Matayo 23
23
Yesu ikenyela avigisi va indagilo na Avafalisayo
(Maliko 12:38-39; Luka 11:43, 46; 20:45-46)
1Ndawe Yesu avalongelige vamalugu pamwi na vanyigendo vakwe, 2“Avigisi va indagilo na avafalisayo, vateng'eme mukigoda cha Musa. 3Ino nyenye mupigage na ukwinatila chevakuvalongela, neke sikila chevavipiga, pakuva vavidalika neke valemwe ukupiga sevavidalika. 4Vaviwopa ifitegulo ifisito, fyesifihwaniti pakutegulwa na ukuvatwika avayawo mumavega neke avene sivigela nambi ukupamisa nave na chala hela. 5Vavipiga ifipigo mbefili ifyo sambi vawoneke na avanu. Pakuva vavifwala ifibawo ifipabate finya uwandike uwa indagilo muwusu na mumawoko na ukutalifya inoto na amadunguli mumyenda jawo. 6Vaviwenda ukuteng'emala apanofu mumbungo, na ukuteng'emala mufigoda ifinofu mumasinagogi. 7Vaviwenda ukuhungilwa unofu mumakasi na ukukemelwa, ‘Mwigisi.’ 8Neke nyenye mulakemelwa ‘Mwigisi’, pakuva mwina mwigisi yumwi swe, neke nyenye mbemuli mwilukolo hela. 9Kangi mulamukemela umunu ‘Dadenyu’ mung'i pakuva mwinadadenyu yumwi yealikuchanya. 10Kangi mulemwage ukukemelwa mwivalongola pakuva mwina mulongola yumwi nave ye Kilisito. 11Ye iva muvina mwanyenye ava mukami venyu. 12Ye akwivinia, Nguluvi amulevesa, neke yeakwilevesa uyo Nguluvi saamuvinia.
Yesu akuwukenyela uwubuganisi wawo
(Maliko 12:40; Luka 11:39-42, 44, 52; 20:47)
13“Ino mwinalyo nyenye nye vigisi va indagilo na avafalisayo, nyevabuganisi pakuva mwamwidinda imilyango ija ku wutwa uwa kuchanya pamiho ga vanu, kono nayi nyenye we simukwingila umo nda, kangi mukuvatanila vala avigela ukwingila.”
[ 14“Mwinalyo nyenye mwe vigisi va indagilo na Avafalisayo nyevabuganisi! Pakuva mwamwihiisa nu kulya mukaye sa avang'inetu avafwile mwiva nda mwivanu vanofu, pemukwifunya lusika. Na kwa lulo samuhigwa pakomi.]
15“Mwinalyo nyenye nyevigisi va indagilo na avafalisayo nyevabuganisi mwilowong'asa ing'i na inyanza sambi mumupitule umunu yumwi na peyeapitwike mukumwambusa ave munu va ukwingila kwitemela lya umoto kavili ukulutila nyenye.”
16“Mwinalyo nyenye nyevalongosi nyevabofu! Nyenye mwitigilaga wone umunu ilapile itembeli ulo nda sikinu; neke wone ilapile isahabu ya itembeli ulwilapo ulo lukumwibata. 17Nye nyevabofu nyevapufi! Pakuva ikikomi hilo kiki isahabu na itembeli iyayiwuyapa iyo isahabu yive nzelu? 18Kangi mwitigila wone umunu ilapile pifunyo sikinu; neke wone umunu ilapile ikitawulwa ikivike pachanya pifunyo ulwilapo ulo lumwibata yumwene. 19Mwivabofu nyenye! Mbi kilikwi ikikomi, ikitawulwa kila na pifunyo pepapiwuyapa icho ikitawulwa kiva chelu? 20Ino yula ye akwilapila pifunyo akwilapila mbefili ifivike baho pachanya. 21Na yeakwilapila itembeli uyo akwilapila yiyo itembeli na kangi kwa yuyula yeakwikala mumo. 22Na yeakwilapila kuchanya ilapye kwa ikigoda cha uwutwa cha Nguluvi, na kulumwene yeateng'eme baho pachanya. 23Mwinalyo nyenye, nyevigisi va indagilo na avafalisayo! nyevabuganisi mwitawulaga kwa Nguluvi kimwi kufinyichumi kwa fye mwalimite, neke mulemwe ukwinatila indagilo ndawe uwugolofu, ukudegepela na ulufuuwo; iso sesaukupiga kono wesimwisemwa ukupiga na sisila isingi. 24Mwevalongosi nyevabofu! Ye mwamwihesaga inyasi mwisiva neke mumile ingamiya!”
25“Mwinalyo nyenye nyevigisi va indagilo na avafalisayo, nyevabuganisi, pakuva mwakofuga ifinywelo mwivala na inyelo kono mugati we mwiva mumemile ifinu ifya uwuposi nu wubi.” 26Veve ve Mufalisayo ve mubofu, tale tasi ukofuga ikinywelo na uluhelo mugati, neke na mwivala namo muva mwelu. 27“Mwinalyo nyenye nyevigisi va indagilo na avafalisayo nyevabuganisi pakuva mwindawe ifyanga ifihilive ifyafiwoneka finofu mwivala, neke mugati fimemile fisege ng'ani fya avafwe na uwaafu mbewuli. 28Ino nayi nyenye mwiwonekaga nda mwivanofu na mwivagolofu mwivala neke mugati mumemile uwubuganisi na uwananzi.”
Yesu akuvapavila ukuhigwa kwawo
(Luka 11:47-51)
29“Mwinalyo nyenye nyevigisi va indagilo na avafalisayo, nyevabuganisi, pakuva mwisengelelaga ifyanga ifya avavisi neke pe munose hilo ifyanga fya avanu avevagolofu. 30Mwitigila: ‘Wone twetuve twikwali ifilo fila ifya avadadetu sitwetuhanga mukuwulaga avavisi!’ 31Ino mwa kwiyolelela yi nyenye, ulwa nyenye mwivana va vawo vevavawulige avavisi. 32Ino, musindilise fila ifipigo fyevapigite avadadenyu! 33Nyevanzoka nyenye nyevana va inzoka mbi mukuluka ndawuli ukuhigwa kumoto? 34Ino nene nguvaletela avavisi, na avanu vanyandolo na avigisi, avangi mwavawo muvawulaga na ukuvatumbika, na avangi samuvapunanga mumasinagogi na ukuvahakilisa kwivala ukuhuma mumasinagogi genyu nu kuvatesa mu boma mbesili. 35Ino ukukola lulo, mwisokamwa ukwimila idanda mbeyili ya avanu avagolofu yeyabohwike mung'i. Na hilo, ukuvangila ukuwulagwa kwa Abeli yee simwananga kinu, mbaka kwa Sakaliya umwana va Belekiya, yemwamuwulige pagati pa itembeli na pifunyo. 36Nachene nguvalongela, imbegalo iyi yihigwa ukwimila isi mbesili.”
Uwende wa Yesu ku Yelusalemu.
(Luka 13:34-35)
37“Ve Yelusalemu, Yelusalemu! wawiwulaga avavisi na ukuvakinya na maganga vala avatume kwa veve. Mbi kalinga nene ndavakong'ise nyevanangu pamwi ndawe ing'uku lweyayikong'asa ifiswiya mumapiko, neke pe mubihile. 38Ino mulavage ikaye yenyu yilesilwe wukiva. 39Pakuva nene nguvalongela sisa mumbona kangi mbaka pesamutigila: ‘Afunyililwage yula ye akusa mwitawa ilya Umutwa.’”
Iliyochaguliwa sasa
Matayo 23: HeNT2004
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kihehe New Testament © Bible Society of Tanzania, 2004.
