Luglaa 13
13
Abram ni Lɔt dɔŋa bargaa wia
1Awia, Abram kpogli u haaŋ, di paa u kuna maa di lii Ijip hɛri, di la Nɛgɛv. Lɔt ge izi di hiŋ baa. 2Abram faa ɛɛ dɔɔnnɛ werge. U faa dɔɔ kundɛɛzaa, saliŋhuŋŋa ani salmaa werge.
3U faa izi Nɛgɛv vol di ra la bɔra guŋŋ ka ga hel Bɛtɛl, bɔr la uŋ faa felee so, a Bɛtɛl ni Ai baambaaŋ la.#Lug 12:8 4Denii Abram faa ma mbusu lizibɔr, di jaami Kɔraawiizi la.
5Abram ni Lɔt n faa ra la la, Lɔt gba dɔɔ peeza, nauna ani tantizii. 6Ka hɛri la ge sela diiribɔr faa waa kaŋ bá maa wer so de, dikuubɛɛwiai, ba faa dɔɔ selaa werge. 7Awia, kalu faa chol Abram senɔɔna ani Lɔt hora ni. A saŋa, di Keenan ni Pɛriz hina maa sogo a hɛri.
8Awia, Abram faa ŋɔ Lɔt be, “Yaa ɛɛ lullaa. A waa dɛkkɛ yaa n na naa gɛɛ yaa senɔɔna n na naa. 9A hɛri maa waa yaa sibɔɔ chɔɔwɛ lɛiyaa? Yá bargi. Di i daŋ la nomɛɛl, n daŋ la nodig, di i daŋ la nodig, n ge daŋ la nomɛɛl.”
10Denii Lɔt binni Jɔɔdan Waluu la, di de dɔɔ nii guŋŋ di ga lii bol la banna yir Zoa, de hɛri du wer werge alugɔ Kɔraawiizi kambol#13:10 Kɔraawiizi kambol ɛɛ Ɛdɛn kambol. la ani Ijip hɛri. A saŋa, di Kɔraawiizi haa waa Sɔdɔm ni Gɔmɔra chɔkkɛ.#Lug 18—19 11Awia, Lɔt lizi Jɔɔdan Waluu la, di izi kaali wiifurii. Gunnɛ ba nɛra banɛɛ faa bargi dɔŋa ni. 12Abramwaa faa so Keenan hɛri, ka Lɔt ga so a waluu bolzenaa biini, di baŋzi u tanti diini dugli bolzeŋ bɛl banna yir Sɔdɔm. 13A bol naa hina faa ɛɛ biinikpola hinaa werge maa, di ra ɛɛ wichɔgaa ra zuu Kɔraawiizi ni.
Abram n izee ga so Hɛbrɔn wia
14Lɔt n kaalɛɛ la, Kɔraawiizi ŋɔ Abram be, “Binni hɛri naa maa n barii naa di na. 15N daŋ kpa u maa di tɛɛ i ni i naanna maa, ú ɛɛ ii hor di hanna la. 16N daŋ kaa gil i naanna wazi alugɔ hɛɛhriichaa. Di nɛr maa daŋ wer kur hɛɛhriichaa, guŋwaa, ba daŋ wer kur i naanna gba! 17Awia, gaagi a hɛri maa di na, dikuubɛɛwiai, n kpaubuu di ra tɛi.”
18Awia, Abram panzi u tantizi, di izi ga so dugli Mamrɛ daazenaa n du Hɛbrɔn, di ma mbusu lizibɔr de tɛɛ Kɔraawiizi.
Iliyochaguliwa sasa
Luglaa 13: vag
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.