MATIUS 13
13
Sarḇer ro snon ḇekekef mor
13:1-23
(Mrk. 4:1-20; Luk. 8:4-15)
1Ro ras ani Yesus isasyar ro rum ani ma rya kyain ro danosen andir ya. 2#Luk. 5:1-3 Kawasa sibor semarani ḇo srama spanjuḇer I, inja dek ro wai oso ma kyon roi, mḇoi kawasa ḇeḇor ansi kam sores ro ḇande. 3Ma dawos roi nabor farosi kuker sarḇer. Doḇo: “Snon ḇekekef mor oso isasyar fa kyekef mor. 4Ro fafisu kyekef ya, mor ono nasapi ro nyan andir, ma mansya srama san na rao naḇro. 5Mor ono nasapi ro moḇ ḇeḇekarui, ḇeḇesaprop mankunba inja nasur fasaw, 6ḇape rofyor ori dek kwar, nmaryoi ma nmas snar nerares ḇa. 7Mor ono wer nasapi ro manuk borek; ma manuk anna naduḇ epenna isof nmas ma namar. 8Ma ono nasapi ro saprop ḇepyum raimnai nasur ma namarem: ono ḇeutin, ono ḇesamfur ri wonem, ono wer ḇesamfur rikior.
9Mansei ḇeḇeknaram ido iḇye kada imnaf!”
10Ma manfamyan ḇyesi srama sifuken faro i, ḇo soḇo: “Snaro wawos faro si kuker sarḇer?”
11Yesus kyarem: “Faro mko kada mkosma fakamaman fa mkofawi kankunes Ḇaḇesasoser ro boiyaswa, ḇape sikada roḇa. 12#Mat. 25:29; Mrk. 4:25; Luk. 8:18, 19:26 Snar mansei ḇena, nari ssḇuk faroi wer isof nya farsbawer; ḇape mansei ḇeyakna ḇa, rosai wer isya faroi nari neḇeyun bur i. 13Eḇedari yawos faro si kuker sarḇer; snar smam ḇape imnis smam ba ma srower ḇape imnis srower ḇa, ma sifawi ḇa. 14#Yes. 6:9-10 Inja Yesaya ḇardadi ḇyedi imnis fa kyur si:
Nari mkomnaf kuker knaram mkoḇesi, ḇesyaḇo mkokara ḇa,
nari mkomam keker mka mkoḇesi, ḇesyaḇo mkofawi ḇa.
15Snar er ine sisnesna napup kwar,
ma siknasna nadiw,
ma simkasna nasef;
insa smam awer kuker simkasna
ma simnaf awer kuker siknasna ma sifawi awer kuker sisnesna,
isof skaḇer ma yaḇuk pararei faro si.
16 #
Luk. 10:23-24
Ḇape aski faro mko snar mka mkoḇesi smam ma knaram mkoḇesi simnaf. 17Snar yakofen faro mko: Kaku ḇeri nabi ma snonkaku ḇenapes sya sibor simarisen sakmam ma sakmnaf, roi mkomam ma mko mnaf nane, ḇape sakmam ma sakmnaf na ḇa.
18Inja mkomnaf naḇye, sarḇer snon ḇekekef mor ani. 19Faro snonkaku oser-oser ḇemnaf wos ḇekur Ḇaḇesasoser Boiyaswa, ḇape sifawi na ḇa, snar ḇeḇarḇor ya ryama ma dun mor ḇekekef anna ro sisnesna; irya mor ḇekekef ro nyan andir. 20Mor ḇekekef ro saprop ḇeḇekaruina irya snonkaku ḇemnaf wos ya ma fasaw ḇeyun na kuker raryaḇ. 21Ḇape nerares ḇa inja nasur fasaw knik monda. Rofyor kanderama ḇaḇewayam ono ndama nkuri snar wos ani, snon ani isapi fasaw kaku. 22Mor ḇesapi ro fandu manuk borek irya snonkaku ḇemnaf wos ani, raimnai araryof ananjar awar kirai ine ma sne ḇero nana nepen epen wos anna isof namarem ba. 23Mor ḇesapi ro saprop ḇepyum irya snonkaku ḇemnaf wos ani ma ḇefawi, rarirya nebon, ono ḇeutin, ono ḇesamfur riwonem, ono wer ḇesamfur rikior.”
Sarḇer ro ampyampumber fandu gandum
13:24-30
24Yesus ḇyuk sarḇer oso ḇese wer faro si, doḇo: “Ḇaḇesasoser Boiyaswa imnis raris snonkaku ḇekekef mor ḇepyum ro yaf ḇyedi. 25Ḇape rofyor kawasa syakam senef, mbroḇ ḇyedi ryama ma dakkekef ampyampumber mor ro fandu gandum ansi, raimnai ibur. 26Ro fafisu gandum ansi sisur ma simarem randak ya, ampyampumber ansi kako saksur. 27Inja tuan ḇena yaf ya manfamyan ḇyesi srama faro i ma sikofen, ḇo soḇo: Tuan, rariso mor ḇepyum siso kwekef ro yaf bedi, ḇesyaḇo ampyampumber sine srama kero? 28Tuan ani kyarem: Mbroḇ koḇediso ḇefrur rarirya. Raimnai manfamyan ansi sikofen faro i: Inja tuan wamarisen ido nkora nkopas ampyampumber ansi? 29Ḇape ikofen: Roḇa, snar imbude mkopas sasar gandum sya rofyor mkopas ampyampumber ansi. 30Inja sisur kam mura isof fafisu afuf ya. Ro fafisu ani nari yakofen faro ḇeyuf ansi: Mkoryur ḇepon ampyampumber ansi ma mkororbos si fa sebosbos ma seḇekun; ḇarpur ya mkoryur gandum sya ma mkosun si ro sayar ayedi.”
Sarḇer ro sasawi mor ma mur
13:31-35
(Mrk. 4:30-34; Luk. 13:18-21)
31Yesus ḇyuk sarḇer oso ḇese wer faro si, doḇo: “Ḇaḇesasoser Boiyaswa imnis raris sasawi mor, sun ma skekef ro yaf sena. 32Kaku mor aniso ḇebaḇa syadi ro mor ḇese sya kam, ḇape rofyor isur kwar, sasawi ani iba syadi rofaran ḇese sya kam, ma isyadi wer ḇyeai knam, isof man ro farsyos sya srama smunnarem ro snaw-snaw ḇyena.”
33Ma fyar-fyar sarḇer ine kako faro si: “Ḇaḇesasoser Boiyaswa imnis raris mur bin oso dun fa ḇyukḇaren terigu amek rikior ma ifrur fa napisen kam.”
34Nakam Yesus ḇyuk na faro kawasa ḇeḇor ansi kuker sarḇer, 35#Mzm. 78:2 insa nabi ya wos ḇyedi imnis isoine:
“Yamarisen yaḇas sḇari fa yawos sarḇer,
Yamarisen yawos ro roi ḇero kankunes ro randak supswan ine ḇyeḇefrur ya.”
Farkarkor ro ampyampumber fandu gandumsya
13:36-43
36Raimnai Yesus ibur kawasa ḇeḇor ansi. Manfamyan ḇyesi srama ma sikofen faro i, ḇo soḇo: “Wakofen fasnai faro nko ro sarḇer ampyampumber ro fandu gandum ansi.”
37Ma kyarem faro si, ḇo doḇo: “Snonkaku ḇekekef mor ḇepyumya ido irya Romawa Snonkaku; 38yaf ya irya supswan. Mor ḇepyum sya irya romawa-romawa Ḇaḇesasoser ma ampyampumber sya irya romawa-romawa ḇeḇarḇor. 39Mbroḇ ḇekekef ampyampumber sya irya Ibiris. Fafisu afuf ya irya ras papupes ma ḇeyuf ansi irya malaikat. 40Ma raris ampyampumber sya siryur si ma sikun si ro for rarirya kako ro ras ḇepupes ya. 41Rumkun snonkaku nari iwan malaikat ḇyesi ma nari siryur roi ḇeḇor ḇeḇeninyan ma snonkaku kam ḇefrur ḇarḇor ro Ḇaḇesasoser ḇyedi. 42Sikam nari sisawen si ro for; rodia nari sisma kankanes ma arkfafais nakor. 43Rofyor ani kawasa ḇenapes sya nari sisnai imnis ori ro Ḇaḇesasoser Kma sedi. Mansei ḇeḇeknaram, iḇye imnaf!”
Sarḇer ro arasai ḇeyokef ma inkin mkamor ḇeḇemaeja
13:44-46
44“Ḇaḇesasoser Boiyaswa imnis papus beyokef ro yaf ya, ma snonkaku oso isma na, raimnai iyokef na wer. Snar raryaḇ ḇyedi rya ḇyoḇ pres papus ḇyena fa ḇyukkoḇes yaf ani.
45Rarirya kako kuker Ḇaḇesasoser Boiyaswa imnis snon ḇesewar inkin mkamor ḇepyum. 46Rofyor isrow kwar inkin mkamor ḇeḇemaeja kaku, rya ma ḇyoḇ pres papus ḇyena fa ḇyukkoḇes inkin mkamor ani.”
Sarḇer ro pam paspos
13:47-52
47“Rarirya kako Ḇaḇesasoser Boiyaswa imnis pam paspos ḇenap ro soren, ma in syoso-syoso sḇar ro pam ani. 48Pam ani ifo kwar spawi ḇebonde ma skimfir in ḇepyum sya ma siser si ro aiḇar ḇoi in ḇepyumba sya sisawen si. 49Rarirya kako ro fafisu ras ḇepupes ya: Malaikat-malaikat sya nari srama fa sirarwas snonkaku ḇeḇarḇor sya bur snonkaku ḇenapes sya, 50raimnai sisawen snonkaku ḇeḇarḇor sya ro for ḇembrerḇa; ro diwa nari skanes ma sark fafais nakor.
51Mkofawi roi ḇeḇor nanekam kwarke?” Skarem: “Mḇoi, nkofawi kwar.”
52Raimnai Yesus ikofen faro si: “Inja ḇefawi nananem Refo Yahudisya oser-oser isma farkarkor ḇekur Ḇaḇesasoser Boiyaswa imnis tuan oso ḇesasyar papus ḇebabo ma ḇekwar nakam ro kron ḇyedi.”
Simewer Yesus ro Nazaret
13:53-58
(Mrk. 6:1-6; Luk. 4:16-30)
53Yesus fyar-fyar sarḇer anna posa kwar, ibur moḇ ani. 54Ryama kwar ro mnu ḇyedi, fyarkor kawasa ro dia ro rum nadi sedi. Sikandor kam ma sikofen: “Ro moḇ rosai isma fawawi ma samambraḇ ḇyuki ifrur aḇyair kanandor nane? 55Ko kam kofawi irya rumawa ro snon ḇefawi nananem ḇefrur rum? Kofawi kako snari snori Maria ma naek ḇyesiso: Yakobus, Yusuf, Simon ma Yudas? 56Ma srar ḇyesi kako sisya skainfadu ko? Inja moḇ rosaiso isma roi ḇeḇor nanefa ro ya?” 57#Yoh. 4:44 Ma sikam sfafayaf ḇo siyaw i.
Inja Yesus ikofen faro si: “Nabi oso semafi ro moḇ-moḇ ḇese, mḇoi demir ro mnu mankundi ḇyedi ma rum ḇyedi kada sefandun i ḇa.” 58Ma snar kakyarḇa sena, Yesus dakfrur aḇyair kanandor nabor ro dia ḇa.
Iliyochaguliwa sasa
MATIUS 13: LAIBHW
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
