MATIUS 14
14
Yohanes Ḇemasi ḇyeḇemun
14:1-12
(Mrk. 6:14-29; Luk. 9:7-9)
1Ro fafisu ani Yesus ḇyesno faro Herodes, koranofiak ro supya mnuk ani, dakmnaf i. 2Rarirya ikofen faro ḇefararur ḇyesi: “Irya Yohanes Ḇemasi; diḇri kwar ro fandu ḇemar sya eḇedari samambraḇ anna nafararur roi.”
3 #
Luk. 3:19-20
Snar Herodes iwan kwar fa sfor Yohanes, ḇo sewanka i ma ssun i ro bui, snar dun ḇedar ḇyedi Filipus swari, Herodias fa fyakawin i. 4#Im. 18:16, 20:21 Snar Yohanes isonk Herodes, ḇo doḇo: “Wapok wun Herodiasḇa, snar rarirya beyuk sasoser agama!” 5Herodes ḇyenamu myun Yohanes ḇape imkak kawasa ḇeḇor ansi, snar skarai nabi rirya.
6Ḇape ro ras munara swarapepen Herodes ḇyeḇeyaben ya, Herodias inai ḇyedi ifyer ro ḇarpon sedi ma ifrur raryaḇ Herodes sneri, 7isof Herodes ḇyeasas kuker syasi nari ḇyuk faroi rosai ryawer imarisen dor ro i.
8Snar inai ani snari fyarkor ninyan i kwar inja ikofen: “Buk faro aya Yohanes Ḇemasi ḇruri ro sayer oso.”
9Inja wairek sneri fyafardun, ḇape snar sna ḇyedi ma dakam ḇyesi, eḇedari ḇyuk sasoser fa ssḇuk Yohanes ḇruri faro i. 10Inja iwan fa speremuk Yohanes ḇruri ro bui, 11raimnai siseri ro sayer oso, ma ssḇuki faro inai ani ma duni faro snari. 12Raimnai Yohanes Ḇemasi manfamyan ḇyesi srama ssun aipyokem ani fa sikrir i. Ḇarpur ya sra faro Yesus fa sikofen ḇadir faro i.
Yesus fyan kawasa syaran ririm
14:13-21
(Mrk. 6:30-44; Luk. 9:10-17; Yoh. 6:1-13)
13Yesus imnaf Yohanes imar kwar imarisen kyaḇer bur moḇ ani ma dek wai oso ḇemoḇ ḇeḇeursḇa. Ḇape kawasa ḇeḇor ansi simnaf inja sisasyar ro mnu sena siso nyan ḇeraḇande fa siyomuser i. 14Fafisu Yesus ryande, myam kawasa ḇeḇor ansi ma iswar si, ḇo ḇyuk pararei faro ḇeduf si.
15Fanam mandira, manfamyan ḇyesi srama faroi ma sikofen, ḇo soḇo: “Moḇ ine ḇyeuserḇa ma fyanam roḇ kwar. Inja wawan kawasa ḇeḇor ansine fa sra insa skoḇes roḇean ro mnu-mnu na.”
16Ḇape Yesus ikofen faro si: “Sipok sibur awer, mkoiso nari ḇefan si.”
17Skarem faro i, ḇo soḇo: “Inkosma monda ro dine mamami ririm ma in risuru.”
18Yesus ikofen: “Mkun na muma maro aya.” 19Raimnai iwan kawasa ḇeḇor ansi fa skain ro aḇris sya. Rofyor dun mamami ririm ma in risuru kwar, iwakwaker ḇe nanki ma ikofen kasumasa ma ḇyeḇokna posa pyanasnis na ma ḇyuk na faro manfamyan ḇyesi, raimnai manfamyan ḇyesi sirwas na faro kawasa ḇeḇor ansi. 20Ma sikam sanan isof sarḇor. Sanan posa kwar siryur mamami ker-ker ḇedawer na ma siserna ro noken samfur seser risuru nafo. 21Kawasa ḇeyanan ansi kam indokada sesyaran ririm, ḇoi bin ma romawasya seḇeyakkor ḇa.
Yesus imbran ro warya bori
14:22-33
(Mrk. 6:45-52; Yoh. 6:16-21)
22Raimnai Yesus ḇyuk sasoser fasau faro manfamyan ḇyesi fa sek ro wai ma spon i ḇe ḇariwarḇar, ro fafisuya kako iwan kawasa ḇeḇor ansi fa sibur. 23Ma iwan kawasa ansi fa sibur kwar, Yesus dek ro urek ani raryas demir ḇyenadi. Ro fafisu roḇ kwar, derer ro dia. 24Ro fafisu ani manfamyan ḇyesi skaḇor kwar bur sup ya isof ro danosen ya faduri, ma wai ani ikren-ikḇar ro bak na, snar sko sor wam ya.
25Ro fafisu kyamadui meser (indokada oras) kior Yesus ryama faro si imbran ro warya bori. 26Ro fafisu manfamyan ḇyesi smam imbran ro war ya bori, sikandor, simkak ḇo sfararar ma soḇo: “Faknik ri rya!”
27Ḇape Yesus ikofen fasaw faro si: “Mkoknon! Ayai ri, mkomkak awer!”
28Inja Petrus dor faroi: “Manseren, aurya ido, wakofen ḇo yambran ro warya bori mufaḇe au.”
29Yesus ikofen: “Rwamuma!” Inja Petrus dado bur wai ya ma imbran ro war ya bori fa isrow Yesus. 30Ḇape rofyor ḇyabir wam ya ipok, imkak ma iswarḇaḇ imbrur inja dar-dor: “Manseren, wafnoḇek aya!”
31Yesus isawar fa iser i ma ikofen: “Ne, snonkaku ḇekyar mnis ḇa, snaro beḇirḇar?”
32Raimnai suyek ro wai ya ma wam ya kako iḇrin. 33Ma snonkaku ḇero wai ani sḇansuba faroi, soḇo: “Kaku ḇeri Rumkun Allah risoau.”
Yesus ḇyuk pararei faro snonkaku ḇeduf ro Genesaret
14:34-36
(Mrk. 6:53-56)
34Rofyor skofyafer kwar skorande ro Genesaret. 35Rofyor kawasa ro mnu ani smamḇaḇir Yesus, sikofen ḇayir i ro sup ani ḇesiper. Inja ssun ḇeduf sesi kam faro Yesus. 36Sor faro i insa span monda ro syatu pusyom ḇyena. Ma snonkaku ḇepan roi isya siprei kam.
Iliyochaguliwa sasa
MATIUS 14: LAIBHW
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
