Mateo 2

Is Menge Memimituen

1Diyà si Jesus ianak te inged he Bitlihim, te prubinsya he Hudiya zutun te timpu te kedhadì te aney en he hadì he egngezanan ki Hirudis. Ne zutun te vatè pa utew si Jesus, nekeuma ziyà te Hiruselim is menge memimituen. Diyà sikandan ebpuun te meziyù he inged diyà te edsilaan. 2Ne in-insè dan ke, “Hendei ianak kes midtagnà he vatà he ebpekehadì te menge etew he Hudiyu? Neehè dey is kedlepew te vituen he iyan tuus te ked-enaka kandin ne tenged kayi midhendini key su ed-ezapen dey sikandin.” 3Ne hein nezineg heini ni Hadì Hirudis nesemukan is gehinawa zin wey is tivuuk he tigHiruselim. 4Ne midtig̵um ni Hirudis is langun he pengulu te menge memumuhat wey is menge menunudlù te kesug̵uan. Ne mid-insaan din sikandan ke, “Hendei id-anak kes mibpilì te Megbevayà he ibpahadì sumalà is kedtegnaa zengan?” 5Ne midtavak dan te, “Diyà sikandin id-anak te inged he Bitlihim, te prubinsya he Hudiya. Egketuenan ta heini su zuen insurat he Lalag te Megbevayà pinaag̵i te ebpeneuven dengan he egkag̵i te,

6‘Sikiyu is menge tigBitlihim he ziyà ed-ubpà te prubinsya he Hudiya,

egkevantug daan is inged niw iring te zuma he menge inged diyan te Hudiya

su ziyà te keniyu ebpuun is edhadì te menge sakup ku

he menge kevuwazan ni Israyil.’ ”

7Ne si Hirudis, hein nezineg din haazà midtawag din kes nemekeuma he memimituen. Ne hein iyan dà duma zin haazà is menge memimituen, mid-insaan din ke keenu medlepew is bituen he neehè dan. 8-10Ne hein netuenan ni Hirudis, midteleenan din te ibpeey-eyazan kandan te ebpen-ahà is batà ne ke sikandin te, “Emun egketuredu niw, ipetueni niw kediey su wey ku meturedu su ed-ezapen ku zaan.” Ne zutun, impelaus sikandan diyà te Bitlihim. Ne zutun migenat haazà is menge memimituen ne hein diyè dan en te zalan neehè dan en maan kes bituen he iyan kes bituen he neehè dan he midlepew ziyà te edsilaan. Ne nelipey zan utew hein neehè dan en maan. Ne mibpetundug kandan haazà is bituen, ne zutun medteren te renged te valey he zutun kes batà. 11Ne hein midseled dan dutun te valey neehè dan haazà is batà wey is iney zin he si Maria. Ne midluhud dan su ed-ezapen dan haazà is batà. Ne zutun impelepew zan is menge kavan he zutun itagù is ketig̵eyunan dan ne mibeg̵ayan dan sikandin te vulawan wey menge mahal he mehemut he beyewà wey mira.

12Ne impesavut kandan te Megbevayà pinaag̵i te teg̵einep he kenè dan en medlikù diyà te ki Hirudis. Ne tenged kayi, wazè dan en med-ikul zuen te imbayè dan dutun te ked-ulì dan.

Is Kebpelag̵uy Pehendiyà te Ihiptu

13Ne hein migenat en kes menge memimituen, mibpeteg̵einep en maan ki Jose is belinsug̵uen te Nengazen he egkag̵i te, “Enew kad, Jose. Ne uwita nu heeyan is batà wey iney zin ne pelag̵uy kew pehendiyà te Ihiptu. Ne zutun kew tag̵ad taman te kenè ku pa sikew egkeg̵iyan. Su ebpenahaan ni Hirudis heeyan is batà su edhimetayan din.” 14Ne zutun mid-enew si Jose, ne mid-uwit din haazà is batà wey si Maria, ne migenat dan dutun te mezukilem pehendiyà te Ihiptu. 15Ne zutun dan med-ubpà taman te minatey en si Hirudis.

Egkeulaula zan heini su egketuman kes netagnà he migkag̵i te Nengazen pinaag̵i te ebpeneuven dengan he ke sikandin te, “Mid-umew ku is Anak ku he ibpaawà puun te Ihiptu.”

Is Kebpenhimetayi te Menge Vatà

16Ne hein netuenan ni Hirudis he mid-akal zà kandin kes menge memimituen, nepauk utew. Ne insug̵ù din he ibpepenhimetayan is langun he menge vatà he maama he ebpenuig̵en te zezuwa he tuig wey minus pa zutun te tivuuk he inged te Bitlihim wey is menge siringan dutun he inged. Midhimu zin heini su wey mepatey si Jesus su zezuwa en he tuig is kelug̵ayad puun te kegkeahaa te menge memimituen duen te vituen.

17Ne pinaag̵i zutun netuman kes netagnà dengan ni Jeremias, kes ebpeneuven te Megbevayà su migkag̵i si Jeremias te,

18“Duen meg̵urub he egkezineg ta ziyà te inged he Rama.

Egkezineg ta is edsineg̵ew wey ebpemenderawit

su edlendag̵an ni Rakil is menge anak din.

Edsineg̵ew ne wazè en ebpekelangan kandin

su is menge anak din naawè en.”

Is Ked-ulì Diyà te Israyil

19Ne hein minatey en si Hirudis, mibpeuman mebpeteg̵einep ki Jose is belinsug̵uen te Nengazen he migkag̵i te, 20“Enew kad, Jose, ne uwita nu heeyan is batà wey is iney zin ne ulì kew ziyà te tanà he Israyil su minatey en sikan is edhimatey pezem keniyan te vatà.” 21Ne mid-enew si Jose ne miduma zin haazà is batà wey si Maria is iney te vatà ne mid-ulì dan diyà te tanà he Israyil.

22Ne hein netuenan ni Jose he iyan hadì diyà te Hudiya si Ergilau he nekesunud te amey zin he si Hirudis, midlevayan dan is prubinsya he Hudiya su nahandek dan. Ne tenged te mibpeteg̵einep is Megbevayà he edsambag ki Jose, midlaus dan diyà te prubinsya he Geliliya. 23Ne ziyè dan med-ulì te inged he egngezanan te Neserit. Umba neulaula zan heini su egketuman is netagnà dengan te menge ebpeneuven te Megbevayà su nekag̵i zan he egngezanan si Jesus he tigNeserit.

Iliyochaguliwa sasa

Mateo 2: mbbNT

Kuonyesha

Shirikisha

Nakili