Luka 10
10
Akasɩpʋ Aduesienɔ-nyɔ Sumbi Wa
(Mateo 10:7-16)
1Ɩnɩ ɔma a, Yesu lɛlɛ mʋ akasɩpʋ aduesienɔ-nyɔ (72)#10:1 Aduesienɔ-nyɔ (72): Aduesienɔ (70) bʋ nwʋlʋ amʋ akʋtɔ. akʋ ɛ, ɔlɔwa amʋ́ abanyɔ-abanyɔ ɔbɛɛ bʋgyankpa yɔ wulugyiwuluá mʋ onuto mɔyɔ mʋ́sʋ. 2Ɔlɛbla amʋ́ ɔbɛɛ, “Atɔ kpɔtɩhɛ amʋ ɩtsɔ, tamɛ mʋ́ akpɔtɩpʋ bʋmɔtsɔ. Mʋ́ sʋ mlɩkokoli ndɔ mʋ wie, ɔwa akpɔtɩpʋ tsɔtsɔ abʋba bɔkpɔtɩ mʋ atɔ amʋ. 3Mlɩnatɩ, mlɩbɩá ndɛ mlɩ wa fɛ akufabi ɔyɔ adundutɔ. 4Mlɩmátsu sika kɛntɛ, akpankogyo ntɛ ntʋkʋta kɩta. Nɩ mlɩna ɔkpatɔ a, mlɩmálɩɩ tʋntʋn aha. 5Nɩ mlowie-woyigyiwoyitɔ a, mlɩgyankpa bla amʋ́ mlɩaa, ‘Bulu ɔhaa mlɩ iwilwii.> 6Nɩ woyi mʋ wie amʋ tekle iwilwii a, mlɩ iwilwii bésin woyi amʋsʋ. Tamɛ nɩ ɔtamakle iwilwii a, ɩbɛ́sanki ba mlɩ wa. 7Mlɩtsia woyi amʋʋ bɔhɔ mlɩ mʋ́tɔ amʋtɔ. Mlɩgyi atɔ, amlɩnun togyitɔá bɛ́ha mlɩ, tsufɛ agyʋma ɔyɔpʋ bʋtɛka ɩkɔ. Mlɩmátu layetsia woyi bambatɔ. 8Nɩ mlowie wulu kʋsʋ, bɔhɔ mlɩ a, mlɩgyi tɔá bɛ́ha mlɩ. 9Mlɩtsa alɔpʋá bʋbʋ wulu amʋtɔ, amlɩbla wulu amʋtɔ aha mlɩaa, ‘Bulu iwiegyi lawie woyi ta.> 10Tamɛ nɩ mlowie wulu kʋsʋ, bʋmɔhɔ mlɩ a, mlɩdalɩ yɛlɩɩ brɔnʋsʋ; amlɩblɩ mlɩaa, 11‘Anɩdɛ mlɩ wulutɔ otutu amʋʋ ɩlawʋlɩ anɩ ayabiasɩ amʋ kʋraa kpakpa wʋlɩ. Tamɛ mlɩbɩá Bulu iwiegyi amʋ lawie woyi ta.> 12Ndɛ mlɩ bla mbɛɛ, Bulu ɔbɛ́bɩtɩ wulu amʋtɔ aha ɩsʋ dʋn Sodomfɔ mʋ asʋn ogyikɛ amʋ.
Aha Ánɩ́ Bʋmɛdamli Klʋntɔ Asʋngyi
(Mateo 11:20-24)
13“Korasinfɔ, mlɩgyɔwɩ. Betsaidafɔ, mlɩgyɔwɩ nɩ. Nɩ Tiro pʋ́ Sidon awulu lalahɛ amʋtɔ nɔbwɛ ofula akpɔnkpɔntɩ anfɩ nɔbwɛ mlɩtɔ anfɩ a, tɛkɩ bʋda akpekpetɔ, bakpa nsuo wa nwuntɔ pʋsuna ánɩ́ badamli klʋntɔ. 14Tamɛ mlɩbɩá Bulu ɔbɛ́bɩtɩ mlɩ ɩsʋ mʋ asʋn ogyikɛ dʋn Tiro mʋa Sidonfɔ. 15Mlɩ Kapernaumfɔ, mlɩdekle mlɩaa mlótsu ɩwɩ fʋa alɩɩ yɔwɔ ɔsʋsʋ? Ɛkɛkɛɛkɛ! Bulu ɔbɛ́ba mlɩ asɩ yowie afulitɔ.”
16Yesu lɛbla mʋ akasɩpʋ amʋ ɔbɛɛ, “Ɔha ánɩ́ ɔhɔ mlɩ asʋn lahɔ mɩ. Ɔha ánɩ́ olekina mlɩ asʋn hɔ lakina mɩ asʋn hɔ. Ɔha ánɩ́ olekina mɩ asʋn hɔ ɛ lakina mɩ Sɩ amʋʋ ɔlɔwa mɩ amʋ asʋn hɔ.”
Akasɩpʋ Aduesienɔ-nyɔ Amʋ Yinki Ba
17Akasɩpʋ aduesienɔ-nyɔ amʋ beyinki ba ansigyisʋ. Bɛbla Yesu bɛɛ, “Anɩ Wie, nɩ akplʋn wa ɔŋɛ lalahɛ kʋraa fʋ ɩdatɔ a, bʋtobu anɩ.”
18Yesu lɛbla amʋ́ ɔbɛɛ, “Nowun ánɩ́ Satan lɛkpa tsu ɔsʋsʋ fɛ alɩá nsaɩntɔ tɔfwɩ ɩbɩ bɛda ɔsʋlʋtɔ pɔ. 19Mlɩnu! Naha mlɩ tumiá mlɩtsatsa awɔ pʋ́ nyankpʋkpiesʋ tsʋn, amlɩgyi Ɔbʋnsam tumi fɛ́ɛ́sʋ. Tɔtɔɔtɔ mɔ́ɔbwɛ mlɩ. 20Tamɛ ansɩ magyi mlɩ ánɩ́ ɔŋɛ lalahɛ labu mlɩ. Mboun ansɩ igyi mlɩ ánɩ́ Bulu lawanlɩn mlɩ ada tswɩ ɔsʋsʋ.”
Ansɩ Legyi Yesu
(Mateo 11:25-27; 13:16-17)
21Alɩ brɛ amʋtɔ a, Ɔŋɛ Wankɩhɛ lɛha ansɩ lɛhɩɛ gyi Yesu. Mʋʋ ɔlɛblɩ ɔbɛɛ, “Mɩ Sɩ, ɔsʋ mʋ́a asɩ Owie! Nɛda fʋ ɩpan ánɩ́ falɛ tɔá fɔpʋŋain anyansapʋ pʋ́ asʋn abɩpʋ ɔwan suna aha ánɩ́ bʋmeyin ɔlala, bʋgyi fɛ nyebi. Ee, mɩ Sɩ! Alɩ fʋdekle fɛɛ ɩba mʋ́tɔ nɩ.”
22Mʋʋ ɔlɛbla mʋ akasɩpʋ amʋ ɔbɛɛ, “Mɩ Sɩ lapʋ togyitɔ wa mɩ ɩbɩtɔ. Ɔhaa meyin ɔha ánɩ́ Obi amʋ gyi, nkɛtɩ Ɔsɩ amʋ nkʋlɛ. Ɔhaa meyin Ɔsɩ amʋ ɛ, nkɛtɩ Obi amʋ, pʋ́ ɔha ánɩ́ Obi amʋ latsula ánɩ́ ɔbɛ́lɛ mʋ suna mʋ.”
23Brɛá ɔhaa má amʋ́ wa a, ɔlɛdamli kɩ amʋ́, bla amʋ́ ɔbɛɛ, “Mlɩ mʋ́ a, Bulu layula mlɩ, mlɩdɛ atɔ anfɩ wun. 24Ndɛ mlɩ bla mbɛɛ, Bulu ɔnɔsʋ atɔɩpʋ pʋ́ awie tsɔtsɔɔtsɔ bekleá bówun atɔ anfɩ, abʋnu asʋn anfɩ mlɩdenu, tamɛ bʋmenya mʋ́ alɩ.”
Samariayin Awɩtɔlɛpʋ Ɔkʋ
25Mose mbla osunapʋ ɔkʋ lɔkʋsʋ lɩɩ fɩtɛ Yesu asʋn anfɩ pʋsɔ mʋ kɩ. Ɔlɛfɩtɛ mʋ ɔbɛɛ, “Osunapʋ, ntɔ mbwɛ asa anya nkpa ánɩ́ ɩtamata?”
26Yesu lɛbla mʋ ɔbɛɛ, “Nkalɩ Mose Mbla lɛblɩ? Nkalɩ fonu mʋ́ asɩ?”
27Oyin amʋ lɛbla mʋ ɔbɛɛ, “Pʋ fʋ klʋn, fʋ ɔkla, fʋ ɔwʋnlɩn pʋ́ fʋ agywɩɩn fɛ́ɛ́ dwɛ fʋ Wie Bulu, afʋdwɛ fʋ ba fɛ fʋ ɩwɩ.”
28Yesu lɛbla mʋ ɔbɛɛ, “Mʋ́ fablɩ a. Bwɛ mʋ́, fénya nkpa ánɩ́ ɩtamata.”
29Tamɛ oyin amʋ lekleá obósuna ánɩ́ mʋ asʋn da ɔkpa. Mʋ́ sʋ ɔlɛfɩtɛ Yesu ɔbɛɛ, “Ma gyi mɩ ba?”
30Yesu lɛbla mʋ ɔbɛɛ, “Brɛ kʋsʋ oyin ɔkʋ lɛkplɩ tsu Yerusalem ɔyɔ Yeriko. Brɛá ɔna ɔkpatɔ a, oleyefia ogyo atswapʋ akʋ. Aha anfɩ bɛkpa mʋ tati, swɩɩ mʋ atɔ fɛ́ɛ́, da mʋ sian mʋ mɔ, natɩ si mʋ tswɩ. 31Bulu igyi ɔhapʋ ɔkʋ na ɔkpa amʋ kɛnsʋ. Brɛá olowun mʋ sɩsɩ a, ɔlɛbaɩ tsʋn ɩfʋntɔ natɩ si mʋ. 32Alɩ kɛn Lewiyin ɔkʋ ɛ lɔbɔtʋ mʋ, baɩ tsʋn ɩfʋntɔ natɩ nɩ. 33Tamɛ Samariayin ɔkʋá ɔna ɔkpa amʋsʋ mʋ́ lɛba bowotii mʋsʋ. Brɛá olowun mʋ a, ɔlɔwa mʋ nwɛ. 34Ɔlɛnatɩ yɔtʋ mʋ, ɔlɛtsɛɩ nta kpekple wʋlɩ mʋ nlɔsʋ, yi ofobi wa mʋ́, klɩ mʋ́, tsu mʋ dɩnka mʋ afrimusʋ, pʋ mʋ ya afɔɔ ɔswɩɩkpa yɛkɩ mʋsʋ. 35Mʋ́ ɔyɩkɛhɛ a, Samariayin amʋ lɛlɛ sika fututu anyɔ ha afɔɔ ɔswɩɩkpa ɩnʋsʋ ɔkɩpʋ ɔbɛɛ, ‘Kɩ mʋsʋ ha mɩ. Nɩ feyinta tɔkʋ tsɩa a, neyinki nɛ́ka fʋ.> ”
36Yesu lɔmɔ mʋ́ ɔnɔ ɔbɛɛ, “Fʋ atɔkɩhɛtɔ a, aha abasa anfɩtɔ ɔmɔmʋ gyi oyin amʋʋ olefia ogyo atswapʋ amʋ mʋ ba?”
37Mose mbla osunapʋ amʋ lɛbla mʋ ɔbɛɛ, “Oyin amʋʋ olowun mʋ nwɛ amʋ.” Yesu lɛbla mʋ ɔbɛɛ, “Mʋmʋ yɔ afʋyɛbwɛ mʋ́ odu.”
Marta Mʋa Maria Wa Yɔ
38Brɛá Yesu mʋa mʋ akasɩpʋ bʋna ɔkpatɔ bɔyɔ Yerusalem a, bowie wulu kʋsʋ. Ɔtsɩ ɔkʋá bʋtɛtɩ mʋ Marta lɔhɔ mʋ ɔfɔɔ, ɔlɛkpa mʋ ya mʋ woyitɔ. 39Mʋ pio tsɩhɛ gyi Maria. Maria anfɩ lebetsia Yesu ayabiasɩ, ɔdɛ mʋ atosunahɛ nu. 40Marta nkʋlɛ dɛdamli tsʋn mʋ́tɔ, alɩá ɩbɔ́bwɛ ɔbɔ́bwɛ amʋ́ afɔɔtɔ. Ɩlɔdʋn mʋ. Mʋʋ ɔlɛnatɩ yɔ Yesu wa, yɛfɩtɛ mʋ ɔbɛɛ, “Mɩ Wie, fawun ánɩ́ mɩ pio lasi agyʋma amʋ fɛ́ɛ́ tswɩ mɩ nkʋlɛsʋ? Bla mʋ ɔbɛ́tsa mɩ.”
41Yesu lɛbla mʋ ɔbɛɛ, “Oo Marta, Marta! Fʋdɛ fʋ ɩwɩ han ntobi tsɔtsɔɔtsɔ ɩwɩ. 42Toku kʋlɛ pɛ dehian, Maria lalɛ mʋ́a ɩbʋ alɛ dʋn. Ɔhaa mɛ́ɛtalɩ swɩɩ mʋ.”
Iliyochaguliwa sasa
Luka 10: nko
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
