Matiyu 6
6
Abu Ehwya dgyan je e dwe edwe ángá
1“Nye e di e seshi abu nye bwe be mò esese mo nye anga a engga mo be nobǝ. Nye e bwe nye be evǝa be nobǝ be e di kpwà ara ra. Ano nye bwe enò, Ate nye e no a kpe ángá a no ye nye buhwen akan ra.
2“Enona, atan a wa no be ya ekan mò, we ti e twa mbo bón sangǝ́ abu be ya ayibangǝ̀ bwe anga a tswa be àtá chuefǝnm ngge a chu be efǝ ra. Be bwe enò evǝa be nobǝ e tàn be. M jan nye ebi, be cha gu ara binbin mo be mò a Ehwya àa no be ángá. 3Tea atan a wa no be ya ekan mò, we cha mbo dwa nobǝ akan e yi mò a o bwe anga ra. 4We dwe be nobǝ edwe hon engǝ̀tonton, kǝnggwa Ate o e di gu be mò e no engǝ̀tonton ángá, a no o buhwen mbo.
Abu ja bgó ebgo ángá
(Luka 11:2-4)
5“Atan a nye bgó ebgo anga, nye e no nye abu be ya ayibangǝ̀ ra, adia be dgyan be e ywa ne no e bgó ebgo anga a tswa àtá chuefǝnm ngge a tswa be efǝ, evǝa be nobǝ e no di be anga. Ebi m jan nye anga, be cha gu ara be mò a Ehwya àa no be ángá. 6Tea atan a wa bgó ebgo ángá, we kwashi a tswa àtá mbo, we fǝ e pe tafǝmo, we bgó ebgo a zǝn Ate o a be nobǝ diben be ye ra ángá. Kǝnggwa Ate o e di gu be mò a be bwe anga engǝ̀tonton ángá, a no o be buhwen mbo.
7“Atan a nye bgó ebgo anga, nye e no tku e wi nye vǝ anga abu be ya sen ekpwam bwe anga ra, adia be ka anga jan, adi ebwem enò ba fo be. 8Nye e no nye abu be ra, adia Ate nye yi mò a nye nda anga sangǝ́ nye chà bgó ye.
9“Ena abu nya bgó ebgo ángá.
“‘Ate je e no anga a kpe,
be e tse ti mbo,
10Be nobǝ be e yi jan wa tì,
be e bwe be moedgyan mbo
a tswa zǝnchaje abu be
bwe nó anga a kpe ángá.
11No je nogwa nogwa,
mode a je nda anga ḿ mo nò hon.
12Gwano je be ebgen mo je
abu je gwano be ya e bwe je ebgen anga.
13We gwa mbo Shetan ge e mbwà e di je,
e twa e fǝ̀ chu ra,
tea we ti e vǝ́ je a tswa echakpo mbwe.’
14Adia ano nye gwano be nobǝ, be ebgen a be bwe nye anga, Ate nye e no a kpe ángá, a gwa a no nye be ebgen a nye bwe anga gaten. 15Tea ano nye gwano nye be nobǝ be ebgen a be bwe nye anga ra, Ate nye e no a kpe ángá gwa a no ye nye be ebgen a nyè bwe ángá ra gaten.
Abu nya tsevǝ ángá
16“Atan a nye tsevǝ anga, nye e kpà nye fǝzǝn abu be ya ayibangǝ̀ bwe bwi ángá ra, adia be kpà fǝzǝn mo be evǝa be e tú be nobǝ jan be tsevǝ anga. Ebi m jan nye anga, be cha gu ara be buhwen mo be. 17Tea atan a nye tsevǝ anga, nye e fǝ fǝzǝn embǝga mo nye, nye e kpwá byi a chu mo nye, 18evǝa ge e ngga ye zǝ a zǝn be nobǝ jan nye tsevǝ anga ra. Ge e kpwà Ate nye. Ate nye hon a be diben be ye ra, nwene e di binbin mo be mò a be bwe anga engǝ̀tonton ángá, a no nye buhwen mo nye.
Nye e dgon be mobenben mo nye a kpe
(Luka 12:33-34)
19“Nye e dgon nye be mobenben mo nye a tswa zǝnchaje ena, zǝn a be efya ngge etsebgo de tkò a gu be, ngge zǝn a be yaju bu a fki àtá, n shi zǝ́ ju anga ra. 20Tea nye e dgon be mobenben mo nye a kpe, zǝn a be efya ngge etsebgo de a tkò be be ra, ngge zǝn a be yaju bu a fki be àtá, be e zǝ́ ju ángá ra. 21Adia zǝn a be mobenben mbo no anga, a zǝn a tsuruku mbo no anga gaten.
Fǝzǝn hon a enggasansan mo ekǝnjuju
(Luka 11:34-36)
22“Fǝzǝn a petila mo ekǝnjuju. Ano fǝzǝn mbo hon no ngge etkwaju, binbin mo ekǝnjuju mbo a mbo ngge enggasansan. 23Tea ano fǝzǝn mbo ben ye etkwaju ra, binbin mo ekǝnjuju mbo a mbo ngge etwafǝfǝ. Ano enggasansan hon e no a ju o ángá, nga ara etwafǝfǝ, etwafǝfǝ hon a bgen twa a fǝ̀ chu.
24“Nobǝ akan a bwe ye be yagwamo mu fà mochi ra, adia ga ze akan na dgyan akan eno e ra ga no akan edgwa na di a pin efki hon. Wa fen mbo Ehwya ngge tse adi ekpengga akan ra.
Nye e tsen nye tsuruku a chu mò akan ra
(Luka 12:22-34)
25“Enona, m jan nye anga, nye e tsen nye tsuruku a chu nya mo nye, a chu mò a nya de, eno e ra a chu mò a nya ngǝ ángá ra. Nye e tsen nye tsuruku a chu ekǝnjuju ngge a chu mò a nya nggwa a ju nye ángá ra. Nya hon twafǝ̀ ye mode ra? Ekǝnjuju hon twafǝ̀ ye mokàn ra? 26Nye di be nwendnye, be da be ra n bǝ be ra. Be tefǝn be mò anga a tswa eben ra, tea Ate nye e no a kpe ángá fi be anga. Nye gǝ̀n twafǝ̀ nye be ra? 27A engga mo nye, ara adi tsuruku etsenm mbwe, vǝ bgon a ti nya mbwe mo awa akan?
28“Ano bwe a ge, nye tsen tsuruku anga a chu mokàn a ju nye? Nye e di be vǝmo e twa kpimo anga a tswavǝ́n ángá, be wa be wá ra, n fǝ̀n be eti ra. 29Bi adi enò, m jan nye anga, èé Sulemano ngge mobenben mbwe binbin, bè tsànse ti be ye ju esese abu akan mo be ra. 30Ano Ehwya tsàn a se be vǝmo a tswavǝ́n nwone e no angǝ nòmo, tea kpe nya kpu be a nggwa a fǝ̀ ángá, ga tsàn a se nye ju twa a fǝ̀ ye be ra? A nye be ya chaebi nwofyan. 31Enona, nye e no e tsen nye tsuruku anga a chu be mò e dwana jan, ‘Zǝn a ja ben mò a ja de, mò a ja ngǝ ngge mò a ja nggwa a ju je ángá, no a che, ra?’ 32Adia be ya e yi be Ehwya ra, a be ya e kpu tsuruku mo be nyino tkunda be mò ena anga. Tea adi ḿ mo nye, Ate nye e no a kpe ángá, yi jan nye nda be mò hon anga. 33Enona, nye e kwafya e nda eyim mo zǝnotì mbwe ngge zǝno ebitete enom, kǝnggwa ga no nye binbin mo be mò ena gaten. 34Enona, nye e tsen nye tsuruku a chu nòkpe ra, adia nogwa nogwa no ngge fwa mbwe. Be mò tsen tsuruku mo nò a zǝkpe akan, mbwà ara mo nò hon.
Nu markerat:
Matiyu 6: ICH
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2024 Luke Initiative for Scripture Translation
