If you have would like a copy of this version please contact info@davaraudiobibles.org

Limbu Old Testament

खे़ब्‍याङ् निङ्‌वाॽफुमाङ्‌ङिल्‍ले़ नुहन् नु कुस्‍साहाॽ हाङ्‌वामुॽइ पिरुसिआङ् मे़त्तुसि, “मिक्‍किफुङ् फे़क्‍ताम्‍मे़ॽर पोःन्‍दे़म् थे़ॽरे़म्‍मे़ॽ, हे़क्‍क्‍याङ् इक्‍सादिङ् खाम्‍बेःक्‍मान् थिम्‍से़म्‍मे़र पेगे़म्‍मे़ॽ॥ इक्‍सादिङ् खाम्‍बेःक्‍मोबा के़रे़क् थक्‍साहाॽ नु ताङ्‌साङ्‌बो के़बे़बा के़रे़क् पुसाहाॽरे़ हे़क्‍क्‍याङ् वरःङ्‌ङो के़याक्‍पा के़रे़क् ङाहाॽरे़ खिनिॽ के़म्‍गिरिॽ॥ खे़ङ्‌हाॽ खिनिॽ हुक्‍कोए मे़वाॽरो॥ कुसक्‍मा के़याक्‍पा मुन्‍जिङ् वयाक् के़लॽबा के़रे़क् थक्‍सापुसाहाॽ खिनिॽ चामा कुजा पोङ्॥ के़रे़क् सरेःक्‍क्‍याःप्‍पा थाबुदिङ् सिङ्‌बुङ् लुङ्‌बुङ्‌हाॽ खिनिॽ पिनिङ्‌बा हे़क्‍केए आल्‍ल खिनिॽ के़रे़क् पाःन्‍हाॽ पिनिङ्‌लो॥
“कर हिङ्‌मन् के़बिबा कुमाक्‍खिॽइन्‍नु सोरिक् खिनिॽ सा मे़जे़म्‍मिन्‍ने़ॽ॥ हे़क्‍क्‍याङ् खिनिॽ हिङ्‌मन् के़बिबा माक्‍खिॽइल्‍ले़ कुले़क्‌वा आङ्‌गाॽ खुम्‍दिङ् पिरुङ्‌सिङ्‌लो॥ के़रे़क् थक्‍सालाम्‍बा हिङ्‌मन्‍ले़ कुले़क्‌वा नाःक्‍तुङ्‌लो, हे़क्‍क्‍याङ् के़रे़क् मे़न्‍छाम् याप्‍मि लाम्‍बाआङ् वेॽ फुॽनुसाॽहाॽरे़ खुन्‍छि हिङ्‌मन्‍ले़ कुले़क्‌वा नाःक्‍तुङ्‌लो॥
“मना के़से़प्‍पान् मनारे़ए मे़से़रुरो,
थेआङ्‌भे़ल्‍ले़ निङ्‌वाॽफुमाङ्‌ङिल्‍ले़ आबाङे कुजइःत्तो मे़न्‍छाम् याप्‍मिन् चोगुबारो॥
खिनिॽग मिक्‍किफुङ् फे़क्‍ताम्‍मे़ॽर पोःन्‍दे़म् थे़ॽरे़म्‍मे़ॽ॥ इक्‍सादिङ् खाम्‍बेःक्‍मो आत्तातान्‍ने यरिक् हिन्‍जाॽबित्‍छाॽहाॽ मे़वाॽर, हे़क्‍क्‍याङ् यरिक् मे़बोङ्‌ङाङ् मे़बोन् मे़बेःक्‍ल॥”
खे़ब्‍याङ् निङ्‌वाॽफुमाङ्‌ङिल्‍ले़ नुहन् नु कुस्‍साहाॽ अक्‍खे मे़त्तुसि, “खिनिॽ हे़क्‍क्‍याङ् खिनिॽ सामे़न्‍छाॽहाॽनु, वालाधाओलाम् खिनिॽनु के़लःम्‍बा के़रे़क्—कुहिङ्‌वे़त् थक्‍सापुसाहाॽ, हिम्‍धक्‍साहाॽ, ताम्‍भुङ् थक्‍साहाॽनु आङ्‌गाॽ आमाङ्‌हुप्‍पिन् युक्‍सिङ् चोगुङ्‌लो॥ याम्‍मो आभे़ल्‍ले़आङ् वदप्‍माओबा च्‍वाःत्तिल्‍ले़ पाधुङ्‌साहाॽ मे़म्‍मे़क्‍ने़न्, इक्‍सादिङ् खाम्‍बेःक्‍मान् मे़ङ्‌मारे़ लागि याम्‍मो आभे़ल्‍ले़आङ् वदप्‍मा मे़धाङ्‌ने़न् फाॽआङ् आङ्‌गाॽ आमाङ्‌हुप्‍पिन् युक्‍सिङ् चोगुङ्‌लो॥”
हे़क्‍क्‍याङ् निङ्‌वाॽफुमाङ्‌ङिल्‍ले़ पाःत्तु, “आङ्‌गाॽ नु खे़ने़ॽ हे़क्‍क्‍याङ् खे़ने़ॽनु के़वाॽबा के़रे़क् कुसक्‍मा के़याक्‍पा थक्‍सापुसाहाॽ लुम्‍मो हे़क्‍क्‍याङ् ताःन्‍दि के़दाबा के़रे़क् थाःक्‍हाॽरे़ लागि आङ्‌गाॽ चोगुङ्‌बा माङ्‌हुप्‍पिल्‍ले़ मिक्‍सेन् कन् पोङ्‌लो— खाॽमिःत्तो आनाम्‍धिङ्‌गोन् फत्‍छुङ्, हे़क्‍क्‍याङ् खे़न् आङ्‌गाॽ नु इक्‍सादिङ् खाम्‍बेःक्‍माल्‍ले़ कुलुम्‍मो लत्‍छा माङ्‌हुप्‍ले़न् मिक्‍सेन् पोङ्‌लो॥ आङ्‌गाॽ इक्‍सादिङ् खाम्‍बेःक्‍मो खाॽमिःप्‍पान् फत्‍छुङ् हे़क्‍क्‍याङ् नाम्‍धिङ्‌गोन् निधाःप्‍पिल्‍ले़, आङ्‌गाॽ नु खिनिॽ हे़क्‍क्‍याङ् के़रे़क् परिक्‍पा पाधुङ्‌साहाॽलुम्‍मो चोगुङ्‌बा आमाङ्‌हुप्‍पिन् निङ्‌वाॽ इःत्तुङ्‌लो॥ के़रे़क् पाधुङ्‌साहाॽ के़से़प्‍पा वदप्‍मा च्‍वाःत्तिन् याम्‍मो आभे़ल्‍ले़आङ् थाङ्‌ल मे़याःन्‍नाल्‍लो॥ खाॽमिःप्‍पो नाम्‍धिङ्‌गोन् निधाःप्‍पिल्‍ले़, आङ्‌गाॽ खे़न् ओमे़त्तुङ्‌ङाङ् निङ्‌वाॽफुमाङ्‌ङिन् नु इक्‍सादिङ् खाम्‍बेःक्‍मोबा के़रे़क् कुहिङ्‌वे़त् पाधुङ्‌साहाॽलुम्‍मो के़बोङ्‌बा सदादिङ्‌बा माङ्‌हुप्‍पिन् निङ्‌वाॽ इःत्तुङ्‌लो॥”
निङ्‌वाॽफुमाङ्‌ङिल्‍ले़ अक्‍खेलॽरिक् नुहन् मे़त्तु, “इक्‍सादिङ् खाम्‍बेःक्‍मोबा के़रे़क् कुहिङ्‌वे़त् पाधुङ्‌साहाॽ नु आङ्‌गाॽ आलुम्‍मो चोगुङ्‌बा माङ्‌हुप्‍पिल्‍ले़ मिक्‍सेःन्‍निन् आम्‍भा कन्‍लो॥”

वालाधाओनु के़लःम्‍बा नुहःल्‍ले़ कुस्‍साहाॽ सेम, हाम, ये़पे़द मे़वये़॥ हाममे़न् कनानले़ कुम्‍बा वये़॥ नोहःल्‍ले़ कुस्‍साहाॽ हाबा कन् सुम्‍सि मे़वये़, कन्‍हाॽलाम्‍बाए इक्‍सादिङ् खाम्‍बेक् खाराक् मे़न्‍छाम् याप्‍मिहाॽ मे़से़रो॥
नुहन् याःन्‍गे़मबा के़जाबा पोःक्‍खे़, खुने़ॽए के़रे़क्‍नुःल्‍ले़ तगि चे़ल्‍ले़क्‍सेॽ इक्‍ताप् के़लेःप्‍पा वये़॥ खे़ल्‍ले़ चे़ल्‍ले़क्‍सेॽ थिन् थुङु, खे़ब्‍याङ् खुने़ॽ मयुआङ् कुसाःङ्‌गाहिम् सिगाङ् ले़क्‍चाॽबुधुक् इप्‍से़आङ् ने़स्‍से़॥ कनानले़ कुम्‍बा हामे़ल्‍ले़ आबाङे कुम्‍बान् ले़क्‍चाॽबुधुक् ने़स्‍से़बा निसुआङ् लाःक्‍कात् लःन्‍दे़बे हे़क्‍क्‍याङ् कुम्‍भुॽसि ने़प्‍मजाङ् चे़क्‍तुसि॥ कर सेमे़न् नु ये़पेत्ते़ल्‍ले़ लत्‍छा चिरिक्‍थिक् याङ्‌ने़त्‍छि, हे़क्‍क्‍याङ् ने़प्‍माङ्‌ले़ खुन्‍छिॽ फक्‍ताङ्‌ङो फत्‍छे़छु, हे़क्‍क्‍याङ् एगाङ् एगाङ् सःन्‍ने़छिर पेगे़त्‍छिआङ् खे़ङ्‌हाॽरे़ ले़क्‍चाॽबुधुक् के़ने़बा खुन्‍छिॽ पान् ते़प्‍ते़त्‍छु॥ खे़ङ्‌हाॽरे़ खुन्‍छिॽ नारान् एगाङ् ले़प्‍साङ् हिसिङ्‌ङाङ् पत्‍छे़बाल्‍ले़ चोगुल्‍ले़ खे़ङ्‌हाॽरे़ खुन्‍छिॽ पान् ले़क्‍चाॽ ने़स्‍से़बा मे़निसे़त्‍छुन्॥
नुहन् चे़ल्‍ले़क्‍सेॽ थिःल्‍ले़ ममा ले़रुल्‍ले़ कुस्‍सा फोःक्‌वाबाल्‍ले़ चोगुबा पाःन्‍निन् निङ्‌वाॽ खोसु, खे़ब्‍याङ्‌ग खे़ल्‍ले़ पाःत्तु,
“कनानने़न् माङ्‌दे साङ्‌ग्रारे़ ते़त्तुरो,
खे़ङ्‌ग कुम्‍भुॽसिरे़ खुन्‍छिॽ योःग्‍बाहाॽनुःल्‍ले़आङ्
योयोक्‍पा योग्‍बा पोङ्‌लो॥”
खे़ल्‍ले़ अक्‍खेआङ् पाःत्तु,
“सेमे़ल्‍ले़ कुयहवे दाङ्‌बा निङ्‌वाॽफुमाङ्‌ङिल्‍ले़ कुनारा पोररो,
हे़क्‍क्‍याङ् कनाने़न् खे़ल्‍ले़ कुयोःग्‍बा पोङ्‌लरो॥
निङ्‌वाॽफुमाङ्‌ङिल्‍ले़ ये़पेत्ते़न् पोःन्‍थे़ॽर याःन्‍दुररो,
खे़न् सेमे़ल्‍ले़ कुसाःङ्‌गा हिम्‍मो याङ्‌धोःक्‍लरो,
हे़क्‍क्‍याङ् कनाने़ङ्‌ग ये़पेत्ते़ल्‍ले़ कुयोःग्‍बा पोङ्‌लरो॥”
वदप्‍मा थाङे़आङ् एगाङ् नुहन् किप् सुम्‍सिआङ् ङाबोङ् तङ्‌बे थारिक् हिङे़॥ नुहन् के़रे़क्‍ले़ कुगिप् फाङ्‌सिआङ् ङाबोङ् तङ्‌बे के़रे़आङ् वये़॥ हे़क्‍क्‍याङ् खुने़ॽ मासिङ्॥

Sikiliza तोलिङ्‌सोमु 9