Yohan 10
10
Yesu onu Oʋesigbanɔ Gbã ɛ
1Yesu apani si, “Mɛɛsi mlɔ anukwarɛɛ: ɔniliɛ gi ɔ́ʋiga kevunu ya tiku iʋesi le kukaa mɛ ɛ, pɔ̀ xe izeemuiga ɔkɔ dzedze e tiku i, onu oze ni odètsa. 2Ɔniliɛ gi izeetiku gani kevunu ya ɛ, yɛ onu oʋesigbanɔ yɛ. 3Kevunu ya opepe ye aadra kevunu ya ɔki yɛ: iʋesi le izeenu yɛ ole lo xe axwa yɛ iʋesi le linyi ne e, lɛ aatu ɔtɔ ni lɛ kudono o. 4Xe ebu le edono e, aaze lɛ ɔtɔ nɔ, lɛ iʋesi le iakuni yɛ kude, lɛ ese linu si íte yɛ ole lo. 5Itrákuni banɔ dzedze kude liwewe e: boŋu i, íase ní banɔ baklɔ ba su lɛ ese linu si íte ba ile le e.” 6Yesu ebu abee liɛ ya aki bà, pɔ̀ bénu yɛ ese e.
7Lɛ loso Yesu apani dzɛ si, “Mɛɛsi mlɔ anukwarɛɛ si, Mɛ menu kevunu ya aki iʋesi le. 8Banama pɔ́ gi bɛba kpɛ ɔtɔ ɛki mɛ ɛ, bezè bedetsa, lɛ iʋesi le ínu kutu iiki ba a. 9Mɛ menu kevunu ya, ɔniliɛ gi aaga mɛ aʋa xe aatiku kuka mɛ ɛ, aamɔ kubúbú; aatiku lɛ aado lɛ aamɔ ɔdɔŋakɔ gbã a. 10Oze ye kɔ ɛ, izɛɛba tɔ yizuru, yiye ni tɔ yizizi bidɔ. Maba tɔ mlaamɔ ligbã́, ligbã́ ní lɛ kisrɛsrɛ mɛ.
11“Mɛ menu oʋesigbanɔ gbã ɛ. Oʋesigbanɔ gbã ɛ, izɛɛkɔ yɛ ligbã́ nɛ ɛkɔ ní yɛ iʋesi le litukpo o. 12Xe apaa onete ɔtɔ gi ónu oʋesigbanɔ ɔ, xe ónu lɛ onete fɛ ɛ, xe amɔ agbodogli ye e, gi atrába ɛ, aase iʋesi le su kɔ agbodogli ye evu iʋesi le kɔ ìgɔgɔ lɛ ìhle e. 13Apaa onetee aase lɛ ese linu si apaa onete ko onu u, lɛ ɔ́kɔ lɛ mɛ ɔki iʋesi le e. 14“Mɛ menu oʋesigbanɔ gbã ɛ; lɛ mete mɛ iʋesi le e, lɛ mɛ iʋesi le fɛ ite me e: 15ŋwisi kiliɛ gi Ɔka yɛ ete me e, xe mɛ fɛ mete Ɔka yɛ ɛ, xe makɔ mɛ ligbã́ nɛ akyɛ ní iʋesi le litukpo e. 16Iʋesi dzedze ilɛ gi inu mɛ inɛ ɛ, gi imá ní iʋesi lɛ ya kusi i. Lilɛ si migbani lɛ kyɛ manɔ; ianu mɛ ole lo, lɛ iadzi oʋesiha tole ki oʋesigbanɔ tole e. 17Mɔka Aya alɔ mɛ lɛ ese linu si madimɛ si maakɔ mɛ ligbã nɛ kɔ, tɔ maadzini le kuzɛ. 18Ɔnɔnɔ ɔ́trazi mɛ ligbã nɛ ní mɛ awla a. Makɔ lɛ akyɛ ní mɛ ɔtutɔ mɛ kupɛ́pɛɔ onu. Kigagla kiliɛ ní mɛ awla si mikɔ lɛ kyɛ, lɛ kigagla kiliɛ ní mɛ awla si midzini le kuzɛ ɛ. Lɛ ya ɔsã Mɔka aki mɛ si mibitɛ ɛ.”
19Kɔkpɛ eboa la ya gi Yesu apani loso e, kulɛlɛ kwiku ní Yudanɛ ma kusi dzɛ. 20Bamɛ beglegle bɛzɛɛpani si, “Ozimizi ye yɛ ɔkpasi ní yɛ mɛ! Eewle! Ege loso mlɛta yɛ kutu u?”
21Pɔ̀ batɔ bɛpani si, “Ɔniliɛ mɛ gi ozimizi ye ɔkpasi i, ɔ́tratani kunugu yo kugu nite me e! Kitɛ ozimizi ye aaki si kuŋupoo kwiamɔ ɔ?”
Yudanɛ ma bázɛ Yesu aʋa ɛɛŋa a
22Gi Lisɔligba lɛ onu kudradra Liweŋaŋa nɛ lina ní Yerusalem i, lize kásasi le. 23Yesu azɛɛga aza ní Lisɔligba lɛ kapɛa lia gi bizɛxwa si Salomo Ɔviva nɔ mɛ ɛ, 24lɛ Yudanɛ ma gi bɛklani yɛ ɛ, beʋi ye si, “Kɔzɛna ni lipoe woli onu wɔavu blo odu liboe me modramodra na a? Xe wɔ wonu Kristo ye e, dra lɛ mɛ ki blɔ faã.”
25Yesu ebu le onu si, “Masi mlɔ kóko, pɔ̀ mlázi mɛ aʋa aŋa a. Axwɛ ana gi mawa gani Mɔka Aya yɛ kigaglaɛ mɛ ɛ, ɛɛpani ní mɛ onu kooko; 26pɔ̀ mlázi mɛ aʋa aŋa a, gi aní mɛ iʋesi mlenu loso o. 27Mɛ iʋesi le izeenu liboe lɛ gi mizɛɛsi lɛ ɛ; Mete le, lɛ izeeku ni mɛ kude e. 28Maki lɛ ligbã́ moblo le, lɛ ítratse liwewe e. Ɔnɔnɔ ɔ́tratani lɛ kuʋa kuzɛ ní mɛ awla a. 29Mɔka gi yɛ akɔ lɛ aki mɛ ɛ, ekeme asani ba petee, lɛ ɔnɔnɔ ɔ́tratani lɛ kuʋa kuzɛ ní Mɔka awla a. 30Mɛ ni Mɔka Aya kunu kidɔ tile.”
31Lɛ Yudanɛ ma bɛtá akla dzɛ si bɛɛsa yɛ ɛ. 32Pɔ̀ Yesu asi ba si, “Mabitɛ bidɔ gbã glegle ní mlɔ kusi gi Kaka Aya aki mɛ si mibitɛ ɛ, bɛ mɛ biwoli su mlɛpɛ si mlɛɛsa mɛ akla na ɛ?”
33Yudanɛ ma bebu le onu si, “Kúpɛ si kusa wɔ akla kɔkpɛ wɔ eboe gbã na, pɔ̀ kɔkpɛ wɔ ebusioboe la loso o! Ɔnɔ ko wo nu, pɔ̀ wɔpɛ si wubitɛ isu ya si wo nu Aya a!”
34Yesu ebu le onu si, “Aní kiŋwlimi bɛŋwlimi kpɛ ní mlɔ tutɔ mlɔ ɔsã nɔ mɛ si, Aya apani si, ‘Mlalɛ ŋwisi Aya ba na a.’ 35Kwite si kuŋwlimi yɔ kuli kɔ mɛ kɔ tsini kanɔmɛ anɔmɛ; lɛ Aya axwa banɔaklɔ si balɛ ŋwisi Aya ba, gi benu banɔaklɔ gi ba Aya aki yɛ liboe le e. 36Mɛ kɔ ɛ, kikyá Aya akya mɛ xe atsisi mɛ ní kelea mɛ ɛ. Kitɛ mɛ mlaatani kudo si medo libusioboe gi mapani si menu Aya Yebi i? 37Kɔlɔ mlakízi mɛ aʋa aŋa a, xe máʋibitɛ ní Mɔka Aya yɛ kupɛpɛɔ aʋa a. 38Pɔ̀ xe mabitɛ ní kɔ aʋa ɛ, xe mlázi mɛ aʋa aŋa fɛ ɛ, mlazi mɛ axwɛwawa la tete xunyɔ aʋa aŋa, tɔ mlaate le dɔni abla kɔtsinɔ si Kakaa Aya ɔlɛ ní mɛ mɛ̀ lɛ malɛ ní Kakaa Aya mɛ ɛ.” 39Dzɛ ɛ, bɛpɛ si beevu Yesu, pɔ̀ edo ní ba awla a.
40Lɛ Yesu edzi atsa Yordan Onipe lo o, xe atrɛ niklɔ gi Yohanes azaakpɛ kuni yo aki banima kutɔpu yɔ ɛ, lɛ eze ní niklɔ ɛ. 41Banɔ glegle bɛba yɛ klɔ. lɛ bɛpani si, “Yohanes ɔ́bitɛ linugutseboe tɔtɔ, pɔ̀ liboe kakaa gi apani ní onyime liɛ ya su i, lilɛ lɛ mɛ.” 42Lɛ banɔ glegle níklɔ, bɛzi yɛ aʋa ɛɛŋa ɛ.
Iliyochaguliwa sasa
Yohan 10: avn
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
