ମାତିସ୍ 14
14
ଆସ୍ନାନ୍ ଚିଉ ଯୋହାନ୍ସ୍କି ମରନ୍
(ମାର୍କୁସ୍ ୬:୧୪-୨୯; ଲୁକାସ୍ ୯:୭-୯)
1ହୁ ସାମାୟନୁ ଗାଲିଲୀ ରାଜୀନ୍ତା ରାଜା ହେରୋଦ୍ସ୍ ଯୀଶୁସ୍କି ବାରେନୁ ଖବର୍ ମେନ୍ଚାସ୍, 2ଆରୁ ତାଙ୍ଘା ସେବକ୍ରିନ୍ ତେଙ୍ଗିୟାସ୍, “ଇସ୍ ଆସ୍ନାନ୍ ଚିଉ ଯୋହାନ୍ସ୍! ଆସ୍ ଖିଉ ଆଲାର୍ସ୍ତି ଉଜ୍ଜିୟାସ୍ କେର୍କାଦାସ୍, ହୁଦ୍ଘିଲାଗାନ୍ ତାଙ୍ଘାସାନ୍ ଇ ଜାମା ଶକ୍ତିଘି ନାଲ୍ଖୁଦ୍ ପ୍ରକଟ୍ ମାନି।”
3ଏନ୍ଦେର୍ଗେକା ହେରୋଦ୍ସ୍ ତାଙ୍ଘା ଭାଇ ଫିଲିପ୍ପସ୍କି ଆଲି ହେରୋଦିଆଘି ଲାଗାନ୍, ଯୋହାନ୍ସିନ୍ ଧାରିକିରି ହିଁଚାସ୍ ଆରୁ ଜେହେଲ୍ନୁ ଗୁଡ୍ଡେଇ ଚିଚ୍କାଚାସ୍। 4ଏନ୍ଦେର୍ଗେକା ଯୋହାନ୍ସ୍ ଆସିନ୍ ତେଙ୍ଗିୟାସ୍ କା ଇ ଆଲିବନ୍ ଉଇନା ନିଙ୍ଗାଗେ ଉଚିତ୍ ମାଲ୍ଲିଦ୍। 5ହୁଦ୍ଘିଲାଗାନ୍ ହେରୋଦ୍ସ୍ ଯୋହାନ୍ସିନ୍ ପିଟା ବେଦ୍ଦାଲିୟାସ୍; ଲେକିନ୍ ଆସ୍ ଆଲାରିନ୍ ଏଲ୍ଚାଲିୟାସ୍, ଏକାର୍ କା ଯୋହାନ୍ସିନ୍ ନାବୀବୁଲି ମାନାଲିୟାର୍।
6ଲେକିନ୍ ହେରୋଦ୍ସ୍କି ଜନମ୍ ଉଲ୍ଲାନୁ, ହେରୋଦିଆଘି ତାଙ୍ଗ୍ଦାଦ୍ ପାହିୟାର୍ଘି ଆଘ୍ଲି ନାଲିକିରି ହେରୋଦ୍ସିନ୍ ଖୁସ୍ କାମ୍ଚା। 7ଆଙ୍ଗେନ୍ ଆସ୍ କସମ୍ ମହିଁକିରି ତେଙ୍ଗିୟାସ୍, “ନିନ୍ ଏକାନ୍ ନିଅୟ, ଏନ୍ ଆବନ୍ ନିଙ୍ଗାଗେ ଚିଅନ୍।” 8ଆରୁ ଆଦ୍ ତାଙ୍ଗ୍ୟଘି କାତ୍ଥାନ୍ ମେନିକିରି ତେଙ୍ଗିୟାଦ୍, “ଆସ୍ନାନ୍ ଚିଉ ଯୋହାନ୍ସ୍କି କୁକ୍କୁନ୍ ଏଙ୍ଗାଗେ ଅଣ୍ଟା ଥାଡ଼ିନୁ ଇସାନ୍ ଚିଆ।” 9ଇବନ୍ ମେନିକିରି ରାଜାସ୍ ଦୁଃଖୁ ମାନ୍ଚାସ୍, ଲେକିନ୍ ନିଜର୍ କସମ୍ଘି ଲାଗାନ୍ ଆରୁ ତାଙ୍ଘାଗାନେ ଆସାନ୍ ରୁ ଆଲାର୍ଘି ଲାଗାନ୍ ହୁକୁମ୍ ଚିଚ୍ଚାସ୍ କା ଆବନ୍ ଚିଆକୋ। 10ଆରୁ ହେରୋଦ୍ସ୍ ଆଲାରିନ୍ ଜେହେଲ୍ଗେ ତାଇୟିକିରି ଯୋହାନ୍ସ୍କି କୁକ୍କୁନ୍ ପୁଜ୍ତାଚାଷ୍; 11ଆରୁ ଆସ୍କି କୁକ୍କୁନ୍ ଅଣ୍ଟା ଥାଡ଼ିନୁ ଅନ୍ଦ୍ରାର୍ ଆରୁ ଆ କୁକାଏଗେ ଚିଚ୍ଚାର୍, ଆରୁ ଆଦ୍ ତାଙ୍ଗ୍ୟଘି ଚାହାଗେ ଅଚ୍ଚାକେରା। 12ଆଙ୍ଗେନ୍ ଯୋହାନ୍ସ୍କି ଚେଲାର୍ ବାର୍ଚାର୍ ଆରୁ ତାଙ୍ଘା ମାଁଣାବନ୍ ହୋଇକିରି ମାଣେଇଚାର୍, ଆରୁ କାଇକିରି ଯୀଶୁସ୍କେ ଖବର୍ ଚିଚ୍ଚାର୍।
ଯୀଶୁସ୍ ପାଞ୍ଚ୍ ହାଜାର୍ ଆଲାରିନ୍ ମହତାଚାସ୍
(ମାର୍କୁସ୍ ୬:୩୨-୪୪; ଲୁକାସ୍ ୯:୧୦-୧୭; ଯୋହାନ୍ ୬:୧-୧୪)
13ଯେତ୍କବାକେନ୍ ଯୀଶୁସ୍ ଯୋହାନ୍ସ୍କି ବାରେନୁ ମେନ୍ଚାସ୍ ତା, ଆସ୍ ଡଙ୍ଗାନୁ ଅକ୍କିକିରି ଆ ଆଡ୍ଡାସ୍ତି ଅଣ୍ଟା ଶୁନ୍ଶାନ୍ ଆଡ୍ଡାଗେ କେରାସ୍, ଇବନ୍ ମେନିକିରି ଆଲାର୍ ସହର୍ଗୁଠିନ୍ତି ଏକ୍ତେ ତାଙ୍ଘା ପାଛ୍ଲି-ପାଛ୍ଲି କେରାର୍। 14ଆରୁ ଆସ୍ ଡଙ୍ଗାନ୍ତି ଏତ୍ତିକିରି ଆଲାର୍ଘି ଅଣ୍ଟା ବାଡ଼୍କା ଭିଡ଼୍ ଏରିୟାସ୍ ଆରୁ ଆସ୍କେ ଆବ୍ଡ଼ାର୍ଘି ମିଆଁ ମୁରୁକ୍ ସୋଗ୍ଗେ ଲାଗ୍ଗିୟା, ଆରୁ ଆସ୍ ଆବ୍ଡ଼ାର୍ଘି ବେମାର୍ଗୁଠିନ୍ ବାନେ କାମ୍ଚାସ୍।
15ବିଡ଼ି ଅକ୍କାନ୍ତି ତାଙ୍ଘା ଚେଲାଜାମାର୍ ତାଙ୍ଘାସାନ୍ ବାରିକିରି ତେଙ୍ଗିୟାର୍, “ଇଦ୍ ତା ଶୁନ୍ଶାନ୍ ଆଡ୍ଡାଦ୍ ଆରୁ ବିଡ଼ିହି ଅକ୍କିୟା କେରାଦ୍; ହୁଦ୍ଘିଲାଗାନ୍ ଆଲାରିନ୍ ପାଡ଼ାତାରା କାଲାଗେ ଚିଆ, ଏସ୍କେ କା ଆବ୍ଡ଼ାର୍ ତାହ୍ମାଲାଗାନ୍ ଅନାମହାଗେ ହେନ୍ଦର୍।” 16ଲେକିନ୍ ଯୀଶୁସ୍ ତାଙ୍ଘା ଚେଲାଜାମାରିନ୍ ତେଙ୍ଗିୟାସ୍, “ଆବ୍ଡ଼ାର୍ଘି କାନା ଦାର୍କାର୍ ମାଲ୍ଲାଦ୍! ନିମିନ୍ ଇବ୍ଡ଼ାର୍ଗେ ଅନାମହାଗେ ଚିଆଲାଗା।” 17ଆବ୍ଡ଼ାର୍ ଆସିନ୍ ତେଙ୍ଗିୟାର୍, “ଇସାନ୍ ଏହ୍ମାସାନ୍ ଖାଲି ପାଞ୍ଚେଟା ଆସ୍ମା ଆରୁ ଯୋଡ଼େ ଇଞ୍ଜୋ ରାଇ।” 18ଯୀଶୁସ୍ ତେଙ୍ଗିୟାସ୍, “ଆବ୍ଡ଼ାନ୍ ଇସାନ୍ ଏଙ୍ଘା ଚାହାଗେ ଅନ୍ଦ୍ରା।” 19ଆନ୍ତିନ୍ ଆସ୍ ଆଲାରିନ୍ ଘାଁସି ମିଆଁ ଅକ୍କାଗେ ହୁକୁମ୍ ଚିଚ୍ଚାସ୍, ଆରୁ ଆସ୍ ଆ ପାଞ୍ଚେଟା ଆସ୍ମାନ୍ ଆରୁ ଯୋଡ଼େ ଇଞ୍ଜୋନ୍ ଧାର୍ଚାସ୍; ଆରୁ ସରଗ୍ ତାରା ଏରିକିରି ଧାନ୍ୟାବାଦ୍ ଚିଚ୍ଚାସ୍ ଆରୁ ଆସ୍ମାଗୁଠିନ୍ ଖିଣ୍ଡା-ଖିଣ୍ଡା ଚେଲାଜାମାର୍ଗେ ଚିଚ୍ଚାସ୍, ଆରୁ ଚେଲାଜାମାର୍ ଆଲାର୍ଗେ ଚିଚ୍ଚାର୍। 20ଆରୁ ଜାମା ଆଲାର୍ କୁଲୁଭର୍ ମଖ୍ଖାର୍ ଆରୁ ଉଚ୍ଛିୟାର୍ କେରାର୍, ଆରୁ ଯେତ୍କ ଟୁକ୍ଡ଼ା ଆସ୍ମା ଏଙ୍ଗ୍ରା ଆବନ୍ ଚେଲାଜାମାର୍ ଠୁଡ଼ିୟାଚାର୍ ଆଦ୍ ବାର ଡାଲା ମାନ୍ଚା। 21ଆରୁ ମହୁଁ ଆଲାର୍ଘି ଭିତର୍ନୁ ମାଏକିନିଆଁ ଆରୁ ହାଦ୍ଦୁରିନ୍ ଆମ୍ବିକିରି, ଲାଗ୍ଭାଗ୍ ପାଞ୍ଚ୍ ହାଜାର୍ ମାର୍ଦ୍ନାର୍ ରାଚାର୍।
ଯୀଶୁସ୍କି ଆମ୍ମୁନୁ ଏକ୍ନା
(ମାର୍କୁସ୍ ୬:୪୫-୫୨; ଯୋହାନ୍ ୬:୧୫-୨୧)
22ହୁଙ୍ଗେନିନ୍ ଯୀଶୁସ୍ ତାଙ୍ଘା ଚେଲାଜାମାରିନ୍ ଡଙ୍ଗାନୁ ଅକ୍କିକିରି ତାଙ୍ଘାଏନ୍ତି ଆଘ୍ଲି ହାପାଖା କାଲାଗେ ତେଙ୍ଗିୟାସ୍, ହତ୍କତକ୍ ଆସ୍ ଆଲାରିନ୍ ବିଦା କାମଚସ୍। 23ଆସ୍ ଆଲାରିନ୍ ବିଦା କାମ୍ଚ୍କା ପାଛ୍ଲି, ବିନ୍ତି କାମାଗେ ଦୁସ୍ରା ଅଣ୍ଟା ପାର୍ତ୍ତାଗେ କେରାସ୍; ଆରୁ ବିଡ଼ି ଅକ୍କାନ୍ତି ଆସ୍ ଆସାନ୍ ଅଥାସ୍ ରାଚାସ୍। 24ଲେକିନ୍ ହତ୍କବାକେନ୍ ଡଙ୍ଗାଦ୍ ହଁସ୍ରା ଖାଁଣିନ୍ତି ଢେର୍ ଗେଛାନୁ ରାଚା ଆରୁ ଡଙ୍ଗାଦ୍ ଲହ୍ଡ଼ିତି ଡାଗ୍ମାଗ୍ରାଲିୟାଦ୍, ଏନ୍ଦେର୍ଗେକା ଧୁକାଦ୍ ଡଙ୍ଗାଘି ଆଘ୍ଲିତାର୍ତି ବାରାଲିୟାଦ୍। 25ଆରୁ ଯୀଶୁସ୍ ବିଜ୍ଜନାଘି ଲାଗ୍ଭାଗ୍ ତିନ୍ଚାର୍ ବାଜେ ହଁସ୍ରାନୁ ଏକ୍ତେ-ଏକ୍ତେ ଚେଲାଜାମାର୍ଘି ଚାହାଗେ ବାର୍ଚାସ୍। 26ଆରୁ ଚେଲାଜାମାର୍ ଯୀଶୁସିନ୍ ହଁସ୍ରାନୁ ଏକ୍ନାନ୍ ଏରିକିରି ଘାବ୍ରାରାଚାର୍ କେରାର୍ ଆରୁ ତେଙ୍ଗା ଲାଗ୍ଗିୟାର୍, “ଇଦ୍ ତା ଭୁତ୍ତୁଦ୍!” ଆରୁ ଆବ୍ଡ଼ାର୍ ଏଲ୍ଚ୍କାତି ଚିର୍ରାରାଗେ ଲାଗ୍ଗିୟାର୍। 27ଲେକିନ୍ ଯୀଶୁସ୍ ହୁଙ୍ଗେନିନ୍ କାଚ୍ନେଖ୍ରାସ୍ ଆରୁ ତେଙ୍ଗିୟାସ୍, “ଧିରାଜ୍ ଧାରା! ଆମା ଏଲ୍ଚା! ଏନିନ୍।” 28ଆଙ୍ଗେନ୍ ପାତ୍ରାସ୍ ଯୀଶୁସିନ୍ ଯାବାବ୍ ଚିଚ୍ଚାସ୍, “ହେ ପ୍ରାଭୁ, ଯଦି ନିମିନ୍ ହାଲେ ଏଙ୍ଗାନ୍ ନିହ୍ମା ଚାହାଗେ ଆମ୍ମୁନୁ ଏକା ଆରୁ କାଲାଗେ ହୁକୁମ୍ ଚିଆ।” 29ଆସ୍ ତେଙ୍ଗିୟାସ୍, “ବାରା!” ଆଙ୍ଗେନ୍ ପାତ୍ରାସ୍ ଡଙ୍ଗାନ୍ତି ଏତ୍ତିକିରି ଆମ୍ମୁନୁ ଯୀଶୁସ୍କି ଚାହା କାଲାଗେ ଲାଗ୍ଗିୟାସ୍। 30ଲେକିନ୍ ପାତ୍ରାସ୍ ଧୁକାବନ୍ ଏରିକିରି ଏଲ୍ଚିୟାସ୍ କେରାସ୍, ଆରୁ ଯେତ୍କବାକେନ୍ ମୁହ୍ଲା ବେଦ୍ଦାଲିୟାସ୍ ତା ଚିର୍ରା ରାଇକିରି ତେଙ୍ଗିୟାସ୍, “ହେ ପ୍ରାଭୁ, ଏଙ୍ଗାନ୍ ବାଛାବା!” 31ଯୀଶୁସ୍ ହୁଙ୍ଗେନିନ୍ ହେଖ୍ଖା ଲାମ୍ବାବାଇକିରି ଆସିନ୍ ଧାର୍ଚାସ୍ ଆରୁ ତେଙ୍ଗିୟାସ୍, “ହେ କମ୍ ବିଶ୍ଵାସୀୟ, ନିନ୍ ଏନ୍ଦେର୍ଗେ ଶାକ୍ କାମ୍ଚ୍କାଏ?” 32ଯେତ୍କବାକେନ୍ ଆବ୍ଡ଼ାର୍ ଡଙ୍ଗାନୁ ଅକ୍କିୟାର୍ ତା, ଧୁକା ବନ୍ଦ୍ ମାନ୍ଚାକେରା। 33ଆଙ୍ଗେନ୍ ଡଙ୍ଗାନୁ ରୁ ଆଲାର୍, ଆସିନ୍ ହାଁଠୁୱାରାଇକିରି ଯୋହାର୍ କାମ୍ଚାର୍ ଆରୁ ତେଙ୍ଗିୟାର୍, “ସତ୍ତୁନିନ୍, ନିମ୍ ପାର୍ମେଶ୍ଵାର୍ସ୍କି ହାଦ୍ଦୁର୍।”
ଯୀଶୁସ୍ ଗେନ୍ନେସାରେତ୍ ରାଜୀନ୍ତା ବେହ୍ମରିୟାରିନ୍ ବାନେ କାମାଲ୍ଦାସ୍
(ମାର୍କୁସ୍ ୬:୫୩-୫୬)
34ଆବ୍ଡ଼ାର୍ ହଁସ୍ରା ପାର୍ ମାନିକିରି ଗେନ୍ନେସାରେତ୍ ରାଜୀଗେ ଆଣସିୟାର୍। 35ଆରୁ ଆସ୍ତା ଆଲାର୍ ଯୀଶୁସିନ୍ ଚିହ୍ନେଚେଇଚାର୍ ଆରୁ ଚାହାଚାହାନ୍ତା ପାଡ଼ାଗୁଠିଗେ ଖବର୍ ଚିଚ୍ଚାର୍, ଆରୁ ଆଲାର୍ ଜାମା ବେହ୍ମରିୟାରିନ୍ ତାଙ୍ଘା ଚାହାଗେ ଅନ୍ଦ୍ରାର୍, 36ଆରୁ ଆବ୍ଡ଼ାର୍ ଏସ୍କେ ତାଙ୍ଘା ଚିଢ଼ାଘି ପାଣ୍ତୁନ୍ ଖାଲି ଏସ୍ରର୍; ହୁଦ୍ଘିଲାଗାନ୍ ତାଙ୍ଗାନ୍ ଆର୍ଜୀବିନ୍ତି କାମାଗେ ଲାଗ୍ଗିୟାର୍ ଆରୁ ଯେତ୍କ ଲୋକ୍ ଏସ୍ରାର୍, ଆବ୍ଡ଼ାର୍ଜାମାର୍ ବାନେ ମାନ୍ଚାର୍ କେରାର୍।
Nu markerat:
ମାତିସ୍ 14: xis
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© (Active) Wycliffe Bible Translators, Inc. All rights reserved.
