Seera Uumamaa 3
3
Namni Ajajamuu Dide
1Bofni bineensa Rabbi Waandhi lafa irratti uume maraa caalaa hamaa ture; kanaafuu inni dubartitti'iin, «Dhugamaan Rabbi daraaraa muka hulee biqiltu'uu kana keessa jiran maraa hin nyaatinaa'a isiniin jedheeraa?» Jedhee isii gaafate. #Mudh. Yoh. 12:9; Mudh. Yoh. 20:2 2Dubartittiinillee bofaan, «Daraaraa muka hulee biqiltu'uu kana keessa jiru hin nyaanna; 3ammo Rabbi, ‹daraaraa muka hulee biqiltu'uu jiru kana keessaa daraaraa muka kanaa irraa hin nyaatinaa'a; hin tuqinalle'e; yoo kana gootan hin duutanii› jedhee nu seereera» jettee deebifteef. 4Bofnillee dubartitti'iin, «Dhugamaan du'a hin duutan; 5Wonti Rabbi waan kana isin ajajeef gaafa isii irraa nyaattan ijji teessan akka banamtu, akka isin waan misha'aa fi waan hamaa maraa adda baaftanii beettan waan beekuuf» isi'iin jedhe. 6Dubartittiin daraaraa mukaa san yoo laaltu nyaataaf mishaa; laalcha ijaatiifillee ka nama dharraasisuu fi ka nama ogoomsu akka ta'e hennaa argite daraaraa san fuutee nyaatte; akkasuma abbaa manaa ufiitiifillee hin kennite, innillee isii woliin nyaate. 7Ijji lamaaniituu hin baname; isaanillee akka qullaa ta'an beekan; kanaafuu baala muka hurbu'uu wolitti hodhanii marxifatanii qullaa nafa ufii dhoffatan.#3:7 Muka Hurbu'uu akkuma naannoo Itoophiya'aatitti beekkamu muka odaa fakkaatu ka baalli isaa qoree hin qabne ka daraaraan isaa mi'aawu. 8Isaan hennaa galgalaaye Rabbi Waandhi hulee biqiltu'uu keessa uduu deemu laagaa isaa dhagayanii Aadamii fi haati manaa isaa Rabbii Waaqa afo'oo hulee biqiltu'uu keessatti jalaa dhokatan.
9Garuu Rabbi Waandhi Aadamiin waamee «Eessa jirta?» Jedhee isa gaafate.
10Innillee, «Hulee biqiltu'uu keessatti laagaa kee dhagayee waan qullaa jiruuf si sodaadhee dhokadhe» jedheen.
11Rabbillee, «Akka qullaa taate eentu sitti hime? dhugamaan daraaraa muka ani irraa hin nyaatin jedhee si ajaje irraa fuutee nyaattee?» jedheen.
12Aadamillee «Intala ati akka na woliin jiraattuuf naa kennitetu daraaraa mukaa san irraa fuutee naa kennitee nyaadhe» jedhe.
13Rabbi Waandhi dubartitti'iin «Wonti ati goote kun maali'i?» Jedhee isii gaafate; isiinillee, «Bofatu na sobee nyaadhe» jette. #Qor. 2ffaa 11:3; Xim. 1ffaa 2:14
Murtii Rabbii
14Kanaan maayessa Rabbi Waandhi bofaan,
«Ati waan kana gooteef busaawa'aa fi bineensota maraa irraa adda baatee abaaramaa taata;
adha irraa jalqabii gara'aan lafa irra looyi;
bara jiraattu maraa biyyee nyaatta;
15Si'ii fi dubartii tana jidduu, fiixaa keetii fi fiixaa isi'ii jidduu diina akka ta'an godha.
Inni mataa kee mushurussa;
atillee koomee isaa iddita» jedheen. #Mudh. Yoh. 12:17
16Dubartitti'iinillee,
«Hennaa ulfoofte rakkinna sitti guddisa;
hennaa deettullee ciniinsuu sitti jabeessa;
hawwiin kee gara abbaa manaa keetii ta'a;
inni si bulcha» jedheen.
17Aadamiinillee,
«Ati jecha haadha manaa teetii dhageettee
daraaraa mukaa ka ani ‹Hin nyaatin› jedhee si ajaje fuutee
waan nyaatteef;
sababaa keetiif ardiin ta abaaramte haa taatu;
ati bara jireenna keetii maraa isii irratti
hojjattee dadhabbi'iin nyaatta.
18Ardiin qore'ee fi ashookallaa baafti;
atillee waan lafaa biqile nyaatta. #Ibr. 6:8
19Haga gaafa biyyee irraa uumamteetitti deebitutti,
hojjattee fuuruu keetiin nyaatta;
biyyee waan taateef
gara biyye'ee deebita» jedheen.
20Aadam haati manaa isaa waan uumama lubbuu qabu maraaf haadha taateef «Hawwaa» jedhee maqaa itti baase. 21Rabbi Waandhi Aadamii fi Hawwaa gogaa irraa uffata hojjatee isaanitti uwwwise.
Aadamii Fi Hawwaan Jeennata Keessaa Ari'aman
22Rabbi Waandhi, «Aadam waan hama'aa fi waan mishaa gara gara baasee beeku'uun kunoo akkuma keenna ta'e; ammallee deebi'ee harka ufii hiixatee daraaraa muka jireennaa san irraa fudhatee akka hin nyaanne; baraa haga bara baraallee akka hin jiraanne» jedhe.#Mudh. Yoh. 22:14 23Kanaafuu Rabbi Waandhi Aadamiin Eedaniin hulee biqiltu'uu keessaa baasee akka inni lafa irraa uumame qotu godheen. 24Haga Aadamiin baaseen maayessa Eedaniin hulee biqiltu'uu gara baya biiftu'uu maleekkota kiruubeel jedhamanii fi guraadee gara lamaaniin akka ibiddaa mallisu gara maraanuu kaaye.#3:24 Kitaabonni gariin yaada (wonti inni waan kana godheef akka eennullee gara muka jireennaa san hin dhandheef) jedhu itti eda'a.
Nu markerat:
Seera Uumamaa 3: KitWoy
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in