Marko 11
11
DEŠ‐U‐YEKH
1Kana pašile ka e Yerusalema, e Betpaža tay e Betaniya, paša e Playin le Maslinenge, bišaldya don anda peske vortača, 2tay mothodya lenge, “Žan ando gav mosa pe tumende tay kana dena andre, arakhena ekhe phangle katiroŕes. Khonik šoha či bešlya pe leste. Putren les tay anen les katka. 3Te phenela tuke voarekon, ‘Soste putren les?’, phenen leske, ‘Kado trobul le Raske tay bišalela les palpale.’ ” 4Tay geline‐tar tay arakhle le katiroŕes kay sas phanglo ka o vudar ande vulitsa. Tay puterde les. 5Tay vuni anda kodolende kay bešenas kote mothodine lenge, “So keren? Soste putren le katiroŕes?” 6Tay phende lenge so mothodyasas o Isus tay mekline le te žan. 7Atunči, andine le katiroŕes ka o Isus tay šude penge raxamya po katiroŕo tay o Isus anklisto pe leste. 8Tay but buhlyarenas penge raxamya po drom tay kaver šudenas po drom patryange krenži kay šindesas ando veš. 9Tay vi kodole anglal tay vi kodole palal, savoŕe tsipinas, “Hozana, mišto avilyan. Alduime kodo kay avel ando anav le Devlesko. 10Alduime e Amperatsiya amare Dadeski, le Davidoski so avela. Te tsipin ‘Hozana’ ando čeri.”
11Atunči gelo ande Yerusalema tay dya andre ando templo. Tay kana sa dikhlyasas, aba kazno sas, tay gelo avri ži kay e Betaniya le deš‐u‐dontsa.
12De teherin, kana avile palpale katar e Betaniya, bokhaylo. 13Tay, dural, dikhlya ekhe šmotyinengi pruyin kay patryazisaili. Gelo te dikhel te daštila te arakhel šmotyini pe pruyin. Numa feri patrya sas, či aver khanči. Nas inke e vryamya le šmotyinenge. 14Tay phendya lake o Isus, “Te manay xal šmotyini tutar khonik.” Vi leske vortača ašunde so mothodya.
15No, avile ži ka e Yerusalema. Dya andre ando templo tay lya te gonil avri savoŕen kay tyinenas tay bityinenas ay dya muyal le mesalya kodolenge kay pařuvenas le loventsa ay vi le skamina kodolenge kay bityinenas le golumbya. 16Či mekelas kanikas te na ingerel khanči pa o templo. 17Tay lya te sityarel. “Nay ramome, ‘Bušola muŕo kher ekh kher le rudžimasko sa le natsiyenge’. Numa tume kerdyan anda leste ekh groapa le čorengi.”
18Kana ašunde kodo le bare raša tay le Zakonarya, lya te roden sar te mudaren les. Darayle lestar ke mirisayle le žene pala lesko sityarimos.
19Atunči, kana ratyolas, geline‐penge anda o foro.
20De teherin, kana avile palpale, dikhle ke le šmotyinengi pruyin šutyili ku vini ku sa. 21Tay dya pe godži o Petro tay mothodya leske, “Raya, dikh. Šutyili e pruyin kay akušlya la.” 22Dya anglal o Isus, “Si tume te patyan tume ando Del. 23Vorta, mothav tuke, kongodi mothol kadale playinake te lel‐pe tay te šudel‐pe ande marya, tay či benuil ande peste ke vorta kerel‐pe numa sa patyal ke avela‐pe, kerdyola leske. 24Anda kodya, phenav tumenge, soste‐godi mangen kana rudžin‐tume, te patyan ke aba tute avel les, vorta avela tumende. 25-26Tay kanagodi rudžintume, te kerdya tuke bayo voarekon, yertisaren leske. Tay pala kodya vi tumaro Dad ando čeri yertila tumenge tumare bezexa.”
27Tay may yekh data aresle ka e Yerusalema. Tay kana phirelas ando templo, avile leste le bare raša tay le Zakonarya tay vi le purane. 28Phende leske, “Kaske putyaryasa keres kadale butya. Kon dya tuke kača putyarya te keres le”. 29Mothodya lenge o Isus, “Vi me pušava tumendar voareso. Den ma anglal tay me mothav tumenge kon dya ma kača putyarya. 30O bolimos kay dya o Yovano. Anda o čeri sas vay anda le manuš? So mothon mange?” 31Tay mothodine yekh avreske, “Te phenasa, ‘anda o čeri’, mothola vo, ‘Ay sostar či patyanas‐tume lestar?’ 32Numa sar te phenas, ‘anda'l manuš?’ ” Darayle le gažendar ke patyanas‐pe savoŕe ke čačo profeto sas o Yovano. 33Anda kodya, dine le Isusos anglal, “Sar te phenas?” Tay mothodya le o Isus, “Mišto, sar te phenav tumenge me kon dya ma kača putyarya te kerav kadale fyaluri?”
Nu markerat:
Marko 11: Kald71
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
maintained by the British and Foreign Bible Society
