ᒠᓐ 10
10
ᒪᔭᑕᓂᓯᐅ-ᐃᔪᐤ ᑲ ᒥᔪ ᑭᓄᐛᔨᒪᑦ ᐅᒪᔭᑕᓂᓯᒪ
John 10.1-10 (Easter-4 Year A)
1“ᑯᐃᔅᒄ ᒋ ᐎᑎᒪᑎᓇᐛᐤ, ᐊᐛᓐ ᐊ ᐎ ᒋᒧᑎᑦ ᓇᒪ ᐊᓐᑕ ᐊ ᐃᔎᑕᒧᐅᓂᔨᒡ ᒪᔭᑕᓂᓯᐅᒋᐛᐱᔪᐤ ᐅᒋ ᐱᒐᐤ᙮ ᐃᔭᒡ ᐊᓐᑕ ᐅᒋ ᐸᔅᑕᑎᐛᐱᔪᐤ ᐊ ᐎ ᐱᒐᑦ᙮ 2ᐊᑯ ᐊᓐ ᐊᓐᑕ ᐊ ᐃᔎᑕᒧᐅᓂᔨᒡ ᒪᔭᑕᓂᓯᐅᒋᐛᐱᔪᐤ ᑲ ᐅᒋ ᐱᒐᑦ ᐊᐅᑯᓐ ᐅᔭ ᐅᒪᔭᑕᓂᓯᐤ ᐅᑦ ᐃᔨᒧᐛᐛ ᐊᓐᒡ ᒪᔭᑕᓂᓯᒡ᙮ 3ᓴᓂᒪᑯᐤ ᒪᒃ ᐊᓂᔭᔪᐤ ᑲ ᑭᓄᔎᑐᐛᔨᒋ ᐊᓐᑕ ᒪᔭᑕᓂᓯᐅᒋᐛᐱᒡ᙮ ᐊᓂᔭ ᒪᒃ ᒪᔭᑕᓂᓴ ᓂᔅᑐᑎᒥᔪᐛ ᐅᐸᑕᑯᓱᐅᓐ ᐃᔅᐱ ᑎᔭᑈᑕᒋ ᐛᔅ ᐎᔾ ᐊᓂᔭᔪᐛ ᐅᒪᔭᑕᓂᓯᒪ᙮ ᐊᑯ ᒪᒃ ᐱᔭᒋ ᐎᐎᔨᒋ ᐊᑯ ᐊ ᐊᑎ ᓇᓴᐅᑯᑦ᙮ 4ᐊᓂᔭ ᒪᒃ ᐊ ᐊᑎ ᐎᐎᑕᐊᑦ ᐎᔾ ᓂᑲᓄᑕᐤ᙮ ᓇᓴᐅᑯᐤ ᒪᒃ ᐊᓂᔭᔪᐛ ᒪᔭᑕᓂᓴ ᐛᔅ ᓂᔅᑐᑎᒥᔪᐛ ᐅᐸᑕᑯᓱᐅᓐ᙮ 5ᑯᑎᑲ ᐊᐛᔪᐛ ᓇᒪ ᒋᑭ ᐅᒋ ᓇᓴᐛᐅᒡ ᐊᓐᒡ ᒪᔭᑕᓂᓯᒡ᙮ ᒋᑭ ᒋᑎᓯᒪᐅᒡ, ᐛᔅ ᑕᐸ ᓂᔅᑐᑎᒧᐛᐅᒡ ᒪᓐᑕᐛ ᐅᐸᑕᑯᓱᐅᓂᔪᐤ᙮”
6ᒋᓴᔅ ᒋ ᐎᑎᒧᐛᐤ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᒥᒄ ᒪᒃ ᓇᒪ ᐅᒋ ᓂᔅᑐᑕᑯᐤ ᐊᓂᔭ ᑕᓐ ᑲ ᐃᓯ ᐊᔨᒧᑎᒧᐛᑦ᙮
7ᐊᑯ ᒪᒃ ᒋᓴᔅ ᒥᓐ ᒂ ᐃᑕᑦ, “ᑯᐃᔅᒄ ᒋ ᐎᑎᒪᑎᓇᐛᐤ, ᓂᔾ ᐊᐅᒄ ᒋᐱᔎᐤ ᐊᓐᑕ ᐛᒋ ᐱᒐᒡ ᑭᔭ ᐊᓐᑕ ᐛᒋ ᐎᐎᒡ ᐊᓐᒡ ᒪᔭᑕᓂᓯᒡ᙮ 8ᒥᓯᐛ ᑯᑎᑭᒡ ᑲ ᑎᑯᓯᒡ ᐊ ᐎ ᐎᐎᑕᐊᒡ ᐊᓂᔭ ᒪᔭᑕᓂᓴ ᐊᔅᒄ ᐊᑲ ᐅᒋ ᑎᑯᓯᓄᐅᒡ ᒋ ᒋᒧᑐᐅᒡ ᐎᔨᐛᐤ᙮ ᒥᒄ ᒪᒃ ᓇᒪ ᐅᒋ ᓂᑐᑕᑯᐅᒡ ᐎᔨᐛᐤ ᐊᓂᔭᔪᐛ ᒪᔭᑕᓂᓴ᙮ 9ᓂᔾ ᐊᐅᒄ ᒋᐱᔎᐤ᙮ ᐊᓐ ᐊᐛᓐ ᓂᔾ ᐊ ᑕᐅᒡ ᑲ ᐅᒋ ᐱᒐᑦ ᒋᑭ ᐱᒪᒋᐅᐤ᙮ ᑕᑈ ᒋᑭ ᐎᐧᑯᒋᐅᐤ ᐊᓐ ᐊᐛᓐ ᑭᔭ ᑕᑈ ᒋᑭ ᒥᔽᔨᒧᐤ᙮ 10ᑲᒋᒧᑎᑦ ᑎᑯᓯᓄᐤ ᒥᒄ ᒐᒋ ᒋᒧᑎᑦ ᒪᒃ ᒐᒋ ᓂᐸᐃᐛᑦ ᒪᒃ ᒐᒋ ᓂᓱᐅᓇᒋᐃᐛᑦ᙮ ᓂᔾ ᒪᒃ ᐎ ᓂᒋ ᑎᑯᓯᓐ ᒐᒋ ᒥᔨᐛᔭᓐ ᐊᓐ ᐱᒪᑎᓯᐅᓐ ᐊᓐᑕ ᐊᑲ ᓂᑕ ᓄᑕᐱᔨᒡ ᒐᒂᓐ᙮”
John 10.11-18 (Easter-4 Year B)
11“ᓂᔾ ᐊᐅᒄ ᒪᔭᑕᓂᓯᐅ-ᐃᔪᐤ ᑲ ᒥᔪ ᑭᓄᐛᔨᒪᑦ ᐅᒪᔭᑕᓂᓯᒪ᙮ ᐊᓐ ᐊᐛᓐ ᑲ ᒥᔪ ᑭᓄᐛᔨᒪᑦ ᐅᒪᔭᑕᓂᓯᒪ ᒋᑭ ᐱᔅᑎᓂᒻ ᐅᐱᒪᑎᓯᐅᓐ ᐊᓂᔭ ᐅᒪᔭᑕᓂᓯᒪ ᒐᒋ ᐅᒋ ᐱᒪᒋᐅᔨᒋ᙮ 12ᐊᑯ ᐊᓐ ᒥᒄ ᑲ ᐅᑎᓇᑭᓄᐅᑦ ᒐᒋ ᑭᓄᐛᔨᒪᑦ ᐊᓂᔭ ᒪᔭᑕᓂᓴ ᐊᑲ ᒪᒃ ᒋᒋᐛ ᒪᔭᑕᓂᓯᐅ-ᐃᔪᐅᑦ, ᐊᑲ ᑎᐱᔨᐛᐅᓯᑦ ᐊᓂᔭ ᒪᔭᑕᓂᓴ ᒋᑎᓯᒧᐤ ᐃᔅᐱ ᐎᔭᐱᒪᒋ ᒥᐃᐧᑭᓇ ᐊ ᑎᑯᓯᓂᔨᒋ᙮ ᐊᑯ ᐊᓂᔭᔪᐛ ᒥᐃᐧᑭᓇ ᐛᔭᔅᑐᑐᐛᔨᒋ ᐸᐃᒄ ᐊᓂᔭᔪᐛ ᒪᔭᑕᓂᓴ ᐊᑯ ᐊ ᐃᒐᐸᔨᑐᔨᒋ ᐊ ᒋᑎᓯᒧᔨᒋ ᐊᓂᔭᔪᐛ ᑯᑎᑲ ᒪᔭᑕᓂᓴ᙮ 13ᒋᑎᓯᒧᐤ, ᐛᔅ ᒥᒄ ᒋ ᐅᑎᓇᑭᓄᐤ᙮ ᓇᒪ ᒋᒋᐛ ᐊᐱᑕᔨᒪᐤ ᐊᓂᔭᔪᐛ ᒪᔭᑕᓂᓴ᙮ 14ᓂᔾ ᐊᐅᒄ ᒪᔭᑕᓂᓯᐅ-ᐃᔪᐤ ᑲ ᒥᔪ ᑭᓄᐛᔨᒪᑦ ᐅᒪᔭᑕᓂᓯᒪ᙮ ᓂ ᒋᔅᒐᔨᒪᐅᒡ ᓂᒪᔭᑕᓂᓯᒥᒡ ᐊᓐᒡ ᑲ ᑎᐱᔨᐛᐅᓯᔭᓐ ᑭᔭ ᐎᔨᐛᐤ ᓂ ᒋᔅᒐᔨᒥᑯᒡ, 15ᒧᔭᒻ ᐊ ᐃᓯ ᒋᔅᒐᔨᒥᑦ ᐅᑕᐎᒪᐤ ᑭᔭ ᓂᔾ ᐊ ᐃᓯ ᒋᔅᒐᔨᒥᒃ᙮ ᓇᔅᒡ ᒪᒃ ᓂᑦ ᐃᑕᔨᑎᒥᐃᑯᐛᓐ ᒐᒋ ᐱᔅᑎᓂᓱᐅᒡ ᒐᒋ ᓂᐸᐃᑯᐅᒡ ᐎᔨᐛᐤ ᐅᒋ ᐊᓐᒡ ᓂᒪᔭᑕᓂᓯᒥᒡ᙮ 16ᑯᑎᑭᒡ ᒪᔭᑕᓂᓯᒡ ᓂ ᑭᓄᐛᔨᒪᐅᒡ ᐊᑲ ᐅᒋᒡ ᐅᑕ ᐅᔭ ᒪᔭᑕᓂᓯᐅᒋᐛᐱᔪᐤ᙮ ᑭᔭ ᐎᔨᐛᐤ ᒪᒃ ᔭᐃᑕᔾ ᓂᑭ ᐸᓱᐛᐅᒡ᙮ ᒋᑭ ᓂᔅᑐᑎᒧᒡ ᑭᔭ ᐎᔨᐛᐤ ᓂᐸᑕᑯᓱᐅᓂᔪᐤ ᑭᔭ ᒐ ᐸᐃᒂᒡ ᒪᔭᑕᓂᓯᐅᒋᐛᑉ ᑭᔭ ᒋᑭ ᐸᐃᑯᓱᐤ ᐊᓐ ᒪᔭᑕᓂᓯᐅ-ᐃᔪᐤ᙮”
17“ᐊᐅᒄ ᐅᔭ ᐛᒋ ᓇᔅᒡ ᓴᒋᐃᑦ ᐅᑕᐎᒪᐤ ᓇᔅᒡ ᐊ ᐱᔅᑎᓂᓱᐅᒡ ᒐᒋ ᓂᐸᐃᑯᐅᒡ ᒐᒋ ᐅᒋ ᒥᓐ ᐱᒪᑎᓯᐅᒡ᙮ 18ᓇᒪ ᐊᐛᓐ ᓂᑭ ᒋ ᓂᐸᐃᒄ ᒧᔭᒻ ᐊᔅᒄ ᐊᑲ ᐅᑎᒋᐱᔨᒡ ᑕᓐᑕ ᒐ ᐱᔅᑎᓂᓱᐅᒡ ᒐᒋ ᓂᐸᐃᑯᐅᒡ᙮ ᓂᒋ ᒥᔨᑯᐅᓐ ᓱᐧᑲᑎᓯᐅᓐ ᒐᒋ ᐱᔅᑎᓂᓱᔭᓐ ᒐᒋ ᓂᐸᐃᑯᐅᔭᓐ ᑭᔭ ᓂᒋ ᒥᔨᑯᐅᓐ ᓱᐧᑲᑎᓯᐅᓐ ᒥᓐ ᒐᒋ ᐱᒪᑎᓯᔭᓐ᙮ ᓄᑕᐎᔾ ᐅᔭ ᑲ ᐃᑎᓱᒥᑦ ᒐᒋ ᐃᑐᐅᒡ᙮”
19ᐊᑯ ᒥᓐ ᒂ ᑎᐸᓂᐱᔪᔨᒋ ᐊᓂᔭᔪᐛ ᒍᐤ ᐃᔪᐛ ᐃᔅᐱ ᐱᔭᑕᑯᑦ ᐅᔭ ᐊ ᐃᔅᒋᔄᑦ᙮ 20ᒥᒐᑦ ᒪᒃ ᐊᓐᒡ ᒍᐤ ᐃᔪᒡ ᒋ ᐃᑕᐅᒡ, “ᒥᒋ ᐊᒐᒂ ᐱᒋᔅᑲᑯᐤ᙮ ᒋᔎᐤ᙮ ᒐᒂᓐ ᐛᒋ ᓂᑐᑐᐛᒄ ?”
21ᑯᑎᑭᒡ ᒋ ᐃᔅᒋᔄᐅᒡ, “ᓇᒪ ᒋᐸ ᐅᒋ ᐃᔅᐱᔅ ᒥᔪᑕᑯᓱᐤ ᐊᐛᓐ ᐊ ᐃᔨᒥᑦ ᐊ ᐱᒋᔅᑲᑯᑦ ᒥᒋ ᐊᒐᒂ ᐊ ᐃᔅᐱᔅ ᒥᔪᑕᑯᓯᑦ ᐅ ᓇᐸᐤ ᐊ ᐃᔨᒥᑦ᙮ ᑕᓐᑕ ᒋᐸ ᒋ ᐅᒋ ᐃᓯᓇᑯᓂᔪᐤ ᐊᐛᓐ ᐊ ᐱᒋᔅᑲᑯᑦ ᒥᒋ ᐊᒐᒂ ᒐᒋ ᐃᑐᑐᐛᑦ ᐊᐛᔪᐛ ᐊᑲ ᐛᐸᑎᒥᔨᒋ ᒐᒋ ᐛᐸᑎᒥᔨᒋ ᐊᑯ ?”
ᒋᓴᔅ ᐊᑲ ᑕᑈᔭᔨᒥᑯᑦ ᐊᓂᔭᔪᐛ ᒍᐤ ᐃᔪᐛ ᐊ ᐊᐎᔨᑦ ᙭
John 10.22-30 (Easter-4 Year C)
22ᒪᒂᒡ ᒋ ᐱᐳᓐ ᐊᓐᑕ ᒋᕈᓯᓕᒥᒡ, ᒋ ᐊᑎ ᐅᑎᒋᐱᔪᐤ ᒪᒃ ᐊᓐᑕ ᐊᓯᑯᒻ ᐱᐳᓇ ᑲᒋ ᒥᑯᓴᒡ ᐊ ᒋᔅᒋᓯᒡ ᐊᓐᒡ ᒍᐤ ᐃᔪᒡ ᐊᓐᑕ ᑲ ᒋᔅᒋᓄᐛᒋᑕᑭᓄᔨᒡ ᐅᒋᓴᐊᔭᒥᐊᐅᒋᐛᐳᐛᐤ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᒋᔅᒋᓄᐛᒋᐃᐛᐤ ᒥᑯᓴᐅᓐ ᒋ ᐃᓯᓂᐧᑲᑕᒧᒡ ᐅᔭ ᐊ ᒥᑯᓴᒡ᙮ 23ᒋᓴᔅ ᒪᒃ ᒪᒂᒡ ᒋ ᐱᐸᒧᑕᐤ ᐊᓐᑕ ᐱᑐᔎᒡ, ᓴᓚᒥᓐ ᐅᐱᑐᔎᒡ ᑲ ᐃᓯᓂᐧᑲᑕᔨᒡ᙮ 24ᐊᑯ ᒂ ᐸᒋ ᐛᔅᑲᑲᐳᔅᑕᑯᑦ ᒍᐤ ᐃᔪᐛ᙮ ᐊᑯ ᒂ ᐃᑎᑯᑦ, “ᑕᐃᔅᐱ ᐊᑯ ᒐ ᒥᔨᔭᒡ ᒐᒋ ᒋᔅᒐᔨᒥᑕᒡ ᐊᐛᓐ ᒋᔾ ? ᑯᐃᔅᒄ ᒪ ᐸᒋ ᐎᑎᒧᐅᓇᓐ, ᐊᐛ ᒋᔾ ᙭ ᐊᓐ ᒋᓴᒪᓂᑐᐛ ᑲ ᐸᒋ ᐃᑎᓴᐅᑯᑦ ?”
25ᐊᑯ ᒋᓴᔅ ᓇᔎᐅᓯᐊᑦ, “ᓴᔅ ᑯᐃᔅᒄ ᔅᒋ ᐎᑎᒪᑎᓇᐛᐤ ᓇᒪ ᒪᒃ ᒋ ᐅᒋ ᐎ ᑕᑈᑐᐅᓇᐛᐤ᙮ ᐊᓂᔭ ᒥᓯᐛ ᑲ ᐃᓯ ᐸᒋ ᒥᔨᑦ ᓄᑕᐎᔾ ᒐᒋ ᐃᓯ ᒪᒥᔅᑲᒡ ᐃᑐᒡ ᓇᓂᑎᒻ ᐅᑕ ᐊ ᑕᔭᒄ ᐊᑯᑕ ᐊ ᓄᒂᒡ ᐊᐛᓐ ᐊ ᐊᐎᔭᓐ᙮ 26ᒋᔨᐛᐤ ᒪᒃ ᐎ ᓇᒪ ᒋᑭ ᐅᒋ ᑕᑈᑐᐅᓇᐛᐤ ᐛᔅ ᑕᐸ ᐊᓐᑕ ᓂᒪᔭᑕᓂᓯᒥᒡ ᐊ ᑕᒡ ᒋ ᐊᑎ ᐃᓯ ᐎᒋᐃᐛᓇᐛᐤ᙮ 27ᓂᑐᑎᒧᒡ ᓂᐸᑕᑯᓱᐅᓂᔪᐤ ᓂᒪᔭᑕᓂᓯᒥᒡ᙮ ᑭᔭ ᓂ ᒋᔅᒐᔨᒪᐅᒡ, ᑭᔭ ᐱᔭᒋ ᓇᓴᐅᒡ᙮ 28ᓂ ᒥᔭᐅᒡ ᑲᒋᒡ ᐱᒪᑎᓯᐅᓂᔪᐤ, ᓇᒪ ᒪᒃ ᓂᑕ ᒋᑭ ᐅᒋ ᓂᓱᐅᓇᑎᓯᐅᒡ᙮ ᑭᔭ ᓇᒪ ᐊᐛᓐ ᓂᑭ ᒋ ᒥᔅᑭᒧᒄ ᐊ ᑕᐧᑯᓂᒥᒋ᙮ 29ᓄᑕᐎᔾ, ᐊᓐ ᑲ ᐸᒋ ᒥᔨᑦ ᐅᔭ ᒪᔭᑕᓂᓴ, ᐊᐅᒄ ᒪᐅᒡ ᒐᔅᑕᔨᑕᑯᓯᑦ᙮ ᓇᒪ ᒪᒃ ᐊᐛᔪᐛ ᑕᔪᐛ ᒐᒋ ᒥᔅᑭᒥᑯᑦ ᐅᔭ ᒪᔭᑕᓂᓴ ᐊ ᑕᐧᑯᓇᑦ᙮ 30ᓂᔾ ᑭᔭ ᓄᑕᐎᔾ ᓂ ᐸᐃᑯᐅᓇᓐ᙮”
31ᐊᑯ ᐊᓐᒡ ᒍᐤ ᐃᔪᒡ ᑲ ᐅᒋ ᐅᑎᓇᒡ ᐊᓯᓂᔭ ᒥᓐ ᐊ ᐎ ᐱᒧᓯᓇᑕᐛᒡ ᒋᓴᓴ ᐊ ᐎ ᓂᐸᐊᒡ᙮ 32ᐊᑯ ᒋᓴᔅ ᒂ ᐃᑕᑦ, “ᒥᒐᑥᐤ ᔅᒋ ᐛᐸᑕᓇᐛᐤ ᑕᓐ ᑲ ᐃᔅᐱᔅ ᒋ ᒥᔪᑐᑎᒪᑎᑯᒡ᙮ ᓂᓇᐧᑯᐤ ᔅᒋ ᓄᑯᑥᑎᓇᐛᐤ ᒥᔪᑐᑎᒪᒐᐅᓇ ᒋᓴᒪᓂᑐᐤ ᐊᒋ ᐸᒋ ᒥᔨᑦ ᒐᒋ ᐛᐸᑎᔨᑎᑯᒡ᙮ ᑕᓐ ᐊᓐ ᑲ ᐃᑐᑎᒪᓐ ᐛᒋ ᐎ ᐱᒧᓯᓇᑕᐅᔭᒄ ?”
33ᒋ ᐃᑎᑯᐤ ᒪᒃ ᐊ ᐃᓯ ᐎᑎᒪᑯᑦ, “ᓇᒪᔭᐤ ᐎ ᒥᔪᑐᑎᒪᒐᐅᓐ ᐛᒋ ᐎ ᐱᒧᓯᓇᑕᐅᑕᒡ, ᒋ ᐸᔅᑕᒧᓐ ᐊᐅᒄ ᐛᒋ ᐎ ᓂᐸᐃᑕᒡ᙮ ᒋᑦ ᐃᔅᒋᔄᓐ ᐊ ᒋᓴᒪᓂᑐᐎᔨᓐ ᒥᒄ ᒪᒃ ᐊ ᓇᐸᐎᔨᓐ᙮”
34ᐊᑯ ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᐊᒋ ᐃᑕᑯᐱᓇ ᒋᓴᒪᓂᑐᐤ ᐊᓂᔭ ᑲ ᒥᔭᑦ ᒐᒋ ᑎᐸᔅᑯᓂᒐᔨᒋ,
ᓂᒋ ᐃᔅᒋᔄᓐ, ‘ᒥᓂᑐᐅᒡ ᒋᔨᐛᐤ᙮’
35ᒋ ᒋᔅᒐᔨᑕᓇᓄᐤ ᑲᒋᒡ ᐊ ᑕᑈᒥᑲᒡ ᑕᓐ ᐊᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ᙮ ᒥᓂᑐᐅᒡ ᒋ ᐃᓯᓂᐧᑲᑕᐤ ᒋᓴᒪᓂᑐᐤ ᐊᓂᔭᔪᐛ ᑲ ᒥᔭᑭᓄᔨᒋ ᐅᑦ ᐃᔨᒧᐅᓐ᙮ 36ᓂᔾ ᒪᒃ, ᐅᑕᐎᒪᐤ ᓂᒋ ᐅᑎᓂᒄ ᑭᔭ ᓂᒋ ᐸᒋ ᐃᑎᓴᐅᒄ ᐅᑕ ᐊᔅᒋᒡ᙮ ᑕᓐᑕ ᒐᒋ ᐅᒋ ᐃᔅᒋᔄᔭᒄ ᐊ ᐸᔅᑕᒧᔭᓐ ᐊ ᐃᔅᒋᔄᔭᓐ, ᐊᐅᒄ ᓂᔾ ᒋᓴᒪᓂᑐᐤ ᐅᑯᓴ ? 37ᐊᑲ ᐊ ᐃᑐᑎᒧᐛᐅᒐ ᐊᓂᔭ ᑲ ᐃᓯ ᓂᑐᐛᔨᒥᑦ ᓄᑕᐎᔾ ᒐᒋ ᐃᑐᑎᒧᒡ ᐊᑯ ᑭᑈ ᓇᒪ ᑎᑯᓐ ᒐᒋ ᑕᑈᔭᔨᒥᔭᒄ ᒋᓴᒪᓂᑐᐤ ᐅᑯᓴ ᐊ ᐊᐎᔭᓐ᙮ 38ᐊᑎ ᐊᑲ ᐎ ᑕᑈᔭᔨᒥᔭᒄ ᐊ ᐃᔅᒋᔄᔭᓐ ᒋᓴᒪᓂᑐᐤ ᐅᑯᓴ ᐊ ᐊᐎᔭᓐ ᓇᔅᒡ ᒋᐸ ᒐᔅᑎᓇᑕᔨᑎᒥᐃᑯᓇᐛᐤ ᐊ ᐱᒋᔅᑯᐅᑦ ᐅᑕᐎᒪᐤ ᑭᔭ ᓂᔾ ᒪᒃ ᐊ ᐱᒋᔅᑯᐅᒃ ᐊᓐ ᐅᒋ ᐊ ᒪᒥᔅᑲᒡ ᐃᑎᔭᓐ᙮”
39ᐃᔅᐱ ᒪᒃ ᑲ ᐃᔅᒋᔄᑦ ᒋᓴᔅ ᐅᔭ ᐊᑯ ᒥᓐ ᒂ ᐎ ᒪᑯᓂᑯᑦ ᐊᓂᔭ ᒍᐤ ᐃᔪᐛ, ᒥᒄ ᒪᒃ ᓴᔅ ᒋ ᔅᑐᑕᐤ᙮
40ᐊᑯ ᒋᓴᔅ ᒥᓐ ᑲᐤ ᒂ ᐊᓱᑲᒪᐊᐧᒃ ᐊᓂᔭ ᒠᕐᑕᓐ ᓯᐱᔪᐤ᙮ ᐊᓐᑕ ᑲᒋ ᓯᑲᐃᑕᒐᔨᒡ ᒠᓇ ᐊᑯᑕ ᑲ ᐃᑐᑕᑦ᙮ ᐊᑯᑕ ᐊᓐᑕ ᑲ ᑕᑦ᙮ 41ᒥᒐᑐᐤ ᒪᒃ ᐊᐛᔪᐛ ᒋ ᐸᒋ ᓂᑐᐛᐱᒥᑯᐤ ᑲ ᐃᔅᒋᔄᔨᒋ, “ᓇᒪ ᓂᑕ ᐅᒋ ᒪᒥᔅᑲᒡ ᐃᑐᑎᒻ ᒠᓐ, ᒥᒄ ᒪᒃ ᒥᓯᐛ ᑕᑈᒥᑭᓂᔪᐤ ᑕᓐ ᑲ ᐃᑕᒋᒪᑦ ᐅᔭ ᓇᐸᐛ᙮” 42ᒥᒐᑐᐤ ᒪᒃ ᐊᐛᔪᐛ ᒋ ᑕᑈᔭᔨᒥᑯᐤ ᒋᓴᔅ ᐊᓐᑕ ᑲ ᑕᔨᒋ᙮
Iliyochaguliwa sasa
ᒠᓐ 10: ᓇᔅᑲᐱ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
