San Mateo 2
2
Ngu jo cha xi vechu cjuatacun rë ne, cavëë cha niñú tsëhë Jesucristu
1Nixtin xi catsin Jesús nangui Belén, distritu Judea, nixtin hya ne, Herodes vitexa me xuta nangui vë. Hacuaha nixtin hya ne, ngu jo cha xi vechutaha cjuatacun rë ne, cavetjun cha ladu vetjucaa tsuhi cafehe cha nandya Jerusalén. 2Hane cuitjin cachja cha:
―¿Jani sacu niji quihndi xi cuitexa nangui Israel? ta cahyin xi cavetjucaa niñú rë me ngajan ladu vetjucaa tsuhi. Hane nduvintjenguin me xi chjihinrcuin me.
3Hya xi cama ne, jemu cama xti rë Herodes xi tu cahndë me cjua jan; cojo xuta nangui Jerusalén ne, cama xti rë me. 4Hya xi cama ne, Herodes ne, cajindayavaha me yëjë ni nahmi xi matitjun cojo yëjë cha vicuya cjuachacun rë xuta nangui Israel. Sehe cavinenguise me ¿jani xi tsin xu me xi má Cristu? 5Hane cuitjin cafayangui me:
―Ngajan nandya Belén, distritu Judea tsin ta cuatjin catsihindu profeta tsëhë nandya jan xi ngajan tsin quihndi:
6Ngaye, nandya Belén, ngaye nandya tsëhë xuta tjë rë Judá,
hacuaha vengui chji ri xcun xuta matitjun nangui Judá.
Ta ngajñi rë xuta riji ne cuetjutsejen ngu me xi cuitexa rë xuta naha, xuta nangui Israel.
7Hya xi camá ne, Herodes ne, cajindayahma me cha xi vechu cjuatacun rë jan. Cafahataha rë me cha. ¿Mé hora cjuaquixi tsëhë mé nixtin camatsejen niñú jan? 8Ngaxtun vëhë ne, sehe cavitexa me cha xi cjue cha Belén. Hacuaha cuitjin cachja me cojo cha:
―Tangun ngajan Belén. Chjinengunsunndujun yëjë tsëhë quihndi. Hane xi sacu nuju cjuaquixi ne, ningatjun ná cjua sehe cojo ngahan ne hacuaha cjuë́ cjuahárcun quihndi.
9Xi cavihndë cha xi cuicun vi cjua jan, cavetju cha quiji cha. Hane niñú xi cavetjucaa ngajan ladu vetjucaa tsuhi jan ne, hacuaha quiji titjun hisca xi cavechu cahndë́ hiscan xi jiña quihndi, hane ngajan cavasén. 10Hane xi cavëë cha niñú xi ngajan cavasen ne, jercu tu ndama camaha ni rë cha. 11Hane xi cavisehen cha ndihya hiscan siu me ne, cavëë cha quihndi jan. Hacuaha cavëë cha naa rë me, xi hmí rë María. Sehe quiji cavixcuhnchi cha cafaharcun cha quihndi jan. Hane sehe cavuxaha cha hiscan hincha rë cha cuatjo, hane casua cha oro cojo tyjungunsa cojo tyjungunjne xi hmí rë mira. 12Hya xi cavatju vëhë ne, tsëhë xi cachja chini cojo rë cha xi cuyaain cha taha ladu hiscan tacun Herodes ne, tahaxin cavuya cha nangui rë cha.
Quiji me hiscan nangui Egipto
13Hya xi quiji cha xi vechu cjuatacun rë jan ne, cafehetsejen ngu ángel rë Nina ngajñi chini rë José, hane cachja cuitjin:
―Tisatjinhngue, tihincueje quihndi cojo naa rë. Tiyun hiscan nangui Egipto. Hane ngajan cuinechun hisca xi tsingátju cjua xi cuyun. Cuatjin nihñu ta tsëhë xi Herodes ne, cuanguise me quihndi xi tsiquehen me.
14Hane cavisatjenhnga me nixten quijicojo me quihndi jan cojo naa rë, cafe me Egipto. 15Hane xi cafehe me ngajan Egipto ne, ngajan caviyujutaha me hisca nixtin xi cahme Herodes. Cuatjin cama sehe hatuxa camachihin cjua xi catsingatju Nina cojo profeta rë me hatsëë nixtin. Cuitjin chja cjua jan: “Cajindáya rë quihndi naha xi nduvaniji tsëhë nangui Egipto.”
16Hya xi camachaya rë Herodes xi camá cavindacha cha xi vechu cjuatacun rë jan ne, jercu cama cjan rë me. Hane cavitexa me yo xi tsiquehen rë yëjë ni quihndi xihin xi cjëë cjuë jyan nu, yëjë ni quihndi nandya Belén cojo distritu rë. 17Vëhë cjua xi cachja Nina xi catsihindu profeta Jeremías:
18Vinuhya rë cjuava ngajan nandya Ramá.
Jemu tjin cjuandusin.
Na Raquel ne, jihndava na ngatsë rë quihndi rë na.
Hane tsajin cjuetacun xi cuma rë na ta tsëhë xi ha cafë quihndi.
19Hane xi cavatju cahme Herodes ne, cavuya cafehetsejen nga ángel rë Nina ngajñi chini rë José ngajan Egipto ne, 20cuitjin cachja:
―Tisatjinhngue tihincueje quihndi cojo naa rë. Tihinniji nandya Israel. Tihin ta tsëhë xi ha cahme cha xi meje tsiquehen rë quihndi. Cuatjin cachja.
21Hya xi camá ne, cavisatjenhnga José ne, sehe cavetju me quijicojo me quihndi cojo naa rë, hane sehe cavisehen nga me nangui Israel. 22Peru xi cahndë José xi Archelaus vitexa me distritu Judea ta me vëhë vitexa me ngojo rë nahmi rë me, Herodes, vëhë xi camacjincacun José mijí cjue me ngajan. Hane xi cachja chini cojo rë me ne, sehe cavisehen me distritu Galilea. 23Caviyujutaha me ngajan ngu nandya xi hmí rë Nasaret. Cuatjin cama sehe cuetjucaa cjua xi catsihindu profeta tsëhë me xi xuta ne, cuichja me xi Jesús ne, xuta Nasaret me.
Nu markerat:
San Mateo 2: maq
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1991, Wycliffe Bible Translators, Inc. All rights reserved.
