Texte de la Bible: Azumeina © Alliance Biblique du Tchad, 1999 Enregistrement du Nouveau Testament Azumeina ℗ 2012 Hosanna

Azumeina - 2012 Edition (NT) Drama

Azumeina Bible © Alliance Biblique du Tchad, 1999.

Vun til ma lum kavungô ma bei angufa ma a yum ala Pa’â na mi ar go. Nglo suma ngat buzuna azi ki suma hat gata a nga hal lovota á tchi Jesus, wani a nga le mandara suma.


Ata yi máma, Seitan mi kal kur Judas ma a yum ala Iskariyot-na, ni ma aduk suma dogo yam mbà máma. Mi i min zlad’a ki nglo suma ngat buzuna azi ki suma nglona hi suma ndjol gong nga kud’ora hAlonid’ina, ni nana ba, mi hazi Jesus abozi ge? Azi le furîd’a, a hlum vunazi á hum beged’a. Judas mi mina, nga mi hal lovota á hazi Jesus abozi bei ablau suma a wumu.


Ata yima bur ma vun til ma lum kavungô ma bei angufina nda’â, ni yima azi ngat tumiyôna Pa’â kuana, Jesus mi sun Pierre azi ki Jean, mi dazi ala: Agi i minî te ma Pa’â.
Azi djobom ala: Ang min ala ami minimizi ni lara ge?
Mi hulong dazi ala: Agi gologiya! Ata yima agi kalagi avona, agi mba ngavagi sana kageleng nga mbina kamu. Agi igi ad’um kur azì ma mam kal kuana. Agi dagi mi samazina ala: Ma hat suma mi dala: Gong nga akoi d’a an mba ni te Pa’â kua ki man suma hatid’a ni lara ge? Mam mba mi simad’agi gong nga ngol la yam ndrata akulo d’a a min ahlena pet nga kuad’a. Agi minigi ahlena kua. Azi iya, a fahlena d’igi mam dazi na, a min ahle suma te Pa’â kua.


Kid’a yina ndaka, Jesus mi kak avun tena ki mam suma a sunuzina. Mi dazi ala: Hurun hat heî á te Pa’â ki sed’egi avok ndak manda. Kayam ndata, an nga ni dagiya, an dok te ki sed’egi d’uo d’a, gak an mba ndagam vunam sä kur leud’a hAlonid’a.
Mi hle kopma, mi le mersi mAlona kamu, mi dazi ala: Agi vagi kop ma wana, b’rawagizi aduk tagiya. Kayam an nga ni dagiya, avok hî, an dok tche süm guguzlud’a ki sed’egi d’uo d’a gak Alona mba mi mba á te leu mamba.
Mi hlavungôna, mi le mersi mAlona kamu, mi mbrugum kä, mi haziziya, mi dazi ala: Ma wana ni hliwin [ma an hum mbei kagina. Ar agi lagi hina á djib’eregi kanu.
Bugol tena mi hle kopma hina mi, mi dazi ala: Ma wana ni vun ma djin ma awilina hAlona ma mi djinim ki buzuwan ma mba mi djang ngei kagina.] Wani gologiya, sama mi han abo sumina mi nga ki sed’en avun tena. Kayam an Gor Sana mba ni mit d’igi Alona mi ngandji kan na, wani ni zla d’a hohoud’a yam sama mi han abo sumina. A nde djop tazi ala ni nge adigazi ba, mba mi lahle ndazina ge?

Gagad’a tchol aduk suma hata ala ni nge ba, ma ngolâ adigazi ge? Jesus mi dazi ala: Amuleina handjaf sumina a nga te kaziya, suma a nga ki vun ma hed’ina a nga yazi ala Suma a le suma djivid’ina. Wani agi lagi na d’i, wani ma ngol ma adigagina, ar mi mbut ni d’igi gogor magina na; ma avogogina, ar mi mbut ni d’igi ma lagi sundina na. Ni nge ba, ni ma ngolâ ge? Ni ma nga kaka kä avun tenina, d’oze ni ma nga mi he tenina zu? Wani an nga adigagi ni d’igi ma le sunda na.
Wani agi suma vagi tagi ki an kur kuk mandina, an hagi leud’a ni d’igi Abun mi handji na mi, kayam agi tagi agi tchagi ki sed’en kur leu manda. Agi mba kagagi yam zlumiyô suma amula á ka sariyad’a yam andjafâ hi Israel ma dogo yam mbàna.


Jesus mi de kua ala: Simon, Simon, gola! Seitan nga mi tchen kagi á yigigi d’igi suma a yik awuna na, wani an tchen wa Alona kangû, kayam he gagazi manga kid’ak ki. Wani ata yima ang hulong kur lovot mangina, ar ang sira b’oziyongâ.
Simon mi hulong dum ala: Salana, an min tan á i dangeina d’oze á matna ki sed’engû.
Jesus mi dum ala: Pierre, an nga ni dangû, ahle’â mba mi hel ini d’uo tua d’a, ang mba tin vunang kan yang hindi ala ang wan nga d’i.

Jesus mi dazi kua ala: Kid’a an sunugi bei bid’im mba beged’a bei bid’imba ngola bei atuguruna asegid’a, na ni agi kid’agagi va zu?
A dum ala: Hawa!
Mi dazi ala: Wani ki tchetchemba, sama nga ki bid’im mba beged’a, mi yod’u, mi yo d’a ngola mi. Sama nga ki mbigeu d’a fiyaka d’uo na, mi gus baru mam mba ngola woyo, mi gus mbigeu d’a fiyaka. Kayam an nga ni dagiya, mbeî ahle suma a b’irizi kur mbaktumba hAlonid’a kan ala: A ndumum zlapa ki suma tchila yam gata na, a ndaga. Ahle suma b’irizi kana a nga ndaga.
Mam suma hata a dum ala: Salamina, gol mbigeu d’a fiyaka wan mbàna.
Mi dazi ala: Ndak wa.


Jesus ndabu mi i yam ahina d’a Olif-fa d’igi mam nga mi le teteu na. Mam suma hata a i ad’um mi. Kid’a mi mbaza kuad’a, mi dazi ala: Agi tchenegi Alona kayam agi tchugugi kur kuka d’i. Mi wal lei ki sed’ezi dubung d’igi sana mi gahinad’a na, mi grif kä, mi tchen Alona. Mi dala: Abunu, le ang mina ni, ang hle kop ma ayî ma wana woi kanu, wani ang le nata min manda d’i, wani ang le nata min manga. [Ata yi máma, malaikana mi tcholï akulo, mi mba á hum ad’enga. Kayam mi nga kur a’alîd’a, mi tchen Alona ki so tad’a, zumal la kamba nga d’i tol kä d’igi buzuna na mi.]
Kid’a mi tchen Alona dad’a, mi tchol akulo, mi i gen mam suma hata, mi fazi a nga burâ sena kä ki yor tad’a. Mi dazi ala: Ni kayam me ba, agi burugi sena ge? Agi tchologi akulo, agi tchenegi Alona, kayam agi tchugugi kur kuka d’i.


Kid’a Jesus nga mi de zla ndata tua d’a, ablau suma a mba atam ki ma a yum ala Judas-sâ, ni ma aduk suma hat suma dogo yam mbànina, nga mi tit avoroziya. Mi hut go gen Jesus á sobom vunamu. Jesus mi dum ala: Judas, ang han an Gor Sana woi abo suma ni ki vun ma sopa zu?
Ata yima suma ki Jesus-na a wahle suma a nga lena, a dum ala: Salamina, ami kazi ki mbigeu d’a fiyaka zu? Ma dingâ tu adigazi mi ka hum azongâ hi ma ngol ma ngat buzunina ta ndjufa woyo.
Wani Jesus mi hulong dazi ala: Agi aragiya! Ndak da’! Mi dom humamu, mi tchilimziya.
Jesus mi de mi nglo suma ngat buzuna azi ki suma nglona hi suma ngom gong nga kud’ora hAlonid’a ki suma nglo suma a mba á vuma ala: Agi mbagi ki mbuguyo suma fuyogeina ki tutuguyona abogi á van d’igi sama kula na ge? Burâ ki burâ an nga ki sed’egi kur gong nga kud’ora hAlonid’a, agi halan nga á ved’a d’i. Wani ki tchetchemba ni yi magina, nad’enga hi nduvundid’a mi.


Ata yi máma, suma a ve Jesus, a i ki sed’em hur azina hi ma ngol ma ngat buzunina. Pierre nga mi i ad’um sä woi hina dei. Ata yima azi vakud’a kä hur azina d’arâ, a kak kä avunad’u. Pierre mi nga adigazi mi. Gor ra sunda ti wumu, mi nga kaka kä avun akud’a. Ti golom baba, ti dala: Sama wana mi nga ki sed’em mi.
Wani Pierre mi tin vunam mi dat ala: Atchad’a, an wum nga d’i.
Bugol ndjö, sama dingâ mi wumu, mi dum ala: Ang nga ki sed’ezi mi.
Wani Pierre mi de mi sa máma ala: An nga ki sed’ezi d’i.
Bugol lera tu go, ma dingâ mi dala: Gagazi, sama wana mi nga ki sed’ezi mi, kayam mam mi ma Galile-na.
Wani Pierre mi dum ala: An we nga vama ang nga duma d’i.
Kid’a mam nga mi de zla ndata tua d’a, ata yi máma na wat, ahle’â mi hela. Salad’a mi pret tam mi gol Pierre. Pierre mi djib’er yam zla d’a Salad’a mi dumzi ala: Avok ahle’â bei hel ini tua d’a, ang mba tin vunang kan yang hindi ala ang wan nga d’uo d’a. Mi ndabua, nga mi hlizlik tchina ngingik.


Suma a ve Jesus-na a nga lazamu, a nga tom mi. Azi d’ud’um iram mbei ki barud’a, a djobom ala: Ang damiya, sama tongî nge ge? A dum zla d’a dinga ngola, a ngulum mi.


Kid’a yina fo dad’a, suma nglona hi Juif-fîna azi ki nglo suma ngat buzuna ki suma hat gata a tok taziya, a i ki Jesus ata yazi ma b’ak zlad’a, a dum ala: Le angî Mesi-yu ni, ang damiya.
Wani mi dazi ala: Le an dagi pî, agi mba hagi gagazid’a kan ndi. Le an djobogi pî, agi mba hulongôn ded’a d’i. Wani ki tchetchemba, an Gor Sana nga ni i á kak ata bik ka ndjufa hAlo ma ad’engîd’a.
Azi pet a dum ala: Na ni ang nAlona Goroma zu?
Mi dazi ala: D’igi agi dagi na, an ni mamu.
Azi dala: Ei halei ni glangâs ma me d’ei ge? Kayam ei tei humi zla d’a ndavunamba ki humeya.

Sikiliza Luc 22