Israelfɔ Ɩlʋ 22
22
Nana Bulu Bʋ Iwiegyi
Dawid kanfʋ-ɩlʋ ha ɩlʋ osunapʋ. Bɔ́pʋ bakɛ nani ɔmɛ wa mʋ́.
1Mɩ Bulu, mɩ Bulu, ntogyi sʋ fakpa mɩ ɔma?
Nasu kpoli fʋ nwɛsʋ,
tamɛ mɩ Ɔhɔpʋ Bulu, fawa ɩfɔ mɩ wa.
2Mɩ Bulu, ntokpoli fʋ ɔyɩkɛhɛ,
fʋtamanu mɩ isu.
Ntamasi fʋ kpoli onye,
tamɛ ɩwɩ molwii mɩ.
3Tamɛ fʋ mʋ́ fʋna ɔtsan.
Israelfɔ kanfʋ gyi fʋ obia.
4Fʋsʋ anɩ anain bɔpʋ ansɩ dɩnka.
Bɛdɩnka ansɩ fʋsʋ,
fɛlɛ amʋ́ tsu ɩkplantɔ.
5Fʋ bosu kpoli, fɛlɛ amʋ́.
Fʋsʋ bɔpʋ ansɩ dɩnka,
pɛlɩ mɛkɩta amʋ́.
6Tamɛ mɩ mʋ́ a, nyambi ngyi.
Mmegyi nyankpʋsa.
Ɩwɩ nyankɩla ngyi ha anyankpʋsa.
Ɔhaa tamafia mɩ.
7Ɔhagyiɔha owun mɩ
ɔtɔbwɛ mɩ ɔblɔla.
Bʋtenyankpa ansɩtɔ,
kpʋkpʋ nwuntɔ, blɩ bɛɛ,
8“Mʋ ansɩ dɩn Nana Bulusʋ, ɔhɔ mʋ.
Mʋ ansɩ tegyi mʋ ɩwɩ.
Mʋ́ sʋ ɔlɛ mʋ!”
9Fʋlɛlɛ mɩ tsu mɩ yin opunitɔ.
Fɛha nɔpʋ ansɩ dɩnka fʋsʋ brɛá ndenyɔpʋ.
10Besi mɩ dɩnka fʋsʋ tsu brɛá bɔkwɩɩ mɩ.
Tsu mɩ yin iputɔ ɔpá fʋgyi mɩ Bulu.
11Máwa ɩfɔ mɩ ɩwɩ, tsufɛ ɩkplan latʋ mɩ ta.
Ɔhɔpʋ má mɩ ɩnʋ.
12Mɩ alupʋ bakafia mɩ, fɛ nnantswie yinhɛ tsɔtsɔɔtsɔ.
Basan ɔmátɔ nnantswieá bʋbʋ ifu babomli mɩ.
13Mɩ alupʋ anfɩ bayaa ɔnɔ gblaun wa mɩ.
Fɛ gyata ɔtrapʋ dekpoun, ɔdɛ ɔbwɩá alakɩta tɩtɩ.
14Mɩ ntsantsin yɔyɔɔyɔ, fɛ ntsu batsɛɩ wʋlɩ.
Mɩ ɩklʋn labwɛ fɛ okpin, ɩlaŋlaɩn wa mɩ ɩwɩtɔ.
15Ɔwʋnlɩn lata mɩtɔ fɛ planfɔ.
Mɩ ɔdandʋ laklɩ mɩ ɔnɔtɔ.
Faha nda lowu ɔbɔnɔ.
16Akɩaɩ bakafia mɩ.
Aha lalahɛ bada ɔbʋn wa mɩ.
Amʋ́ ayín lafuti mɩ ɩbɩ pʋ́ mɩ ayabi fɛ gyata.
17Nɛ́talɩ kla mɩ awú fɛ́ɛ́.
Mɩ alupʋ bówun mɩ, lɛ ansɩ yi mɩsʋ.
18Beye mɩ atadɩɛ ha aba,
bɔtswɩ abi mɩ atadɩɛ tɩntɩnsʋ.
19Oo Nana Bulu, máwa ɩfɔ mɩ ɩwɩ,
mɩ ɔwʋnlɩn ɔwapʋ, wa ɔsa bɔhɔ mɩ.
20Hɔ mɩ lɛ ɔdayi ɔnɔ.
Hɔ mɩ ɔkla ɔkʋkʋnʋ ɔkʋlɛ lɛ akɩaɩ anfɩ ɩbɩ.
21Lɛ mɩ tsu agyata anfɩ ɔnɔ.
Tsú akpokpo anfɩ bʋbʋ ɩyɩn anfɩ nsiebi ɔnɔ.
22Nɛ́kla fʋ bwɛhɛ suna mɩ apio.
Nɛ́kanfʋ fʋ anɩ ɔpasuatɔ.
23Nana Bulu ifu anyapʋ fɛ́ɛ́, mlɩkanfʋ mʋ.
Yakob abi-aná, mlɩwa mʋ numnyam.
Israel abi-aná, mlɩbu mʋ.
24Tsufɛ ɔtamakɩ ohiani mʋ ipian owunkɛ, ki nwun.
Ɔtamadamli ɔma ha mʋ.
Osu kpoli mʋ a, ɔtɔsɔ mʋ ɔnɔ.
25Fʋtɛha ntɛkanfʋ fʋ aha tsɔtsɔɔtsɔ ansɩtɔ anɩ ɔpasuatɔ.
Nɛ́ka fʋ ɩkɔá notsula fʋ ifu anyapʋ ansɩtɔ.
26Aha ánɩ́ bʋma tɔtɔ bégyi mwɛ.
Fʋ adunkapʋ bɛ́kanfʋ fʋ.
Ɩwa alɛ ha amʋ́ brɛ fɛ́ɛ́!
27Nana Bulu, ɔyɩtɔ aha fɛ́ɛ́ bɛ́kaɩn fʋsʋ, damli kɩ fʋ.
Abusuangyiabusuan bósum fʋ.
28Tsufɛ Nana Bulu bʋ iwiegyi.
Mʋdɛ ɔmá fɛ́ɛ́sʋ gyi.
29Ɔyɩtɔ ɩwɩ atsupʋ fɛ́ɛ́ bɛ́ba ɩwɩasɩ sum mʋ.
Aha ánɩ́ bowun ánɩ́ bʋmɛ́ɛtalɩ hɔ amʋ́ ɩwɩ nkpa fɛ́ɛ́,
pʋ́ aha ánɩ́ bóbowu bóbun sum mʋ.
30Abi-aná fɛ́ɛ́ bósum mʋ.
Bɛ́blɩ mʋ ɩwɩ asʋn suna amʋ́ aná.
31Bɛ́da mʋ yilebwɛ ɔkan suna aha ánɩ́ bɛ́bɛlɩn ánɩ́ mʋlabwɛ.
Iliyochaguliwa sasa
Israelfɔ Ɩlʋ 22: nko
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation