Luk 4
4
Nlim garɛ Jisɔs
(Matiyu 4.1-11; Mak 1.12-13)
1Na Jisɔs krɛ nyi aya Jɔdan gɔ ɛkɔ ji Ɛtinge Ɛtɔgɔ, ɛtɔgɔ tomɛ tu gɔ ɛwungwung. 2Ɛjiji Nlim garɛ nɔ gɔ nfong atalabal. Gɔ afong nyaa kpɛk kpɛ Jisɔs ɛjomjom ajɔm li, njal kimawɛ yam.
3Ɔwɔ Nlim tɔngɛ rɛ, “Rɛjɔlarɛ wɔ Mɔn Ɛshɔwɔ wɔ, tɔng ɛbtal niya shingɛ ɛjom alɛgɛ.”
4Jisɔs kimawɛ fangɛ rɛ, “Nwɛr Ɛshɔwɔ rɛ: ‘Nɛ nim jɔ kpen gɔ nshɔl alɛgɛ nyinyi.’ ”
5Ɔwɔ Nlim tamanɛ gɔ ɛjiji kpe warɛ shɔng tebɛ Ɛtol ɛying kpɛk kpɛ gɔ mɔngarɛ. 6Nlim kimawɛ tɔng rɛ, “Nkpa kagɛ ɛkɔ kpɛk kpɛ na nshɔl nyaa kpɛk kpɛ, bɔ fagɛ kpɛk kpɛ kam, wɔ mɛ nkpemalɛ fagɛ ka nɛ nɔ kɔrɔm nɔ. 7A rɛ jɔmim, kpɛk kpɛ kpe jɔlɔ anya.”
8Jisɔs kimawɛ fangɛ rɛ, “Nwɛr Ɛshɔwɔ rɛ: ‘Jɔm Nliladɛ nɔ le Ɛshɔwɔ ɛba wɔ lɔgɔ yɛ ntangtang.’ ”
9Nlim kimawɛ rɔd tam awɔ gɔ Jɛrushɛlɛm shɔng konɛ gɔ ɛji ji ga warɛ gɔ ɛtak gɛ Ɛshɔwɔ. Kimawɛ tɔng rɛ, “Rɛjɔl rɛya wɔ Mɔn Ɛshɔwɔ wɔ, yib aa gbɔ gɔ ndi. 10Teb Nwɛr Ɛshɔwɔ tɔngɔ rɛ, ‘Ɛshɔwɔ kpe tomo balɔgɔ ɛbtom ɛbɛ baba nɔbɔnɔbɔ. 11Bɔ kpa gberɛ gɔ abɔ, nɔngɔ akǝ gbɔ rɔm ata gɔ atal.#4.11 Psalm 91:11,12 ft ’ ”
12Jisɔs kimawɛ fangɛ rɛ, “Nwɛr Ɛshɔwɔ tɔb bungɔ rɛ: ‘Kǝ garɛ Nliladɛ ɛwa nɔ le Ɛshɔwɔ ɛba.’ ”
13Ɔji Nlim migarɛ Jisɔs gɔ mbang anyinganyingɛ mal, a tamɛ sha gɔ mɔngarɛ.
Anɛ tɛnɛ Jisɔs gɔ Nasarɛt
(Matiyu 13.53-58; Mak 6.1-6)
14Jisɔs fɛrɛ gɔ Galili gɔ ɛkɔ ji ɛtɔgɔ, ɛka ɛjɛ yalɛ kpɛk kpɛ gɔ ɛjang jiɔ. 15Atebe gɔ ɛtak ji Aju kpejɔ wanɛ, nɛ awɔngawɔngɔ jige.
16Ajɛ gɔ Nasarɛt, ɛjiji bɔ lɛɛ nɔ, gɔ Ɛfong Ɛragɛ Ɛku Aju a tam gɔ ɛtak ji Aju kpejɔ wanɛ, na akpejɔ lim. Na amelɛ yimi rɛ alɔng. 17Bɔ fagɛ nwɛr a Ashaya ntinge ateb Ɛshɔwɔ kayɛ. Na afangɛ nɔ, a nyenɛ ɛji ji bɔ yɛlɛ rɛ,
18“Ɛtɔgɔ Ɛshɔwɔ le na namɛ,
Teb yɛ mim jag rɛ mɛ bi tinge akpak nɔbɔ ɛteb.
A fɛrɛ tomim rɛ mɛ bi tɔng anɛ ba agbakɔbɔ rɛ bɔ kpe lɔngɔ,
Alaga amar nyen, anɛ ba bɔ kpe kagɛ bɔ ɛrɛm bɛl ɛbtarɛ.
19A fɛrɛ tɔng anɛ lagɛ ngarɛ nyi Ɛshɔwɔ kpe folo anɛ ɛbɛ.”
20Ɔwɔ afɛdɛ nwɛr, fagɛ ka nlɔgɔ ɛbtom, fɛrɛ jina. Amar anɛ kpɛk kpɛ gɔ ɛtak ji Aju kpejɔ wanɛ jɔ bɔngɔ yɛyɛ.
21Jisɔs kim bungɔ tɔng bɔ rɛ, “Nwɛr Ɛshɔwɔ nyaa nyi miwog lɛl ɛjɔl na bɔ bungɔ nɔ.”
22Anɛ Kpɛk kpɛ gamɛ ɛnɔ fɛrɛ lamɛ bɔ anyar teb anɔbɔ alom nya jɔ lɔngɛ gɔ nyɔ. Bɔ rɛ, “Mɔn a Josɛf shang a?”
23Jisɔs kim bungɔ tɔng bɔ rɛ, “Nyinyi rɛ wan nkpe tobo ɛbganɛ niya kam rɛ, ‘Nlima anɛ ayam, lim ɛna wɔfɔnɔ.’ Lim aa gɔ ga ɛjabɛ fufɔ na nshɔl nyi ɛwogo na amilim gɔ Kapanum.”
24Jisɔs shɔrashi ntɔng rɛ, “Ntɔng wan ɛlɔgɔlɔgɔ, ntinge ɛteb Ɛshɔwɔ awɔngawɔngɔ lim nɔ bɔ kpejɔ gberɛ gɔ gɛ ɛjabɛ. 25Ntɔng wan ɛlɔgɔlɔgɔ rɛ: bɛlɛ agɔl gbalɛ gbalɛ gɔ Isɛrɛl gɔ ngarɛ Ɛlayija, ji ɛlab ki jɔ kpɛ naa gɔ nnya ɛra na ɛjang ji ɛgba yalɛ kpɛk kpɛ aji. 26Tu ɔji jɔlɔ nɔ, Ɛlayija Ɛshɔwɔ metomom tu ngɔl anyinganyingɛ nyi jɔlɔ gɔ Isɛrɛl, shingim ngɔl nyi jɔlɔ gɔ Jarefat ɛjabɛ ji le gɔ Sidɔn. 27Anɛ ba jɔ yam abile jɔlɔ gbalɛgbalɛ gɔ Isɛrɛl gɔ ngarɛ Ɛlayisha ntinge ateb Ɛshɔwɔ; gɔ ɛblɔng nyiɔ Ɛshɔwɔ limim nɛ awɔngawɔngɔ nɔb shingim Naaman nɔ lɔng Siriya.”
28Ɔji anɛ ba jɔlɔ gɔ ɛtak ji Aju kpejɔ wanɛ wogo ji abungɔ nɔ, bɔ bɛlɛ ɛragɛ ɛbtem gbalɛgbalɛ.
29Bɔ mɛlɛ yimi, tɔng Jisɔs lɔng awɔ gɔ ɛjabɛ, tamanɛ gɔ ɛrɔ ɛwɔng ji ɛjabɛ kon nɔ, nɔngɔ bɔ gbolɛ kag gɔ ɛdamɛ. 30Jisɔs jɛnɛ shing bɔ gɔ ɛbka tam mbang ɛnye.
Jisɔs kamɛ abi atɔgɔ yege gɔ ngɔbjing a nlolom
(Mak 1.21-28)
31Ɔwɔ Jisɔs tamɛ nyi ɛrɛdɛ kapanum, ɛjabɛ ji ligɔ Galili, a jɔ tebe anɛ gɔ ɛfong ɛragɛ ɛku Aju. 32Bɔ anɛ kpɛk kpɛ lamɛ bɔ anyar na a jɔ teb. Teb alom ɛnye kpe ɛkɔ. 33Gɔ ɛtak ji Aju kpejɔ wanɛ bɛlɛ nlolom awɔng nɔ bɛlɛ abi atɔgɔ gɔ ngɔbjing; ajɔ abinge gbogbo rɛ, 34“Ah! Jisɔs nɛ a Nasarɛt, jɛn ji akpe shɛbɛ gɔ garɛ ɛji? Aba rɛ abǝ rangɛ war a? Mɛ nyinyi nɛ nɔ alinɔ: wɔ wɔ le ɛtinge Nɛ Ɛshɔwɔ!”
35Jisɔs nyamɛ ɛbi ɛtɔgɔ rɛ, “Bolo nyɔ lɔngɛ gɔ ngɔbjing!” Nlim yege nlolom nɔnu tob gɔ ndi gɔ ɛshimar anɛ kpɛk kpɛ lɔngɛ sha, ɛjomjom amelimim.
36Lamɛ nɛ awɔngawɔngɔ anyar bɔ fɛr jɔ bab atɛm rɛ, “Ajɛn alom anyia a? Gɔ ɛkɔ ɛjɛ a nyamɛ abi atɔgɔ, bɔ lɔng!”
37Ɛka lagɛ Jisɔs yalɛ kpɛk kpɛ aji gɔ ɛbjabɛ bǝgɔgɔ.
Jisɔs lime anɛ gbalɛgbalɛ ayam
(Matiyu 8.14-17; Mak 1.29-34)
38Jisɔs mɛlɛ gɔ ɛtak ji Aju kpejɔ wanɛ tam gɔ ɛtak gɛ Sayimɔn. Nyen nkal a sayimɔn jɔ yamɛ arɔmbum, bɔ jɔ gbɔngɔ Jisɔs rɛ atɔbɛ. 39Jisɔs kim jɛgɛ shɔng yimi tɔbɛ nyam arɔmbum rɛ lɔng kayɛ ɛyagɛ, arɔmbum shɔrɔ lɔng kayɛ ɛyagɛ. Amelɛ tutu kime ɛblɔgɔ bɔ.
40Ɛfong biyɔ gɔ ngarɛ ntomo a njol ɛbgon, anɛ ba bɛlɛ anɛ ba jɔ yam ajɔbɔ ayam shɔlɔ bɔ ba gɔ ji Jisɔs; alagɛ nɛ awɔngawɔngɔ ɛbɔ, lim bɔ kpɛk kpɛ nɔb.
41Abi atɔgɔ fufɔ lɔng anɛ gbalɛgbalɛ gɔ ngɔbjing, jɔ binge rɛ, “Wɔ wɔ le Mɔn Ɛshɔwɔ!” Jisɔs nyam abi atɔgɔ anɔngim bɔ bung ntɔng, teb bɔ nyinyi rɛ yɛ wɔ le Krayis.
Jisɔs bungɔ alom Ɛshɔwɔ gɔ ɛtak ji Aju kpejɔ wanɛ
(Mak 1.35-39)
42Na fonfo ɛkparɛ nɔ, Jisɔs tamɛ gɔ mbɛlɛ ɛji. Anɛ bɔmɔ awɛ ɛshɛbɛ, na bɔ nyenɛ nɔ, bɔ gbɔngɛ rɛ akǝ tam bɔ sha. 43Jisɔs kim tɔngɔ bɔ rɛ, “Mɛ mkpe tir bung anɔba alom lagɛ Ɛtol Ɛshɔwɔ gɔ ɛbjabɛ bɔgɔ fufɔ, teb jiɔ ji Ɛshɔwɔ tomom rɛ mbilim.”
44Nɔwɔ a jɔ bung alom Ɛshɔwɔ gɔ ɛtak ji Aju kpejɔ wanɛ gɔ Judiya.
Nu markerat:
Luk 4: NBP
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
©️2024 Luke Initiative for Scripture Translation
