Athpariya 2023 WBT (NT) Non-Dramatized

Athpariya 2023 WBT (NT) Dramatized

येसुङा माट्‌टुए, “छेम्‍बा डोक्, आङा खानि लोनाँनि, खोना याप्‌मि ठुँबा खोराङि ढुवारिक्‌लाम्‍मा भिट्‌रा लिक्‌निना, टरो आरकोलाम्‍मा ठाङ्‌युङ् लिक्‌युक्, हिट्‌नाम्‍बाक् याङ्‌काखुट् लोक् डाँका ए॥ टरो ढुवारिलाम्‍मा भिट्‌रा लिक्‍नाम्‍बाक् ठुँबा कापुबा ए॥ ढुवारिक् काकोबा याप्‌मिङा उन् लाउङ्‌सा ढुवारिक् ओङ्‌सुबिडुटु॥ हिट्‌नुङ् ठुँबाचिङा ओसोरा ओखेम्‍सुटु, हिट्‌नुङ् उठुँबाचिगा निङ् लाडुङ् छेम्‍डुचिचि, हिट्‌नुङ् हिट्‌नागा भारा खाट्‌टुचिचि॥ जब हिट्‌नाङा उन्‍ङाना सोब्‍बे उठुँबाचि भारा होट्‌टुचिचि, हिट्‌नुङ् उन् हिट्‌नागा ओटोप्‍माङ् ओटोप्‍माङ् लाम्‌टियुक्, हिट्‌नुङ् ठुँबाचिम्‍बाक् ओएङ्-ओएङ् रोक् उरिक्‍टुटु, पोङ्‌भोने ठुँबाचिङा ओसोरा मिसेन् उनिसुटु॥ ओडाङ्‌बा माले आरु खोनाङाना चा ओएङ्-ओएङ् ठुँबाचि ओलाम्‌टिनिगा, टरो हिट्‌नालाम्‍मा उपिन्‌युओखाट्‌युक्, पोङ्‌भोने हिट्‌नागाँगा सोरा ठुँबाचिङा मिसेन् उनिसुन्‍ना॥”
येसुङा हिट्‌नागा ना रिङ् मुन्‍डुम्‌ङि लोडुचे, टरो उन्‍ङा लोडुचिगा रिङ् हिट्‌नागाँ बुजा ओचोग्‍वाट्‌टुन्॥

हिट्‌नाड्‌डेउङ् येसुङा फेरि हिट्‌नागा लोडुचे, “छेम्‍बा डोक्, आङा खानि लोनाँनि, ठुँबा खोराङिना ढुवारिक् आङा डोक्॥ आङा नुङ्‌ना पाइले ओटायागा सोब्‍बे याङ्‌काखुट्‌चि लोक् डाँकाचि ए, टरो ठुँबाचिङा हिट्‌नागाँगा रिङ् ओखेम्‍स्‍वाट्‌टुन्॥ ढुवारिम्‍बाक् आङा डोक्, कोइ याप्‌मि आङालाम्‍मा भिट्‌रा लिगे भोने हिट्‌ना हिङ्‌युक्, हिट्‌नुङ् हिट्‌ना भिट्‌रा लिग्‌युक् हिट्‌नुङ् भारा होन्‌युक्, हिट्‌नुङ् हिट्‌नाङा खारकाङि चाराँ लिमा टोगुटु॥ याङ्‌काखुट्‌बा उम्‍टे याङ्‌खुट्‌मा, सेप्‍मा हिट्‌नुङ् जाखाम् चोक्‍मा एडोक् टायुक्॥ आङाउम्‍टे हिट्‌नागाँ चोला ओटोगु, हिट्‌नुङ् हिट्‌ना औधि जोम् ओटोगुवाक् नुङ् टायाङ्‌ना ए॥

“ओचेट्‌नुना गोठाले आङा डोक्॥ नुना गोठालेङा उठुँबाचि लाउङ्‌सा ओचोला भोक् चा पिडुटु॥ टरो निम्‍याक्‌ङि ठुँबा पुमाउङ्‌सा युङ्‌बालाक् याप्‌मिम्‍बाक् ब्‍वाँसो आबाना निसुङ् ठुँबाचि पोक्‍टुढोचिउङ् पिन्‌युक् खाट्‌युक्, पोङ्‌भोने ठुँबाचि उन्‍ङाना माखाक्, हिट्‌नुङ् ब्‍वाँसोङा ठुँबाचि पाट्‌टुचिचि हिट्‌नुङ् चेम्‍बेलेङ् चोगुचिचि॥ हिट्‌ना याप्‌मि भागाँ लियुङ् खाट्‌युएट्‌युक्, पोङ्‌भोने हिट्‌ना ठुँबाचि पुमा निम्‍याक्‌ङि युङ्‌बालाक् एडोक् हिट्‌नुङ् हिट्‌नाङा ठुँबाचिगा यान्‍दा डोक् चोगुन्‌चिन्‍गा॥
“ओचेट्‌नुना गोठाले आङा डोक्, आङा आठुँबाचि मिसेन् निसुङ्‌चिङ्‌चिङ्, हिट्‌नुङ् आङाना आठुँबाचिङा आङा मिसेन् याङ्उनियुक्॥ आङा पाबाङा मिसेन् याङ्‌नियुक्, हिट्‌नुङ् आङा पाबा मिसेन् निसुङ्‌टुङ्, हिट्‌नुङ् आङा ठुँबाचि लाउङ्‌सा आचोला चा भोक् पिडुङ्‌टुङ्॥ हाट्‌ले ना ठुँबा खोराङि ओवानिगा आङागा आरु ठुँबाचि चा ओवाहेट्॥ हिट्‌नागा चा आङा टाप्‍माचि कोलाइसे, हिट्‌नुङ् हिट्‌नागाँ आसोरा ओखेम्‍सुटु, हिट्‌नुङ् हिट्‌नि ठुँबाचिगा ठिक्‍ए बागाल लियुक्, हिट्‌नुङ् ठिबाङ् एडोक् गोठाले लियुक्॥
“पाबाङा आङा माया याङ्‌चोक्‌युक्, पोङ्‌भोने आङा आचोला फेरि नोक्‍माउङ्‌सा भोक् चोगुङ्‌टुङ्॥ खोनाङा चा आङाना आचोला सेप्‍मा उहिडुन्‍ना, टरो आप्‍पे आनिङ्‌ग्‍वालाम्‍मा पिडुङ्‌टुङ्॥ आङालोक् आसोक्‍मा पिमाना आधिकार चा युङ्‌ग्‍वा, हिट्‌नुङ् फेरि नोक्‍माना आधिकार चा आङालोक् युङ्‌ग्‍वा॥ आङाना पाबाङा आङा याङ्‌पिडाना आग्‍याँ चा ना डोक्॥”
ना रिङ् ओखेम्‍सुङ् याहुदिचि फेरि उन्‌चि उन्‌चि ओटोङ्‌नेएट्‌नि॥ हिट्‌नागा माड्‌डे याप्‍माङा नाड्‌डे ओमाट्‌टुए, “ना टोन्‍डेबाङा लिन्‍डुएसुए, हिट्‌नुङ् ङाङ्‌साइसे॥ पोङ् नाङाना उरिङ् खानिङा आखेम्‍सुम्‍टुम्‍ना?” टरो आरुङा ओमाट्‌टुए, “ओचाफेन्‍ना रिमेट्‌ङा इप्‍टुना याप्‌मिङा नाड्‌डे रिङ् माट्‌टुन्‍ना॥ पाक् ओचाफेन्‍मा रिमेट्‌ङा इप्‍टुना याप्‌मिङा याङ्‌कानिनिबाङाना उमिक् नुमानिङ् चोक्‍मा हिडुटुनि टे?”

हिट्‌ना बेला चुङ्‌ग्‍वामा बेला डाना, हिट्‌नुङ् यरुसलेमङि माङ्‌ठाना सामारपान् चोक्‍माना चाडा डाना॥ येसु माङ्‌ठानाङाना याम्‍बा-नायाम्‍बा सोलोमान ओलोडुना मोखाङि लाम्‌टियागोन्‍डाना डाना॥ याहुदि ओठेडोङ्‌चि याम्‍बा-नायाम्‍बा उछुमाउङ् उन् उसिलाप्‍टुए, “खान्‍ङा आन्‍याँ खोना बेला सोम्‍मा याप्‌मिआफाम्‌युक्‍ना? खान् खिरिस्‍ट भोने आन्‍याँ पारचिन्‍दा याप्‌मिलोडा॥”
येसुङा हिट्‌नागा लोडुचे, “आङा खानि पाइले डोक् लोमा हिनाइनाने, टरो खानिङा बिस्‍वास डोक् आचोक्‌निम्‍ना॥ आङाना पाबाङाना उनिङ्‌ङि आङा चोगुङ्‌गा नागा टोॽवाङा डोक् आङा साइना नुङ् पारमान् पिडुटु॥ टरो खानिङा बिस्‍वास डोक् याङ्आचोगिन्‍नागा, पोङ्‌भोने खानि आङाना आठुँबाचि माखाक्॥ आठुँबाचिङा आरिङ् ओखेम्‍सुटु, हिट्‌नुङ् हिट्‌नागा आङा मिसेन् निसुङ्‌चिङ्‌चिङ्, हिट्‌नुङ् हिट्‌नागाँ आङा रोक् उरिक्‍ङा॥ आङा हिट्‌नागा लाट्‌निना चोला पिडुङ्‌चिङ्‌चिङ्, हिट्‌नुङ् हिट्‌नागा खोना बेला चा जाखाम् उलिनिगा, हिट्‌नुङ् खोनाङा चा हिट्‌नागा आङालाम्‍मा याङ्ओनाप्‌युङ् खाट्‌मा उहिडुन्‌चिन्‍गा॥ आङाना पाबाङा हिट्‌नागा आङा याङ्‌पिडाइसे, हिट्‌नुङ् उन् सोब्‍बे नुङ्‌ना साक्‌तिसालि वाहेट्॥ पाबाङाना उमुक्‌लाम्‍मा खोनाङा चा हिट्‌नागा नाप्‍मा उहिडुन्‌चिन्‍गा॥ माङ्‌हाङ् पाबा लोक् आङा ठिक् एना॥”
ना रिङ् ओखेम्‍सुङ् याहुदिचिङा येसु लिङ्‌गेॽवाङा लेप्‍मा लोङ्‌सा फेरि लिङ्‌गेॽवा ओकोबुए॥ येसुङा हिट्‌नागा लोडुचे, “आङाना पाबाङा याङ्‌लोडाना गाड्‌डे याप्‍मा ओचेट्‌नुना टोॽवा आङा खानि टोकानाङि चोगुएसुङे॥ हिट्‌नागा टोॽवा माड्‌डेङि खोनाम्‍बाक् टोॽवाङाना लाउङ्‌सा खानिङा आङा लिङ्‌गेॽवाङा लेप्‍मा आकोलिएट्‌टिङागा?”
याहुदिचिङा ओलोडुए, “ओचेट्‌नुना टोॽवा लाउङ्‌सा आन्‍याँ खान् लिङ्‌गेॽवाङा लेप्‍मा कोल्‍याँगा माखाक्, टरो खान्‍ङा माङ्‌हाङ् आलोडुजोएट्‌टु, पोङ्‌भोने खान् याप्‌मि आलिसाउङ् चा खान्‍ङा आप्‍पेलाउङ्‌सा माङ्‌हाङ् आचोगुएट्‌टु॥”
येसुङा हिट्‌नागा लोडुचे, “पाक् खानि धारमाबिधिङि माङ्‌हाङ्‌ङा ‘आङा लोनाने, खानि माङ्‌चि ए’ नुङ् माट्‌टुना रिङ् छेप्‌निगेट्‌निनै टे? माङ्‌हाङ्‌ङा उन्‍ङाना खाबोर काटोक्‍बाचि उन्‍ङा ‘माङ्’ लोडुचे, हिट्‌नुङ् धारमाछाप्‍लाङि छेप्‍बालाक् रिङ् माङ्‌जोना लिनिना॥ पाबाङा सेङ्‌सेङ् चोगुङ् नाराङि आङा याङ्‌पाङ्‌साना, हिट्‌नुङ् ‘आङा माङ्‌हाङ् छा’ ए नुङ् माट्‌टुङ्‌नाँ खोड्‌डेउङ् माङ्‌हाङ् लोमाजामा लिसेना टे? आङा पाबाङाना ओटोॽवा चोक्‌निङ्‌गेट्‌निङ्‌ना भोने, खानिङा आङा बिस्‍वास याङ्‌चोक्‍नेनिन्॥ टरो आङा पाबाङाना टोॽवा चोगुङ्‌टुङ् हिट्‌नुङ् चा खानिङा आङा बिस्‍वास आचोगिन्‍नागा भोने, नागा टोॽवा पुयानुमुङ् बिस्‍वास चोगानुम्, हिट्‌नुङ् पाबा आङि वाहेट्, हिट्‌नुङ् आङा पाबाङि वाङेट्‌ङा नुङ् खानिङा ठाहा आटोगुम्‍टुम् हिट्‌नुङ् बुजा आचोगुम्‍टुम्॥” ना रिङ् ओखेम्‍सुङ् हिट्‌नागाँ फेरि उन् लाब्‍मा ओकोलुए, टरो उन् हिट्‌नागाँगा मुक्‌लाम्‍मा होन्‍डाउङ् खाडे॥
हिट्‌नुङ् येसु फेरि यारदान होङ् याहाँपारा युहान्‍नाङा पाइले बाप्‌टिस्‍मा पिडुचिगा डेन्‌ङि खाडे, हिट्‌नुङ् हिट्‌नि डोक् उन् युङे॥ जोम् याप्‌मिचि उन् सोरि ओटाए, हिट्‌नुङ् हिट्‌नागा नाड्‌डे उपिगे, “युहान्‍नाङा पाक्‍चा डोङ् ठोङ्‌डिगा टोॽवा चोग्‍वाट्‌टुन्, टरो युहान्‍नाङा येसुङाना बारेङि माट्‌टुना सोब्‍बे रिङ् छेम्‍बाना डोक् रैछो॥” हिट्‌नुङ् हिट्‌नि याप्‍मा याप्‌मिचिङा उन्‌ङि बिस्‍वास ओचोगुए॥

Sikiliza युहान्‍ना 10