<div class="version vid1316 iso6393mta" data-vid="1316" data-iso6393="mta">
   <div class="book bkJHN">
      <div class="chapter chINTRO1" data-usfm="JHN.INTRO1">
         <div class="imt1"><span class="content">Ini Denu Sa Igsulat I Huwan</span></div><div class="ip"><span class="content">Na, si Huwan sa sebaen maama diy&#224; sa sepul&#249; owoy duwa salu i H&#233;sus hinemil&#236; di an&#236; tumegudon da. Iya sa em&#224; di si S&#233;bediyu sa tegepuket, owoy iya sa inay di si Salomi sa eg-unut-unut ma diy&#224; si H&#233;sus owoy kagdi ma sa bayi tak&#224; egbegay tabang diy&#224; si H&#233;sus owoy sa medoo salu di.</span></div><div class="ip"><span class="content">Bat&#224;bat&#224; pel&#224; si Huwan egoh i H&#233;sus migsas&#224; kenagdi. Egoh da sa kakay di si Santiyago egpepion puket diy&#224; sa mantadan, migtal&#224; H&#233;sus i owoy eg-ikagiyan di kagda egpeunut diy&#224; kenagdi. H&#234;, sinalidan i Huwan owoy si Santiyago sa em&#224; da diy&#224; sa kumpit, owoy mig-unut da ma d&#233; diy&#224; si H&#233;sus. End&#224; migleng&#224; Huwan i eg-unut-unut diy&#224; si H&#233;sus. Taman egoh di lukes, end&#224; nehal&#236; sa kesalig di diy&#224; si H&#233;sus owoy tigtu da ma egsehiduway.</span></div><div class="ip"><span class="content">Na, tinulon i Huwan sa pesuwan di migsulat siini libelu. Ungay&#224; di migtuu sa langun etaw Anak i Nemula H&#233;sus i an&#236; melal&#249; da taman melugay amuk egpigtuu da. Duen pitu panduan binaelan i H&#233;sus tinulon i Huwan diy&#224; siini igsulat di, owoy duen ma pitu tinegudon i H&#233;sus tinulon di. Dan&#224; sa medoo panduan di, metiigan ta si Nemula sa migpeangay si H&#233;sus diy&#224; tan&#224;, owoy dan&#224; sa medoo tinegudon i H&#233;sus, metiigan ta ma pineangay i Nemula kagdi.</span></div><div class="ip"><span class="content">Iya sa ungay&#224; i Huwan migtuu sa langun etaw diy&#224; si H&#233;sus owoy mangunut da ma diy&#224; kenagdi, en&#249; ka melal&#249; da taman melugay dan&#224; da daa egsalig diy&#224; si H&#233;sus. End&#224; duen sa liyu saligan da.</span></div>
      </div>
   </div>
</div>

Ini Denu Sa Igsulat I Huwan
Na, si Huwan sa sebaen maama diyà sa sepulù owoy duwa salu i Hésus hinemilì di anì tumegudon da. Iya sa emà di si Sébediyu sa tegepuket, owoy iya sa inay di si Salomi sa eg-unut-unut ma diyà si Hésus owoy kagdi ma sa bayi takà egbegay tabang diyà si Hésus owoy sa medoo salu di.
Batàbatà pelà si Huwan egoh i Hésus migsasà kenagdi. Egoh da sa kakay di si Santiyago egpepion puket diyà sa mantadan, migtalà Hésus i owoy eg-ikagiyan di kagda egpeunut diyà kenagdi. Hê, sinalidan i Huwan owoy si Santiyago sa emà da diyà sa kumpit, owoy mig-unut da ma dé diyà si Hésus. Endà miglengà Huwan i eg-unut-unut diyà si Hésus. Taman egoh di lukes, endà nehalì sa kesalig di diyà si Hésus owoy tigtu da ma egsehiduway.
Na, tinulon i Huwan sa pesuwan di migsulat siini libelu. Ungayà di migtuu sa langun etaw Anak i Nemula Hésus i anì melalù da taman melugay amuk egpigtuu da. Duen pitu panduan binaelan i Hésus tinulon i Huwan diyà siini igsulat di, owoy duen ma pitu tinegudon i Hésus tinulon di. Danà sa medoo panduan di, metiigan ta si Nemula sa migpeangay si Hésus diyà tanà, owoy danà sa medoo tinegudon i Hésus, metiigan ta ma pineangay i Nemula kagdi.
Iya sa ungayà i Huwan migtuu sa langun etaw diyà si Hésus owoy mangunut da ma diyà kenagdi, enù ka melalù da taman melugay danà da daa egsalig diyà si Hésus. Endà duen sa liyu saligan da.

Sikiliza Huwan Ini Denu Sa Igsulat I Huwan