text: copyright The Konta New Testament The Word for the World,  audio: copyright The Konta New Testament ℗ 2018, Davar Partners International 

Ooratsa C’aak’uwa Kontaso Doona

ዬሱሲ ሂኒ ኢያርኮ ካታማ ጌሊዴ፥ ሄዋና ኣ ዴዔ። ሱንይ ዛኪዮሳ ጌቴቲያ ኢቲ ዱሬ ቢታኒ ሄዋን ዴዔ። ኢካ ቃራፂያዋንቱሲ ካፑዋ። ዛኪዮሲ ዬሱሳ ጌቴቲያዌ ሃቃዌንቶ ቤዓናው ኮዪሺን ቃን ጊዴዳዋ ዲራው፥ ኣሳ ጮራቴፔ ዴንዶዋን ቤዓናው ዳንዳዪቤና። ዬሱሲ ሄ ኦጊያና ኣያ ዲራው፥ ሲንው ኣዴ ኢቲ ቦዒያ ቦላ ኬሴዳ።
ዬሱሲ ሄ ሳዓ ጋኪዴ፥ ቁ ጊ ፑዴ ፄሊዴ፥ «ዛኪዮሳ፥ ሃቼ ኔ ጎሌን ፔሻናው ቤሲያ ዲራው ኤሌ ዎ» ያጌዳ። ኢካ ኤሌሊ ቦዒያፔ ዎዴ፥ ናሼቻን ዬሱሳ ሞኬዳ። ሄዋን ዴዒያ ኣሳ ኡባይ ሃዋ ቤዒዴ፥ «ሃዌ ናጋራንቻ ጎሌን ጌሊዴ ኢማ ጊዲዴ ሾቤታና ሃኔ» ጊዴ ኡባቱካ ዙዙን ዶሜዲኖ።
ዛኪዮሲካ ቃሲ ኤቂዴ ጎዳ፥ «ጎዳው፥ ሲሚ ታው ዴዒያዋ ኡባፔ ባጋ ሂዬሳቶ ኢማና፤ ኦፔኔካ ዎርዱዋን ኣኬዳዋ ጊዶፔ፥ ኦይዱ ዳኩዋ ኡዳዴ ዛራና» ያጌዳ።
ዬሱሲካ ዛኪዮሳው ኦዲዴ፥ «ኔኒካ ኣብራሃሞ ሼሻ ጊዲያ ዲራው፥ ሃቼ ኣቶቴይ ሃ ጎሌ ኣሳው ዬዳ። ኣያው ጎፔ፥ ኣሳ ናዓይ ባዬዳዋ ኮያናዉኔ ኣሻናው ዬዳ» ያጌዳ።


ኣሳይ ሃዋ ሲሲዴ ዴዒሺን ዬሱሲ፥ ሂኒ ዬሩሳላሜ ማቶ ዲራዉኔ ኡንቱንቶ ፆሳ ካዉቴይ ሃዒካ ቆንጪያዋ ማላቶ ዲራው ሌሚሱዋ ኦዴዳ። ሃዋዳን ያጊ ዶሜዳ፤ «ኢቲ ዎልቃማ ቢታኒ ባሬው ካዉቴ ቦንቹዋ ኣኪዴ ሲማናው፥ ሂኒ ሃኮ ጋዲያ ቤዳ። ባሬ ቆማቱዋ ጊዶፔ ታሙዋ ፄሲዴ፥ ኡንቱንቶ ታሙ ሚና ጌቴቲያ ሚሻ ኢሞዋሺን፥ ‹ታኒ ሲማዴ ያና ጋካናው፥ ሃሚሻን ዛሊዒሺቴ› ያጌዳ።
«ሺን ኣ ጋዲያ ኣሳይ ኣ ኢፆ ዲራው፥ ‹ሃ ቢታኒ ኑ ቦላ ካዉታናዳን ኑኒ ኮዮኮ› ያጊዴ፥ ጉዬና ኢ ዴዒያሳ ኣሳ ኪቴዲኖ። ጊዶፔ ኣቲን፥ ሃ ቢታኒ ካቴ ጊዲዴ ሂኒ ባሬ ጋዴ ሲሜዳ። ሄ ቆማቱ ሁጲያን ሁጲያን ኢ ኢሞ ሚሻን ዛሊዒዴ ኣይ ኬና ዎሴዲኖንቶ ኤራናው ፄሲሴዳ።
«ኮይሮ ቆማይ ሺቂዴ፥ ‹ጎዳው፥ ኔኒ ታው ኢሜዳ ታሙ ሚና ዎያ ታሙዋ ዴማዲ› ያጌዳ። ኣ ጎዳይ ኣ፥ ‹ሃያናሾ! ኔኒ ሎዖ ቆማ፤ ኔኒ ጉ ዬዉዋን ኣማኔቴዳዋ ጊዳዴ ቤቶ ዲራው፥ ታሙ ካታማቱዋ ቦላን ማታይ ኔው ኢሜቴዳ› ያጌዳ።
«ላዔያዌካ ሺቂዴ፥ ‹ጎዳው፥ ኔኒ ታው ኢሜዳ ኢቼሹ ሚና ጌቴቲያ ሚሻይ ኢቼሹዋ ዎዳ› ያጌዳ። ኣ ጎዳይካ ኣ፥ ‹ኔው ኢቼሹ ካታማቱዋ ቦላን ማታይ ኢሜቴዳ› ያጌዳ። ሃራ ሄዜንያ ቆማይ ሺቂዴ፥ ‹ጎዳው፥ ጩርቃን ፃፃ ዎዳ ኔ ሚሻ ሃዋ ቤዓ። ኣያው ጎፔ፥ ኔኒ ዎቤናሳፔ ኣኪያዋ፤ ዜራቤናዋ ቆይጪያ ሜቄ ባይና ኣሳ ጊዲያ ዲራው፥ ኔው ያያዲ› ያጌዳ።
«ጎዳይካ፥ ‹ሃ ኢታ ቆማይ፤ ኔኒ ሃሳዮ ቃላን ኔ ቦላ ታኒ ፒርዳና። ዎቤናዋ ኣኪያዋ፥ ዜራቤናዋ ቆይጪያ ሜቄ ባይና ኣሳ ጊዲያዋ ኤሮፔ፥ ታኒ ያዴ ታ ሚሻ ዎያና ኣካና ማላ፥ ኣዪሲ ዎሲያዋንቶ ኢማቤይኪ?› ያጌዳ።
«ጎዳይካ፥ ሄዋን ኤቆዋንታ፥ ‹ሃ ሚሻ ኣፔ ዎ ኣኪዴ ታሙ ሚናይ ዴዒያዎ ኢሚቴ› ያጌዳ። ኡንቱንቱካ፥ ‹ጎዳው፥ ኣው ታሙ ሚናይ ዴዔ› ያጌዲኖ።
«ኢካ፥ ‹ታኒ ሂንቴንቶ ኦዲያዌ፥ ዴዒያዎ ኡባው ጉጄታናዋ፤ ባይናዋፔ ቃሲ ሄ ዴዒያዌካ ኣኬታናዋ። ዬዉዋን ቃሲ ታኒ ኡንቱንቱ ቦላን ካዉቴናዳን ኮዬዳ ታ ሞርካቱዋ ታኮ ኣሂዴ ታ ሲንን ሹኪቴ› ጌዳ» ያጌዳ።


ዬሱሲ ሃዋ ጎዋፔ ካላ ሂኒ ዬሩሳላሜ ኬሳናው ባሬና ካሊያዋንቱፔ ሲንቲዴ ቤዳ። ዴብሬ ዛይቴ ጌቴቲያ ዴሪያ ማታን ዴዒያ ሂኒ ቤቴፋጌን ቢታኒያ ጌቴቲያ ሄራ ካታማቱዋኮ ሺቄዳ ዎዴ ባሬና ካሊያዋንቱፔ ላዓቱዋ፥ «ሂንቴንቱፔ ሲንን ዴዒያ ቄሪ ካታማቱዋ ቢቴ፤ ያ ሂንቴንቱ ጌሊያ ዎዴ፥ ኦኒኔ ቢሮ ኡቲቤና ሃሬ ማራይ ቃሼቲ ኡቴዳዋ ዴማኒታ፤ ኣ ቢሊዴ ሃ ኣኪ ዪቴ። ኦኒኔ ሂንቴንታ፥ ‹ሃዋ ኣያው ቢሊቴ?› ጊዴ ኦቾፔ፥ ‹ኢ ባሬ ጎዳው ኮሺያ ዲራሳ› ያጊቴ» ያጌዳ።
ኪቴቴዳዋንቱካ ቢዴ፥ ዬሱሲ ኡንቱንቶ ኦዶዋዳን ሃኒና ዴሜዲኖ። ኡንቱንቱ ሃሬ ማራ ቢሊያ ዎዴ ቤዒዴ ሃሪያ ጎዳይ፥ «ሃሬ ማራ ኣያው ቢሊቴ?» ያጌዳ። ኡንቱንቱካ፥ «ጎዳው ሃዌ ኮሼ» ያጊዴ፥ ሃሬ ማራ ዬሱሳኮ ኣሄዲኖ፤ ባሬንቱ ማዩዋ ኣ ቦላን ዎዴ ዬሱሳ ሃሪያ ቶጊሴዲኖ። ኣሳይካ ዬሱሲ ቢያ ኦጊያ ቦላ ባሬንቱ ማዩዋ ሂፄዲኖ።
ኢ ዴብሬ ዛይቴ ጌቴቲያ ዴሪያ ዱጌ ኣፊያ ኦጊያ ማቴዳ ዎዴ፥ ዳሮ ጮራ ጊዴዳ ኣ ካሊያዋንቱ ቤዔዳ ፆሳይ ኦዳ ማላታው ኡባው ናሼቲዴ፥ ባሬንቱ ኮሻ ቁ ኦዴ፥
«ጎዳ ሱንን ዪያ ካቲ ኣንጄቴዳዋ፤
ሳሉዋን ሳሮታይ ጊዶ።
ቃሲ ኪሊ ቃ ሳሉዋን
ዴዒያ ፆሳይ ቦንቼቶ»
ያጌዲኖ።
ኣሳ ጋርሳን ዴዒያ ኢቲ ኢቲ ፓሪሳዋቱ ዬሱሳ፥ «ታማርሲያዎ፥ ኔና ካሊያዋንታ ጮዑ ኦሪኪ» ያጌዲኖ። ኢካ ዛሪዴ፥ «ታኒ ሂንቴንቶ ኦዳይ፥ ኡንቱንቱ ጮዑ ጎፔ፥ ሹቻይካ ዋሳናዋ» ያጌዳ። ዬሱሲ ዬሩሳላሜ ማቴዳ ዎዴ፥ ካታማቶ ቤዒዴ፥ ዬኪዴ፥ «ኔ ሳሮታው ጊዲያዋ ኔኒ ሃቼ ኤራዲንቶ ሎዓ፤ ሺን ሃዒ ሄዌ ኔ ኣይፊያፔ ጌሜዳ። ኣያው ጎፔ፥ ኔ ቦላ ያና ዎዲ ዴዔ፤ ሄ ዎዴ ኔና ኢፂያዋንቱ ኔ ዩሹዋን ዲርሳ ዲሪዴ፥ ያፔኔ ሃፔኔ ዶዲዴ፥ ኔና ኡንዔያ ዎዲ ያናዋ። ኔናኔ ኔ ዲርሳ ጋርሳን ዴዒያ ኔ ኣሳ ሜንሬና። ፆሳይ ኔና ቤዓናው ዬዳ ዎዲያ ኔኒ ኤራቤና ዲራው፥ ኔና ኢፂያዋንቱ ሹቻ ኡባ ኢቱዋ ኢቱዋ ቦላፔ ዴንዴ ላላናዋ» ያጌዳ።


ሃዋፔ ካላ ዬሱሲ ጌሻ ጎሊያ ጌሊዴ፥ ዛሊዒያዋንታ ሄዋፔ ኬሴዳ። ዬሱሲ ዛሪዴ፥ « ‹ታ ጎሊ ፆሳ ዎሲያ ጎሊያ ጊዳናዋ› ጌቴቲዴ ፆሳ ቃላን ፃፌቴዳ። ሺን ሂንቴንቱ ኣ ፓኑዋ ጎንጎሉዋ ኦዲታ» ያጌዳ። ዬሱሲ ኡባ ዎዴ ጌሻ ጎሊያን ታማሪሲ ዴዒሺን፥ ቄሳቱዋ ካፓቱ፥ ሙሴ ሂጊያ ታማሪሲያዋንቱኔ ኣሳ ኣዪሲያዋንቱ ኣ ዎናው ኮዪኖ። ሺን ኣሳይ ኡባይ ኣ ሃሳያፔ ኢቱኔ ኣቴናን ሲሲ ኡቶ ዲራው፥ ኣ ዎያ ኦጊያ ኡንቱንቱ ዬዲኖ።

Sikiliza ሉቃሳ 19