SAN MATEO 14
14
Ngujuii Juan nu ntyucuatya ji'i̱ ngu'
1La cui' tyempo bi' cua ndyuna Herodes cha' ji'i̱ Jesús, lo'o nu Herodes bi' laca loo ji'i̱ ngu' Galilea tyempo bi'. 2Li' nchcui' nu laca loo bi' lo'o msu ji'i̱:
―La cui' jyo'o Juan nu ntyucuatya ji'i̱ ngu', la cui' bi' laca nu qui'yu jua ―nacui̱ Herodes―. Cua ngujuii yu, pana ndyu'ú yu chaca quiya' nti' na', bi' cha' nchca ji'i̱ yu cua'ni cha' tlyu jua'a̱.
3Ntsi̱i̱ Herodes bi' ni, cha' cua ngusñi yu ji'i̱ Juan bi' tya tsubi' la, ngusca̱' yu ji'i̱ lo'o ngusu'ba yu ji'i̱ ne' chcua̱. Ngua'ni nu cusu' bi' cha' cuxi bi' xqui'ya Herodías clyo'o Felipe tya'a ycui' Herodes bi'. 4Tya lu'ú nu Juan bi' lo'o nchcui' lo'o Herodes ndi'ya̱:
―Ná ntsu'u chacuayá' tyi'i̱ nu'u̱ lo'o clyo'o tya'a nu'u̱ ―nacui̱ Juan ji'i̱ Herodes.
5Nu ngua li' ngua ti' Herodes cujuii ji'i̱ Juan bi', pana ndyutsi̱i̱ yu ji'i̱ ñati̱, cha' ngua ti' ngu' cha' cua nchcui' Juan cha' ji'i̱ ycui' Ndyosi lo'o ngu'. 6Lo'o ngua tsa̱ ngula nu Herodes bi', li' ngua'ni yu sca ta'a. Tyu̱u̱ tya'a ngu' ndyu'u ti'i̱ ngu' slo yu, lo'o li' ñaa nu cuna'a̱ sñi' Herodías, ndyula quiya' su ntucua ycui' Herodes. Ngua chaa tsa ti' nu cusu' bi' li', 7bi' cha' ngua'ni yu jura cha' ta yu lcaa na nu jña cho' bi' ji'i̱ yu. 8Li' ndacha' xtya'a̱ nu cuna'a̱ bi' ji'i̱, na ca nu jña cho' ji'i̱ Herodes. Ti'í tsa ti' Herodías ña'a̱ ji'i̱ nu Juan bi', bi' cha' ngua ti' cujuii ji'i̱ Juan.
―Hique Juan nu ntyucuatya ji'i̱ ngu' nta̱' ―nacui̱ nu cuna'a̱ cuañi' bi' ji'i̱ Herodes li'―. Ca̱a̱ lo'o ngu' ji'i̱ scua' que yu ne' sca tsi'yu ―nacui̱.
9Ngua xñi'i̱ xi ti' Herodes nu laca loo bi' li'; pana cua ngua'ni yu jura slo lcaa ngu' nu ndya'a̱ ta'a, bi' cha' ngulo yu cña cha' cua'ni ngu' ñi'ya̱ nu nacui̱ nu cuna'a̱ bi'. 10Ngulo yu cña ji'i̱ sendaru cha' tsaa si'yu cu' ngu' scua' que Juan ca ne' chcua̱. 11Li' ngusta ngu' scua' que yu bi' ne' tsi'yu, ñaa lo'o ngu' ji'i̱ bi' li', nda ngu' ji'i̱ nu cuna'a̱ cuañi' bi'. Li' ndu'u nu cuna'a̱ bi' ndyaa, ndyaa lo'o tsi'yu bi' slo xtya'a̱.
12Lo'o li' ñaa ngu' nu ndyaca tsa'a̱ ji'i̱ Juan, ngüi'ya ngu' ji'i̱ jyo'o bi', cha' tsaa lo'o ngu' ji'i̱ cha' tyatsi'. Lo'o cua nguxatsi' ngu' ji'i̱, li' ndyaa ngu' ndacha' ngu' ji'i̱ Jesús ñi'ya̱ ngua cha' bi'.
Nda Jesús na nu ndyacu ca'yu mil tya'a ñati̱
13Lo'o ndyuna Jesús ñi'ya̱ nu ngua ji'i̱ jyo'o Juan, ndyatí̱ yu ne' yaca ni'i̱ cha' tyu'u yu chaca to' tayu'; ngua ti' yu tsaa sca se'i̱ ca ne' quixi̱' su ná ntsu'u ñati̱. Pana yala ti ngua cuayá' ti' quiña'a̱ ñati̱ cha' ndyaa yu cajua, bi' cha' lo'o ti ndyaa lca'a̱ ngu' ji'i̱ yu, masi quiya' ti ngu' lijya̱ ngu' nde to' hitya ti. Lo'o ngu' tyu̱u̱ tya'a quichi̱ ndyaa ngu'. 14Lo'o ndyalaa yaca ni'i̱ bi' to' hitya, li' ngutu'u Jesús; na'a̱ yu cha' cua ndyalaa quiña'a̱ tsa ñati̱ cajua li'. Tya'na tsa ti' yu ji'i̱ lcaa ngu' bi', bi' cha' ngua'ni yu cha' ndyaca tso'o ngu' quicha nu ndya'a̱ ngu' lo'o. 15Tyucui tsa̱ ndi'i̱ ngu'; lo'o cua ngusi̱i̱, li' nchcui' ngu' nu ndyaca tsa'a̱ ji'i̱ lo'o Jesús:
―Ne' quixi̱' ntsu'u na re. Ná ntsu'u ñati̱ cacua ti su ndi'i̱ na re ―nacui̱ ngu' ji'i̱ Jesús―. Lo'o jua'a̱ cua ngusi̱i̱ tsa juani. Tso'o la masi culo nu'u̱ cña ji'i̱ nu ngu' quiña'a̱ cua cha' tsaa ngu' lcaa quichi̱ ca ndacua, cha' cui'ya ngu' na cacu ngu'.
16―Cu'ma̱ ta ma̱ na cacu ngu' bi' ca nde ti ―nacui̱ Jesús―. Ná nga'a̱ cha' tyaa ngu'.
17Ndube xi ti' nu ngu' nu ndyaca tsa'a̱ bi' li':
―Ca'yu tya'a ti xlyá teje' ntsu'u ji'na ca nde, cusu' ―nacui̱ ngu' ji'i̱ Jesús―, lo'o jua'a̱ ntsu'u tucua tya'a ti cualya nde. Tsa bi' ti cha'.
18Li' nchcui' Jesús lo'o ngu' bi':
―Ca̱a̱ lo'o ma̱ ji'i̱ ca nde ―nacui̱ ji'i̱ ngu'.
19Li' ngulo Jesús cña ji'i̱ nu ngu' quiña'a̱ bi', cha' tyaca'a̱ ngu' xi lo quii. Li' ndaya' yu ji'i̱ nu ca'yu tya'a xlyá teje' bi' lo'o ji'i̱ nu tucua tya'a cualya bi'; nxña'a̱ yu nde cua̱ li', ndya xlya'be ji'i̱ ycui' Ndyosi, lo'o li' nguxana yu nsa'be yu xlyá lo'o cualya bi', nda yu yu'be bi' ji'i̱ ngu' nu ndyaca tsa'a̱ ji'i̱ cha' tacha ngu' ji'i̱ ñati̱ bi'. 20Jua'a̱ ngua cha' ndyacu lcaa ngu', ña'a̱ cuayá' nu nguaala' ji'i̱ ngu'. Li' nxuti'i̱ ngu' lcaa yu'be nu ndyanu, lo'o jua'a̱ ngutsa'a̱ tii tyucuaa tya'a chcubi lo'o yu'be bi'. 21Ca'yu mil tya'a ngu' qui'yu ndyacu ngu' slo Jesús tsa̱ bi', lo'o xa' cuentya ngua nu cuna'a̱ lo'o nu sube.
Ndya'a̱ Jesús lo hitya tayu'
22Lo'o li' ngulo Jesús cña ji'i̱ nu ngu' nu ndyaca tsa'a̱ ji'i̱, cha' tyatí̱ ngu' ne' yaca ni'i̱ cha' tsaa ngu' nde loo la su tsaa ycui' ca chaca tsu' tayu' bi'; tyanu ycui' cha' chcui' salya' lo'o nu quiña'a̱ tsa ñati̱ bi', ngua ti' yu. 23Lo'o cua ndyaa lcaa ngu' bi', li' ndyaa Jesús nde sii' ca'ya cha' chcui' lo'o ycui' Ndyosi su ndu̱ yu ycui' ti yu. Lo'o cua tsaa ti cuichaa, tya ndu̱ Jesús ycui' ti nde sii' ca'ya. 24Laja li' tyijyu' ndya'a̱ yaca ni'i̱ bi' lo tayu'. Lqui'ya ti nxna yaca ni'i̱ bi', xqui'ya cha' lye tsa ndyatu̱ clyoo' lo hitya, cha' lye tsa ndyaca cui'i̱. 25Lo'o cua quixee ti, li' lijya̱ Jesús ndya'a̱ lo hitya ti; 26pana lo'o na'a̱ ngu' nu ndyaca tsa'a̱ ji'i̱ cha' ndya'a̱ yu lo hitya ti, ndyutsi̱i̱ tsa ngu' li'.
―¡Cua lijya̱ sca jyo'o! ―nacui̱ ngu'.
Li' ngusi'ya tsa ngu' cha' ndyutsi̱i̱ ngu'. 27Hora ti ndacha' Jesús ji'i̱ ngu':
―Cua'ni tlyu tyiquee ma̱ ―nacui̱ Jesús ji'i̱ ngu'―. Na' laca̱, ná cutsi̱i̱ ma̱.
28Li' nguxacui̱ Pedro cha' ji'i̱:
―¿Ha chañi cha' nu'u̱ laca, cusu'? ―nacui̱ Pedro ji'i̱ Jesús―. Si chañi cha' nu'u̱ laca, culo nu'u̱ cña 'na lacua, cha' lo'o na' tya'a̱ na' lo hitya cha' tyalaa na' ca su ndu̱ nu'u̱.
29―Ca̱a̱ nu'u̱ ca nde ―nacui̱ Jesús ji'i̱ Pedro li'.
Lo'o li' ngutu'u Pedro ne' yaca ni'i̱, ndya'a̱ yu lo hitya cha' tyalaa yu ca su ndu̱ ycui' Jesús. 30Pana hora ti ngua tii yu cha' lye tsa ndyaca cui'i̱, ndyutsi̱i̱ tsa yu li', nguxana cha' nclyu'u yu ne' hitya li'. Lo'o ti ngusi'ya yu ji'i̱ Jesús:
―Xu'na ―nacui̱ Pedro ji'i̱―, culo nu'u̱ 'na ne' hitya re.
31Hora ti ngusñi Jesús ya' Pedro.
―Xti tsa tyempo ndalo nu'u̱ cha' jlya ti' nu'u̱ 'na ―nacui̱ Jesús ji'i̱ Pedro bi'―. ¿Ni cha' ná jlya tso'o ti' 'na?
32Lo'o li' ndyalaa lo'o Jesús ji'i̱ Pedro ca su ndacui yaca ni'i̱, ndyatí̱ ngu' ne' bi' li'; hora ti ngua ti̱ cui'i̱ li'. 33Ngua'ni tlyu ngu' nu ndi'i̱ ne' yaca ni'i̱ bi' ji'i̱ Jesús, lo'o ti ndatu̱ sti̱' ngu' slo yu.
―Chañi cha' nu'u̱ laca nu sca ti Sñi' ycui' Ndyosi ―nacui̱ ngu' ji'i̱.
Ngua'ni Jesús jo'o ji'i̱ ngu' quicha nde Genesaret
34Lo'o li' ndyalaa ngu' chaca tsu' tayu' bi', ndyalaa ngu' nde Genesaret. 35Lo'o ndyuloo ngu' nu ndi'i̱ cajua ji'i̱ Jesús, li' hora ti nda ngu' cha' ndyaa lcaa quichi̱ su cacua ti, cha' caca cuayá' ti' ngu' bi' cha' cua ndyalaa Jesús. Li' ya̱a̱ lo'o ngu' ji'i̱ lcaa ngu' quicha slo Jesús. 36Ndijña ngu' chacuayá' ji'i̱ yu cha' cala' ngu' quicha bi' masi quiya' ste' ti yu; lo'o ndyala' ngu' quicha bi' ste' yu, hora ti ngua tso'o ngu' bi' li'.
Nu markerat:
SAN MATEO 14: cta
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1981, Wycliffe Bible Translators, Inc. All rights reserved.
