Ayubu 34:16-30

Ikiwa una ufahamu, sikia neno hili; Isikilize sauti ya maneno yangu. Je! Atatawala mtu aichukiaye haki hata mmoja? Nawe, je! Utamhukumia mkosa aliye na haki na mwenye nguvu? Je! Inafaa kumwambia mfalme, Wewe u mwovu? Au kuwaambia wakuu, Ninyi ni wabaya? Sembuse yeye huwajali nyuso za wakuu, Wala hawajali matajiri kuliko maskini? Kwani wote ni kazi ya mikono yake, Hufa ghafla, hata usiku wa manane; Watu hutikisika na kwenda zao, Nao mashujaa huondolewa pasipo mkono wa mtu. Kwani macho yake yako juu ya njia za mtu, Naye huziona hatua zake zote. Hapana hofu ya giza kuu, mahali wawezapo kujificha watendao udhalimu. Kwani yeye hana haja ya kumfikiria mtu zaidi, ili aende mbele za Mungu ahukumiwe. Yeye huwavunjavunja mashujaa pasipo kuwachunguza, Na kuwaweka wengine mahali pao. Kwa sababu hiyo yeye huyatafiti matendo yao; Naye huwapindua usiku, wakaangamia. Yeye huwapiga kwa sababu ya uovu wao, Waziwazi mbele ya macho ya wengine; Kwa sababu walikengeuka, wasimfuate yeye, Wasikubali kuzishika njia zake hata moja; Hata wakafanya kilio cha maskini kumfikia, Naye akasikia kilio cha hao wateswao. Akitoa utulivu yeye, ni nani awezaye kuhukumia makosa? Akificha uso wake, ni nani awezaye kumtazama? Kama hufanyiwa taifa, au mtu mmoja, ni sawasawa; Ili huyo mpotovu asitawale, Wala pasiwe na wa kuwatega watu.