iMatiu 4

Imufẹ oyi iJesu

(iMak 1.12-13; iLuk 4.1-13)

1Ayẹmhẹ ọ rue iJesu je ọdagbe ifufu ni Ọkphaghiẹ ọ mẹ asha mu ọli fẹ.#4.1 Li zẹ Iburu 2.18; 4.15. 2Abi iJesu ọ rọ pfi azumhi ogbẹlẹ egbhuẹva se, okiamhi oo gbe ọli. 3Ighọ Ọkphaghiẹ ọ bhale deba li, ọọ li, “Ini o khia khi Omi Ẹshinẹgba u khi, nu eni echẹ ena ngme ni e mele eminale-a nẹ ni u le.”

4IJesu ọọ li, “Ebe-no-pfuasẹ o ngme ghọ khi:

“ ‘Ọa khi eminale tsẹ,

o ri agbọ a na ọgbọ,

ama ungmemhi ni

o rọte Ẹshinẹgba unu lasele kpa.’ ”#4.4 Li zẹ iDẹut 8.3.

5Ighọ Ọkphaghiẹ ọ rue iJesu je iJerusalẹmu, ẹoli no pfuasẹ. Ọ rue ọli ya nga apfiẹpfiẹmhi ashini o yagha nẹ shi Owa Oyi Ẹshinẹgba ya migha. 6Ọọ iJesu, “Ini o khi Omi Ẹshinẹgba u khi, rọte ukhomhi ana ji ya tiemhi ekẹkhẹ.” Irari khi Ebe-no-pfuasẹ o ngme ọli khi:

“ ‘Ẹshinẹgba ọ ya

ri unu na igẹni eyọli

e ri ẹloe shi ẹ egbe

e kpe abọ muẹ,

Ini u khi khi owẹ

shi ẹchẹ.’#4.6 Li zẹ Iwolo 91.11,12.”

7IJesu ọọ li, “A gbo li kẹkẹ ọ shi Ebe-no-pfuasẹ khi, ‘Khi mu Ẹshinẹgba Ọnọmhuẹ ọyẹ fẹ bino.’ ”#4.7 Li zẹ iDẹut 6.16.

8Ighọ Ọkphaghiẹ ọ rue iJesu nga ukhomhi ute ni o lolo yagha, ọ ga ri eghiele ni e la agbọ ona nya ali isomhotse oyẹwẹ khasẹ ọli. 9Ọọ li, “Ena nya mhi ya rọ nẹ ini u lẹsẹ nyẹsẹ ukhomhi ga mhẹ.”

10IJesu ọọ li, “Vu mhẹ alo-a, Ọkphaghiẹ! Ebe-no-pfuasẹ òó liẹ,

“ ‘Nyẹsẹ ukhomhi na

Ẹshinẹgba Ọnọmhuẹ oyẹ,

lọlighuo kpe wa ke ga.’ ”#4.10 Li zẹ iDẹut 6.13.

11Ighọ Ọkphaghiẹ ọ zẹ iJesu obọ, igẹni e bhale ya kpaghiẹ ọli obọ.

IJesu ọ rọte iGalili gba ikanya eyọli ekẹ le

(iMak 1.14-15; iLuk 4.14-15)

12Abi iJesu ọ rọ suọ khi a mu iJọni shi owa ighumha, ọ nyenẹ egbe je ẹdẹli iGalili.#4.12 Li zẹ iMat 14.3; iMak 6.17; iLuk 3.19-20. 13Ọa migha iNazarẹti, ọ je iKapanọmu, ẹdẹli ni o la ukiẹkiẹ okẹ iGalili ni o la ekẹ iZebulọ ali iNafutali.#4.13 Li zẹ iJọn 2.12. 14Eri a mẹ ena ni a rọ bhale ya ẹ khi ungmemhi ni Azaya ọmekẹguele ọ ngme, o bhale ya tsẹ, ni ọ la liẹ,

15“Ẹẹ ekẹ iZebulọ

ali ekẹ iNafutali,

ni a la ini a da okẹ iJọdani lase,

IGalili, ni ẹgbọ

iJẹta#4.15 Ẹgbọ iJẹta khi ẹgbọ ni e la ekẹ agbọ ona nya ni ẹa khi ẹgbọ iZirẹni. e ngeli, ni o la odẹ ni o je okẹ oniẹmhi.

16Ẹgbọ ni e la alo ebili

e ya mẹ ákpá oniẹmhi.

Oni ákpá ọọ ngale na

ẹgbọ ni o li abinẹ khi

eghuli o ti mama wẹ.”#4.15-16 Li zẹ Aza 9.1-2.

17Rọte aghọ vu iJesu ọ rọte tse abọ kia guele, “Ọgbọgbọ ọ mu pfi, irari khi Eghiele oyi Ẹshinẹgba o she ramhi.”#4.17 Li zẹ iMat 3.2.

IJesu ọ lu egbifẹlẹ aane e deba luẹ

(iMak 1.16-20; iLuk 5.1-11)

18Abi iJesu ọ li kia epfepfẹ okẹ oniẹmhi iGalili, ighọ ọ mẹ iPita ali Aduru, ọgbọ ali inyọghuo ni e khi egbifẹlẹ khi e ri aga a gbe ifẹlẹ oni okẹ-no-khishi. 19IJesu ọọ wẹ, “A bhale deba mhẹ khi mhi ya sẹsẹ ẹ abi a ke liẹ ke lu ẹgbọ bhale, ocho ni a rọ ọ gbe ifẹlẹ.” 20Aghọaghọ e zẹ aga eyẹwẹ obọ, e deba li.

21Ọ ke lẹ, ọ mẹ ọgbọ ali inyọghuo, iJemhisi ali iJọni imi iZebedi khi e nu itawẹ la elemhi ọkọ okẹ ni e lo, e riẹlẹ aga oyẹwẹ ẹ riẹlẹ. IJesu ọ lu wẹ e bhale. 22Aghọaghọ e lase ọkọ-okẹ le, e pfi itawẹ shi aghọ, e deba li vu.

IJesu ọ ri eni ẹẹ ghua ze

(iLuk 6.17-19)

23IJesu ọ kia asha kpa ekẹ iGalili ọ la owa ugamhi eyẹwẹ sẹsẹ wẹ usomhi onete oyi iloghie, ali ọ ri ẹgbọ ni e mhuẹ ighuamhi ọdọda ze. 24Ighọ a li suọ eko ọli ushishi iSiria oghọ nya, ya ramhi khi ẹgbọ e tsua eni mhuẹ ighuamhi ali anasẹmhẹ ọdọda, ghe eni e mhuẹ ayẹmhẹ ọkphaghiẹ ali ughuamhi ni ọọ mu ọgbọ pfi gbe ali eni e guọghọ-a bhale deba iJesu. Ọ ga rẹwẹ ze nya. 25Ighọ ebubu ẹgbọ e rọte iGalili ali ẹoli iDikapolisi ali iJerusalẹmu, ekẹ iJudia ali ẹgbọ ni e la ukiẹkiẹ obinokpọle oyi okẹ iJọdani, e deba li.

Nu markerat:

iMatiu 4: atgNT

Märk

Dela

Kopiera