ማቲወስት ወንጌል 4
4
ፈወነ 4
እየሱስ ፊትንሸጘ
(ማር. 1፡12-13፤ ሉቃ. 4፡1-13)
1እንዝ ግረ ዳቪለውስ ፊትናንስ ማጥን መንፈስ ቅዱስ እየሱስት በራኸል ቃው ፊሱ።#እቭ. 2፡18፤ 4፡15። 2እየሱስም ጝግል ኣርቨ ግርቅዝመ ኣርቨ ጨንዝ ፃመት ግረ ግድርዱ።#ዘፀ. 34፡28፤ 1ነገ. 19፡8። 3ፊትነተድም እየሱስ ትጐ ኣልት፦ «ክት እደረት ዅር ኣረውዝየ እስቲ እንዛይ ቕርጝድዛት፦ ‹ሚ ኣጥን ይር› ኣዝ!» ዩ። 4እየሱስ ግን፦ « ‹እጅር እደረት ምቸይስ ፈው ቃልዝቅጚ ሚዝ ጭቝ ፅባውም› ይሽት ፃፍሽኩ» ዩ።#ዘዳ. 8፡3።
5እንዝ ግረ ዳቪለውስ እየሱስት ቅድስት ኻትመ እየሩሳልየምትል ፊስ መቅደስ ጝኒዝ ጫፍ ጕልላቲል ችብስ፦#ንኽ. 11፡1፤ ዳን. 9፡24።
6« ‹ክልኵጣንድ ቕርጘዝ ፅጋራይጘጘ፣
ክት ጝታናንጣኒዝ ጕይጛንስ ማጥን
ጝመላካንድዛት ክማጥን ኣዝጡ›
ይሽት ፃፍሽኩ፤ እደስለስ ክት እደረት ዅር ኣረውዝየ እኒስ ሳ ዊርውርጭ» ዩ።#መዝ. 91፡11-12። 7እየሱስም፦ « ‹ክኣምላክ ኣደረት ፊትንትንተ› ይሽት ቈሽ ፃፍሽኩ» ዩ።#ዘዳ. 6፡16።
8እንደ ገነም ዳቪለውስ እየሱስት ጭቕጘ ሊግዘው ኣበል ፊስ ኣልሚዙ ቲተቲተው ቅምቲዝመ ጝክቭሪዝ እጝቅትቅ ቓሊሱነ፣ 9«ይልኲል ደፋሽር ይጭስ ሲግድራን እኒንትቅ ክጭስ ነቅጭር» ዩ። 10ኣይንድ እየሱስ፦ «እፈ ሲጣን ክተ! ይበዊስ እለ ፊጥ! ‹ክኣምላክ ኣደረስ ሲግጭ፣ ጝት ጭቝም ኣምልክ› ይሽት ፃፍሽኩ» ዩ።#ዘዳ. 6፡13። 11ኣይንድ ዳቪለውስ ጝት በር ፊሩ። መላካንም ተርጝ እየሱስት ኣግልግል።
እየሱስ ክንሰነው ኪርመጘ
(ማር. 1፡14-15፤ ሉቃ. 4፡14-15)
12እየሱስም ይዃንስ እፁሸጘ ወሻንድ ገሊለ ትጐ ዋጥሩ።#ማቲ. 14፡3፤ ማር. 6፡17፤ ሉቃ. 3፡19-20። 13ናዝሪትትም በር ዛቭለውንስመ ንፍታሊምት ኣውራጀይል ችጝሽረይ ቅፍርናዀም ትጐ ፊር ጐዩ።#ይዃ. 2፡12። 14-15እንም ኣቐውድ ነቭይ ይሳያስ፦
«ዛቭለንት ዝቨ፣ ንፍታሊምት ዝቨ፣
ዮርዳኖስት እጂ ባኽር ጒደነይዝ ደርቸይል ፅበው
ኣኽዛቫኒዙ ገሊለም፣
16ጥመይል ፅበው ኽዝቭ፣
ኽየው ብርኻን ቓሉ፤
ክርጘዙ መጅወ ፅበው ዝቨል ፅበቊዝም፣
ብርኻን ፉ»
የው ዊግተውድ ፋፅምሻንስ የጝ።#እሳ. 9፡1-2። 17እየሱስም ኣይኒስ ኪርም፦ «ምጝግስተሰማያት ኣልትርኵችነ ንስኻ ጥውጥን» ያ ሲቭክጠ ኪርሙ።#ማቲ. 3፡2።
እየሱስት በውጥ ክንደጥድ
(ማር. 1፡16-20፤ ሉቃ. 5፡1-11)
18እየሱስ ገሊለት ባኽሪዝ ጋቢዝ ዲቋንድ ሊጘ ዚን እቅ የነትም ቢጥሮስ ይሽተው ስሙንስመ ጝዝን እንድርያስስ ቓሉ፤ ጛይም ኻዘ ፃውረቍ ዊን፤ ጝታመረቭድየንትም ባኽሪል ማልጛ ዊን። 19ጘጝም፦ «ላቝጥን ይት ቲክንጥን፤ ነስየ እቅድ ይጭስ ፃውርድርነቅ ፃቭጭር» ዩ። 20ጛይም በውዝ ጝታመረቭድ በርጝ ጝት ቲክን።
21ጝጊስ ዲቍ የጘ ቈሽ ላጥ ሊጘ ዚን ዘቭዲወስት ቝር ያይቈቭስመ ይዃንስስ ቓል ጭጙ፤ ጛይም ጝታይር ዘቭዲወስ ጅቅ ታኰል ኣቕጝ ጝታመረቭድየንት ኣስልጛ ዊን። 22ጛይም በውዝ ታኰይዝመ ጝታይርስ በርጝ ጝት ቲክን።
እየሱስ ክንሳ ፅውዝጅንጥድ ቓዘጘ
(ሉቃ. 6፡17-19)
23እየሱስም ጝታምኵራቫኒል#4፡23 ምኵራቭ፦ ጐኒስ ኣኽቭሸነ ስፍረ ኣቓንድ ኣዅደኒዙ ፀለውት ጝንም የጝ። ክንሳ፣ እደረት ምጝግስቲዙ ወንጌልድየንትም ሲቭካ፣ ቲተቲተው ፅውዘዝመ ቕጅወዝ ፃይሸቍ እቅድዛትም ቓዛ፣ ገሊለት ዝቨይልቅ ጅልዋ ዊኑ።#ማቲ. 9፡35፤ ማር. 1፡39። 24ጝጂጘድም ድፍን ሰውርየ ኣሽ ወይሽታንስቅ ጝሉ ጝሉ ፅውዘዝመ ደውየዝ ፃይሽጝ ተሰቃይሸቍድዛት፣ ጋኒናንዝ ፃይሸቍድዛት፣ ማለው ፅውዘ ፃየቍድዛት፣ ለውሻሻንድዛት፣ እጝቅትቅ ጝጐ ነስ፤ ጘጝም እጝቅትቅ ቓዙ። 25ገሊለስ፣ ፅቃ ኻትምጢስ፣#4፡25 ፅቃ ኻትምጥ፦ ግሪክኘ ዊግተቍዝመ ኣዅደን ኣየቍ እቅዝ ላብጠ ፅበጘቍ ኻግራንድድ ፅቃ ኻትምጥ ይሽትጘኵ፤ እንዛይ ኽትምጥድ ኽይጥጘድ ችጝሽጘውድ ገሊለት ባኽሪዝ ምስራቂዝጐቱዝመ ሰምየን ምስራቂዝጐቱዝ የጝ። እየሩሳልየምስ፣ ይዅዳስመ ዮርዳኖስ ዊርቨይዝ እጂስ፣ ተረቍ ንቕፀቍ እቅ እየሱስት ቲክን።
Nu markerat:
ማቲወስት ወንጌል 4: ኽምጣኣኪ
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
