ମାତିସ୍ 8
8
ଯୀଶୁସ୍ ଅଣ୍ଟା କୋଢ଼୍ ବେହ୍ମରିୟାସିନ୍ ବାନେ କାମାଲ୍ଦାସ୍
(ମାର୍କୁସ୍ ୧:୪୦-୪୫; ଲୁକାସ୍ ୫:୧୨-୧୬)
1ଯେତ୍କବାକେନ୍ ଯୀଶୁସ୍ ପାର୍ତ୍ତାନ୍ତି ଏତ୍ତିୟାସ୍ ତା, ଢେର୍ ଆଲାର୍ ଆସ୍କି ପାଛ୍ଲି-ପାଛ୍ଲି କେରାର୍। 2ଆରୁ ଏରା, ଅଣ୍ଟା କୋଢ଼୍ ବେହ୍ମରିୟାସ୍ ଯୀଶୁସ୍କି ଚାହାଗେ ବାର୍ଚାସ୍ ଆରୁ ଯୋହାର୍ କାମିକିରି ତେଙ୍ଗିୟାସ୍, “ହେ ପ୍ରାଭୁ, ଯଦି ନିମ୍ ଚାହଁର୍ ତା ଏଙ୍ଗାନ୍ ଶୁଦ୍ଧ୍ କାମା ଅଙ୍ଗର୍।” 3ଆଙ୍ଗେନ୍ ଯୀଶୁସ୍ ତାଙ୍ଘା ହେଖ୍ଖା ଲାମ୍ବାବାଇକିରି ଆସିନ୍ ଏସ୍ରାସ୍, ଆରୁ ତେଙ୍ଗିୟାସ୍, “ଏନ୍ ଚାହାଁଲ୍ଦାନ୍, ନିନ୍ ଶୁଦ୍ଧ୍ ମାନାକାଲା।” ଆରୁ ଆ କୋଢ଼୍ ବେହ୍ମରିୟାସ୍ ହୁଙ୍ଗେନିନ୍ ଶୁଦ୍ଧ୍ ମାନ୍ଚାସ୍କେରାସ୍। 4ଯୀଶୁସ୍ ଆସିନ୍ ତେଙ୍ଗିୟାସ୍, “ଏରା ଇବନ୍ ନେକାନ୍ହି ଆମ୍କେ ତେଙ୍ଗା, ଲେକିନ୍ କାଲା ଆରୁ ନିଜ୍କେନିଜ୍ ପୁରୋହିତ୍ଜାମାରିନ୍ ଏଦା, ଆରୁ ଏକା ନିୟମ୍ବନ୍ ମୁଶା ନାବୀସ୍ ଠାହ୍ରାଚ୍କାଦାସ୍ ଆଦ୍ଘି ଲେଖା ବଲୀ ଚାଢ଼ାବା ଏସ୍କେ କା ଆଲାର୍ଘି ଲାଗାନ୍ ଆଦ୍ ସାକ୍ଷୀ ମାନଦ୍।”
ସିପାହୀଜାମାର୍ଘି ଅଣ୍ଟା ମୁଖିଆସ୍କି ବିଶ୍ଵାସ୍
(ଲୁକାସ୍ ୭:୧-୧୦)
5ଯେତ୍କବାକେନ୍ ଯୀଶୁସ୍ କାଫାର୍ନାହୁମ୍ ସହର୍ଗେ ବାର୍ଚାସ୍ ତା ଅଣ୍ଟା ରୋମୀ ସିପାହୀସ୍ ଯୀଶୁସ୍କି ଚାହାଗେ ବାର୍ଚାସ୍ ଆରୁ ଆର୍ଜୀବିନ୍ତି କାମିକିରି ତେଙ୍ଗିୟାସ୍, 6“ହେ ପ୍ରାଭୁ, ଏଙ୍ଘା ଗୁତ୍ତିୟାସ୍ ଆଡ଼୍ପାନୁ ଏକ୍ଆଙ୍ଗିୟା ବେମାର୍ତି ଗଧାନୁ ରାଇକିରି ମୁରୁକ୍ ଦୁଃଖୁ ସାହାଲ୍ଦାସ୍।” 7ଯୀଶୁସ୍ ଆସିନ୍ ତେଙ୍ଗିୟାସ୍, “ଏନ୍ କାଇକିରି ଆସିନ୍ ବାନେ କାମନ୍।” 8ଲେକିନ୍ ଆ ରୋମୀ ସିପାହୀସ୍ ଯାବାବ୍ ଚିଚ୍ଚାସ୍, “ହେ ପ୍ରାଭୁ, ନିମ୍ ଏଙ୍ଘା ଆଡ଼୍ପା ବାରର୍, ଏନ୍ ଆଦ୍ଘି ଲାଇଗ୍ ମାଲ୍ଦାନ୍ ଲେକିନ୍ ନିମ୍ ପଦେ କାତ୍ଥା ତେଙ୍ଗାଚା ହାଲେ ଏଙ୍ଘା ଗୁତ୍ତିୟାସ୍ ବାନେ ମାନସ୍କସ୍। 9ଏନ୍ଦେର୍ଗେକା ଏନ୍ହି ଅଣ୍ଟାସ୍କି କିୟାଁ ରାଦାନ୍ ଆରୁ ଏଙ୍ଘା କିୟାଁ ସିପାହୀ ଜାମାର୍ହି ରାନାଏ। ଏନ୍ ଅର୍ତୁସିନ୍ ‘କାଲା!’ ବାଚ୍କୁନ୍ ଆସ୍ କାଦାସ୍; ଆରୁ ଅର୍ତୁସିନ୍, ‘ବାରା!’ ବାଚ୍କୁନ୍ ଆସ୍ ବାର୍ଦାସ୍! ଆରୁ ଏଙ୍ଘା ଗୁତ୍ତିୟାସିନ୍ ଇବନ୍ କାମା ବାଚ୍କୁନ୍ ଆସ୍ କାମ୍ଦାସ୍।”
10ଯୀଶୁସ୍ ଇବନ୍ ମେନିକିରି ଆଚ୍ମିତ୍ ମାନ୍ଚାସ୍ କେରାସ୍, ଆରୁ ତାଙ୍ଘା ପାଛ୍ଲି ବାରୁ ଆଲାରିନ୍ ତେଙ୍ଗିୟାସ୍, “ଏନ୍ ନିମାନ୍ ସତ୍ତୁନ୍ ତେଙ୍ଗାଲ୍ଦାନ୍ କା ଏନ୍ ଇସ୍ରାଏଲ୍ ରାଜୀନୁ ନେଖାସାନ୍ହି ଏତ୍କ ବାଡ଼୍କା ବିଶ୍ୱାସ୍ ମାଲ୍ଲା ହାଖ୍ଖୁନ୍। 11ଆରୁ ଏନ୍ ନିମାନ୍ ତେଙ୍ଗାଲ୍ଦାନ୍ କା ଏନ୍ନେନିନ୍ ପୁରୁବ୍ ଆରୁ ପଶ୍ଚିମ୍ତି ଢେର୍ ଆଲାର୍ ବାରିକିରି ଆବ୍ରାହାମ୍, ଇସାକ୍, ଆରୁ ୟାକୁବ୍ସ୍ଗାନେ ସରଗ୍ ରାଜୀନୁ ଭୋଜିନୁ ଅକ୍କର୍। 12ଲେକିନ୍ ରାଜୀନ୍ତା ହାଦ୍ଦୁବଚ୍ଚରିନ୍ ବାହ୍ରି ଉହାନୁ ତୁକ୍କାଚାକୋ: ଆସାନ୍ ଆବ୍ଡ଼ାର୍ ଅହ୍ଲର୍ ଆରୁ ପାଲ୍ଲୁନ୍ ପାର୍ମ୍ତେରର୍।” 13ଆନ୍ତିନ୍ ଯୀଶୁସ୍ ସିପାହୀସିନ୍ ତେଙ୍ଗିୟାସ୍, “କାଲା, ନିନ୍ ଏସ୍କେ ବିଶ୍ୱାସ୍ କାମାଲ୍ଦାଏ ଆନ୍ନେନ୍ ନିଙ୍ଘାଗାନେ ମାନ୍ନାଦ୍।” ଆରୁ ତାଙ୍ଘା ଗୁତ୍ତିୟାସ୍ ଆଖାନେନ୍ ବାନେ ମାନ୍ଚାସ୍କେରାସ୍।
ଯୀଶୁସ୍ ଢେର୍ ବେହ୍ମରିୟାରିନ୍ ବାନେ କାମାଲ୍ଦାସ୍
(ମାର୍କୁସ୍ ୧:୨୯-୩୪; ଲୁକାସ୍ ୪:୩୮-୪୧)
14ଯେତ୍କବାକେନ୍ ଯୀଶୁସ୍ ପାତ୍ରାସ୍କି ଆଡ଼୍ପା ବାର୍ଚାସ୍ ତା, ଆସ୍ ପାତ୍ରାସ୍କି ଶାଶ୍ବନ୍ ମୁରୁକ୍ ଯୋର୍ ନାଣିତି ଚୁତ୍କାନ୍ ଏରିୟାସ୍। 15ଯୀଶୁସ୍ ଆଦ୍ଘି ହେଖ୍ଖାନ୍ ଏଁସ୍ରାସ୍ ଆରୁ ଆଦ୍ଘି ନାଣିଦ୍ ଏତ୍ତିୟାକେରା, ଆରୁ ଆଦ୍ ଉସ୍କାରାଇକିରି ଆସ୍କି ସେବା କାମାଗେ ଲାଗ୍ଗିୟା। 16ବିଡ଼ି ଅକ୍କନାବାକେନ୍ ଆଲାର୍ ଢେର୍ ଭୁତ୍ତୁଲାକ୍କା ଆଲାରିନ୍ ଯୀଶୁସ୍କି ଚାହାଗେ ଅନ୍ଦ୍ରାର୍, ଆଙ୍ଗେନ୍ ଯୀଶୁସ୍ ତାଙ୍ଘା ବଚନ୍ତି ଭୁତ୍ତୁଗୁଠିନ୍ ଅଥ୍ରାସ୍; ଆରୁ ଜାମା ବେହ୍ମରିୟାରିନ୍ ବାନେ କାମ୍ଚାସ୍। 17ଏସ୍କେ କା ଏକା ବଚନ୍ବନ୍ ଇଶାୟାହ୍ସ୍ ନାବୀସ୍କି ଦ୍ୱାର୍ନୁ ତେଙ୍କାରାଚା ଆଦ୍ ପୁରା ମାନ୍ନାଦ୍: “ଆସ୍ ନିଜେ ନାହ୍ମାଏ କମ୍ଜୋରିବନ୍ ତାଙ୍ଘା ମିଆଁ ଅଚ୍ଚାସ୍ ଆରୁ ବେମାର୍ଗୁଠିନ୍ ଚେଡ୍ଡାସ୍।”
ଯୀଶୁସ୍କି ଚେଲା ମାନ୍ନାଘି ମୂଲ୍ୟ
(ଲୁକାସ୍ ୯:୫୭-୬୨)
18ଯେତ୍କବାକେନ୍ ଯୀଶୁସ୍ ତାଙ୍ଘା ଚାର୍ହି ପାଖା ଆଲାର୍ଘି ଭିଡ଼୍ ଏରିୟାସ୍ ତା, ହଁସ୍ରା ହାପାଖା କାଲାଗେ ତାଙ୍ଘା ଚେଲାରିନ୍ ହୁକୁମ୍ ଚିଚ୍ଚାସ୍। 19ହତ୍କବାକେନ୍ ଅଣ୍ଟା ପଣ୍ତିତ୍ସ୍ ଯୀଶୁସ୍କି ଚାହାଗେ ବାରିକିରି ତେଙ୍ଗିୟାସ୍, “ହେ ଗୁରୁ, ନିମ୍ ଏକାତାରା କର୍, ଏନ୍ହି ନିହ୍ମା ପାଛ୍ଲି-ପାଛ୍ଲି କନ୍।” 20ଯୀଶୁସ୍ ଆସିନ୍ ତେଙ୍ଗିୟାସ୍, “ଡୁରୁଘି ତାଙ୍ଘା ଲାତା ରାଇ ଆରୁ ଆକାଶ୍ତା ଓଡ଼ାଗୁଠିଘି ତାପ୍ପା ରାଇ ଲେକିନ୍; ମୁନୁଷ୍ ହାଦ୍ଦୁସ୍କି ଲାଗାନ୍ କୁକ୍କୁ ଉୟାଗେ ହି ଆଡ୍ଡା ମାଲ୍ଲାଦିନ୍।” 21ଚେଲାଜାମାର୍ଘି ଭିତର୍ନୁ ଅର୍ତୁସ୍ ତେଙ୍ଗିୟାସ୍, “ହେ ପ୍ରାଭୁ, ଏଙ୍ଗାନ୍ ଆଘ୍ଲି ଏଙ୍ଘା ବୁଆସିନ୍ ମାଁଣାଗେ କାଲା ଚିଆ।” 22ଲେକିନ୍ ଯୀଶୁସ୍ ଆସିନ୍ ତେଙ୍ଗିୟାସ୍, “ନିନ୍ ଏଙ୍ଘା ପାଛ୍ଲି ବାରା ଆରୁ ନେଦ୍ ଆତ୍ମିକ୍ ରୂପ୍ତି କେଚ୍ଚଚାର୍ କେର୍କାନାଏ ଆବ୍ଡ଼ାର୍ ନିଜର୍ କେଚ୍ଚକାରିନ୍ ମାଣର୍।”
ଯୀଶୁସ୍ ଆନ୍ଧି ଧୁକାବନ୍ ବନ୍ଦ୍ କାମାଲ୍ଦାସ୍
(ମାର୍କୁସ୍ ୪:୩୫-୪୧; ଲୁକାସ୍ ୮:୨୨-୨୫)
23ଯେତ୍କବାକେନ୍ ଯୀଶୁସ୍ ଡଙ୍ଗାନୁ ଆର୍ଗିୟାସ୍ ତା, ତାଙ୍ଘା ଚେଲାଜାମାର୍ ତାଙ୍ଘା ପାଛ୍ଲି-ପାଛ୍ଲି କେରାର୍। 24ଆରୁ ଏରା, ହଁସ୍ରାନୁ ଏତ୍କ ବାଡ଼୍କା ଆନ୍ଧିଧୁକା ବାର୍ଚା ଯେ ଡଙ୍ଗାଦ୍ ଲହ୍ଡ଼ିତି ନିନ୍ଦା କାଲିୟାଦ୍, ହତ୍କବାକେନ୍ ଯୀଶୁସ୍ ହାନ୍ଦ୍ରାଲିୟାସ୍। 25ଆଙ୍ଗେନ୍ ଚେଲାଜାମାର୍ ଯୀଶୁସ୍କି ଚାହାଗେ ବାର୍ଚାର୍ ଆରୁ ତାଙ୍ଗାନ୍ ଉଠାବିକିରି ତେଙ୍ଗିୟାର୍, “ହେ ପ୍ରାଭୁ, ଏମାନ୍ ବାଛାବା, ଏମ୍ ମୁହ୍ଲା କାଲ୍ଦାମ୍।” 26ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହେ କମ୍ ବିଶ୍ୱାସ୍ କାମୁରୋ, ଏନ୍ଦେର୍ଗେ ଏଲ୍ଚାଲ୍ଦାର୍?” ଆନ୍ତିନ୍ ଆସ୍ ଉସ୍କାରାଇକିରି ଆନ୍ଧି ଧୁକାନ୍ ଆରୁ ଲହ୍ଡ଼ିନ୍ହି ଧାମ୍କାଚାସ୍ ଆରୁ ଜାମାଦ୍ ବନ୍ଦ୍ ମାନ୍ଚାକେରା। 27ଆରୁ ଚେଲାଜାମାର୍ ଆଚ୍ମିତ୍ ମାନିକିରି ତେଙ୍ଗିୟାର୍, “ଇସ୍ ଏସ୍କେ ଆଲାସ୍ ଯେ ଧୁକା ଆରୁ ଲହଡ଼ିଦ୍ହି ତାଙ୍ଘା ହୁକୁମ୍ବନ୍ ମେନିଦ୍।”
ଯୀଶୁସ୍ ଦୁଇ ଲୋକ୍ ଭୁତ୍ତୁଲାକ୍କା ଆଲାରିନ୍ ବାନେ କାମାଲ୍ଦାସ୍
(ମାର୍କୁସ୍ ୫:୧-୨୦; ଲୁକାସ୍ ୮:୨୬-୩୯)
28ଯେତ୍କବାକେନ୍ ଯୀଶୁସ୍ ହଁସ୍ରା ହାପାଖ୍ତା ଗାଦ୍ରେନିୟ ଜାମାର୍ଘି ପ୍ରଦେଶ୍ଗେ ଆଣ୍ସିୟାସ୍ ତା, ଭୁତ୍ତୁଲାକ୍କା ଦୁଇ ଲୋକ୍ ଆଲାର୍ ମାସ୍ଣା ତାର୍ତି ଉର୍ଖିଆର୍ ଆରୁ ଆସିନ୍ ଭେଁଟ୍ ମାନ୍ଚାର୍। ଆବ୍ଡ଼ାର୍ ଏତ୍କ ବିର୍ଝା ରାଚ୍କାଚାର୍ ଯେ ଆପାବୁନୁ ନେଦ୍ହି କାଲାବାରା ପଲ୍ଲାଲିୟାର୍। 29ଆବ୍ଡ଼ାର୍ ଚିର୍ରା ରାଇକିରି ତେଙ୍ଗିୟାର୍, “ହେ ପାର୍ମେଶ୍ଵାର୍ସ୍କି ହାଦ୍ଦୁ, ଏହ୍ମା ଗାନେ ନିହ୍ମାଏ ଏନ୍ଦେର୍ ନାଲ୍ଖୁ ରାଇଦ୍? ନିମ୍ ଠାହ୍ରାଚ୍କା ସାମାୟନ୍ତି ପହ୍ଲେ ଏମାନ୍ ଦୁଃଖୁ ଚିୟାଗେ ଇସାନ୍ ବାର୍ଚ୍କାଦାର୍ କାଁଏ?” 30ଆରୁ ଆବ୍ଡ଼ାର୍ସ୍ତି କାଟେ ଗେଚ୍ଛାନୁ ଅଣ୍ଟା ବାଡ଼୍କା କିସ୍ସୁଗୁଠି ମେନାଲିୟାଦ୍। 31ଭୁତ୍ତୁଗୁଠିଦ୍ ଆସିନ୍ ଆର୍ଜୀବିନ୍ତି କାମିକିରି ତେଙ୍ଗିୟାଦ୍, “ଯଦି ନିମ୍ ଏମାନ୍ ଅଥ୍ରାଗେ ବେଦ୍ଦାଲ୍ଦାର୍ତା, କିସ୍ସୁଗୁଠିନୁ କାଲାଗେ ଚିଆ।” 32ଯୀଶୁସ୍ ଭୁତ୍ତୁଗୁଠିନ୍ ତେଙ୍ଗିୟାସ୍, “କାଲା!” ଆଙ୍ଗେନ୍ ଆବ୍ଡ଼ାଦ୍ ଉର୍ଖିକିରି କିସ୍ସୁଗୁଟ୍ଟଠିନୁ କର୍ଚା, ଆରୁ ଏରା, ପୁରା କିସ୍ସୁଗୁଠିଦ୍ ମୁରୁକ୍ ଜୋର୍ସେ କୁଦିୟାରିକିରି ଉତ୍ରେନ୍ ଆଡ୍ଡାନ୍ତି ସାମ୍ଧୁର୍ନୁ ଡେକ୍ଚା ଆରୁ ମୁହ୍ଲିଆ କେଚ୍ଚାକେରା। 33ଆରୁ କିସ୍ସୁ ହାପୁର୍ ଇ ଘାଟ୍ଣାନ୍ ଏରିକିରି ବୁଙ୍ଗେଇଚାର୍, ଆରୁ ପାଡ଼ାଗୁଠିନୁ କାଇକିରି ଇବ୍ଡ଼ା ଜାମା କାତ୍ଥାନ୍ ଆରୁ ଭୁତ୍ତୁଲାକ୍କା ଆଲାର୍ଘିନୁ ଏସ୍କେ-ଏସ୍କେ ଘାଟ୍ରା ଆବ୍ଡ଼ାନ୍ ତେଙ୍ଗିୟାର୍। 34ଆଙ୍ଗେନ୍ ସହର୍ତା ଆଲାର୍ ଯୀଶୁସ୍ଗାନେ ଭେଁଟ୍ ମାନାଗେ ବାର୍ଚାର୍, ଆରୁ ଆସିନ୍ ଏରିକିରି ତାହ୍ମା ପ୍ରଦେଶ୍ତି ବୁଙ୍ଗାକାଲା ବୁଲି ଆର୍ଜୀବିନ୍ତି କାମ୍ଚାର୍।
Nu markerat:
ମାତିସ୍ 8: xis
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© (Active) Wycliffe Bible Translators, Inc. All rights reserved.
