Text: © The Bible Society in Liberia, 1999 Audio: ℗ 2010 Hosanna

Krahn, Western - 1998 Edition (NT)

The New Testament in Western Krahn published as KU̍O̍ DELEE © The Bible Society in Liberia, 1999.

Blèe̍ ɛ̀ se̍-a fù-i dɛ̍ᵻ we̍ poe-ɛ, ɛ̍ peě kɔǎn we̍ wɛ̀, ɛ̀ u̍h-a dǎɛ-a Sììkɛ̍n-a Peě-ɛ. Wɛ̀ Nyɔsoa-a slaǎ sà nyɔ̍ klaaᵻ ke telě nǎ poe nyɔ̍-a pɔ̀n jii la̍ i̍ u̍h iě Jusu dbǎ soɛɛ, dɛ̍nu̍ɛ, u̍h-a ple̍ nyɔ̍gbei jǔ.


Wɛ̀ Juda u̍h-a dǎɛ-a Ɛkɛlia-ɛ, iě Setɔn gbǎ dě ɔ̍ ja̍a̍. Kòà-a pùè jɔ̌ sɔɔ̌n laa̍ u̍h-a due bo. Wɛ̀ ɔ̍ mu̍ dě Nyɔsoa-a slaǎ sà nyɔ̍ klaaᵻ ke slaǎ sà gbò-a chape we̍. Iě ɔ̍ ke u̍h pu̍e̍e tìh ka ɔ̍ mu̍-a Jusu kwlǎ sà-a nu̍ dě u̍h we̍-ɛ. Ɛ̍ tè-e u̍h-a wlùh i̍, iě u̍h po̍ wlu̍ tɔ̀ma̍a̍ u̍h iě wlǐ pɛ̌ɛ. Wɛ̀ Juda wɔ̌n. Sɔ ɔ̍ pɔ̀n la̍ jii la̍ i̍ sǔh ɔ̍ iě Jusu kwlǎ sà dě u̍h we̍ wɛ̀ nyɔ̍gbei je̍e la̍a̍n jě.


Blèe̍ ɛ̍ se̍-a fù-i dɛ̍ᵻ we̍ poe-ɛ, wɛ̀ ɛ̍ weɛ̍-a peě nyni̍-o. Dǒ ɛ̍ di̍i̍ bo nyɔ̍-a sà-ɛ Sììkɛ̍n-a blawɛ̌ jǔ slaǎ. Iě Jusu dbo̍ Pitɛ ke Chɔɔn. Ɔ̍ la̍a̍ dě u̍h we̍, “Mɔ̀ mu̍ mɔ̀ iě Sììkɛ̍n Weɛ̍-a Peě-a di̍-dɛ̍ᵻ gba̍a̍ po̍ dǒ àɔ̀ we̍ à iě di̍.”
Wɛ̀ u̍h la̍a̍ dě ɔ̍ we̍, “Tàwe̍ àn pɔ̀n à iě i̍h gba̍a̍ po̍-e ɛ?”
Iě ɔ̍ la̍a̍, “Pò mɔ̀ nyni̍ wlɔ̀-ɛ, mɔ̀ ke jɔ̍gbau due-a mu̍ gbèɛ̀ɛn, ɔ̍ tè tee̍ dlǔ. Nɛ̀ mɔ̀ wɔ̀ dǒ ɔ̍ de̍e̍ mɔ̀ iě dě gbò kɔn di̍i̍ ɔ̍ mu̍-a mu̍-ɛ pa̍. Nɛ̀ mɔ̀ sèàɛ̍ gbò joi wlùh, mɔ̀ la̍a̍, ‘À Dlǔtu la̍ toe àɔ̀ dihwi̍h gbòju, tà ɔ̍ ke ɔ̍ kòà-a mu̍-a Sììkɛ̍n Peě-a di̍-dɛ̍ᵻ di̍-iɛ.’ Nɛ̀ ɔ̍ mu̍ mɔ̀ ja̍i̍ gbòju klaa ɛ̀ dɛ̍ᵻ kli̍hgbɛ̍ nɛ-a dě di̍i̍-ɛ toe. Dě mɔ̀ iě dɛ̍ᵻ kli̍hgbɛ̍ gba̍a̍ po̍-e.”
Wɛ̀ u̍h mu̍, iě u̍h jě ìh kɔn taǐn Jusu sèàɛ̍-a u̍h wlùh-ɛ. Wɛ̀ u̍h po̍ Sììkɛ̍n Peě-a di̍-dɛ̍ᵻ gba̍a̍.


Ti̍ nyni̍-aɛ, wɛ̀ Jusu ke ɔ̍ gba̍tòà tìèe̍ i̍ dǒ teble̍ gbɔ̀. Iě ɔ̍ la̍a̍ dě u̍h we̍, “Ɛ̍ nu̍ ǎn wlùh dɛ̍ kaa̍ mɔ̀ ke ǐn ke à iě Sììkɛ̍n Peě-a di̍-dɛ̍ᵻ di̍ sasǎ wɛ̀ iě tìh jě-ɛ dǔ. Dɛ̍nu̍ɛ, ǎn sèàɛ̍ mɔ̀ wlùh, ǐn se̍ i̍h di̍ mu̍ dɛ te̍e̍ wɛ̀ dɛ̍ᵻ ìh kɔ̍-a dǒ ǐn pùn i̍-ɛ, i̍h iě nɛ dě Nyɔsoa-a kmɔ̌ wlu̍ i̍ kɔn-ɛ di̍i̍.”
Wɛ̀ Jusu dǔ kàu̍n-u, iě ɔ̍ po̍ Nyɔsoa tlɔ̌. Ɔ̍ la̍a̍, “Mɔ̀ dǔ ɛ̀ la-a mɔ̀ iě ɛ̍ mɔ̀-a chɛ̀ jii̍ gblè. Ǎn sèàɛ̍ mɔ̀ wlùh, sɔ da̍a sèàn blǐ ǐn se̍ nmɔ̍ la nǎ mu̍ dɛ te̍e̍ wɛ̀ Nyɔsoa-a kmɔ̌ wlu̍ i̍ kɔn-ɛ iě ji̍.”
Wɛ̀ ɔ̍ dǔ blèe̍ gba̍n-a, iě ɔ̍ po̍ Nyɔsoa tlɔ̌. Wɛ̀ ɔ̍ chɛɛn ɛ̍ i̍, iě ɔ̍ nyǐ ɛ̍ ɔ̍ kòà. Ɔ̍ la̍a̍, “Ɛ̀ la ǎn ku̍ bo [ɛ̍ sà-ɛ slaǎ dǒ mɔ̀ we̍. Mɔ̀ di̍ ɛ̀ la wɛ̀ ǎn tìh iě dǒ mɔ̀ wlì i̍ sǐ.” U̍h wɔ̀-a dɛ̍ di̍-ɛɛ, wɛ̀ ɔ̍ nyǐ u̍h kàu̍n laa̍ ke. Iě ɔ̍ la̍a̍, “Kàu̍n la, ɛ̍ bo ɛ̀ nu̍ ku̍o̍ delee Nyɔsoa po̍ dǒ ǎn nymɔ̍ ɛ̀ wlǎ-a i̍ dǒ mɔ̀ we̍-ɛ we̍.]
“Jɛ nyɔ̍ ɔ̀ mu̍-a ǐn kwlǎ sà-ɛ, ɔ̍ bo ɔ̀ ke ǐn ke à gbo̍a̍ɛ-a sɔ̍n jǔ da̍a teble̍ kɛ̍n. Nyi̍ɔ̍-a Jǔ-a mu̍ mɛ̌ dǒ ka Nyɔsoa nu̍-a ɛ̍ i̍ dbǎ-a we̍. Jɛ nyɔ̍ ɔ̀ sà-a ɔ̍ kwlǎ-ɛ, chlě dǒ ɔ̍ we̍.”
Wɛ̀ u̍h tè we̍ i̍ tèle-ɛ gbɔ̀, pò u̍h-a nyɔ̍we̍ bo ɔ̀ mu̍ ɛ̍ nu̍ kɔ̌ɔ.

Wɛ̀ wɔ̍ɔ̍n i̍ sà-a gbǎ dě kòà nynɛ̌ dǒ u̍h-a nyɔ̍ jɔ ku̍-a wɔ̍n ɔ̀ sìì-a ɔ̍ ba̍ᵻ kli̍hgbɛ̍-ɛ dɛ we̍. Iě Jusu la̍a̍ dě u̍h we̍, “Ùh se̍-a Juu nyɔ̍-ɛ u̍h-a blǔh baaᵻá nui u̍h-a nyɔ̍ bloa̍ joi dɛ kɛ̍n i̍. Wɛ̀ nyɔ̍ ùh blě-a tùn dǒ u̍h dlǔwèàì-ɛ, iě u̍h-a dǎɛ u̍h-a chɛ̀ dɛ̍ᵻ chɛ̀ nu̍ nyɔ̍. Jɛ ɛ̍ se̍-o mɔ̀ɔ̍ nɔ̀ɔ̍ nynɛ̌ i̍ nmɔ. Iě pò nyɔ̍ ku̍ wɔ̍n dě mɔ̀ nynɛ̌ ɔ̍ sìì ɔ̍ ba̍ᵻ i̍-ɛ, nɛ̀ ɔ̍ bo ɔ̀ iě jǔwɛ wɔ̀ dě mɔ̀ nynɛ̌, wɛ̀ dlǔtu iě pòi̍ju wɔ̀. Jɔ tè-a i̍ dǒ teble̍ gbɔ̀ u̍h-a dbee-a jǔ-ɛ ke, jɔ dbee-a nyɔ̍ jǔ-ɛ, u̍h nɛ-a sɔɔ̌n-ɛ, jɔwe̍ bo ɔ̀ ku̍ wɔ̍n ɛ? Jɔ tè-a i̍-ɛ bo ɔ̀ ku̍ wɔ̍n. Jɛ ǐn nɛ nɔ̌ mɔ̀ nynɛ̌ ka nyɔ̍ jǔ dbee nyɔ̍-ɛ.
“Mɔ̀ɔ̍ bo ùh nyna ǐn de̍e̍ i̍ dě ǎn jua̍i̍ sàɛ̀-ɛ kli̍hgbɛ̍ di̍i̍. Ɛ̍ tìh-ɛ, ka ǐn Baa nu̍-a ǐn nyɔ̍ wlu̍ i̍ kɔn-ɛ kwa̍ tèè-ɛɛ, kǎ ǐn nu̍ ɛ̍ mɔ̀ kwa̍ tèè-ɛ ke. Wɛ̀ mɔ̀ iě dǒ ǎn teble̍ kɛ̍n dɛ̍ di̍-i, mɔ̀ iě nǎ dě ǎn kmɔ̌ wlu̍ i̍ kɔn-ɛ di̍i̍. Wɛ̀ mɔ̀ iě dǒ nynɛ̌ gbalǎᵻ kɛ̍n i̍ tìèe̍, wɛ̀ mɔ̀ iě Eslɔɛ nyɔ̍-a chɛ̌tu-a pùè jɔ̌ sɔɔ̌n wlu̍ i̍ kɔn.”


Jusu la̍a̍, “Samo, Samo, Setɔn sà-ɛ wlu̍ kɛ̍n ɛ̍ iě mɔ̀-ɔ slɛ̌n ka klè joi-a fùn kwǐ kɛnɛ̌ i̍-ɛ. Jɛ ǐn ba̍le dǒ àn tàà wɛ̀ àn wlùh gbaɛ je̍e ìn si̍h wɔ̍n po̍. Nɛ̀ pò ìn fèàɛ̀ nɔ̌ ǐn we̍ dode̍-ɛ, nɛ̀ ìn po̍ ìn de̍di̍i̍ᵻ gbǐh ku̍u̍ ke o.”
Iě Pitɛ la̍a̍, “Joi, ǐn gbàɛ̀ iě dě ìn we̍ kasoo gbǎ wɛ̀ iě-e mɛ̌-ɛ.”
Jusu la̍a̍, “Pitɛ, ǎn sèàɛ̍ ìn wlùh, àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ sɔ̀nwɔ̍i̍n.”

Wɛ̀ Jusu la̍a̍ dě ɔ̍ kòà we̍, “Ti̍ ǐn dbo̍-a mɔ̀ wɛ̀ mɔ̀ se̍-a pɔsɛ̍ ke, gbèèkǔ ke bu̍h-u po̍-dɛ̍ᵻ gba̍-ɛ, dɛ̍ bo ɛ̀ kɔn tìh nu̍ mɔ̀ i̍ ɛ?”
Iě u̍h la̍a̍, “Dɛ̍-a tìh se̍ à i̍ nu̍.”
Jusu la̍a̍, “Jɛ kaka la̍ nyɔ̍ ɔ̀ blě-a pɔsɛ̍ ke gbèèkǔ-ɛ, nɛ̀ ɔ̍ dǔ ɛ̍-ɛ. Nɛ̀ nyɔ̍ ɔ̀ se̍-a plàn chlɛ̀n blě-ɛ, ɔ̍ ple̍ ɔ̍ dɛ̍wlo̍o̍ ɔ̍ iě due tɛ̀n. Nyɔsoa-a chlǐh-wlu̍ la̍a̍, ‘U̍h-a mu̍ ɔ̍ dɛ̍ᵻ sɔ̀nᵻ nyɔ̍ slè-e.’ Bɔ̌ ǐn sèàɛ̍ mɔ̀ wlùh, ɛ̍ kɔn ɛ̍ iě chɛ̀-ɛ gbǎ dǒ ǐn pùn. Dɛ̍nu̍ɛ, dɛ̍ᵻ ìh chlǐh-a dǒ ǎn dɛ we̍-ɛ, i̍h-a nɛ la̍-ɛ.”
Wɛ̀ ɔ̍ kòà la̍a̍, “Joi, gbɛ̀n-e, plàn chlɛ̀nᵻ sɔɔ̌n la.”
Iě ɔ̍ la̍a̍, “I̍h tìè i̍.”


Wɛ̀ Jusu sɔ dǒ wlɔ̀, iě ɔ̍ mu̍ dě Ɔle-Tu̍ᵻá Tlu̍h kɛ̍n ɔ̍ ke ɔ̍ kòà ke, ɛ̀ nu̍-a ɔ̍ tǐwai dɛ̍ se̍e̍-ɛ. Ɔ̍ nyni̍-aɛ, iě ɔ̍ la̍a̍ dě u̍h we̍, “Mɔ̀ ba̍le wɛ̀ mɔ̀-ɔ je̍e blu̍ja̍a̍ gbǎ.”
Iě ɔ̍ sɔ dǒ u̍h we̍ ɔ̍ mu̍ tà nyɔ̍ po̍ sɔɔ̌ gbo̍-ɛ, ɛ̍ mu̍-a nyni̍-ɛ. Wɛ̀ ɔ̍ po̍ kɔlu̍ᵻ wlù iě ɔ̍ ba̍le. Ɔ̍ la̍a̍, “Baa, pò ìn wɔ̌n-ɛ, nɛ̀ ìn sà ǐn kàu̍n la wɔ̍i̍n. Jɛ dɛ̍ àn pɔ̀n-a bo ɛ̀ ìè nɛ, ɛ̍ se̍ naɛ̍ ǐn se̍ dǎ.” [ Wɛ̀ Nyɔsoa-a ǐnchɔ̀ sɔ dě ja̍i̍wlɔ̀ ɛ̍ wlǔh-i ɔ̍ i̍. Iě ɛ̍ po̍ ɔ̍ gbǐh ku̍u̍. Wɛ̀ ɔ̍ ba̍le dɛ̍blɔ, dɛ̍nu̍ɛ, nɛ̀ ɛ̍ chlɛ̌n-ɛ ɔ̍ wlùh. Nɛ̀ ka nymɔ̍-a tǒ dǒ bloɔ̍-ɛ, kǎ sù ɛ̀ wlǔh-a ɔ̍-ɛ, ɛ̍ nu̍ tǒ-ɛ.]
Ɔ̍ wɔ̀-a ba̍le-ɛ, iě ɔ̍ mu̍ dě ɔ̍ kòà we̍. Ɔ̍ iě-a mu̍-ɛ, nɛ̀ u̍h gboǎɛ nyinɔ̍ i̍ wɛ̀ dǒ wɔɛ-a sǔh we̍. Wɛ̀ ɔ̍ la̍a̍ dě u̍h we̍, “Dɛ̍nu̍ mɔ̀-a mɔ̌ ɛ? Mɔ̀ sɔ bloɔ̍ mɔ̀ iě ba̍le, wɛ̀ mɔ̀-ɔ je̍e blu̍ja̍a̍ gbǎ.”


Jusu nɛ dǒ wlu la̍ wɛ̀ nyɔ̍ tlùgbei̍ ji̍. Nɛ̀ Juda ɔ̀ po̍-a Jusu-a kòà pùè jɔ̌ sɔɔ̌n-ɛ, ɔ̍ bo ɔ̀ blě u̍h kwa̍. Wɛ̀ ɔ̍ mu̍ Jusu wlì ɔ̍ iě ɔ̍ gblèè. Wɛ̀ Jusu la̍a̍ dě ɔ̍ we̍, “Juda, nyɔ̍ gblèè-ɛ bo àn mu̍ Nyi̍ɔ̍-a Jǔ kwlǎ sà-ɛ ae?”
Kòà ùh ke Jusu na-aɛ, u̍h juo dɛ̍ ɛ̀ mu̍-a nɛ-ɛ, iě u̍h la̍a̍, “Joi, à nu̍ à plàn chlɛ̀nᵻ à iě u̍h we̍ fɔ̀n ae?” Iě u̍h-a due tba̍ Nyɔsoa-a slaǎ sà nyɔ̍-a dlǔtu-a kèi̍ dɛ̍, ɔ̍ chɛ̍n ɔ̍ di̍na̍ doun i̍.
Jɛ Jusu la̍a̍, “Bɔ̌ ɛ̍ ba̍ nu̍-ɛ dɛ.” Iě ɔ̍ tǔh jɔ̍gbau laa̍ ɔ̍ doun i̍, wɛ̀ ɛ̍ bɔ̌.
Wɛ̀ Jusu la̍a̍ dě slaǎ sà nyɔ̍-a klaaᵻ ke, slaǎ sà gbò-a chapeᵻ ke nyɔ̍ klaaᵻ ùh ji̍-a ɔ̍ gbɛ̍n la̍-ɛ we̍, “Ɛ̀ mɔ̀ nu̍-a plàn chlɛ̀nᵻ ke gbòmina̍ᵻ kwa̍ i̍ blě-ɛ wɛ̀ mɔ̀ nu̍-a ji̍-ɛ, nɛ̀ ka nyɔ̍ la̍ mɔ̍ jlǐ-nyɔ̍-ɛ. Ka sɔ̀n-a sɛ̀n-aɛ, kǎ ǎn nɛ dě mɔ̀ we̍ Nyɔsoa-a slaǎ sà gbò sɔ̀n, dǒ-o nɔ̀ɔ̍, mɔ̀ se̍ ǐn sɔ̍n pùn gba̍. Jɛ nɛ̀ jɛwɛ̀ mɔ̀-a ti̍ nyni̍ dɛbo, ɛ̍ ke kwile naɛ gbǐh ke.”


Wɛ̀ u̍h gbɛ̍n Jusu iě u̍h gba̍ ɔ̍ dě slaǎ sà nyɔ̍-a dlǔtu blǐ gbò. Iě Pitɛ wɔ̀ dǒ u̍h de̍e̍, jɛ nɛ̀ ɔ̍ ti̍ɛ̍ɛn u̍h we̍ i̍. U̍h tbà nɛ̍ dǒ gbò-a gbàɛ̍gbà-a wèa̍, iě u̍h tìèe̍ tàdùè i̍. Wɛ̀ Pitɛ tè i̍ dě u̍h nynɛ̌, iě nynɔ̌gbaɔ jǔ due ɔ̀ nu̍-a pòi̍ju-ɛ jě ɔ̍. Wɛ̀ ɔ̍ gbɛ̀n Pitɛ ja̍ sòo̍sòo̍, iě ɔ̍ la̍a̍, “Jɔ̍gbau la ɔ̍ ke Jusu-a na ke o.”
Jɛ Pitɛ tòlo-e, ɔ̍ la̍a̍, “Nynɔ̌ chɛ̀, ǐn se̍ ɔ̍ juo o.”
Ɛ̍ wlè-o wɛɛ iě nyɔ̍ dɔɔ jě ɔ̍. Wɛ̀ ɔ̍ la̍a̍, “Mɔ̀ la, mɔ̀ nyɔ̍ la u̍h-a due ke o.”
Jɛ Pitɛ la̍a̍, “Jɔ̍gbau chɛ̀, ɛ̍ se̍ mɔ̍ o.”
Ɛ̍ wlè-o chɛ̀gbɛɛ iě jɔ̍gbau dɔɔ bla̍ dlǔ i̍, ɔ̍ la̍a̍, “Ǐn juo ɛ̍ kleǐn jɔ̍gbau la ɔ̍ ke Jusu na. Dɛ̍nu̍ɛ, ɔ̍-ɔ Kaladii jǔ ke.”
Jɛ Pitɛ la̍a̍, “Jɔ̍gbau chɛ̀, ìh àn bla̍-aɛ, ǐn se̍ i̍h-a dɛ i̍ juo.”
Dǒ tàdùè laa̍, wlu̍ sǐi dě ɔ̍ wɔ̍ɔ̍n sǔh iě suuh slò. Wɛ̀ Joi fèàɛ̀, iě ɔ̍ gbɛ̀n Pitɛ ja̍. Iě wlu̍ ɔ̍ bla̍-a dě Pitɛ we̍-ɛ ɛ̍ dǔ dǒ ɔ̍ wlì i̍ sǐ-ɛ. Ɔ̍ la̍a̍, “Àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ sɔ̀nwɔ̍i̍n.” Pitɛ sǐ-a sɔ̀n-ɛ, iě ɔ̍ fìn dɛ̍blɔ dɛ.


Nyɔ̍ ùh-a tù-a Jusu jlǐhɛ̍-ɛ, u̍h nui ɔ̍ jlii̍h kɛ̍n i̍ iě u̍h bla̍ ɔ̍. Wɛ̀ u̍h bla̍ ɔ̍ jliɛ̍ jlǐh, iě u̍h tèle ɔ̍ i̍, u̍h la̍a̍, “Po̍ gbànwli à iě jě. Nyɔ̍ bo ɔ̀ tba̍ ìn dɛ̍ ɛ?” Wɛ̀ u̍h po̍ ɔ̍ wlu̍ dɔu diih pùn i̍.


Sɔ̀n sɛ̀n-aɛ, wɛ̀ nyɔ̍ klaaᵻ ke, Nyɔsoa-a slaǎ sà nyɔ̍ ke telě nǎ poe nyɔ̍ gbǎ tàdùè. Iě u̍h ja Jusu dǒ u̍h jǔ. Wɛ̀ u̍h la̍a̍, “Pò ìn tù Nyɔsoa-a Chèɛ̀ Tba̍ju-ɛ, nɛ̀ ìn sèàɛ̍ à wlùh.”
Jɛ ɔ̍ la̍a̍ dě u̍h we̍, “Pò ǐn sèàɛ̍ mɔ̀ wlùh-ɛ, mɔ̀ se̍ ɛ̍ tìh chɛ̀-ɛ po̍ mu̍. Nɛ̀ pò ǐn tèle mɔ̀ dɛ̍ i̍-ɛ, mɔ̀ se̍ ǎn wlu̍ pɔ̀n we̍ sà mu̍. Jɛ sɔ da̍a sèàn blǐ-ɛ, Nyi̍ɔ̍-a Jǔ-a mu̍ i̍ tè dǒ Nyɔsoa ɔ̀ Blě-a Gbǐh Kli̍hgbɛ̍-ɛ di̍na̍ we̍.”
Wɛ̀ u̍h kli̍hgbɛ̍ la̍a̍, “Nɛ̀ɛ̍, mɔ̀ Nyɔsoa-a Jǔ ae?”
Iě ɔ̍ la̍a̍ dě u̍h we̍, “Mɔ̀ɔ̍ bo ùh dǎ laǎn.”
Wɛ̀ u̍h la̍a̍, “À se̍ sàànsi̍i̍h dɔɔ i̍ pɔ̀n dɛ. À chɛ̀ wɔ̌n ɔ̍ wlu̍ wɛ̀.”

Sikiliza Luu 22