ya Farisi ono kuker ḇefawi nananem Refo Yahudi ḇeraker Yerusalem srama faro Yesus ma sikofen: 2“Snaro manfamyan ḇesi sḇeyuk rari ro kpu koḇesi? Snaro sḇan siḇrasna ḇa ro fafisu sanan?”
3Ḇape Yesus kyarem faro si: “Snaro mko kako mkakḇeyuk Allah sasoser ḇyena ḇekur kako rari kpu mkoḇesi? 4#Kel. 20:12, 21:17; Im. 20:9; Ul. 5:16 Snar Allah ikofen: Besyowi snami ma kmami; ma oso wer: Mansei ḇefras snari roḇa kmari ikada ismai samamyai marmar. 5Ḇape mko kada mkoḇo: Mansei ḇekofen faro snari ma kmari: Rosai yasma na fa yaḇuk ḇesyowi mu, yaḇukna nfarser kwar faro Allah, 6snonkaku ani ikada ḇyesyowi snari ma kmari ḇa. Rarirya Allah wos ḇyena mkoḇeuser naba snar rari mankun mkoḇena. 7Ne, snonkaku ḇemarares Kaku ḇeri ro Nabi Yesaya ḇardadi ḇyedi ḇekur mko:
8 #
Yes. 29:13
Er ine som Aya kuker sḇardip monda,
Mḇoi sisnesna kada nbinkwan bur Aya.
9Fromo monda kakyar ma nadi sena faro Aya,
snar farkarkor ssḇuk farkor na sasoser snonkaku monda.”
10Raimnai Yesus dor snonkaku ḇeḇor ansi ma ikofen faro si: 11“Mkomnaf ma mkokara pyum: Roi ḇesun ro sḇadon naiso ḇeḇemamas snonkaku sya ḇa, mḇoi roi ḇesasyar ro sḇadon naiso ḇeḇemamas snonkaku.”
12Ma manfamyan ḇyesi sra ma sifuken faro i: “Wafawi kwarke wos wakofen na nekarui ḇekarkar faro Farisi ansi?” 13Yesus kyarem faro si: “Rokaker Kma yedi ro boiyas kyerḇa na, nari neḇepas kuker rares ḇyena kam. 14#Luk. 6:39 Mkomam monda si. Si snonkaku ḇepraf ḇekfin ḇepraf sya. Rofyor snon ḇepraf oso ikfin min ḇepraf oso, nari susapi ro der.”
15Raimnai Petrus ikofen faro Yesus: “Wakofen ḇayir sarḇer ine faro nko.”
16Yesus kyarem: “Mko kako mkakfawi ḇayim sarḇer ani? 17Mkofawiḇake roi ḇeḇor ḇesun ro sḇadon nsun pdef ḇesnewar raimnai sisawen na ro akyek? 18#Mat. 12:34 Ḇape rosai ḇesasyar ro sḇadon neknam ro sne ma naiso ḇefrur mamas snonkaku. 19Snar ro sne iso ḇekara swaruser ḇeḇyeḇa, mamun, farḇakbuk rmomen, karaw, soar ankar ma anonef. 20Naiso ḇefrur mamas snonkaku. Ḇape kanan kuker ḇramin ḇeḇan ḇa, ikada ḇyemamas snonkaku ḇa.”
Kakyar bin Kanaan oso
15:21-28
(Mrk. 7:24-30)
21Raimnai Yesus kyaḇerbur ro dia ḇe sup Tirus ma Sidon. 22Bin Kanaan oso ro sup ani ryama ma dor: “Waswar aya, o Manseren, Romawa Daud, snar inai yedi rur ḇemaḇak ya iswoḇer i isof ḇyenyawa ḇa.”
23Ḇape Yesus kyarem wos oso faro i ḇa. Raimnai manfamyan ḇyesi srama ma sor faro Yesus, ḇo soḇo: “Wawan i fa ibur, snar iyawuser koḇo dor ḇesya kwari.”
24Yesus kyarem: “Yasma wawan monda faro domba-domba ḇeḇor ro fandu er Israel.”
25Ḇape bin ani fyanam Yesus ma ḇyansuba faro i ma ikofen: “Manseren wafnoḇek aya.”
26Ḇape Yesus kyarem: “Kopok kun roḇean ḇefasos faro romawa sya ma neḇesawen faro make sya ḇa.”
27Bin ani ikofen, ḇo doḇo: “Kaku ḇaboi Manseren, ḇape makei ya dakan kako roḇean mom-mom ḇesapi ro meja tuan ḇyedi.”
28Inja Yesus kyarem ma ikofen faro i: “Ne, awino, kakyar bedi iba, rarirya roi wor ani wasmai raris moḇ wamarisen rai.” Ma ro fafisu ani beri inai ḇyedi iprei.
Yesus ḇyuk pararei faro kawasa ḇeduf sibor
15:29-31
29Fafisu sskobur supya fyor ani kwar, Yesus imbran sye danosen Galilea ma dek ro urek oso ma kyain ro dia. 30Fyoroḇa kawasa sibor semarani ḇo srama ḇe I ma ssun snonkaku ḇepapipen, manis, ḇepraf, awer ma ḇese sibor wer, ma srir si ro ḇarpon Yesus ma ḇyuk pararei faro sikam. 31Rarirya kawasa ḇeḇor ansi sikandor snar smam awer sya sawawos, manis sya siprei, ḇepapipen sya simbran, ḇepraf sya smam, ma rarirya si sandik Allah Israel.
Yesus fyan kawasa syaran rifiak
15:32-39
(Mrk. 8:1-10)
32Raimnai Yesus dor manfamyan ḇyesi ma ikofen: “Sneri iswar kuf kawasa ḇeḇor ansine. Ras rikior kwar siso aya ma nanano kyur siḇa. Yamewer yawan si fa sibur kuker basbiser, nari simsoi ro nyan ya bori.”
33Manfamyan ḇyesi sikofen faro i, ḇo soḇo: “Rariso moḇ ḇeḇeursḇa ine kosma roḇeyan fa koḇukfan snonkaku ḇeḇor ansine?”
34Yesus ikofen faro si: “Mkosma roḇeyan ri ḇeso?” Skarem, ḇo soḇo: “Mamami rifik ma in kasun ono sisya kako.”
35Raimnai Yesus iwan kawasa ḇeḇor ansi fa skain ro saprop ya bori. 36Raimnai dun mamami rifik anna kuker in ansi, ikofen kasumasa, raimnai pyanasnis na ma ḇyuk na faro manfamyan ḇyesi, fa manfamyan ḇyesi sakḇuk na faro snonkaku ḇeḇor ansi. 37Ma sikam sanan isof sarḇor. Ḇarpur ya siryur mamami ker-ker ḇedawer na, sismai noken rifik nafo. 38Snonkaku ḇeyanan ansi kam sesyaran rifiak, bin ma romawa sya seḇeyakkor ḇa.
39Raimnai Yesus iwan snonkaku ḇeḇor ansi fa sibur. Ikada dek ro wai ma skopaw ḇesup Magadan.
Iliyochaguliwa sasa
MATIUS 15: LAIBHW
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
