Tharu, Dangaura: Dangaura Tharu (New Testament)

Dangaura Tharu

मनैन्‍हक भारी भीड देख्‍क येशू पर्वत्‍वम जाक बैठ्‍ल। ओ चेलाहुँक्र उहाँकठे गैल। येशू हुँकन शिक्षा देहलग्‍ल:

“आत्‍मिक रूपम गरीबहुँक्र आशिष पाइल मनै हुइट,
काकरकि स्‍वर्गक राज्‍य हुँकन्‍हक्‍के हो।
शोक करुइयन आशिष पाइल मनै हुइट,
काकरकि हुँक्र सान्‍त्‍वना पैहीँ।
नम्र मनै आशिष पाइल मनै हुइट,
काकरकि हुँक्र पृथ्‍वीम अधिकार कर पैनेबाट।
धार्मिकतक लाग भुँखाइल-पियासल मनै आशिष पाइल मनै हुइट,
काकरकि हुँकन्‍हक भुँख-पियास मेट्‍नेबाटन।
दया करुइयन आशिष पाइल मनै हुइट,
काकरकि हुँक्र दया पैहीँ।
पवित्र मन रहुइयन आशिष पाइल मनै हुइट,
काकरकि हुँक्र परमेश्‍वरह देखहीँ।
मेलमिलाप करुइयन आशिष पाइल मनै हुइट,
काकरकि हुँक्र परमेश्‍वरक सन्‍तान कैजहीँ।
धार्मिकतक लाग सँतावा पउइयन आशिष पाइल मनै हुइट,
काकरकि स्‍वर्गक राज्‍य हुँकन्‍हक्‍के हुइटन।

“टुह्र आशिष पाइल मनै हुइटो, जब मनै महीह विश्‍वास कर्लक कारण टुँहन दुःख देहीँ, सँतैहीँ, निन्‍दा करहीँ, ओ झूट बोल्‍क टुन्‍हक बारेम खराब बात बट्‌वैहीँ। तब खुशी ओ आन्‍दित होओ, काकरकि टुन्‍हक लाग स्‍वर्गम भारी इनाम ढैगिल् बा। अघट्‌टेक अगमवक्तन फे मनै ओसहेँक दुःख देक सँताइँट्।”


“टुह्र पृथ्‍वीक न्‍वान हुइटो। तर न्‍वानक स्‍वाद हेराइल कलसे फेदोस्र केहीँले नोनार बनैना? उ त बाहर फँक्‍ना ओ मनै ग्‍वारले डब्‍ना बाहेक और कुछु कामक नैरहट्‍।
“टुह्र संसारक ज्‍योति हुइटो। पर्वत्‍वम बनल सहर नुक नैस्‍याकट्। दिया बार्क मनै पाथीले नैछोप्‍ट, बेनसे घरम सबजहन अजरार ह्‍वाए कैक सामदानम पो ढर्ठ। ओसहेँक टुँहन्‍हकम रहल ज्‍योति मनैन्‍हक आघ चम्‍कदेओ। ओ हुँक्र टुन्‍हक असल काम देखहीँ ओ स्‍वर्गम रना टुन्‍हक बाबक महिमा करहीँ।”

“मै मोशक देहल व्‍यवस्‍था या अगमवक्तन्‍हक ब्‍वालल् वचन रद्द कर आइल हुइटुँ कैक जिन सम्‍झो, बेनसे मै उ पूरा कर आइल हुइटुँ। जाट्‌टीसे मै टुँहन कहटुँ, जबसम स्‍वर्ग ओ पृथ्‍वी बित्‍क नैजाइ तबसम व्‍यवस्‍थम लिखल सब बात बिना पूरा हुइल उहिँमक अक्षरक एकठो मात्रा या एकठो बिन्‍दु फे नैहेरैने हो। व्‍यवस्‍थमक सबसे छुटी बातह उलङ्‍घन कर्ना ओ उलङ्‍घन कर सिखैना मनै स्‍वर्गक राज्‍यम सबसे छुटी ठहर्नेबाट। तर व्‍यवस्‍थक बात अप्‍न फे पालन कर्ना ओ औरजहन फे पालन कर लगैना मनैजुन स्‍वर्गक राज्‍यम बरा ठहर्नेबाट। मै टुँहन कहटुँ, परमेश्‍वरक आज्ञह शास्‍त्री ओ फरिसीहुँकनसे मजासे पालन नैकर्बो कलसे, टुह्र स्‍वर्गक राज्‍यम जाइ नैपउइयाहुइटो।

“टुह्र सुनरख्‍लो, अघट्‌टेक मनैन असिक कैगिल् रह, ‘हत्‍या जिन करहो, जे हत्‍या करी ऊ दण्‍ड पाई।’ तर मै टुँहन कहटुँ, आपन भैयसे रिसैना मनैया दण्‍ड पउइया बा। जे आपन भैयक अपमान करी ओहीह महासभम जवाफ देहपरहिँस। आपन भैयह सरपुइया त झन् नरकक् आगीम पर्नेबा।
“उहओर्से परमेश्‍वरह भेटी चह्रैनासे आघ टुँहार भैयक टुँहीनसे रिस बाटन कना बात थाहाँ हुइल् कलसे, टुँहार भेटी वेदीक आघ ढैक, तुरुन्‍त जाओ ओ आपन भैयसे मेलमिलाप कैडारो। तबदोस्र आक आपन भेटी चह्राओ।
“अदालतम पुग्‍नासे आघ आपन विरोधीसे डगरिहेम मेलमिलाप कैडारो, नकि त ऊ टुँहीन न्यायाधीशक जिम्‍मा लगादेहीँ, ओ न्यायाधीश टुँहीन सिपाहीक जिम्‍मा लगादेहीँ त टुँ झ्‍यालखानम पर्नेबाटो। जाट्‌टीसे मै टुँहीन कहटुँ, उ ब्‍याला जरिमानक एक-एक पैँसा नैतिरटसम टुँ छुट्‌कारा नैपैनेहुइटो।

“‘व्‍यभिचार जिन करहो’ कना बात त टुह्र सुनरख्‍लो। तर मै टुँहन कहटुँ, कौनो महिलह कुई गलत विचारले ह्‍यारल कलसे फे ऊ मनम व्‍यभिचार कैस्‍याकल रठा। यदि टुँहार दाहिन आँख पाप कर लगैठा कलसे, ओहीह झिँक्‍क फाँकदेओ, काकरकि टुँहार सलशरीर नरकम फँक्‍वापाइलसे त टुँहार शरीरक अङ्‌गमसे एकठो अङ्‌ग फँक्‍ना टुँहार लाग धेर असल हो। टुँहार दाहिन हाँठ पाप कर लगैठा कलसे, ओहीह काट्‌क फाँकदेओ। काकरकि टुँहार सलशरीर नरकम फँक्‍वापाइलसे त टुँहार शरीरक अङ्‌गमसे एकठो अङ्‌ग फँक्‍ना टुँहार लाग धेर असल हो।


“असिक फे लिखल बा, ‘आपन गोसिनेह छ्‌वार खोजुइया छोडपत्र कागत लिख्‍क छ्‌वार।’ तर मै टुँहन कहटुँ, जे आपन गोसिनेह व्‍यभिचारक कारण बाहेक और कारणले छोरी, ऊ ओहीह व्‍यभिचार कर लगैठा ओ ओसिक जे छ्‌वारल गोसिन्यह भ्‍वाज कर्ठा, ऊ फे व्‍यभिचार कर्ठा।”

“अघट्‌टेक मनैन ‘झूट किर्‍या जिन खैहो, तर परमप्रभुक नाउँम खाइल किर्‍या पूरा करहो’ कैक कहल बात त टुँहन थाहाँ बा। तर मै टुँहन कहटुँ, कौनो बातक फे किर्‍या जिन खैहो। स्‍वर्गक नाउँ लेक किर्‍या जिन खैहो, काकरकि उ त परमेश्‍वरक सिंहासन हो। पृथ्‍वीक नाउँ लेक फे किर्‍या जिन खैहो, काकरकि यी परमेश्‍वरक पाउदान हो। यरूशलेमक नाउँ लेक फे किर्‍या जिन खैहो, काकरकि उ त महाराजक सहर हो। आपन कपारिक किर्‍या फे जिन खैहो, काकरकि टुह्र आपन कपारिक एकठो भुट्ला फे उज्‍जर या कर्‍या बनाइ नैसेक्‍टो। ज्‍या कना बा, हो कलसे हो कहो, नैहो कलसे नैहो कैदेहो। ओहीसे बहुत कुछु बोल्‍बो कलसे, उ त शैतानकओर्से हो।


“‘आँखक बद्‍ला आँख, दाँतक बद्‍ला दाँत’ कना बात त टुह्र सुनरख्‍लो। तर मै कहटुँ, टुह्र कौनोजहनसे बद्‍ला जिन लेओ। यदि कौनो मनैया टुँहार दाहिन गालम चट्‌काई कलसे, बाउँ गाल फे सोझारदेओ। कौनो मनैया मुद्दा लगाक टुँहार कमीज लैजाइ खोज्‍ठा कलसे, ओहीह कोट फे देडारो। कौनो मनैया एक किलोमिटरसम जैना कर लगैठा कलसे, वाकरसँग दुइ किलोमिटरसम जादेओ। टुँहीनसे मङ्‌ना सबजहन देओ, ऋण मङ्‌ना मनैन फे ऋण देओ।


“‘आपन छिमेकीह प्रेम करो, शत्रुहजुन हेल्‍हा करो’ कना बात त टुँहन थाहँ बा। तर मै टुँहन कहटुँ, शत्रुन प्रेम करो। टुँहन सँतुइयन्‍हक लाग प्रार्थना करो। असिक कर्बो कलसे, स्‍वर्गम रना आपन बाबक छाई-छावन हुइबो। काकरकि परमेश्‍वर खराब ओ सज्‍जन दुनु जन्‍हक लाग घाम लगादेठ। धर्मी ओ पापी दुनु जन्‍हक लाग पानी बर्सादेठ। टुँहन प्रेम करुइयन केल प्रेम कर्ठो कलसे, टुह्र का इनाम पाइसेक्‍बो जे? ओसिन प्रेम त कर उठुइयन फे कर्ठ। टुह्र आपन मनैन केल आदर कर्ठो कलसे, औरजहनसे धेर का काम कर्लो जे? ओसिक त गैरयहूदी मनै फे कर्ठ। स्‍वर्गम रना बाबा सब बातम सिद्ध रहअस टुह्र फे सब बातम सिद्ध होओ।”

Sikiliza मत्ती 5