Matayo 11
11
Avatume uluhuma kwa Yohane umubatisi
(Luka 7:18-35)
1Nave Yesu peasinzile ukuvalagisa avanyigendo avanyichumi na vavili ahele kuwutalo kukwigisa na mukudalika muboma sawo.
2Neke Yohane ave ipulika we ali mundinde ifipigo fya Kilisito, avatumige avanyigendo vakwe vakamuwuse. 3Ndawe vatigilige kulumwene, “Veve ye mwene ye akusa apangi tusindilage yungi?” 4Yesu ndawe avapitulige, “Mubite mukamulongele Yohane fye mwipulika na fye mukufiwona: 5Avabofu vilava, avatevafu vigenda, avanyawukoma viteleswa, avadibafu vipulika na avafwee visilibuka, na avamikaa vidalikilwa Ulukani Ulunofu. 6Na mufunyilile yula ye nene singumuvifya.”
7Nape vahesile avanyigendo va Yohane, Yesu avanzile ukuvawusa vamalugu ulwa Yohane, “Nyenye mwemuhele ku balali kula kukulava kiki? Ulusoli pelwipugwa na ing'ala? 8Ino mwemuhele kwekiki? Kukulava umunu ye afwite imyenda iminofu ija lutogo? Mulavage avavifwala imyenda iminofu ija ulutogo vali mukaye sa uwutwa. 9Ino mwemuhele kwe kiki? Kukulava umuvisi? Nachene nguvalongela na yalutye kulumuvisi.
10“Uyu ye mwene umwandikile ulwa mulavage, ‘Nene ngumutuma umulongola vangu pamiho gako, ye awuyapa ing'asi yako pawulongolo pa veve.’ 11Nachene nguvalongela umunu umwegalwa na umung'inetu, siealawoneka yealutye kwa Yohane umubatisi. Neke yula ye iva mudodo ku wutwa uwa kuchanya ava muvina ukulutila Yohane. 12Ukuhuma mufilo ifya Yohane umubatisi mbaka neng'ino uwutwa uwa kuchanya wa wiwoneka kwa ludali na avanu avanyaludali vakuwutegula kwa kukangala. 13Pakuva avavisi mbevali na sindagilo isa Musa vavilite mbaka imisika igi. 14Neke wone muhwane ukwidikila, sweno Yohane ye Eliya, yeakala ase. 15Umunya mapulikilo, apulikage!
16“Ino nene nziganisa na kiki imbegalo iyi? Yi ndawe avana avateng'eme pa wugusikiso swe vikemesa avayawo: 17‘Twakufile ingulugulu isa uluwungo si mwadufili. Twakoolite ingoolo isa ikivembo simwavembiti!’ 18Pakuva Yohane aasile sialisigi nambi kunywa neke vatigile ‘Ina lisoka.’ 19Umwana va umunu aasile ilya na ukunywa neke vatigile, ‘Mulavage muhatufu kangi mugaasi, umunya wiyendi na avakong'asa imbemenenge na avanya nzanangifu!’ Nave ndahihyo uluhala lwa Nguluvi lwalwikagulanika mufipigo fyakwe.”
Iboma ingaya lufuuwo
(Luka 10:13-15)
20Ndawe avangige ukukenyela iboma sila kwe apigite imiitu, pakuva sivapesili inzanangifu sawo. 21“Winalyo veve Kolasini! Winalyo veve Betisaida! Pakuva imiitu ijo je give gipigike ku Tilo na ku Sidoni, vevava vapesile idaha inzanangifu kwa ukufwala amagunila na ukwibaka ikifu vawoneke ulwa yevahongise na ukupela. 22Ino nene nguvalongela nyenye pa ikimunyi, icha ukuhigwa, Nguluvi saavahiga pakomi nyenye ukulutila avanu avanya ku Tilo na ku Sidoni. 23Nayu veve Kapelenaumu, wisaka wivinie mbaka kuchanya? Sa usindikwa panyi mbaka ku vafwe! Pakuva imiitu gila je givegipigitwe ku Sodoma iboma iyo yeyiva poyili mbaka neng'ino. 24Ino nene nguvalongela nyenye paikimunyi icha ukuhigwa, Nguluvi alavadegepela avanya ku Sodoma neke sinyenye nda.”
Muse kwa nene mukasuupe
(Luka 10:21-22)
25Ndawe ulusika lulula Yesu atigilige, “Ngukulumba veve Dada, Mutwa va kuchanya na mung'i, ulwa veve wavafihite ifinu ifi avanyaluhala na avasugu neke uvalagile ifi avana fyali. 26Ena, Dada vangu, pakuva ulu lwe luhekelelo pamiho gako.”
27“Dada vangu amelye mbefili. Asukuli ye amusele umwana pesi Dada, kangi asukuli yeamusele Dada pesi umwana na yula umuhagule na umwana ye awenda ukumulagila. 28Muse kwa nene, nyenye mbemuli ye mwifwaha na ifitegulo ifisito nene ndivanenula sambi musuupe. 29Mufwalage ulupanda lwangu, mwiyigise kwa nene pakuva nene ndimugaya kwivinia munumbula na yinyenye mwinoma mumitima jenyu. 30Pakuva ulupanda lwangu silusito na ikitegulo changu kipefu.”
Iliyochaguliwa sasa
Matayo 11: HeNT2004
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kihehe New Testament © Bible Society of Tanzania, 2004.
