Mistari Maarufu ya Biblia kutoka Kusintii Andunya 1

Shirikisha

Si anyiɛ nɔ Ilaaɔ̃ í ni, ka taka amanɛ si yaasei awa taka nwa, nɔ ku jɔ wa, ku jɛ inɛ ngbo si cɛ̃ɛi tenku ŋa do si yɛi ŋa do si mɛɛmui inɔ ilu ŋa, do si iŋa hai nɛ nto ŋa fei, hee do si ilɛ fei. Ilaaɔ̃ í taka amanɛ í jɔ nŋu takaɛ mam mam. Í taka inɛmɔkɔ do inaabo.

Nɔ Ilaaɔ̃ í wee nŋa í sɔ̃ ŋa í ni, i bí ku kpɔ ŋa, ilɛ fei ku kɔ̃ nɔ ku jɛ tu ŋɛ, nɔ i maa jɛ inɛ ngbo si cɛ̃ɛi inɔ inyi ŋau do si yɛi ŋa do si mɛɛmu ŋa iyi à wa si ilɛu ihɛ̃ fei.

Hai sinte Ilaaɔ̃i í taka lele do ilɛ.

Ilɛ í wɛɛi wo kù nɛ yaase, nkãma kù wa si. Inyii wa tɛ bii fei nɔ ilu kuku í biiɛ. Do lelei inyiu bɛi hundei Ilaaɔ̃ í ya maa yaa.

Ŋɔi Ilaaɔ̃ í ni, inya kumá ku ce, nɔ inya kumá í ce.

Nɔ Ilaaɔ̃ í cɔ mii iyi nŋu í ce fei, nɔ í yɔɔ iyi í sĩa jiida jiida. Si bɛɛbɛi í ceò alɛò daakɔ nɔ í jɛ ajɔ mɛɛfasia.

Nɔ Ilaaɔ̃ í yɛ inya kumáu í sĩa, nɔ í fɛɛfɛ inya kumá do ilu kuku.

Nɔ Ilaaɔ̃ í ni, i cɔ, fɔfɔ ŋa do iju nŋa ŋa iyi à ya fita si ilɛ fei hee do jĩi ku so ŋa fei, ǹ mu nŋɛi ku jɛ ijɛ nŋɛ.

Nɔ í kpe inya kumáu dasã, ilu kukuu mɔ idũ. Si bɛɛbɛi í ceò alɛò daakɔ, nɔ nŋu bɛi í jɛ ajɔ sinte.

Nɔ Ilaaɔ̃ í ni afe ku ce ku kpɛ̃ lele do inyiu.

Bɛɛbɛ mɔi an jɔ̀ mii ku nɛ ngbo iyi í ya fita si ilɛ fei ku jɛ ijɛi mɛɛmu ŋa iyi à wa si andunya fei, hee do yɛi ŋa fei, hee do iŋa hai nɛ nto ŋa fei do mii ilu hunde iyi í wa si ilɛ fei. Nɔ nŋu mɔ í ce bɛɛbɛ.

Nɔ Ilaaɔ̃ í ni mii ku má inya ŋa a maa má inya lelei Aɔ̃ bɛ a fɛɛfɛ dasã do idũ, nɔ a jɛ nyinda ŋa iyi aa nyisi waatii jingau ŋa do ajɔ do adɔ̃ ŋa.

Si anyiɛ nɔ Ilaaɔ̃ í ni mii tũtũ ku fita ku bii ilɛ, hai fɔfɔ ŋa do iju nŋa ŋa hee do jĩi ŋa iyi aa ya maa so. Aŋa fei aa ya maa soi si dimi nŋa ikã ikã. Nɔ inɛ nŋu mɔ í ce bɛɛbɛ.

Nɔ nŋu mɔ í ce. Bɛɛbɛi Ilaaɔ̃ í ce í taka afe í fɛɛfɛò inyi iyi í wa lele do iyi í wa ilɛ.

Nɔ mii tũtũ í fita si ilɛ, hai fɔfɔ ŋa do iju nŋa ŋa, hee do jĩi ŋa iyi à ya maa so si dimi nŋa ikã ikã. Nɔ Ilaaɔ̃ í yɔɔ iyi bɛɛbɛ mɔ í sĩa.

Ilaaɔ̃ í ce mii nla minji iyi à ya maa má inya. Í ce inunu iyi í la í re ku jɛ ti dasã, cukpa mɔ iyi kù toou ku jɛ ti idũ. Nɔ í ce leleaɔ̃ ŋa má.

Nɔ Ilaaɔ̃ í ni má, inyi iyi í wa abɛi afeu ku tɔtɔɔ inya akã, nɔ ilɛ ngbɛ mɔ ku wɛɛ ikã. Nɔ nŋu mɔ í ce bɛɛbɛ. Nɔ Ilaaɔ̃ í kpe bii í gbɛu ilɛ nɔ í kpe bii inyi í tɔtɔɔu mɔ tenku. Nɔ Ilaaɔ̃ í yɛ iyi nŋu mɔ í sĩa.

Si anyiɛ ŋɔi í wee nŋa í ni, i bí ku kpɔ ŋa hee tenkuu fei ku kɔ̃, nɔ yɛi ŋa mɔ a kpɔ si andunya.

Nɔ Ilaaɔ̃ í ni iŋa dimi ikã ikã fei ku ce si ilɛ, hai mɛɛmui inɔ ilu ŋa do iŋa hai nɛ nto ŋa do mɛɛmui sako ŋa, fei ndɛɛ fei ikã ikã. Nɔ bɛɛbɛi nŋu mɔ í ce.

Nɔ Ilaaɔ̃ í ni inyi ku ce mii ilu hunde nkpɔ nkpɔ si inɔɛ, nɔ yɛi ŋa a maa fo lele.

Ilaaɔ̃ í ce mɛɛmui sako ikã ikã fei si dimi nŋa, do mɛɛmui inɔ ilu ŋa, do iŋa hai nɛ nto ŋa. Nɔ í yɛ iyi nŋu mɔ í sĩa.