Traducción bíblica: Tzotzil Chamula © Sociedad Bíblica de México, 2000 www.socbiblicademexico.com.mx Grabación de Tzotzil Chamula (Biblia) ℗ Hosanna, 2005

Tzotzil, Chamula - 2000 SBM (Drama - NT

Biblia en Tzotzil de Chamula, Chiapas, México © Sociedad Bíblica de México, A.C. 2000

Ti Jesuse laj stsob ta stojol ti lajcha'vo' (12) yajchanc'optaque. Laj yac'be yich' yabtelic, stsatsalic ta sloq'uesel ti c'usiuc no'ox pucujale, xchi'uc ta scolesel ti jchameletique. Laj stacanan batel ta yalel ti ventainel yu'un ti Diose, xchi'uc ta scolesel ti jchameletique, xi ti Jesuse:
—Mu c'usi xavich'ic batel ta sventa ti abeique, mi ja'uc anamte'ic, mi ja'uc amoralic, mi ja'uc avotic, mi ja'uc ataq'uinic. Jlic no'ox ac'u'ic xavich'ic batel. Comanic ta na ti bu ta xac'otique ja' to mi laloq'uic batel ti teye. Ti bu mu xa'ich'atic ta muq'ue, loc'anic batel ta jteclum. Lilinic comel ti spucuquil avoquique, senyail ti iltabil ta xc'ot yu'un ti Diose.
Loq'uic batel un, batic ta jteclumetic, ta bic'tal lumetic ta yalel ti lequil ach' c'ope, xchi'uc ta scolesel ti jchameletique.


Scotol c'usi ta spas ti Jesuse, laj ya'i ti ajvalil Herodese. Mu stac' a'yeluc ta xa'i c'usi xu' ta snop. Yu'un oy jlom ta xalic ja' cha'cuxi ti Juan ti chame. Ti yane ta xalic ti ja' vul ta loq'uel ti j'alc'op Eliase. Ti yane ta xalic ti ja' nan jun vo'neal j'alc'op ti cha'cuxie. Xi ta xal ti Herodese:
—Vu'un laj cal mantal laj yich' c'ocbel sjol ti Juane. ¿Buch'u van taje ti ta xca'ibe ep ti sc'oplale?
Jech o xal ti Herodese oy ta yo'nton ta sq'uel ya'i ti Jesuse.


C'alal sutic talel ti jcholc'opetique, lic yalbeic Jesús ti c'usi laj spasique. Laj sq'uej sbaic loq'uel, batic ta jteclum Betsaida. Ja'uc le' une, c'alal laj ya'iic ti jnaclejetique, laj sts'acliic batel, ich'bil c'otic ta muc' yu'un ti Jesuse. Laj yalbe ya'iic sc'oplal ti ventainel yu'un ti Diose, xchi'uc laj scolesan ti jchameletique.
C'alal ta xa xmal ti c'ac'ale, ti lajcha'vo' (12) jcholc'opetique nopajic batel ta stojol ti Jesuse, xi c'ot yalbeique:
—Taco xa batel scotol ti jnaclejetique yo' xu' xba sa' bu ta xcux yo'ntonic, xchi'uc ta sa'el sve'elic ta jujun bic'tal lum ti bu nopol no'oxe, yu'un ti bu oyotique, mu'yuc c'usi x'ayan.
Xi laj yal ti Jesuse:
—Ac'beic sve'el ti vo'oxuque.
Xi laj yalique:
—¿C'usi ta xcutcutic, ti c'ajomal xa no'ox vo'bej pan xchi'uc cha'cot choye? Ja' no'ox mi xba jmancutic tal sve'el ti jnaclejetique.
Yu'un nopol vo'miluc (5,000) viniquetic tsobolic. Ti Jesuse xi laj yalbe ti yajchanc'optaque:
—Albeic ya'i, ac'o chotiicuc ta lajuneb yoxvinic (50) ta jujuvoc'.
Jech laj spasic jech c'u cha'al albatique, choti scotolic. Ti Jesuse laj stsac ti vo'bej pane xchi'uc ti cha'cot choye, laj stoy muyel sat ta vinajel, lic yalbe vocol ti Diose, lic sc'osilan ti choye, laj xet' ti pane, laj yac'be jelavel ti yajchanc'optaque yo' jech ta spucbeic ta scotol ti c'u yepal oyique. Ve'ic ti bu xa c'alal xal ti yo'ntonique. Ts'acal to, laj stsobbeic lajcheb (12) moch ti scomelale.


Oy jun c'ac'al ti Jesuse laj sq'uej sba batel ta c'opojel ti'inel. Xi laj sjac'be ti yajchanc'optac ti tey xchi'uque:
—¿Buch'uun ta xalic xana' ti jnaclejetique?
Xi laj staq'uique:
—Oy jlom ta xalic ti vo'ot la ti Juan j'ac'-ich'-vo'e. Oy jlom ta xalic ti vo'ot la ti Eliase. Ti jlome ta xalic ti vo'ot la jun vo'neal j'alc'op ti cha'cuxie.
Xi laj sjaq'ue:
—Ti vo'oxuque, ¿mi xana'ic ti buch'uune?
Xi laj stac' ti Pedroe:
—Vo'ot ti Cristoe, ti talemot ta stojol ti Diose.


Tsots laj sc'uban Jesús ti mu'yucuc buch'u junucal xalbeic ya'i ti ja' Cristo ti stuque, ti xi laj yale:
—Ti vu'un co'ol j'elantique ta xquich' ep vocol. Ta sjip stenicun ti moletique, ti banquilal paleetique, ti jchanubtasvanejetic yu'un ti oy c'usi tsots albil sc'oplale. Ta xiyaq'uicun ta milel, ja'uc, ti ta yoxibal c'ac'ale, ta xicha'cuxi.
Ti Jesuse xi laj yalbe scotol ti jnaclejetique:
—Ti mi oy buch'u ta x'och ya'i ta cajchanc'ope, ac'o xtuch' ta yo'nton ti xcuxlejale, ac'o sts'ic svocol jujun c'ac'al, ac'o sts'acliun. Yu'un ti buch'u tsots sc'oplal ta xa'i ta spoj ti xcuxlejale, ta xch'ay, ja'uc ti buch'u ta xch'ay ti xcuxlejal ta jventae, ta sta xcuxlejal. ¿C'usi bal o ti vinique, ti mi ja' no'ox ta xu'nin scotol ti sba banomile, ti mi ch'ayel ta xbat ti stuque? Mi oy buch'u ta xq'uexav ta jtojol xchi'uc ta xq'uexav yu'un ti lequil ach' c'op cu'une, ja' jechun ec ti co'ol j'elantique, ta xiq'uexav ta stojol c'alal ta xital xchi'uc yutsilal ti Jtote, xchi'uc ti ch'ul anjeletique. Ta xcalboxuc ava'iic ta melel, oy jlomoxuc li'e mu'yuc to ta xachamic mi mu'yuc ta xavilic ta aba ta asatic ta xventainvan ti Diose.


Ech'em xa vaxaquib (8) c'ac'al ti va'i s'elan laj yal ti Jesuse, imuy batel ta vits ta c'opojel ti'inel, ti chi'inbil batel yu'un ti Pedroe, ti Jacoboe, ti Juane. C'alal yacal ta c'opojel ti'inele, lic yanijuc ti sate, ti sc'u'e toj sac icom, lic xojobanuc. Vinaj cha'vo' viniquetic ta xlo'ilaj xchi'uc ti Jesuse. Taje, ja' ti Moisese xchi'uc ti Eliase. Tey joyobtabilic ta xojobal ti toj yan yutsile. Ti cha'vo' viniquetique ta xalbeic sc'oplal ta x'iq'ue batel li' ta banomile, ti ta xc'ot ta pasel ta xich' svocol ta Jerusalene. Manchuc mi ta xvay ya'iic ti Pedroe xchi'uc ti xchi'iltaque, vic' to ti satique, ti laj yilic yutsilal slequilal ti Jesuse xchi'uc ti cha'vo' viniquetic xchi'inojane. C'alal laj xch'ac sbaic batel ti cha'vo' viniquetic ta stojol ti Jesuse, ti Pedroe xi laj yale:
—Jchanubtasvanej, ¡jun yutsil ta j'ech'el ti li' oyotique! Xi s'elan ta jpascutic oxbejuc axibal na: jun avu'un, jun yu'un ti Moisese, jun yu'un ti Eliase.
Jech laj yal ti Pedroe yu'un mu stac' a'yeluc c'usi xu' ta xal.
C'alal jech ta xc'opoje, ja' o tal voliaticuc ta toc. Xi'ic ta jmec ti volibilic ta toque. Ti ta toque, oy Buch'u ic'opoj talel ti xi ta xale:
—Ja' ti Jnich'on li'e, ti toj c'ux ta xca'ie. A'yibeic ti sc'opojele.
C'alal laj c'opojuc ti Buch'u ta xc'opoj talele, laj yilic stuc xa ti Jesuse. Mu'yuc buch'u laj yalbeic ya'i ti c'usi laj yilique, ts'ijil comic.


Ta yoc'lomal c'alal yalic talel ta vitse, yepal no'ox xvoletic batel, ba snupic ta be ti Jesuse. Oy jun vinic ta stojol ti jnaclejetique, ti tsots avan ti xi laj yale:
—Jchanubtasvanej, yu'un jun ti jnich'one, avocoluc colesbun. Ta x'ilbajinat yu'un ti pucuje. C'alal ta x'ilbajinate, tsots ta x'avan ta jmec. Ta xtubbat yic', xvocan xa ye, mu xcomtsanat. Laj jc'anbe vocol ti avajchanc'optac ta sloq'ues ti pucuje, ja'uc le' une, mu'yuc xu' yu'unic ta sloq'uesel.
Xi laj stac' ti Jesuse:
—Jeche'oxuc, mu'yuc atuq'uilic, mu'yuc c'otem ta avo'ntonic ta xch'unel. ¿C'u ono'ox sjalil ta sc'an li' oyun ta atojolic ti mu jts'icbaj ta xca'i avu'unique? Ic'bun talel ti anich'one.
C'alal nopaj talel ti quereme, jipat ta lum yu'un ti pucuje. Tubbat yic' no'ox xtoc. Ja'uc ti Jesuse, laj sjajanta ti pucuje. Laj scoles ti quereme. Laj yac'be batel ti stote. Scotolic ch'ayal c'ot yo'ntonic yu'un smuc'ul stsatsal ti Diose.


C'alal ch'ayal yo'nton scotolic yu'un c'usi ta spas ti Jesuse, xi laj yalbe ti yajchanc'optaque:
—A'yic lec li'e, xi s'elan ti mu xach'ay ta avo'ntonique: ti vu'un co'ol j'elantique, ta xi'aq'ue ta yoc ta sc'ob ti viniquetique.
Mi ja'uc xa'ibeic smelol ti va'i s'elan ta x'albatique yu'un mu'yuc to ta x'ac'bat sna'ic, xchi'uc ta xi'ic ta sjac'beic smelol ti c'usi albatic yu'un ti Jesuse.


Ti yajchanc'optaque lic svul sbaic buch'u ti cajal sc'oplal ta xc'ot yu'unique. Ja'uc ti Jesuse laj sna' ti jech ta snopique. Laj yic' talel jun ch'in querem ti laj sva'an ta sts'elique. Xi laj yalbe ti yajchanc'optaque:
—Buch'uuc no'ox ti ta jventa ta xich' ta muc' ti olol li'e, ta xiyich'icun ta muc' ec. Ta xich'ic ta muc' xtoc ti Buch'u laj stacun talele. Ti buch'u x'ech' to peq'uel yuni c'oplal ta xac' sba ta atojolique, ja' cajal sc'oplal ta xc'ot.


Ti Juane xi laj yalbe ti Jesuse:
—Jchanubtasvanej, laj quilcutic jun vinic ta sloq'ues pucuj ta aventa. Laj jpajescutic yu'un ma'uc jchi'uctic ta abtel.
Xi laj stac' ti Jesuse:
—Mu xapajtsanic, yu'un ti buch'u mu xiscontrainotique, ja' jchi'iltic ta abtel.

C'alal po'ot xa sta yorail ta xcha'sut muyel ta vinajel ti Jesuse, sjunul yo'nton bat c'alal Jerusalén. Laj stac jelavel yajtuneltac ta biq'uit jteclum ti oy ta Samaria banomile yo' ta xba xch'amunic na. Ja'uc ti samariaetique laj yilic ti ta xbat ono'ox ta Jerusalene. Jech o xal mu'yuc xaq'uic ta ch'om ti snaique. C'alal jech laj yilic ti Juane, ti Jacobe, ja'ic ti yajchanc'optaque, xi laj yalique:
—Cajval, ¿mi ta xac'an ti jc'ancutic yaluc talel c'oc' ta vinajel yo' ta xlajic scotol le'e jech c'u cha'al laj spas ti j'alc'op Eliase?
Ti Jesuse lic sq'uelbe sat ti cha'vo'ique, ti xi laj yalbe ti laj sjajantae:
—Ti vo'oxuque mu xava'iic buch'u xch'ulel avich'ojic. Ti vu'un co'ol j'elantique ma'uc tal jtubbe xcuxlejalic ti jnaclejetique, tal jcolta.
Batic ta yan biq'uit jteclum.


Xi tal yal jun vinic c'alal yacal ta xanavic batel ta bee:
—Cajval, ta jc'an ta jchi'inot batel ti buyuc no'ox ta xabate.
Xi laj stac' ti Jesuse:
—Ti vete oy snail ch'enic, ti mutetique oy stasic, ja'uc ti vu'un co'ol j'elantique, mi ja'uc oy bu juteb xu' ta jcux ti co'ntone.
—Batic —xi laj yalbe yan vinique.
Xi laj staq'ue:
—Cajval, ac'bun ave ati' ti ta jmuc ba'yel ti jtote.
Xi laj stac' ti Jesuse:
—Ac'o smuc yanimaic ti buch'u chamemic ono'oxe. Ja'uc ti vo'ote, ba alo ti ventainel yu'un ti Diose.
Xi laj stac' ti jun xtoque:
—Cajval, ta jc'an ta jchi'inot batel. Ja'uc le' une, malaun jliqueluc, ta xba cal jba comel ta jna.
Xi laj stac' ti Jesuse:
—Ti buch'u ta sq'uel sutel svalopat ti yic'ojbe batel yabtejeb ti vacaxe, mu xtun ta yabtelanel ti ventainel yu'un ti Diose.

Sikiliza San Lucas 9