ফুরা যীশুগো সেঃবৈফু কিজু ছেংগ্যাংফাক লুঃউককেচা

(মথি ২৬:১-৫,১৪-১৬; মার্ক ১৪:১,২,১০,১১; যোহন ১১:৪৫-৫৩)

1য়াং আখিংমা যিহুদীরোমা চিঃছিই মিথিঃব্রি লুকচা মুং পুয়িইচা পাঃহ্লারিব্যা। দিঃ পুয়িইগো ক্যুয়েম্রকতি পুয়িইলি খঃরি। 2আগ্রি ফুংগ্রিরোনা কেইং ছারারোচা যীশুগো অাথিঃমা আঃথিই সেঃবৈফু ‍লেং হ্রাগেলিরি, আক্রংগা য়াংসুউরো লুঃউগো ক্রককেলিরি।

3য়াং আখিংখা যিহুদা, যাসুগো ইস্কারিয়দলি খঃরি, য়াংসুউমা মকং নেঃচা ওয়ংলিরি। দিঃ যিহুদাচা হিকলিরি, তিছিনৈয়ক তিবিমা তয়ক। 4যাপুয়েং প্যাংরো যীশুগো ফুংগ্রিই আগ্রিইরোনা ওয়িপাসানা ক্যংমা বেন্ডেরো আলাকমা তিঃপিনৈফুলি, দিঃ আক্রংলিলাগো য়ুুরো, য়াংসুউরোনা আতৈংবাং লুকলিইরি। 5য়জংকিজু য়াংসুউরোচা প্যরো যীহুদাগো টেংগা পিইফুছুরো লাক খেংগেলিরি। 6য়াংখা যিহুদাচা, আঃমা খেংরো আখিং হ্রালিইরি, যাফুলিছুগি যিহুদা ক্রিলিরিচা ফ্রইতি, লুঃউ আম্যামা যীশুগো তিঃপিইফু।

কিঃতাংখ্রাং পুয়িইমা আতুং আঃচা

(মথি ২৬:১৭-৩০; মার্ক ১৪:১২-২৬)

7-8চিঃছি মিঃথিইব্রি লুকচা পুয়িই রাকমা কিঃতাংখ্রাং রাক কিজু চাঃফু সকফু কিজু সাংফছুয়িইশ্যি খুয়েকেতি। য়াং রাক তৈংরিখা যীশুচা পিতরনা যোহনগো দিঃ চাঃগা প্ররো রুওয়েলৈতি, “নাংরো লাঃরো ঙারো কিজু কিঃতাংখ্রাং পুয়িই আঃচাগো য়াংগেলি, যাফুলিছুগি ঙারো চাঃনৈংঅং।”

9য়াংসুউরো যীশুগো মিংগেলিরি, “কোবাং ঙারোগো, যা আঃরামা দিঃ আঃচাগো য়াংফু কিজু প্ররিলি?”

10-11যীশু প্রলিরি, “ক্রি, নাংরো যাখা ম্রুদুঃ ওয়ংমি য়াংখা য়কক্যা তয়ককো ওঃখাকনা রিই খেঃ লাঃচাগো ম্রাংলিমি। য়াংসুউ নক্কা নক্কা লাঃরো, য়াংসুউ যা ইংমা ওয়ংফুলি, য়াং ইংমা ইংস্যাংগো প্রগেলি, ‘ছারা সিকফু ক্রিরিগা, কো তিবিরোনা ছারাচা যামা কিঃতাংখ্রাং পুয়িই ঈ আঃচাগো, চাঃনৈঅং য়াং আগেংদুক ইংচা যামালি?’ 12য়াংখা থুউ লুঃউচা নাংরোগো, আম্রাং ইং তিইং ছাংরো হিচাগো প্রালিমি। য়াংদেমা আলুংচা য়াংগেলি।”

13য়াংসুউরোগো যীশু যাপুয়েং প্রলিরিলি, য়াংসুউরো লাঃরো য়াংপুয়েং তেথেং ম্রাংগেলিরি অর য়াংদেমা কিতাংখ্রাং পুয়িই আঃচাগো য়াংগেলিরি। 14য়াংনক আখিং ফ্রতিখা, যীশুচা তেমেংদরোনা আতু চাঃফু থৈংলিরি। 15যীশু য়াংসুউরোগো প্রলিরি, “ঙা ওয়িদানা খেংফুহ্রিইগা, নাংরোনা আতু কিতাংখ্রাং পুয়িই আঃচাগো চাঃফু ঙামা কংগং চিইমা হিকলিরি। 16ঙা নাংরোগো প্ররি,থাওরা ফুরা ঈ নেংঙেংদ আদিপিচা যানিতয়ং আব্রিচুং মফ্রসাগ্রা ঙা অর তাখালি দিঃ পুয়িই আঃচাগো মাঃচাব্যা।”

17য়াংনক যীশু পেয়ালা য়ুলিকরি অর থাওরা ‍ফুরাগো কিজু তাংরো প্রলিরি, “নাংরো আতুওয়ংমা, দিঃচাগো ‍ওয়িই য়ুগে, 18যাস্যালিছুগি ঙা নাংরোগো প্ররি, আগোকাবাং থাওরা ফুরা ঈ নেংঙেংদ মাঃলাসাগ্রা ঙা অর তাখালি চঃব্যসি আঃরি মসকপ্যা।”

19য়াংনক যীশুচা ভংমুংগো য়ুউরো থাওরা ফুরাগো কিজু তাংলিরি। নক্কা য়াং ভংমুংগো মুহুকপ্রি মুহুকপ্রি ফিঃরো, তিবিরোগো পিইরো প্রলিইরি, “দিঃচা ঙা কাইংথা, যাচাগো নাংরোগো পিইলিইমি। ঙাগো তুওয়ক রাঃফু কিজু দিঃপুয়েং প্যাংগেলি।”

20চাব্রিনক, ভংমুংগো পিঃঅং যীশুচা পেয়ালাগো তিবিরোগো পিঃরো প্রলিরি, “ঙা স্যুইনা, থাওরা ফুরা কিজু যাচা আঃসঃ পৈংঙেচা প্যাংফুলি, য়াং পৈংঙেচা লাকখানা ফ্রইতি দিঃ পেয়ালাচা। ঙামা দিঃ স্যুইগো নাংরো কিজু পিইলিইমি। 21ক্রি, যাসুউ ঙাগো তিঃপিইফুলি, য়াংসুউ আলাকচা ঙানা আতু দিঃ তাংখুং আঃপমা হিকরি। 22থাওরা ফুরাস্যাং যা পুয়েং মনুসাওয়া সাঃ সিইফুচা ম্হে থাঃলিইরি য়াংপুয়েং সিইরাফুগা আম্হেং য়িগিলি যাসু য়াংসুউগো তিঃরো পিইরিলি, য়াংসুউগো য়ুউরো চাঃগা প্রফুমিহিব্যা!”

23তিবিরোচা তয়ককো তয়ক মিংগেলিচাগা, য়াংসুউরো আতুওয়ংমা যাসুউ দিঃ আলুককো লুকফুলি।

তিবিরোনা আতু আস্যাং যীশু ঈ চাঃগাচেংবি।

(মথি ২৬:৩১-৩৫; মার্ক ১৪:২৭-৩১; যোহন ১৩:৩৬-৩৮)

24যাসুগো আগ্রি প্ররাফুলি য়াংচাগো য়ুউরো, তিবিরো আতুওয়ংমা চাঃগা আঙ্রাং ফ্রইকেরি। 25যীশু য়াংসুউরোগো প্রলিরি, “যীহুদিমুহু লুঃউরো আতুওয়ংমা মাংরোচা আস্যাং প্যাংরি অর য়াংসুউরোগো পৈংঙে থাঃসারোগো আগ্রিই কিজুস্যাং প্রগেতি, 26য়জংছুগি নাংরো আতুওয়ংমা য়াংপুয়েং ফ্রফুচাগা মাসাং। নাংরো আতুওয়ংমা যাসুউ আলুংসুউ থাক আগ্রিলি, প্রফুছুগি য়াংসুউচা যাসু আলুংসুউ থাক আঙিইলি, য়াংসুউঞ্যং ফ্রঃ অর যাসুউ গংখ্যুকলি, য়াংসুউচা বুয়িংপ্রুকসাঞ্যং ফ্রঃ। 27যাসুউ আগ্রিলি, যাসু চাঃফু থৈংরি মুহুকি লংসা ক্যুয়েং লঃ? যাসুউ চাঃফু থৈংরিলি, য়াংসুউ মুহু ল? য়িগিলি ঙা নাংরো আতুওয়ংমা বুয়িংপ্রুকসাঞ্যং ফ্ররি।

28“ঙা যাখা দুঃখাওয়ানা চিই মকং হিকলিরি, য়াংখালি নাংরো ঙাগো বৈঃ মাঃলাগেলি। 29ঙাক ফাখাং যা পুয়েং ঙাগো শাসানা প্রুঃফু ক্ষেমতা পিঃলিরিলি য়াং পুয়েং ঙারি নাংরোগো ক্ষেমতাগো ল্হুরি। 30য়জংফ্রইখা ঙা নেংঙেংদমা নাংরোচা ঙানা আতু চাঃগেমি সককেমি অর মাংনেংমা থৈংরো তিছিন্হচেসা ইস্রায়েলরোগো তাঃরা চৈকেমি।”

31“শ্যিমুং, শ্যিমুং, ক্রি, মাইংনায় নাংরোগো গ্যুং ছাইংগো চাইংগোঃমা থেলো পাজং খারেলেঃ য়জং খালো ক্রেফোল্হো খওয়ং তংরে। 32য়িগিলি ঙা নাং কিজু ছুকতংলিরিচাগা, নাকমা আক্যুংচা হিঅং। নাং যাখা ঙাকবাদুঃ প্রেং লাঃমি য়াংখা নাকমা দিঃ ঞিংরোগো তদৈং প্যাংরো তাংলি।”

33পিতরচা যীশুগো প্রলিরি, “আস্যাং, কোবাংনা আতু ঙা থংলি ক্যানৈংরি অর সিইরোলি লঃনৈংরি।”

34আপ্রইিমা যীশু প্রলিরি, “পিতর, ঙা নাককো প্রফুগা, গিনি ক্রাক মুতুওয়েংখাং হ্রিইগা নাং সুংখক তয়ং ঙাগো লাক মেখেংলো প্রফুচাগা, নাং ঙাগো মিসি।”

35য়াংনক যীশু কো তিবিরোগো প্রলিরি, “যাখা ঙা নাংরোগো টেংগা ওয়িই, জংওয়িনা অর ফেনেং আপি রুওয়েলৈলিখা য়াংখা নাংরোমা তুখুকমাসা মল্লক ফ্রক্কে লঃ?”

তিবিরো প্রগেলিরি, “ইহিক, মফ্রলি।”

36যীশু প্রলিরি, “য়িগিলি ঙা আগো প্ররি, যাসুউমা টেংগা ওয়িই হিরি অর জং ওয়িই মিগিলি য়ুঃ লাঃলি। যাসু দাঃশ্যি মিহিলি, য়াংসুউ কো কোরুংগো রংরো দাঃশ্যি ওয়িই। 37সেংস্যাংস কেইংমা রুইলো হিকরি, ‘য়াংসুউগো আপ্রইস্যাংরোমা খ্যালৈতি।’ ঙা নাংরোগো প্ররি, দিঃ চাঃগাচা ঙাক আতুওয়ংগারা আব্রিচুং ফ্রইফু। আক্রংগা ঙা আক্রংলিলাগো য়ুউরো যা রুই হিরি, য়াংচা প্রিজুংফু আখিং লাঃব্যা।”

38য়াংখা তিবিরো প্রগেলিরি, “আস্যাং, ক্রি, দিঃ নৈচাং দাঃশ্যি হিকরি।”

যীশু আফ্রি পিলিরি, “থাঃ, য়ল্হক মুহুকপ্যা।”

ছুউক তংরি আখিংমা যীশু ওয়েংনিলিকরি।

(মথি ২৬:৩৬-৪৬; মার্ক ১৪:৩২-৪২)

39যীশু য়াং আঃরাগো বৈরো, কো আক্যাং আলঃ জৈতুং তংদু লাঃলিইরি। তিবিরোচা যীশু নক্কা নক্কা লাঃগেলিরি। 40লাঃরি আঃরাদুঃ রকপ্রি নক যীশু তিবিরোগো প্রলিরি, “ছুং তংগে যাফুলিছুগি চেংজাখ্রাংমা মাক্যারাঅং।”

41য়াংনক যীশু তিবিরোগা তেকে আওয়িই লাঃরো পঃছঃতুক থকরো ছুক তংলিরি, 42“ও ফাখাং, কোবাং চিই সাস্যারিছুগি দিঃ ওয়িদানা পেয়ালাগো, ঙাবাগা য়ুউ লাঃলি। য়াংচা মিগিলি ছেংদা আলৈই মুহুক, কোবাং ছেংদা আলৈই ফ্রইপাজি।”

43য়াংখা গংখাং ফুংগা নেঃ সাঃ তয়ক লাঃরো যীশু তদৈং প্যাংলিরি। 44চিই ছুওরো যীশুচা অর আম্যা চিইক্রিইরো ছুক তংলিরি। যীশু কেইংথাগা সুয়িইচা স্যুইঞ্যং তবক তবক প্যাংরো কেইংফামা ক্যালিইরি।

45-46ছুক তংব্রিনক যীশু থাঃরো কো তিবিরোবাদুঃ লাঃলিইরি। চিই ছুওরো ঞ্যরো তিবিরোচা ওয়িইকেব্যাচাগো ম্রাংরো যীশু তিবিরোগো প্রলিইরি, “যাফু ওয়িইকেতিলি? থাঃরো ছুক তংগে যাফুলিছুগি চেংজাখ্রাংমা মাক্যারাঅং।”

47যীশু য়াংখালি চাঃগা প্রহিকলিরি য়াং আখিংমা লুঃউম্যারোচা য়াংদুঃ লাঃগেলিরি। যিহুদা খঃরো তিছিনৈয়ক তিবিমা তয়ক য়াংসুউচা থুউ লুঃউরো হ্রিইগা হ্রিইগা লাঃলিইরি। যিহুদাচা যীশুগো নেংফু কিজু যীশুবাদুঃ লাঃলিইরি। 48য়াংখা যীশু য়াংসুউগো প্রলিরি, “যিহুদা, নাং নেংরো মনুসাওয়া সাঃগো তিঃ পিইরি?”

তিঃসারো আলাকমা যীশু ক্যাখ্রাং

(মথি ২৬:৪৭-৫৬; মার্ক ১৪:৪৩-৫০; যোহন ১৮:৩-১১)

49যাসুউরো যীশু লিফাকলাকচিই হিকগেলিইরি, য়াংসুউরোচা সিকগেলিইরি যা ফ্রইফুব্যালিঃ। য়াং আতুওয়ক য়াংসুউরোচা যীশুগো প্রগেলিইরি, “ছারা, ঙুরো দাশ্যিনা য়াংসুউরোগো হ্লিইফুলঃ?”

50তিবিরো আতুওয়ংমা তয়কচা দাশ্যিনা মাহা ফুংগ্রিইমা ক্যুয়েং তয়ককো নাঃ হ্লিইবলৈতি। 51যীশু প্রলিইরি, “ফ্রইব্যা, অর মাপ্যাংগিফিই।” দিঃ চাঃগা প্রলো যীশুচা য়াং লুঃউ নাঃগো কৈংলো আকং প্যাংলিইরি।

52যা ফুংগ্রিইরো, ওয়িইপাসানা ক্যংমা ভেন্ডেরো অর ওয়াগ্রিইরো যাসুউরো যীশুগো তিঃফু লাঃগেলিইরি য়াংসুউরোগো যীশুচা প্রলিইরি, “ঙা দাম্রা লঃ, কুবাংরো দা, হ্লেংনা লাঃগেতি? 53ওয়িইপাসানা ক্যংমা রাক-নিইং কুবাংরো হ্রিইথাকমা ঙা হিকলিইরি, য়াংখাগা কুবাংরো ঙাগো মিতিঃগেলিই। প্রফুছুগি কুবাংরোমা আগুরা তিঃফু আখিং; মমৈ ক্ষেমতাগো আগু ম্রাংরারিব্যা।”

পিতর লাক মেখেংচা

(মথি ২৬:১৫-১৮,২৫-২৭)

54য়াংখা যীশুগো য়াংসুউরোচা তিঃলো মাহা ফুংগ্রিই ইংদুঃ য়ুউ লাঃখাগেতি। পিতরচা আওয়িই আওয়িই প্যাংলো নক্কা লৈলিইরি। 55তালাং আলিগংমা যাসুউরো মিং কাংলো হিকগেলিইরি, পিতরচা য়াংসুউরোমা লাঃলো থৈংলিইরি। 56ক্যুয়েংমা তয়কচা য়াং মিং আলাংমা পিতরগো ম্রাংলিইরি অর হ্লাপা ক্রিলো প্রলিইরি, “দিঃ লুঃউলি য়াংসুউনা আতুউ হিকলিইরি।”

57পিতরচা লাক মেখেংব্রি প্রলিইরি, “ঙা য়াংসুউগো মিসিক।”

58অর তাঃনা ফ্রইলো অর তয়কলি পিতরগো ম্রাংলো প্রলিইরি, “নাংগা য়াংসুউরো লুঃউ।”

পিতর প্রলিইরি, “মুহুক, ঙা য়াংসুউরো লুঃউ।”

59তাঃনারি হ্লক নক অর তয়কচা আঃনা প্রলিইরি, “দিঃ লুঃউচা আমেইং য়াংসুউনা হিকলিইরি, আক্রংগা দিঃ লুঃউচা গালীল প্রিনিগা লুঃউ।”

60পিতরচা প্রলিইরি, “ক্রি, নাং যা প্ররিলি ঙা মিসিক।”

পিতর চাঃগা তুং মুতুং ক্রাক তগংচা তুয়েংলিইরি। 61য়াংখা যীশুচা ম্যাকন্হা হ্লিলো পিতরগো ক্রিলিইরি। য়াংখা যা চাঃগা যীশুচা পিতরগো প্রলিইরি, য়াং চাঃগাগো পিতরচা আম্হে ক্যালিইরি, “গিনি ক্রাক মুতুওয়েংখাং হ্রিইগা নাং সুংগ্রিই তৈংঅং প্রফুচাগা, নাং ঙাগো মিসিক।” 62য়াংখা পিতরচা প্রাংগা লাঃলো কংগং ঙুলিইরি।

আতৈংবাংগ্রিই হ্রিইগা যীশুগো তাঃরা চৈচা

(মথি ২৬:৫৯-৬৮; মার্ক ১৪:৫৫-৬৫; যোহন ১৮:১৯-২৪)

63যাসুউরো যীশুগো চংগেতি য়াংসুউরোচা যীশুগো আরি-আসুওয়েং প্রুকলো সেঃকেলিইরি। 64য়াংসুউরোচা যীশু ম্যাকচিইগো ফুংলো প্রগেলিইরি, “প্রনা ক্রিমি, যাসুউ নাককো সেঃরিলি?” 65দিঃপুয়েং য়াংসুউরো অর যে যে চাঃগা প্রলো ঞ্যচিই প্যাংগেলিইরি।

66মুলাংখা যিহুদীরোমা ওয়াগ্রিইরো, ফুংগ্রিইরো অর কেইং ছারারোচা তেরেমা চুককেলিইরি অর যীশুগো য়াংসুউরো আতৈংবাংগ্রিই হ্রিইগা য়ুউ লাঃলো প্রগেলিইরি, 67-68“নাংরা ফোরালং ফ্রইতিছুগি ঙুরোগো প্র।”

যীশুচা প্রলিইরি, “ঙা প্রগিলি ‍কুবাংরোচা তাখালি মুক্যুং মুহুক অর কুবাংরোগো তুখুকমাসা মিংগিলি ‍কুবাংরো মপ্রগে মুহুক। 69ছুগি মনুসাওয়া সাঃচা আগুককাবাং গুংধস্যাংগ্রিই থাওরা ফোরা ঞ্যাফাক্কা থৈং হিকফু।”

70য়াংখা আলুংসুউ মিংগেলিইরি, “ছুগি নাংচা থাওরা ফোরা সাঃ লঃ?”

যীশুচা য়াংসুউরোগো প্রগেলিইরি, “কুবাংরোচা আমেইং প্রগেতি, ঙাচা ফোরা সাঃ।”

71য়াংখা গংখ্যুকরোচা প্রগেলিইরি, “ঙুরোমা অর যা সাকসিই লুরিলিঃ? ঙুরো কুঃদৈং য়াংসুউ খুনাংগা ক্রাগেব্যা।”

Sikiliza লূক 22