Matɨyu 4
4
Seten Jisasɨmo yamofo uloho'mentisofoho.
(Mak 1:12-13; Luk 4:1-13)
1Oso hohosohonta Anɨtuye Towahuno Wopɨngo Jisasɨmo hwaho a'amu mohumunyopono ipemotasɨmentisofoho. Osopo Seten Jisasɨmo honɨngkano wonyo imokiyo'ne yamofo uloho'mentisofoho. 2Jisas kako Mpohumo jomo ulɨmo lonto wopayo manyo'njo nohumentanɨngki mofehi'nyo fouti (40) sɨkuno fouti (40) uyakolofahonɨngki Jisas mijoho engo umentisofoho. 3Jisas mijoho'no nohumentanɨngki Seten i'mofaponto ulɨmento, Kɨko Anɨtuye Hwomu Nehwosɨ'manji olo sojo pi'nɨngo lomo hungkuno ulohojo'no wosopayo umo'nono. 4Ose ulahonɨngki Jisas ulɨmento, Anɨtuye hungkuno ole nalɨwo'nɨngki,
A'amu wosopayo'nohini nɨngkuhwoso sohwo kako ito'no mohumanohoho.
O'o, a'amu Anɨtuye hungkuno hopi'nonohinomne'no syafɨsyɨwo'nɨngkohofoso oso hofɨkoe huyo'mango songo humayo'nefoho.
5Ose ulahonɨngki Seten Jisasɨmo pone wopɨngo pone'no ipemotasonto Anɨtuye tajo ango engo antɨfe yokintahopo uhumajonto 6ulɨmento, Kɨko Anɨtuye Hwomu hwosɨ'manji kɨko olopo nta'ni filɨkofamofo. Ose ulɨkwato lohofonto ulɨmento, Anɨtuye hungkuno nalɨwo'nɨngki,
Anɨtu kakoe a'amu ahwomomjo sohwamo kikimne'no ulɨhwoso'no
hofɨko jɨje ahomo kumakukuji jɨje sɨfemo sojo mentofomatnnehino.
Tohino momatnnohino.
7Seten ose ulahonɨngki Jisas ulɨmento, Nom'ne ifalifaliyo mtɨ'mokumentohofoso ole,
Kɨko jɨje Hwe Engo Anɨtu sohumo yamofo nulohofohotoho.
Kɨko jɨje hunomnohini inɨngkuso'manji ole syafɨsyɨkutoho. Anɨtu wonɨmokosyohumamtonoho. Ose syafɨsyɨkutoho.
8Ose ulahonɨngki Seten Jisasɨmo hwofɨki'nyo yokintaho engo sopone'no utɨmotasonto olo hwaho hopi'nonohino a'amu so'nji yo'mayo hwahoponjo yokumpohn'nyo so'ntnno Jisasɨmo utɨhwamentisofoho. 9Ose utɨhwanto ulɨmento, Kɨko ngkine'no hwomtame ntohofohoji jɨje sɨmeho ntapisoso yo'mayo uhwonalokunoso wokijapmmonnoho. 10Ose ulahonɨngki Jisas ulɨmento, Kɨko i'waho ntohofo. Kengopono fɨwano. Anɨtuye hungkuno ole nalɨwo'nɨngki,
Kɨko jɨje Hwe Engo Anɨtu kakine'nohini hwomtame ulohofo.
Kakine'nohini syoho ulohofiyo.
Ose ulɨmentisofoho.
11Ose ulahonɨngki Seten Jisasɨmo ulɨko'mahonɨngki a'amu ahwomo mta'angoso nu'mantɨfi Jisasɨmo ufo'ma'mentohofofoho.
Jisas kakoe syoho hwaho Ngkalili nta'ni ema'mentisofoho.
(Mak 1:14-15; Luk 4:14-15)
12A'amu fihwa hofɨko Jounɨmo impo'angomo intofahumentohofo so'no Jisas kako nupa'nonto kako hwaho Ngkaliline'no umentisofoho. 13Kako ango Nasalet ulɨko'manto ango Koponeyam osopo humamentisofoho. Oso ango hopo sopo Mijo Ngkalili mitɨmomɨngoponoho. A'amu Sepɨyulan'nji Napɨtalai'njiye imu sofe hwahoponoho. 14Hwe Aisaiya sohumo Anɨtu hungkuno uyahonɨngki lɨmojo sohwo hohonta ifalifaliyo mtɨ'mokumentisoso hohosohonta ne imo'nɨmentisofoho. Ole mtɨ'mokumento,
15Mijo Joutan nongkihnta'ni mijo ayo momɨngopo hwaho Sepɨyulan'nji Napɨtalai'nji hi'njoponoho.
A'amu temtitofo kengo Anɨtuye hungkuno mupa'nɨmmotofo sofeponoho.
16Hofɨko sɨkwo'mjoho'mo humafijoso pomponaho engo uhwonɨfitnnefoho.
A'amu sɨkwo'mjoho so'mo we'enepi nɨhu'nahone wape'nano lɨkuji yontanɨngkuji pomponaho engo wonyoangkafoso u'mofapmmontonoho.
Ose mtɨ'mokumentisofoho.
17Oso hohosohonta Jisas kakoe hungkuno loma'mentisofoho. Ole ulɨmento, Sekwoe honɨngkano wonyo somta'ni fɨwolo'mokumno. Anɨtu nemokosyohumayo sohwoe sɨkuno mofoneponoho.
Jisas a'amu inanɨku syoho'njo sohwamo kakimo tɨfi inɨngkayo'ne joho ulɨmentisofoho.
(Mak 1:16-20; Luk 5:1-11; Joun 1:35-51)
18Jisas Mijo Ayo Ngkalili momɨngo sopo nowento hwe hufa'u inanɨku syoho'njo siko'nɨkwa'imo uhwonɨmentisofoho. Sikoe yofeso Saimoun'nji Entɨlu'njoho. Saimounɨye yofe nom'neso Pitafoho. Siko inanɨku ho'yo mijomo ho'naofontanɨngki u'ma'mentisofoho. Inanɨku ifamiyoso sikoe hamniyoho syohofoho. 19Nu'manto ulɨmento, Siko tɨfi nnɨngkapinyo. Siko inanɨku mawo'nɨngkisiye pa'nɨngoso Anɨtumne'no a'amu mayo'ne wolosetɨhwamo. 20Ose ulahonɨngki sikoe inanɨku ho'yo komo'no nulɨko'manji Jisasɨ'nji umentohofofoho.
21Nowentɨfi Sepetiye hwomu sohwa'u Jemɨsɨ'nji Joun'njimo uhwonɨmentisoso siko hamnɨngkwohwo Sepeti'nji yofayokinomo nohumantɨfi inanɨku ho'yo ito'no esyohumentanɨngki uhwononto joho ulahonɨngki 22siko homnɨngkwohwo'nji yofayokino'nji komo'no ulɨko'manji Jisasɨ'nji umentohofofoho.
Jisas Anɨtuye hungkuno a'amu somo lutɨhwanto a'amu mnokino'njo somo wopɨngo umokumentisofoho.
(Luk 6:17-19)
23Jisas hwaho Ngkalili ho'mo so'meemo emoyonto hwe moya'mi somo hofɨkoe tajo ango somo Anɨtuye hungkuno so'nji Anɨtu wonyoangkafo nemokosyohumayo so'ntnno lutɨhwamojofoho. Kako nolutɨhwanto a'amu mnokino kengo kengo'njo a'apaho wonyo umokumojo somo wopɨngo umokumentisofoho. 24Jisas olo wonyoangkafo hiloso imentiso so'no hwaho Siliya ho'mo so'meemo ho'nɨmentisofoho. A'amu hiso nupa'nontɨfi a'amu yo'mayo tango'njo mnokino'njo somo Jisasɨyepono ipemotapmmentohofofoho. A'amu towahuno wonyo'njo so'nji a'amu nopɨwasyontɨfi yomo yomo iwo'nɨngkohofo so'nji a'amu sɨfe aho pe'nnyo'njo so'nji hopi'nonohino somo ipemotopahonɨngkofi Jisas wopɨngo umokumentisofoho. 25Wopɨngo umokahonɨngki a'amu pi'nɨngo engo Jisasɨmo inɨngkamentohofofoho. A'amu Ngkalili, Ntekapolis, Jelusalem, Jutiya, Mijo Joutan nongkihnta'ango a'amu pi'nɨngoso inɨngkamentohofofoho.
Nu markerat:
Matɨyu 4: apzNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2013, Wycliffe Bible Translators, Inc. All rights reserved.
