MATIUS 5
5
Yesus atakam fami oup aememtame atakam
1,2Yesus era owe tanane aporen. Ararawa, fami oup aapetemeten. Are andaepakiapen. Me abajamkai oweam Armat Ipitpu ambaremesen. Armat Ipit arawa era owe emes atakam aememtamen.
Asan akotnak aemapmas owe atakam
(Luk. 6:20-23)
3“Me Tuhan era Musa Basakamtam Atakam ji baemee asan apok owe, me, Allah jiirey taka aeemas, asan akot aemaptemas. 4Allah jak pota aemapmas owe, jak akot atetamtem. Era owe asan akotnak aemapmas. 5Allah era amba baemetemtem apok owe, aataaji atakam takes atoomemtemas. Era owe asan akotnak aemapmas. 6Allah, era aakot apormar pak jipu baem jak aseserommas owe, era aobatoomep pak takes atetamtem. Era owe asan akotnak aemapmas. 7Allah owe soro ajiomemas owe, soro ajiomemtem. Era owe asan akotnak aemapmas. 8Me asan pota pak jak apok owe, Allah amsamnak aemtemas. Era owe asan akotnak aemapmas. 9Allah, era owe bakipimtaer owe, ‘Era owe dejii,’ emes atakam aesimtem. Era owe asan akotnak aemapmas. 10Wan owe, Allah akot apormar pak aememas. Owe ere, emes owe apormas apaye, wanam are era owe ajurusummas apaye, Allah akot apormar pak aememas owe, asan akotnak aemapmas. Era owe Allah aobaomep owe erare.
11Owe tare Dera bajamkai owe aportan, wanam are tame atakam tara atetan apaye, are tara ajurusumtan apaye, are ‘Tare pota pak aemmakam,’ emes pote atakam akoretas apaye, asan akotnak aemaptemakam. 12Me Allah Surga oup tara atetamtan pak ere, akotnak. Erarawa jak akotnak aemapay. Bonak ere, owe Allah atakam bakoretam oweam emes taka ajurusumesen. Tare ere, asep owe.”
Garam anama sare atakam
(Mrk. 9:50; Luk. 14:34-35)
13“Tare, asamot owe agaram tamen are. Me garam jame apok aemamesto apaye, owe era garam jame baemedanaem asan apok. Era garam, era pota. Owe era garam akoromosomemas. Are era garam bai ajipipirjaremas.
14Tanom asamot owe takes asare aememmakam. Owe, kota, fami oup aeapomtas, are era kota baemetukumtii asan apok. 15Owe pelita asaramapomtas, are era pelita ember bomon baemepurimapom asan apok. Are era pelita, pelita asan ataapomemas. Era asan, pelita era tame bomon owe takes sare aemtiim. 16Emesamare, tanom pelita tamen, owe bipu sare aememay. Owerawa, era aemmakam akot pak aportemas. Wanam, tere era Surga oup Taritipit aeomtemas.”
Musa aeapome Basakamtam Atakam
17“Tare ere, ‘Yesus, Musa aeapome Basakamtam Atakamam, Allah atakam bakoretam owe aeapomes atakamam, bajanimosom andae,’ emes bimak binip bas. Dere era atakam bajanimosom bandae apok. Dere ere, era atakam jipu baemkorom andaeo. 18Atakamnak, wonamo oupam, ara tapirmiam, bajanios apok aemmas ere, owe era Basakamtam Atakam kopenak huruf apaye, era Basakamtam Atakam titik takakope apaye, baemejanimosom asan apok. Owe era atakam jipu takes bonak aemtemas. Era wonamo oupam, ara tapirmiam, asep ajaniostemas. 19Emesare, owe era kopenak Basakamtam Atakam aootasam, are wan owe kopenak basakamtam atakam baoo aememtamtasam, are Allah aobaomep owe, juas apok aememtemas. Me, owe era basakamtam atakam ji aetasam, are owe basakamtam atakam ji bae aememtamtasam, are Allah aobaomep owe, juas aptamnak owe aememtemas. 20Me Musa Basakamtam Atakam baememtam oweam, Parisi oweam, turu apok. Tanom emes turu apok aememtakam apaye, tare Allah baomep owe baemeemem asan apoknak.”
Tareen atakam
(Luk. 12:57-59)
21“Owe atakam era bonaknak owe akores, ‘Owe tatiitakam. Era owe bata owe, pota pak atakam basakamtii ipit bipu aememtemas.’ Emes atakam aesimesen. Tanom emes atakam jane emejiekem. 22Tare ere, baporay! Owe bifane ajoo owe afeomemtas, are era pota pak atakam basakamtii ipit bipu aememtemas. Owe tame atakam ajoo owe atetas, are era pota pak atakam basakamtii owe daytu bipu aememtemas. Owe atakam ajoo owe akoromtas, ‘Wore Bii! Wore wo! Wore pi!’ emes tame atetas, are neraka jisimak bomon ajiiaptemas. 23Tare pak Allah batetam aememtakam, wanam era pak jis bajaatam joopu aememtakam, erarawa, tare, ‘Dejoo ipit jak ambap derare,’ emes bimak binip aemomemtakam, tare Allah atetamtakam pak, era pak jis bajaatam joopu bambi ataetiiay. 24Tararawa, tajoo ipitpu ato takamesosay. Tanom era ipit ato takamkipimtaeray. Era aefasitakam arawa, pak Allah atetamay.
25Owe, ‘Wore emes pota pak emem,’ emes atakam aesimtetertan, tare era pota pak atakam basakamtii ipitpu bamerem apok ere, tanom era owe ainam akipimtaeray. Era owe tare era pota pak atakam basakamtii ipit baotasimemomtam-ombar. Era owe tare pota pak atakam basakamtii ipit aotasimemomtamtan, era ipit tare polisi aotasimemomtamteman. Me polisirawa, tare buji tame bomon ataejiimteman. 26Atakamnak, tare era buji tame bomon aemapaartemakam— era pak jak pota aemtiikoromtakam bare ajiire.”
Pere bambe atakam
27“Owe atakam akores, ‘Pere betakam,’ emes atakam aesimes. Tanom emes atakam jane emejiekem. 28Tare ere, baporay! Jipit, taot banep ajieporto, wanam are era taot pere bambe jak asenomemto, era ipit ajak bomon pere ambem. 29Me tabo poman banamek, tare dosa aomtan, era banamek bawarasomtaeray. Me tabanamek danais aemamesto ere, tare asan akotnak. Me, Allah tadamo anakot aptam neraka bomon akoromosomtan ere, tare asan potanak aemaptemakam. 30Wanam, tabo ban tare dosa aomtan, era ban basakamosomay. Me taban danais aemamesto ere, tare asan akotnak. Me, tadamo anakot aptam neraka ajiiaptakam ere, tare asan potanak aemaptemakam.”
Tapes batuumjisim atakam
(Mat. 19:9; Mrk. 10:11-12; Luk. 16:18)
31“Owe atakam akores, ‘Jipit aremo atuumjisimto, are era taot batuumjisim buku batetamto,’ emes atakam aesimesen. 32Tare ere, baporay! Aremo, owe tamane banda apok aemto, me, armo ipit aremo atuumjisimto, are era taot owe tamane banda taot aemapomtem. Wan ipitam era taot ataetto, era ipit pere bambe ipit aememtem.”
Ataaji baee atakam
33“Wanam, owe atakam era bonaknak owe aememtames. ‘Tare ataaji fiaknak Tuhan aesimtetertakam, “Dere era ataaji aeemin atakam jipu aemtemin. Pote apoknak. Allah banamek taiapar,” emes ataaji aesimtetertakam ere, era ataaji aeetakam atakam bajanimosom bas.’ Emes atakam aesimes. 34Dere ere, atakam tara akorommin. Tanom, ‘Dere era ataaji aeemin atakam jipu aemtemin. Pote apoknak. Allah banamek taiapa,’ emes bajie bas. Tanom, ‘Pote apoknak. Era Surga oup tapirmi aemansa,’ emes bajie bas. Emesare, era Surga oup tapirmi Allah afe baemap asan. 35Tanom, ‘Pote apoknak. Ara tapirmi aemansa,’ emes bajie bas. Emesare, ara tapirmi, Allah abaiko asan. Tanom, ‘Pote apoknak. Kota Yerusalem aemansa,’ emes bajie bas. Emesare, Yerusalem raja daytu akota. 36Tanom, ‘Pote apoknak. Dekuus aapetar,’ emes bajie bas. Tanom takuus fini fasar takakopeam, fini sesak baemejaorom asan apok. Tanom takuus fini sesak takakopeam, fini fasar baemejaorom asan apok. 37Tare ataaji aeetakam, tare, ‘Ijee,’ emes taka ajiay. Tanom, ‘Apok,’ emes taka ajiay. Tare wan atakam aokaimtakam ere, era Bii Kapar Ipit emes bimak binip tara atetamteman.”
Biti bajie bas ataane atakam
(Luk. 6:29-30)
38“Owe atakam akores, ‘Owe, wan owe abanamek danais aemapomtas, owe era owe abanamekam danais baemapomtas. Owe, wan owe asisi ajimtiitas, owe era owe asisiam bajimtiitas.’ Emes atakam aesimes. 39Tare ere, baporay! Owe jokoman tara aemomemtan apaye, biti bajie bas. Owe tabo ake apakamtan apaye, era poman akeam bowajietamay. 40Owe tabaju kaus bataet aemtas apaye, ere are tare pota pak atakam basakamtii ipit bipu atoomtintan apaye, tabaju kemejaam era owe atetamay. 41Owe, tare aapak kilometer taka bandatomastam ajitintan apaye, aapak kilometer jamnuk andatomastamay. 42Owe pak atakam tara ajanimtan apaye, era pak era owe atetamay. Owe tapak bataer aememtas apaye, tanom atii bata bas.”
Tajokoman owe bafaim atakam
(Luk. 6:27-28, 32-36)
43“Owe atakam akoremas, ‘Tajoo owe afaimay. Tajokoman oweam bifane afeomay.’ Emes atakam aesimemas. Tanom emes atakam jane ajiekem. 44Tare ere, baporay! Me tajokoman owe afaimay. Tanom Allah, asan akot, tara ajurusumman owe boem, atakam ajanimtamay. 45Emes aemtakam, tare Surga oup Taritipit arereisnak aememtemakam. Armat Ipit ajopaka, era jokoman owepuam, era akot owepuam, awar ataendaemtamum. Are te, era akot pak baem owepuam, era pota pak baem owepuam awar ataendaemtamum. 46Tare tara afaimman owe taka afaimmakam apaye, asan akot wama emapmakam? Era pemerintah uang bajanimapom oweam emes aememas. 47Tanom selamat atakam tajoo owe taka akoremakam apaye, wama akotnak pak emmakam? Me Allah amsam apok oweam emes aememas. 48Emesare, tanom turunak owe aememay— Surga oup Taritipit turunak aememe tamena.”
Iliyochaguliwa sasa
MATIUS 5: LAIASC
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
