Matiu 4
4
O Mahar 4
Satan ke uatolaua tang Iesu
1 # Hib 2.18; 4.15 Doh tar binakon a Iabena Dedeil ke keip tang Iesu tar butur paden mare la uatolaua to Satan tatanon. 2#KT 34.28Doh Iesu ahik mate ein tar toueitir hangaulur marein, doha toueitir hangaulur boung. I muduhia inggono ke gogo manas. 3Doha tamatang uatolaua ke pokoso manas, kare me kula tatanono pare, “Ge para tuna God nomana, kula toro palaua rone o uapalihin toro bereit.” 4Bo Iesu puk ke kula pare, “Ahik. A nibolo uahiu dehono tono uelhire God pare,
‘A tamat ahik pahe tua to puk re ein pe toro bereit,
bo e tua to tar mamang uelhirelik ke kulaig God.’ ” Ualatut 8.3
5Doh Satan ke keip poluk tang Iesu tar uan uleik i Jerusalem, kare la uatur tatanono tar butur a i ranana tar umang lotu ger dedeil. 6Doh Satan ke kula pare tatanon, “Ge para tuna God nomana, siaka uahiuako i kot, ge a puh pe a nibolo uahiu tono uelhire God pare,
‘Inggon e turung hire tosno anggelou ra turung kaueke totomua.
Doh gisina ra turung uasangana totomua tar limas
mara hikia pahe tukainir kekeim mo palau.’ ” Ker 91.11-12
7Bo Iesu puk ke kula pare tatanon, “A puh pon e moko tono uelhire God pare,
‘Ahik paho uatolaua tar Tamata Noman, a God a noumua.’ ” Ualatut 6.16
8Doh Satan ke keip poluk tang Iesu tar lulunar siusan a i ranantieh, kare ualasira tatanono toro mamang uana uleik uakapa tunane tar kot, karo nitampopokoh, kara niuiana toro pang uanininanine. 9Kare kula Satan pare, “Geto hatup uahiua, karo lotu totoguo, inggo u siokor heir tar mamang inetelikinine totomua.” 10Doh Iesu ke kula pare tatanon, “Satan, uareing totoguo! Ge a puh pe a nibolo tono uelhire God pare,
‘Inggoum mung lotu tar Tamata Noman nami Godoum,
karung longoro kompe tatanon.’ ” Ualatut 6.13
11Song ke hiliu Satan tang Iesu, doho anggelou ka lame, kara me kaueke tatanon.
Iesu ke uakekene tena kalekinale i Galili
12 # Mat 14.3; Mak 6.17; Luk 3.19-20 Tar binaka ke longoro Iesu ka uamoko pein Jon tar uih, kare tapokis i Galili. 13Doh inggono ke hiliu tar uan i Nasaret, kare la uangoul i Kaperneam, a uanon e tok i tektekene tar kodomo uiluiloh i Galili, tonosio mahar koto ra bungus Sebulun me Naptali. 14Iesu ke guata tar puhonene mare kotpokoso sira tunur puh ke kulain God tang propet Aisaia pare,
15“Inggoumeitir tamata toro mahar koto ro nas Sebulun me Naptali
tar lele re lako i teh tar pang giamehenar kodom i Jordan,
toro mahar kotong Galili gera uangoulur bureher tamatasit ahik paho Ju
16gerung uangoul tar kitupun,
inggoum kung bang huara manasa tar uleikir luh,
doh tamiuoumeit rung uangoul tar kitkitupun
a luh ke kotpokoso manasa tamiuoum.” Aisaia 9.1-2
Iesu ke uakekene tar kila tosno tamatang uakuakeluk
17 # Mat 3.2; 19.27 Tar binakonene Iesu ke uakekene tar uelhire tauete pare tasir tamat, “Uapalih tar niguata uasa doh tenami niuangoul, ge a Nitoiang Heuene pe ke uahuhut manasin.”
18Gitie ke latlateil pela Iesu i tehe tar kodomo uiluiloh i Galili, kare bangangua tas nu Saimon gera kilain Pita me nu Andru, rasina ramamahialik ura bakbaka tenasira uben, ge a toking tamatang uekih pe rasin. 19Doh Iesu ke kula pare tasrasin, “Mura uakelukuhane totoguo maru ualasir tamiraoum tar reihime tasir tamata tar la tang God.” 20Doh rasina kura hiliu ualahurungua tenasira uben, kaura uakeluk tang Iesu.
21Gitie ke la uain pela Iesu, kare bang huarangua poluk tar toking gisiameher ramamahialik, rasina tes nu Jems me Jon, a toking tuna Sebedi, rasin ura panete teil tar bout menia tara tamas, doh gisina ra uma uaia tenas uben. Doh Iesu ke kila tasrasina tar la tagu pono tatanon, 22maeit rasina kura hiliu ualahurungua kompe tar bout, doha ra tamas, kaura uakeluk tatanon.
Iesu ke uelhire tauete toro Uelhire Uaia, kare uauia tasir bureher tamat
23 # Mat 9.35; Mak 1.39; Apo 10.38 Iesu ke uiloho uakap i Galili, kare la leka tenas umang lotusin, kare uelhire tauete toro Uelhire Uaia tar Nitoiang Heuen, doh ke uauia uakapa teres momouhur tamatasis res mat. 24#Mak 6.55Doho ueluatata tang Iesu ko la uiloho uakapa tar pang uan i Siria, doho tamatasis ra maluana keip tar bureher mate ka keip pokosomeis tang Iesu mare uauiaono tasisin. Gisis res uelmahing uleik, doho nihikung liouan, o uoto lolong kapul, doha matar tukunus ka keip pokosomeis tang Iesu, kare uauiaono tasisina uakap. 25#Mak 3.7-8Doho burehentiehe tunur tamatang Galili doho tamatang tar pang uan i Dekapolis, dohi Jerusalem, dohi Judia, doho mahar kotong tar pang giamehenar kodom i Jodan ka uakeluk tatanon.
Nu markerat:
Matiu 4: nsn
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2011, Wycliffe Bible Translators, Inc. All rights reserved.
