Maka 6
6
Jisu vai kaikuapo se Nazareti amu
(Matiu 13:53-58; Luke 4:16-30)
1Ni Jisu ta o vaekake koa zae ni ota vaitake o ṉaviko ṉisa peuru kale Nazareti, ni voko disaipeli madu melai ke luluevake vo. 2Ni Sabati ṉaniu kale vota o taniekake nianiiekato ilusato ko pade kale. Ni matu kubo maba madu ta ke padoivake sai, ni so keru seke tava viqa keru voko nianiiekato seta keta vuzeike, ni eri kikelake, “Lai nio nea maba o koakoi voko bokao? Ni noi nio soa matu nianiiola? Ni noi nio vota pizato sala ni o ereka aqasiele ama iruruputo? 3Ako vota kamada inio, ko Mere vo meqora, ni voko visi poso inio se Jemisi ni Josepa ni Jiudasi ni Saimone, ni voko saqi poso melai koi nio seko peuru melai,” kikelake. So sole seta maba kevai kaikuapake se Nazareti amu.
4Melai vo Jisu ta eri kiolake sekasi, “Vo poropita ta keta va paṉaovou kiadama zae poso kale amu, melai seta kevai kaikuapou o ṉaviko ṉisa peuru kale amu, ni o ṉaviko mabamu, ni o ṉaviko saidi,” kiolake. 5So sole vo Jisu ta pui o roveake ereko kubo aqasiele ama iruruputo koa peuru kale, melai kake pala inio omai ivikake voko ṉase ni o urikimake se. 6Nio vo Jisu ta ota matu vuzeike, ako seta maba puliama tuvevo puto samu vokasi sole.
Jisu ko soroemo voko toni omuqa disaipeli madu iruruputole
(Matiu 10:5-15; Luke 9:1-6)
Ni Jisu ta ota olake saizama zavaṉa poso kale, ni o nianiiekimake se maba poso. 7Ni vota o nokaemake sea toni omuqa disaipeli madu omadeukoi, ni vota o soroemake se omuomuqa kidi. Ni puliako vo soroemo se vota o katimake ko pizato tu ke reriko ko ziolo poso, 8ni vota eri ma kiolake, “Meta pulia quli me borikou meko talio kale, melai daṉa ko kiada. Pui me borikou ko bereti, ni pui me borikou ko vesa, ni pui me borikou ko takula meko kukulu kale. 9Meta me qiakou ko buti, melai pui me borikou kama meko sabosabo. 10Sai se maba poso ke baroekimeloa koi, meta sai nio mebeta elou koa pade kale ti kobeta barolou so keru meme vaekou koa peuru, 11Melai so keru meme barolou keru kama pado peuru kale ni maba poso ta pui ke baroekimelou ni pui ke didiemelou me, ta meta me vaekou koa peuru, ni me bapazikou meko kiti kale ama pari tu ko mamola pueko seta pui Baṉara ko madu inio,” kiolake.
12So sole seta keta olake ni ke bazubazutake tu maba madu ta ke liliziovou seko ruqe kale azo. 13Ni seta ke rerikake ko ziolo poso, ni kemai loqaekake ko Olive oela seke verepani ni ke urikimake se.
Jone Bapitaiso ko vou
(Matiu 14:1-12; Luke 9:7-9)
14Nio vo Lekasa Herodi Anitipasi#6:14 Ṉota kea Herodi Anitipasi dikisonare kale. ta o viqake vo Jisu ko aqasiele ama iruruputo ko bazu, ako koa bazu kokai zaroake sole koa kiadama zae poso Qalili rana ko evako. Ni kake maba poso ta eri kikelake, “Jone Bapitaiso inio ota tova saeva voukale azo! So inio vota pizato sala ni o ereka aqasiele ama iruruputo,” kikelake. 15Nio kake ta eri kikelake, “Vota Ilaija inio,” kikelake, ni kake ta mata eri kikelake, “Vota kala Poropita inio lulali ala poropita jari ala,” kikelake. 16Melai vo Herodi o viqe keru ko, vota eri kiolake, “Vo Jone, vo a lezueveni, vo inio ota tova saeva voukale azo!”
17Vo Herodi ta soa pesio ota evake ako lula buti nio vota o soruemevo voko solodia madu ni ke noqoeve vo Jone, ni ke pirieve vo seini kale ni ke vaeve vo pirito pade kale. Vota o erekake ko quli ko Herodiasi ko zario kale avo, vo o raekema, melai kota vovo kaka Pilipi ko reko ikio. 18Eri sole inio o ereke ko quli: Vo Jone Bapitaiso ta pui o lalamatake bazuevo vo Herodi ni eri kiolake, “Kota pui korokoroti ikio ṉota ṉoda va raeka ṉovo kaka ko reko,” kiolake. 19Ni so keru azo inio ko Herodiasi ta kovai kaikuapake vo Jone ni kovai zariake vouvaevo, melai kota pui ko roveake, 20a ko vo Herodi ta ota va paṉaovake sole vo Jone, ako vota ovai nianiia ta Jone ta kala vo Baṉara vo tabu ala ni sidopu ala maba sole vota o vati vailake. Ni vota okai zariake didievo vo kiada keru, matu tiṉoliṉoli kobe ivake melai voko bazu.
21Nio so keru vo Herodi ko alilo ṉaniu ko baroa keru vota o erekake ko alilo ṉaniu ko ṉojola ni o taipazimake se Qavuna madu ko tanamu ni pazokinio ko maba poso ko kuleto amu ni Qalili ama maba poso ko lekasa poso tu kekai zomano koa voko ṉojola. Ni so keru inio ko Herodiasi ta ko keake uri ama taku tu ko vouvaevo vo Jone. 22Ni ko Herodiasi ko meqora ta ko amaqeake koa alilo ṉaniu ko ṉojola kale ni ko pekaoke tu seta ke kelo ko. Ni vo Herodi ni voko lolo poso ta kekai matu zoleike ko. Nio vo Herodi ta eri kiolake koa sinaqu rusu kasi, “Loma quli ṉo ṉoqai zariovo ama? Aṉata a qatiṉou ṉo.” 23Ni vota o erekake piza kama leveleveo koa sinaqu rusu kasi ni maulu o pikake ni eri kiolake, “Ko quli ṉoṉo baseko ama quli ta aṉata a qatiṉou ṉo, matuma quli kobe elou melai uri,” kiolake.
24So sole koa sinaqu rusu ta ko olake ko niania kasi ni eri kikolake, “Loma quli kio aṉata a basekou?” Ni koko niania ta ko kati tiorikake ni eri kikolake, “Vo Jone Bapitaiso ko lezu,” kikolake. 25Ni koa sinaqu rusu ta matu taukavole ko vaitake vo lekasa kasi ni ko bazuevake ni eri kikolake, “Aṉata aqai zaria tu ṉota ṉo qatilou komia erisaṉa vo Jone Bapitaiso ko lezu peleta kale!” kikolake. Ako so inio kota kokai nianiiovou voko vou kikolake. 26Ni so keru vo lekasa o viqa keru koko zario, vota matu duki ota evake, melai vota lula piza kama leveleveo o ereke kokasi sea maba poso o taipazimeni ko tanama kale, sole pui o roveake pazoko koa sinaqu rusu ko zario. 27Sole vota o soroevake kala vovo solodia tu opa kovo vo Jone ko lezu. Nio voa solodia ta o olake pirito pade kale ni opa lezuevake vo Jone. 28Saita inio vota o teamukake peleta kale ni opa katikake koa sinaqu rusu, ni kota kopa katikake koko niania. 29Ni so keru vo Jone ko disaipeli madu ke viqa keru voko vou seta ke olake ni kepa borikake voko tupu ni kepa mutakake.
Jisu ko niaemo sike vuro maba
(Matiu 14:13-21; Luke 9:10-17; Jone 6:1-14)
30Ni se apositolo madu ta ke vaitake ni ke toraevake vo Jisu, ni seta kevai bazuekake kiadama quli seke erekako ni ke mati nianiiekikake se maba madu. 31Ni sai ta matu kubo maba madu ke zio ni vaito putani sole Jisu ni voko disaipeli madu ta puliama taku ke koake tu ke vuato. So sole vota eri kiolake sekasi, “Ariamo tu meda zio me qiadakoi, kama olomoiza kama zaekale, nio sai nio me mamazou.” 32So sole seta keta pakeake koa toupa ko koa pake olomoiza kama zaekale.
33Melai matu kubo maba madu ta ke meake seko zolailo, ni kemai nianiiake se. So sole seta ke vaekake seko peuru poso ni keta rereake ketainole koa olomoiza kama zaekale, ni se inio kuleto keta baroake koa zaekale puliako Jisu ni voko disaipeli madu barolo. 34Nio so keru Jisu o saqora keru vaka topi azo, vota o meake sea matuma vaki, ni vota o matu roquemake se ako seta puliama vilua pikopiko samu jari sole, omadeuvo ko sipi puliama koko vijaro ko maba sama jari. Nio vota o mati nianiiekikake matu kubo bazubazu.
35Ni raisiraisi kota evake inio voko disaipeli madu ta ke olake Jisu kasi ni eri kikelake, “Lula matu raisiraisi kota eva ni koi ta ivulu ama zaekale inio, 36tu vaitoema nia matuma vaki ni bazuema tu seta ke zio tu kepa tatabaraeko ko sailao peuru poso kale, nio ke vuatou,” kikelake.
37Melai vo Jisu ta o mati tiorikake ni eri kiolake, “Me inio me niaemou sea maba poso,” kiolake. Nio seta eri kikelake, “Noni ko kalou inio animeta me roveovou niaemo nia vaki, ako varimuja kaboso ko tabara kale me qovo ama bereti melai pui me male,” kikelake. 38Nio Jisu ta mata eri kiolake sekasi, “Meta olamo ni pa kai nianiimo latau bereti kio sekasi.” Nio seta kekai nianiiake ni eri kikelake, “Sike silo ama bereti ni omuqa niuniu ko kiada,” kikelake.
39Ni Jisu ta o bazuemake voko disaipeli madu ni eri kiolake, “Meta bazuemomo sea vaki tu ke pitapitasio poqala poso kale ni ke papu koa paqauva seulele topi.” 40So sole sea maba poso ta tetebara papu ke evake omadeu paizana sike toni mati kama poqala kale. 41Ni vo Jisu ta o koake koa sike bereti ni koa omuqa niuniu, ni o tadatake aukale ni o kati vararaitake ni uriavo o kasekake Baṉara kasi. Ni vota o palapalamukake ko bereti ni o katimake voko disaipeli madu, ni sea disaipeli madu ta kema puarikake sea vaki, ni mata oma puarikake koa omuqa niuniu sea kiadamu. 42Ni sea kiadamu ta ke vuatake ni keta atapake muli. 43Ni sea disaipeli madu ta kekai sukatikake toni omuqa suakao koko palakiako sailao. 44Ni sea kiadamu ke vuateni ta sike vuro maba madu, melai seta pui kepa ataeme se rekoreko ni meqora poso se sate ke vuateni.
Jisu ko talio Qalili toupa ko ju topi
(Matiu 14:22-27; Jone 6:16-21)
45Ni koa taku kale inio Jisu ta o bazuemake voko disaipeli madu tu ke zazu vaka topi tu kebeta pakeo Qalili toupa ko koa pake Betiseida zavaṉa kale, so maqa inio vota o vaitoemou sea vaki. 46Nio o vaitoema sea vaki ko tova inio vota ota olake sopu kale vararaitole.
47Nio raisiraisi kota baroake ta voa vaka ta lula koa toupa ko tiania ota baroake, melai Jisu ta obeta evake o kiada pado koa zaekale. 48Ni vota o meake sea disaipeli madu ta kebeta vouvaekiniake qeluto kapea ururu kale. Nio vaqaza obe peata keru nio Jisu ta ota taliake toupa ko ju topi, sipole omai alokatake se. 49Nio ke vea keru vo seta eri kikelake, “Kota ziolo ikio!” kikelake. Nio seta keta upaupatake, 50ako sea kiadamu ta ke veake vo ni keta matu ṉake sole.
Melai tutumazi avole Jisu ta eri kiolake sekasi, “Meta pui ṉalo; aṉa ta Jisu lala inio,” kiolake. 51Ni vota ota zazuke sekasi koa vaka topi, ni ko ururu ta kota jamaoke. Ni sea disaipeli madu ta keta matu vuzeike, 52ako seta pui kepa uria paqumuke sole, vo Jisu ko niaemo sea sike vuro maba madu ta Baṉara ko pizato kale inio, ako seko kerukeru ta kutumana sole.
Jisu ko urikimo vere amu Qenesareti peuru kale
(Matiu 14:34-36)
53Nio seta lula keta pakea Qalili toupa ko koa pake ṉaniu o sulupakoi vasia rana Qenesareti, ni sai nio seta ke titiekake seko vaka. 54Ni so keru seke saqora keru koa vaka topi azo sai zama maba poso ta kevai nianiiake vo Jisu. 55So sole seta ke taliekake ko bazu koa zae poso kale, ni seta ke mati olake se vere ama maba poso seko kobo sase vokasi lai ma lai o olakoi. 56Ni kiadama zae poso kale Jisu o olakoi matuma peuru kale ni silo ama zavaṉa poso kale, ni siqo kale ni maketi ko zae poso kale, se maba poso ta kevai padoivake vo, ni seta ke mati olake se vere ama maba poso vokasi. Ni kevai zaivotake tu seta ke tibaeko pala vo Jisu ko sabosabo, ni sea kiadamu seke tibaekeni ta keta urikake muli.
Nu markerat:
Maka 6: BLBNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
The New Testament in the Bilua language, Solomon Islands © The Bible Society of the South Pacific, 1995.
