Matio 26

Nyɔ̍ klaaᵻ sɔ̌ Jusu

(Maɛ 14.1-2; Luu 22.1-2; Chɔɔn 11.45-53)

1Ti̍ Jusu wɔ̀-a ìh kli̍hgbɛ̍ la bla̍-ɛ, wɛ̀ ɔ̍ la̍a̍ dě ɔ̍ kòà we̍, 2“Mɔ̀-a chɛ̀ juo ɛ̍-ɛ, ɛ̍ si̍e̍-o wǐh sɔɔ̌n ɛ̍ iě Sììkɛ̍n Weɛ̍-a Peě nu̍. Dǒ-o bo Nyi̍ɔ̍-a Jǔ-a mu̍ kwlǎ sà-ɛ, wɛ̀ ɔ̍ iě kɔ̍-ɛ dǒ gbàɛ̍ kɛ̍n i̍ tu̍ wlì.”

3Dǒ ti̍ laa̍ di̍i̍ nɛ̀ Nyɔsoa-a slaǎ sà nyɔ̍ klaaᵻ ke nyɔ̍ klaaᵻá gbǎ tàdùè dě u̍h-a slaǎ sà nyɔ̍-a dlǔtu Kaifa-a tùnàgbò di̍i̍. 4Iě u̍h sɔ̌, u̍h iě Jusu gbɛ̍n soɛɛ u̍h iě ɔ̍ dbǎ. 5Wɛ̀ u̍h la̍a̍, “Jɛ mɔ̀ à bɔ̌ ɛ̍ nu̍-ɛ dǒ peě kɛ̍n, nɛ̀ nyɔ̍gbei-a mu̍ slɛ̀ ja̍ sà.”

Nynɔ̌ due po̍ Jusu chlǎn dlǔ

(Maɛ 14.3-9; Chɔɔn 12.1-8)

6Ti̍ Jusu nɛ-a dǒ Bɛtani-ɛ, nɛ̀ ɔ̍ di̍ dɛ̍ dě Samo blǐ gbò, ɔ̀ wìèìdih-a nu̍-a de-ɛ. 7Dǒ-o bo nynɔ̌ due ji̍-i dǒ ɔ̍ we̍. Nɛ̀ nɔ̌ chlǎn ɛ̀ gbǎ-a dɛ̍kɛ̍n-ɛ, sɔɔ̌ u̍h-a dǎɛ-a alebasla-a, dě ɛ̍ sòlɛ̀ di̍i̍ bo ɔ̍ blě-e ɛ̍. Ɛ̍ bo ɔ̍ po̍ dǒ Jusu dlǔ. Nɛ̀ Jusu slo̍e i̍ dǒ teble̍ gbɔ̀. 8Ti̍ ɔ̍ kòà jě-a dɛ̍ nynɔ̌ laa̍ ɔ̍ nu̍-aɛ, sɔ ɛ̍ nyaɛ u̍h wɔ̍i̍n. Iě u̍h la̍a̍, “Dɛ̍nu̍ ɔ̍ gbɔ̀lɔ chlǎn la-a ɛ? 9Nɔ̌ chlǎn la pò ɛ̍ ple̍-ɛɛ, nɛ̀ ɛ̍ mu̍ wlǐ dɔu jě de, wɛ̀ i̍h iě nyɔ̍gbà nyɔ̍ nyǐ-ɛ.”

10Sɔ Jusu juo dɛ̍ u̍h-a bla̍-aɛ, iě ɔ̍ la̍a̍ dě u̍h we̍, “Dɛ̍nu̍ mɔ̀-a bɛ̌ɛ nynɔ̌ la wɔ̍ɔ̍n i̍ ɛ? Dɛ̍ chɛ̀ bo ɔ̍ nu̍ dǒ ǐn we̍. 11Nyɔ̍gbà nyɔ̍ nɔ̀ɔ̍, u̍h ke mɔ̀-a mu̍ da̍a nɛ ma̍u̍. Jɛ mɔ̍ɔ-ɛ, mɔ̀ ke ǐn ke à se̍ da̍a nɛ mu̍ ma̍u̍. 12Pò u̍h ja ǐn i̍ tè la̍ gba̍-ɛ, nɔ̌ chlǎn u̍h-a mu̍-a ǐn i̍ tli̍-ɛ, ɛ̍ bo ɔ̍ tli̍ ǐn i̍ wɛ̀ duedɛ. 13Tìh-a taǐn ǎn sèàɛ̍ mɔ̀ wlùh, tà nyɔ̍gbei-a mu̍-a Nyɔsoa-a pɔ̀n chɛ̀ la bla̍-ɛ nɔ̌ kmɔ̌ kli̍hgbɛ̍ la we̍-ɛ, nɛ̀ dɛ̍ nynɔ̌ la ɔ̍ nu̍-aɛ, u̍h-a mu̍ ɛ̍-ɛ sà ke, wɛ̀ nyɔ̍gbei iě ɔ̍ wlùh we̍ nu̍.”

Juda wɔ̌n-ɛ ɔ̍ iě Jusu kwlǎ sà

(Maɛ 14.10-11; Luu 22.3-6)

14Dǒ-o bo ɔ̍ kòà-a pùè jɔ̌ sɔɔ̌n laa̍ u̍h-a due u̍h-a dǎɛ-a Juda Ɛkɛlia-a mu̍ dě Nyɔsoa-a slaǎ sà nyɔ̍ klaaᵻ we̍. 15Iě ɔ̍ tèle u̍h i̍, ɔ̍ la̍a̍, “Jusu la pò ǐn sà ɔ̍ kwlǎ dě mɔ̀ we̍-ɛ, nɛ̀ dɛ̍ mɔ̀-a mu̍ ǐn nyǐ ɛ?” Wɛ̀ u̍h slè sebla̍ wlǐ-a kwela ta̍a̍n u̍h nyǐ ɔ̍. 16Sɔ dǒ ti̍ laa̍ di̍i̍-ɛ, Juda-a pɔ̀n la̍ jiila̍ i̍ sǔh ɔ̍ iě Jusu kwlǎ sà.

Jusu ke ɔ̍ kòà di̍-i Sììkɛ̍n-a di̍-dɛ̍ᵻ tàdùè

(Maɛ 14.12-21; Luu 22.7-14, 21-23; Chɔɔn 13.21-30)

17Peě nyɔ̍-ɔ poe-a blèe̍ fù-i dɛ̍ᵻ we̍-ɛ, dǒ ɛ̍ sàǐtòò weɛ̍ di̍i̍ wɛ̀ Jusu-a kòà mu̍ dě ɔ̍ we̍. Iě u̍h tèle ɔ̍ i̍, u̍h la̍a̍, “Sììkɛ̍n-a di̍-dɛ̍ᵻ la, tàwe̍ àn pɔ̀n à iě i̍h gba̍a̍ po̍-e dǒ ìn we̍ ɛ?”

18Wɛ̀ ɔ̍ la̍a̍, “Mɔ̀ mu̍ dě tùgbàwlɔ̀ di̍i̍. Jɔ̍gbau due nɛ-a deě-ɛ, mɔ̀ sèàɛ̍ ɔ̍ wlùh. Mɔ̀ la̍a̍, ‘À dlǔtu la̍ ɔ̍ ti̍ kɔǎn we̍ wɛ̀, ɔ̍ ke ɔ̍ kòà-a ji̍ Sììkɛ̍n-a Peě blě la̍-a nɔ̌ ìn blǐ gbò.’ ”

19Wɛ̀ ɔ̍ kòà nu̍ slɛ̌ ɔ̍ po̍-a u̍h chèɛ̀ i̍-ɛ, iě u̍h po̍ Sììkɛ̍n-a di̍-dɛ̍ᵻ gba̍a̍.

20Ti̍ ɛ̍ nu̍-a flìwe̍-ɛ, wɛ̀ Jusu ke ɔ̍ kòà-a pùè jɔ̌ sɔɔ̌n tìèe̍ i̍ u̍h iě dɛ̍ di̍. 21Ti̍ u̍h-a di̍-a la̍ dɛ̍-ɛ, iě ɔ̍ la̍a̍, “Bɔ̌ ǐn sèàɛ̍ mɔ̀ tìh-a taǐn wlùh, mɔ̀-a nyɔ̍ due-a mu̍ ǐn kwlǎ sà.”

22Sɔ ɛ̍ po̍ u̍h-a wlùh seɔn kaa̍. Ɛ̍ tìh jɔ-ɛ, nɛ̀ ɔ̍ tèle Jusu i̍, “Joi, mɔ̍ bo ae?”

23Wɛ̀ Jusu la̍a̍, “Nyɔ̍ ɔ̀ ke ǐn ke à gbà-a nɔ̌ boo̍ due di̍i̍-ɛ, ɔ̍-ɔ bo ɔ̀ mu̍ ǐn kwlǎ sà. 24Nyi̍ɔ̍-a Jǔ-a mu̍ mɛ̌ dǒ ka Nyɔsoa-a wlu̍ dǎ-a we̍. Jɛ nyɔ̍ ɔ̀ sà-a ɔ̍ kwlǎ-a, chlě dǒ ɔ̍ we̍. Nyɔ̍ laa̍ pò ɔ̍ se̍ wlǔh de-ɛ, nɛ̀ ɛ̍ nmɔ jii̍ de dǒ ɔ̍ we̍.”

25Wɛ̀ Juda ɔ̀ mu̍-a Jusu kwlǎ sà-a, iě ɔ̍ la̍a̍, “Dlǔtu, mɔ̍ bo ae?”

Jusu la̍a̍, “Ka ìn dǎ-ɛ, nɛ̀ kǎ ɛ̍ nɛ.”

Joi-a wìe̍dɛ

(Maɛ 14.22-26; Luu 22.14-20; 1 Kɔwlɛntiɔn 11.23-25)

26Ti̍ Jusu ke ɔ̍ kòà-a di̍-a dɛ̍-ɛ, wɛ̀ ɔ̍ dǔ blèe̍ gba̍n-a, iě ɔ̍ po̍ Nyɔsoa tlɔ̌. Wɛ̀ ɔ̍ chɛɛn ɛ̍ i̍, iě ɔ̍ nyǐ ɛ̍ u̍h. Ɔ̍ la̍a̍, “Mɔ̀ gbɛ̍n i̍ mɔ̀ iě di̍, ɛ̀ la̍ ǎn ku̍ bo.”

27Wɛ̀ ɔ̍ dǔ kàu̍n-u, iě ɔ̍ po̍ Nyɔsoa tlɔ̌. Wɛ̀ ɔ̍ nyǐ ɛ̍ u̍h, ɔ̍ la̍a̍, “Mɔ̀ kli̍hgbɛ̍ mɔ̀ nǎ ɛ̍. 28Ɛ̀ la ǎn nymɔ̍ bo. Nymɔ̍ la bo ɛ̀ nu̍ ku̍o̍ Nyɔsoa po̍. Ɛ̍ wlǎ i̍ dǒ nyɔ̍ dɔu-a gblɛ̍n sɔ̀ɛ̀n-a tìh i̍ tǎli-ɛ we̍. 29Ǎn sèàɛ̍ mɔ̀ wlùh, ǐn se̍ nmɔ̍ la nǎ mu̍ dɛ. Weɛ̍ ǎn mu̍-a ɛ̍ nǎ-a delee i̍ po̍-ɛ nɛ̀ ɛ̍ mu̍ dě ǐn Baa-a kmɔ̌ wlu̍ i̍ kɔn-ɛ di̍i̍ nu̍.”

30Wɛ̀ u̍h ble̍ Nyɔsoa duǐh, iě u̍h sǐ sɔ̀n u̍h mu̍ dě Ɔle-Tu̍ᵻá Tlu̍h kɛ̍n.

Jusu la̍ Pitɛ-a mu̍ ɔ̍ tìh-i tòlo

(Maɛ 14.27-31; Luu 22.31-34; Chɔɔn 13.36-38)

31Wɛ̀ Jusu la̍a̍ dě ɔ̍ kòà we̍, “Wlù weɛ̍ la mɔ̀ kli̍hgbɛ̍ mɔ̀-a mu̍ kwlǎ gbǎ mɔ̀ iě ǐn si̍e̍. Dɛ̍nu̍ɛ, kǎ ɛ̍ nu̍ chlǐh-ɛ dě Nyɔsoa-a wlu̍ di̍i̍. Ɛ̍ la̍a̍, ‘Ǎn mu̍ blawɛ̌ᵻ we̍ i̍ gbɛ̀n nyɔ̍ dbǎ, nɛ̀ blawɛ̌ᵻ gbà la ɛ̍ mu̍ ja̍i̍ gbà.’ 32Jɛ ǐn wɔ̀-e wlǔh-ɛɛ, wɛ̀ iě mɔ̀ jǔ mu̍ dě Kaladii fɔɔ.”

33Wɛ̀ Pitɛ la̍a̍, “Pò juh kli̍hgbɛ̍ la u̍h gbǎ kwlǎ-a chɛ̀ àn tìh-ɛ, mɔ̍ɔ, ǐn se̍ gba̍ kwlǎ gbǎ nɔ̌ kmɔ̌.”

34Wɛ̀ Jusu la̍a̍, “Bɔ̌ ǐn sèàɛ̍ ìn tìh-a taǐn wlùh, wlù weɛ̍ la àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ.”

35Wɛ̀ Pitɛ la̍a̍, “Pò ǎn jɛ ja ìn we̍ mɛ̌-ɛ mu̍-a chɛ̀-ɛ, jɛ ǐn se̍ àn tìh-i tòlo mu̍.”

Kòà kli̍hgbɛ̍ sie-a dode̍-ɛ, kǎ u̍h dǎ ke.

Jusu ba̍le-e dě Kɛsɛmani

(Maɛ 14.32-42; Luu 22.39-46)

36Wɛ̀ Jusu ke ɔ̍ kòà mu̍ tà u̍h-a dǎɛ-a Kɛsɛmani-ɛ. Iě ɔ̍ la̍a̍ dě u̍h we̍, “Ka ǎn mu̍-a de̍à iě-a ba̍le-ɛ, mɔ̀ tè i̍ da̍a.” 37Wɛ̀ ɔ̍ dǔ Pitɛ ke Sɛɛbedii-a nynuu̍ sɔɔ̌n u̍h ke ɔ̍ mu̍. Jɛ nɛ̀ wɔɛ-a nu̍ ɔ̍-ɛ, iě ɔ̍ wlùh gbǎ dě de̍i̍. 38Wɛ̀ ɔ̍ la̍a̍ dě u̍h we̍, “Wɔɛ nɛ-a dě ǐn wlùh di̍i̍-ɛ, ɛ̍ wɛ̀la ɛ̍-ɛ dbǎ m̌. Mɔ̀ sie da̍a mɔ̀ iě ǐn de̍e̍ i̍ tè.”

39Ɔ̍ klɛɛn-a dǒ nya̍ wɛɛ-ɛ, wɛ̀ ɔ̍ chlìi i̍ gbìi̍i dǒ bloɔ̍ iě ɔ̍ ba̍le. Ɔ̍ la̍a̍, “Ǐn Baa, pò ɛ̍ nɛ ɛ̍ ka̍-ɛ, nɛ̀ ìn sà ǐn kàu̍n la wɔ̍i̍n lě. Jɛ dɛ̍ ìn wɔ̌ɛn-a kɛ̍n i̍-ɛ, ɛ̍ bo ìè nu̍, ɛ̍ se̍ naɛ̍ ǐn se̍ dǎ.”

40Wɛ̀ ɔ̍ ji̍ de̍ dǒ ɔ̍ kòà laa̍ we̍, iě ɔ̍ jɛɛ u̍h nyinɔ̍ i̍. Ɔ̍ la̍a̍, “Pitɛ, mɔ̀ se̍ nyinɔ̍ jlǐh i̍ ku̍-ɛ bɛ̌ɛ dǒ ti̍ gbɔ̍ wei di̍i̍ ae? 41Mɔ̀ tù ba̍le-ɛ jlǐhɛ̍, wɛ̀ mɔ̀-ɔ je̍e blu̍ja̍a̍ gbǎ. Mɔ̀-a pɔ̀n i̍ slɛ̌ dɛ̍ nu̍-ɛ i̍ de, jɛ mɔ̀ se̍ ɛ̍ we̍ gbǐh blě.”

42Gbɔ̍ᵻ sɔɔ̌n naɛ ɔ̍ gba̍-a de̍-ɛ, iě ɔ̍ ba̍le, ɔ̍ la̍a̍, “Ǐn Baa, pò kàu̍n la ɛ̍ se̍ dǒ ǐn wɔ̍i̍n sà ka̍ nɛ jɛ ǐn kɔn iě ɛ̍ nǎ gbɔ̀gbɔ̀-ɛ, nɛ̀ dɛ̍ àn pɔ̀n-aɛ bo ɛ̀ iě nɛ.” 43Ɔ̍ ji̍-a de̍ka-a, ɔ̍ jɛɛ ɔ̍ kòà laa̍ mɔ̌ la̍ i̍ dɛ, dɛ̍nu̍ɛ, u̍h-a jlǐh ku̍ᵻ ku kwa̍.

44Wɛ̀ ɔ̍ sɔ dǒ u̍h we̍-e, iě ɔ̍ mu̍ de̍ dɛ dode̍. Wɛ̀ ɔ̍ ba̍le gbɔ̍ᵻ ta̍a̍n naɛ. Wlu̍ due laa̍ bo ɔ̍ bla̍ dɛ. 45Wɛ̀ ɔ̍ mu̍ dě de̍ ɔ̍ kòà we̍ iě ɔ̍ la̍a̍ dě u̍h we̍, “Mɔ̀-a sà-e gbǔh mɔ̀-a mɔ̌ ke̍ sǔh ae? Mɔ̀ gbɛ̀n-e, ti̍ la ɛ̍ nɛ à i̍ wɛ̀. Nyi̍ɔ̍-a Jǔ sà-ɛ kwlǎ wɛ̀ dě gblɛ̍n sɔ̀ɛ̀n nyɔ̍ kwa̍a̍. 46Mɔ̀ sɔ-ɔ à iě mu̍ la̍ sǔh. Ɔ̀ mu̍-a ǐn kwlǎ sà-a, ɔ̍ nɛ à i̍ wɛ̀.”

Jusu-a gbɛ̍n-ɛ

(Maɛ 14.43-50; Luu 22.47-53; Chɔɔn 18.3-12)

47Jusu nɛ dǒ wlu la̍ sǔh, wɛ̀ Juda ji̍. Ɔ̍ kòà-a pùè jɔ̌ sɔɔ̌n laa̍ u̍h-a due bo. Nɛ̀ ɔ̍ ke nyɔ̍ tlùgbei̍ na. U̍h blě plàn chlɛ̀nᵻ ke gbòmina̍ᵻ kwa̍ i̍. Nɛ̀ Nyɔsoa-a slaǎ sà nyɔ̍ klaaᵻ ke nyɔ̍ klaaᵻ bo ùh dbo̍ u̍h. 48Wɛ̀ ɔ̀ nu̍-a nyɔ̍ kwlǎ sà nyɔ̍-ɛ, iě ɔ̍ toe u̍h juola. Ɔ̍ la̍a̍, “Nyɔ̍ ǎn mu̍-a gblèè-ɛ, nɛ̀ ɔ̀ mɔ̀-a pɔ̀n-a i̍-ɛ bo. Nɛ̀ mɔ̀ gbɛ̍n ɔ̍ la̍ sǔh.”

49Wɛ̀ Juda slɛ̌ i̍ ɔ̍ mu̍ Jusu wlì, wɛ̀ ɔ̍ gblèè ɔ̍, ɔ̍ la̍a̍, “Dlǔtu, ǐn jɛɛ m̀ o.”

50Wɛ̀ Jusu la̍a̍, “Ǎn chɛ̀-a nyɔ̍, dɛ̍ ìn ji̍-a we̍-ɛ bo ìè nu̍ lě.”

Iě nyɔ̍ laa̍ u̍h wlǎ dě Jusu ja̍, wɛ̀ u̍h gbɛ̍n ɔ̍. 51Wɛ̀ ùh ke Jusu na-aɛ, u̍h-a due chlì ɔ̍ plàn chlɛ̀n. Wɛ̀ ɔ̍ tba̍ slaǎ sà nyɔ̍-a dlǔtu-a kèi̍ dɛ̍, iě ɔ̍ chɛ̍n ɔ̍ doun i̍. 52Wɛ̀ Jusu la̍a̍ dě ɔ̍ we̍, “Tà àn plàn chlɛ̀n la ɛ̍ sɔ-aɛ, po̍ ɛ̍ dǒ de̍. Dɛ̍nu̍ɛ, nyɔ̍ ùh-a fɔ̀n-ɛa plàn chlɛ̀nᵻɛ́, u̍h-a mu̍ plàn chlɛ̀nᵻ i̍ mɛ̌-ɛ. 53Ìn jajeɛ̍ pò ǐn tèle ǐn Baa i̍ ɔ̍ iě ǐn ǐnchɔ̀-a fùùh we̍ dbo̍ i̍h iě ǐn we̍ gbǎ-ɛ, nɛ̀ ɔ̍ se̍-o nyna mu̍ ɔ̍ iě ɛ̍ nu̍ ae? 54Jɛ pò ǐn nu̍ la̍a̍n-ɛ, nɛ̀ ka Nyɔsoa-a wlu̍-a mu̍ chɛ̀-ɛ gbǎ-a nu̍ ɛ? Dɛ̍nu̍ɛ, ɛ̍ la̍ kǎ ɛ̍ kɔn ɛ̍ iě ka nɛ-ɛ nu̍.”

55Dǒ-o bo Jusu wlu-i dě nyɔ̍ tlùgbei̍ laa̍ we̍. Ɔ̍ la̍a̍, “Ɛ̀ mɔ̀ nu̍-a plàn chlɛ̀nᵻ ke gbòmina̍ᵻ kwa̍ i̍ blě-ɛ wɛ̀ mɔ̀ ji̍-a ǐn gbɛ̍n la̍-ɛ, nɛ̀ ka nyɔ̍ la̍ mɔ̍ jlǐ-nyɔ̍-ɛ. Ka sɔ̀n-a sɛ̀n-aa, kǎ ǎn nɛ dě mɔ̀ we̍ Nyɔsoa-a slaǎ sà gbò sɔ̀n ǎn po̍ nyɔ̍ nǎ, doǒ nɔ̀ɔ̍, mɔ̀ se̍-o ǐn gbɛ̍n-ɛ. 56Jɛ ìh kli̍hgbɛ̍ Nyɔsoa-a tu̍owli po̍ nyɔ̍ chlǐh-aɛ, i̍h iě tìh-a taǐn nu̍ dɛbo, ɛ̍ kɔn ìh la i̍h-a nɛ.”

Wɛ̀ ɔ̍ kòà kli̍hgbɛ̍ ple̍ u̍h si̍e̍ ɔ̍.

Jusu nɛ dě Juu-a taɔ kwa̍a̍

(Maɛ 14.53-65; Luu 22.54-55, 63-71; Chɔɔn 18.13-14, 19-24)

57Nyɔ̍ ùh gbɛ̍n-a Jusu-ɛ, u̍h gba̍ ɔ̍ dě Kaifa blǐ gbò, ɔ̀ nu̍-a Nyɔsoa-a slaǎ sà nyɔ̍-a dlǔtu-ɛ, nɛ̀ dě-e bo telě nǎ poe nyɔ̍ ke nyɔ̍ klaaᵻ kli̍hgbɛ̍ gbòe i̍. 58Nɛ̀ Pitɛ wɔ̀ dǒ ɔ̍ de̍e̍ iě u̍h-a mu̍ slaǎ sà nyɔ̍-a dlǔtu laa̍ ɔ̍ gbò-a gbàɛ̍gbà wlì, jɛ nɛ̀ ɔ̍ nynaɛ nya̍. Iě ɔ̍ pa̍ dě gbàɛ̍gbà laa̍ di̍i̍ wɛ̀ ɔ̍ tè i̍ dǒ gbò jlǐhɛ̍ tù nyɔ̍ we̍, ɔ̍ iě tìh-a chɛ̀ i̍h-a siee la̍ jě. 59Sɔ slaǎ sà nyɔ̍ klaaᵻ ke taɔ kli̍hgbɛ̍-a pɔ̀n la̍ sàànsi̍i̍h i̍ u̍h iě Jusu si̍h-i tmɔ̌-ɛ, wɛ̀ u̍h iě ɔ̍ dbǎ. 60Jɛ u̍h se̍ nyɔ̍ chɛ̀ɛ̌chɛ̀ jě. Gbɔ̀gbɔ̀ sǔh-ɛ, nyɔ̍ duuh ji̍-i iě u̍h tmɔ̌-ɛ ɔ̍ si̍h-i. Ɛ̀ bɔ̌ɛ-a doǒ-ɛ, jɔ̍gbauᵻ sɔɔ̌n ji̍-i. 61Iě u̍h la̍a̍, “Jɔ̍gbau la ɔ̍ la̍ ɔ̍ bɛ̌ɛ ɔ̍ iě Nyɔsoa-a slaǎ sà gbò wlǎ wɛ̀ ɔ̍ iě ɛ̍ po̍ dode̍ dǒ wǐh ta̍a̍n di̍i̍.”

62Wɛ̀ slaǎ sà nyɔ̍-a dlǔtu nyna i̍, iě ɔ̍ la̍a̍ dě Jusu we̍, “Dɛ̍ nyɔ̍ la u̍h-a bla̍-a dǒ ìn pùn-ɛ, ìn se̍ ɛ̍ pɔ̀n we̍ sà mu̍ ae?” 63Jɛ Jusu se̍ fuɛn nu̍. Wɛ̀ slaǎ sà nyɔ̍-a dlǔtu la̍a̍ dě ɔ̍ we̍, “Ji̍ ìè kmɔ̌ nɛ Nyɔsoa slɛ̀ɛ̀n pò ìn tù Chèɛ̀ Tba̍ju ɔ̀ nu̍-a Nyɔsoa-a Jǔ-ɛ, ìè à wlùh sèàɛ̍.”

64Wɛ̀ Jusu la̍a̍, “Ka ìn dǎ-ɛ, nɛ̀ kǎ ɛ̍ nɛ. Jɛ bɔ̌ ǐn sèàɛ̍ mɔ̀ kli̍hgbɛ̍ wlùh, dě nya̍-ɛ, mɔ̀-a mu̍ Nyi̍ɔ̍-a Jǔ jě ɔ̍ iě i̍ tè dǒ Gbǐh Kli̍hgbɛ̍ Blě Nyɔ̍-a di̍na̍ we̍, wɛ̀ ɔ̍ iě nǐgbanᵻ kɛ̍n naɛ blě dě ja̍u̍n wlì ɔ̍ iě ji̍.”

65Wɛ̀ slaǎ sà nyɔ̍-a dlǔtu gbǎ jlu̍h-u, wɛ̀ ɔ̍ fǎle ɔ̍ chɛ̀-a jliɛ̍. Iě ɔ̍ la̍a̍, “Jǔ la ɔ̍ nyni-i Nyɔsoa-a nynɛ̌ jii̍. Na̍a̍, mɔ̀-a wɔ̌n ɔ̍ Nyɔsoa-a nynɛ̌ jii̍ nyni wlu̍ lě. Dɛ̍ kɔn sàànsi̍i̍h à pɔ̀n i̍ dɛ ɛ? 66Nɛ̀ ka à iě ɔ̍ tìh nu̍ ɛ?”

U̍h la̍a̍, “Ɔ̍ nu̍ dɛ̍ sɔ̀n, ɔ̍ kɔn ɔ̍ iě mɛ̌.”

67Wɛ̀ u̍h-a wla̍n tɔ̍n dǒ ɔ̍ jua̍i̍ iě u̍h-a tbaɛ ɔ̍ gbunaᵻ i̍. Iě duuh-a tbaɛ ɔ̍ gbǎᵻ i̍. 68Iě u̍h la̍a̍, “Nyɔsoa-a Chèɛ̀ Tba̍ju, ji̍ ìè gbànwli po̍. Nyɔ̍ bo ɔ̀ tba̍ ìn dɛ̍ ɛ?”

Pitɛ tòlo Jusu-a tìh-i

(Maɛ 14.66-72; Luu 22.56-62; Chɔɔn 18.15-18, 25-27)

69Ɛ̍ ti̍ laa̍ nɛ̀ kǎ Pitɛ tè i̍ ke sǔh dě gbò-a gbàɛ̍gbà di̍i̍. Wɛ̀ nynɔ̌gbaɔ jǔ ɔ̀ nu̍-a pòi̍ju-ɛ ji̍ dǒ ɔ̍ we̍ ɔ̍ la̍a̍, “Jusu la ɔ̀ sɔ-a Kaladii fɔɔ-ɛ, ɔ̍ ke àn na ke o.”

70Jɛ Pitɛ tòlo-e dǒ nyɔ̍ kli̍hgbɛ̍ jlǐhwai. Ɔ̍ la̍a̍, “Dɛ̍ àn sà-aɛ, ǐn se̍ ɛ̍ i̍ juo.” 71Wɛ̀ ɔ̍ sɔ dě u̍h nynɛ̌ ɔ̍ mu̍ dě gbàɛ̍gbà-a wɔ̍n we̍. Dě-e bo nynɔ̌gbaɔ jǔ dɔɔ jě-e ɔ̍ iě ɔ̍ la̍a̍ dě nyɔ̍ nɛ-a doǒ-ɛ we̍, “Jɔ̍gbau la Jusu ɔ̀ sɔ-a dǒ Naaslɔɛ wlɔ̀-ɛ, ɔ̍ ke ɔ̍ na o.”

72Pitɛ slɛ̀ɛ̀n iě ɔ̍ tòlo dɛ. Ɔ̍ la̍a̍, “Ǐn se̍ jɔ̍gbau la juo.”

73Ɛ̍ wlè-o chɛ̀gbɛɛ, wɛ̀ nyɔ̍ ùh nyna-a doǒ i̍-ɛ mu̍ dǒ Pitɛ we̍. U̍h la̍a̍, “À po̍ i̍h chɛ̀ nyɔ̍ ùh ke Jusu na-ɛ, mɔ̀ u̍h-a nyɔ̍ due. Dɛ̍nu̍ɛ, àn wlu̍ bo ɛ̀ sà ìn gbɔ̀.”

74Wɛ̀ Pitɛ po̍ di̍h wlu̍we̍i̍, iě ɔ̍ slɛ̀ɛ̀n dě u̍h we̍. Ɔ̍ la̍a̍, “Jɔ̍gbau la ǐn se̍ ɔ̍ dɛ̍ i̍ juo.”

Dǒ tàdùè laa̍ suuh slò-e. 75Iě wlu̍ Jusu bla̍-ɛ, wɛ̀ ɛ̍ dǔ dǒ Pitɛ wlì i̍ sǐ-ɛ. Ɔ̍ la̍a̍, “Àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ.” Pitɛ sǐ-a sɔ̀n-ɛ, iě ɔ̍ fìn dɛ̍blɔ dɛ.

Iliyochaguliwa sasa

Matio 26: KDNT

Kuonyesha

Shirikisha

Nakili