Matius 5

Yesus mangajar di bukit

(Luk. 6:20-23)

1Waktu Yesus lia ada bagitu banya orang yang iko pa Dia, Dia nae di bukit satu. Dia dudu ka bawa, kong Dia pe murit-murit ka sana badekat pa Dia. 2Turus, Yesus mulai mangajar pa dorang. Dia bilang bagini,

3“Paling sanang suda orang-orang yang rasa dong pe diri tara pantas pa Tuhan Allah pe muka,

karna dorang itu suda yang jadi Tuhan Allah pe umat yang Dia Berkuasa sebagai Raja.

4 # Yes. 61:2 Paling sanang suda orang-orang yang pe hati sedi,

karna Tuhan Allah akan hibur pa dorang.

5 # Mzm. 37:11 Paling sanang suda orang-orang yang tara sombong,

karna Tuhan Allah akan kase dunia ini pa dorang.

6 # Yes. 55:1-2 Paling sanang suda orang-orang yang ingin skali#5:6: Kata ingin skali di ayat ini, ada ambe dari kata, ‘lapar deng aus’, yang pe arti, ‘berusaha cari sampe dapa’. biking barang yang butul,

karna Tuhan Allah akan kase puas pa dorang.

7Paling sanang suda orang-orang yang kase tunju dorang pe rasa kasiang pa orang laeng,

karna Tuhan Allah akan kase tunju Dia pe rasa kasiang pa dorang.

8 # Mzm. 24:3-4 Paling sanang suda orang-orang yang pe hati bersi pa Tuhan Allah pe muka,

karna dorang akan lia pa Tuhan Allah.

9Paling sanang suda orang-orang yang kase baku dame pa orang laeng,

karna Tuhan Allah akan bilang dong itu Dia pe ana-ana.

10 # 1Ptr. 3:14 Paling sanang suda orang-orang yang dapa siksa karna biking barang yang butul,

karna dorang itu suda yang jadi Tuhan Allah pe umat yang Dia Berkuasa sebagai Raja.

11 # 1Ptr. 4:14 Paling sanang suda ngoni yang karna ngoni iko pa Kita,

ngoni dapa hina,

dapa siksa,

deng ada yang kase tara bae ngoni pe nama.

12 # 2Taw. 36:16; Kis. 7:52 Sanang deng basimore suda,

karna Tuhan Allah so kase sadia ngoni pe upah basar di sorga.

Barang, nabi-nabi yang dulu me so lebe kamuka dapa siksa sama deng yang ngoni dapa.”

Orang percaya musti bawa pengaru yang bae, sama deng garam deng tarang

(Mrk. 9:50; Luk. 14:34-35)

13 # Mrk. 9:50; Luk. 14:34-35 Yesus bilang lagi, “Ngoni itu sama deng garam di dunia yang kase sadap makanang. Bagitu lagi deng ngoni pe hidup di dunia ini, ngoni musti bawa pengaru yang bae pa orang-orang. Tapi kalu ngoni tara bawa pengaru yang bae, ngoni sama deng garam yang so jadi tawar yang tara mungkin mo barasa garam. Garam itu so tarada dia pe guna, lebe bae buang la orang injang-injang.

14 # Yoh. 8:12, 9:5 Ngoni lagi sama deng tarang di dunia yang kase tarang pa orang-orang. Bagitu lagi deng ngoni pe hidup di dunia ini, ngoni musti bawa pengaru yang bae pa orang-orang. Kong orang-orang pasti mo lia hal-hal bae yang ngoni biking, sama deng dorang lia kota satu di atas gunung yang tara mungkin mo tasambunyi. 15#Mrk. 4:21; Luk. 8:16, 11:33Tara ada orang yang pasang lampu kong tutu dia pe cahaya. Tapi pasti dia taru lampu itu di dia pe tampa supaya kase tarang pa samua orang yang ada di dalam ruma itu. 16#1Ptr. 2:12Bagitu lagi deng ngoni. Ngoni musti biking hal-hal yang bae supaya orang-orang dapa lia apa yang ngoni biking itu kong puji deng hormat pa Tuhan Allah, ngoni pe Bapa yang ada di sorga.”

Yesus datang supaya samua yang nabi-nabi tulis di Kitab Suci itu bole jadi

17Yesus bilang, “Jang ngoni pikir kata, Kita datang di dunia ini la mo hapus aturan-aturan yang ada di lima kitab Musa deng di nabi-nabi laeng pe kitab. Tapi, Kita datang supaya apa yang so tatulis itu bole jadi. 18#Luk. 16:17Ngoni dengar bae-bae e! Langit deng bumi pasti mo ancor, tapi aturan-aturan di lima kitab Musa deng di nabi-nabi laeng pe kitab itu tara akan ilang, biar satu huruf me. Samua itu tetap ada sampe yang Tuhan Allah bilang dulu itu so jadi samua. 19Karna itu, sapa yang langgar satu aturan saja, biar yang paling kacil, kong kase ajar pa orang laeng la iko sama deng dia, dia itu mo jadi orang yang paling tara penting di antara Tuhan Allah pe umat yang Tuhan Allah Berkuasa sebagai Raja. Tapi sapa yang iko samua aturan itu kong kase ajar pa orang laeng supaya orang laeng iko sama deng dia, dia itu mo jadi orang yang paling penting di antara Tuhan Allah pe umat yang Tuhan Allah Berkuasa sebagai Raja. 20Jadi, dengar bae-bae yang Kita bilang ini. Guru-guru agama Yahudi yang ahli lima kitab Musa deng orang Yahudi dari aliran Farisi, dorang jaga iko Tuhan Allah pe aturan-aturan, cuma dorang tara biking yang butul pa Tuhan Allah pe muka. Tapi ngoni ini musti biking yang butul pa Tuhan Allah pe muka kalu ngoni mau jadi Tuhan Allah pe umat yang Dia Berkuasa sebagai Raja pa ngoni pe hidup.”

Jang baku mara

(Luk. 12:57-59)

21 # Kel. 20:13; Ul. 5:17 # Luk. 12:57-59 Yesus bilang lagi, “Ngoni so tau aturan yang torang pe orang tua dulu-dulu dapa, bagini, ‘Jang bunu orang. Sapa yang bunu orang musti dapa hukum.’ 22Tapi Kita mo bilang pa ngoni e, sapa yang mara saja pa dia pe sudara, dia musti dapa hukum. Kong sapa yang momake pa dia pe sudara, musti dapa urus di agama Yahudi pe kumpulan yang paling tinggi yang pe nama Mahkama Agama. Deng sapa yang bilang dia pe sudara bodo, dia musti dapa hukum di api neraka yang mamanyala.

23Jadi, kalu ngoni ada bawa ngoni pe binatang korban persembahan pa Tuhan Allah di tampa bakar korban persembahan, kong waktu itu ngoni dapa inga ada orang yang hati saki pa ngoni, 24ngoni kase tinggal dulu ngoni pe korban persembahan itu di tampa itu pe muka. Kong ngoni pigi suda pa orang itu la baku dame dulu deng dia, baru ngoni bale kase ngoni pe korban persembahan itu pa Tuhan Allah.

25Hal laeng lagi, kalu ada orang yang bilang ngoni sala, kong dong mo bawa pa ngoni di pengadilan, ngoni musti capat-capat kase selesai dulu ngoni pe masala itu waktu masi di tenga jalang. Barang, kalu ngoni tara baku dame, pasti dia kase mangada pa ngoni di hakim. Kong hakim mo serakan pa ngoni di petugas penjara, turus orang itu kase maso pa ngoni di penjara. 26Inga bae-bae, ngoni tara akan kaluar dari penjara itu sebelum ngoni bayar lunas samua biaya sidang yang hakim suru bayar.”

Buang napsu tara bae la ngoni jang biking dosa

27 # Kel. 20:14; Ul. 5:18 Yesus bilang lagi, “Ngoni so tau aturan ini, ‘Jang baku suka deng orang pe laki atau orang pe bini.’ 28Tapi Kita mo bilang pa ngoni e, kalu ada laki-laki yang lia parampuang saja kong di dia pe dalam hati ada napsu mau tidor deng parampuang itu, itu sama saja deng dia so baku tidor deng parampuang itu. 29#Mat. 18:9; Mrk. 9:47Kalu gara-gara ngoni pe mata kanan sampe ngoni jadi berdosa, cungkel suda kong buang mata itu! Karna lebe bae ngoni pe mata sabla ilang kong ngoni tara dapa hukum, daripada ngoni pe mata itu lengkap tapi ngoni pe badan anteru dapa buang di neraka. 30#Mat. 18:8; Mrk. 9:43Kong kalu ngoni pe tangan kanan biking sampe ngoni jadi berdosa, potong suda kong buang tangan itu! Karna lebe bae ngoni pe tangan sabla ilang, daripada ngoni pe tangan lengkap tapi ngoni pe badan anteru maso di neraka.”

Jang baku cere

(Mat. 19:9; Mrk. 10:11-12; Luk. 16:18)

31 # Ul. 24:1-4; Mat. 19:7; Mrk. 10:4 Yesus bilang lagi, “Ada aturan laeng lagi bagini, ‘Sapa yang cere dia pe bini, dia musti kase surat cere pa dia pe bini itu.’ 32#Mat. 19:9; Mrk. 10:11-12; Luk. 16:18; 1Kor. 7:10-11Tapi Kita mo bilang pa ngoni e, laki bole cere dia pe bini kalu dia pe bini so baku suka deng orang laeng. Tapi kalu tarada, kong laki itu cere dia pe bini, dia so biking dia pe bini itu jadi sala pa Tuhan Allah pe muka. Barang, kalu parampuang yang so dapa cere itu kawing ulang deng orang laeng, itu sama deng parampuang itu so baku suka deng orang yang bukang dia pe laki, kong orang yang kawing deng dia me so sala pa Tuhan Allah pe muka, karna orang itu me sama deng so baku suka deng orang yang bukang dia pe bini.”

Jang basumpa

33 # Im. 19:12; Bil. 30:2; Ul. 23:21 Yesus bilang lagi, “Ngoni so dengar aturan satu lagi yang torang pe orang tua dulu-dulu dapa, bagini, ‘Jang langgar sumpa. Kalu ngoni basumpa demi Tuhan Allah, ngoni musti biking sumpa itu.’ 34#Yes. 66:1; Mat. 23:22; Yak. 5:12Tapi Kita mo bilang pa ngoni e, jang skali-skali ngoni basumpa! Jang ngoni basumpa demi langit, karna langit itu Tuhan Allah pe kursi raja untuk berkuasa. 35#Yes. 66:1; Mzm. 48:3Ngoni me jang basumpa demi bumi, karna bumi itu Tuhan Allah pe tampa taru kaki. Ngoni me jang basumpa demi kota Yerusalem, karna kota itu Tuhan Allah punya, Dia itu Raja yang Basar. 36Ngoni me jang basumpa demi ngoni pe kapala sandiri, karna ngoni tarada kuasa la mo biking puti atau itam ngoni pe rambu biar cuma satu ujung rambu. 37Jadi kalu memang butul, bilang saja, ‘Iyo’. Kalu tarada, bilang saja ‘Tarada’. Karna kalu ngoni bilang lebe dari itu, itu pe asal so dari Iblis, setang-setang pe raja.”

Balas deng yang bae pa orang yang biking jahat

(Luk. 6:29-30)

38 # Kel. 21:24; Im. 24:20; Ul. 19:21 Yesus bilang lagi, “Ngoni me so dengar aturan-aturan yang bilang bagini, ‘Kalu ada orang yang kase rusak ngoni pe mata, ngoni me balas kase rusak dia pe mata. Kalu ada orang yang kase pata ngoni pe gigi, ngoni me balas kase pata dia pe gigi.’ 39Tapi Kita mo bilang pa ngoni e, kalu ada orang biking barang yang jahat pa ngoni, ngoni tara bole balas deng yang jahat pa dia. Mala, kalu ada orang yang tampeleng ngoni pe pipi kanan, ngoni kase lagi ngoni pe pipi kiri. 40Deng kalu ada orang yang tuntut pa ngoni di pengadilan supaya dia menang untuk dapa ngoni pe baju, ngoni kase lagi ngoni pe juba pa dia. 41Kong kalu ada orang yang paksa pa ngoni pikul dia pe barang pe jao satu kilo, ngoni pikul suda kong bajalang tamba satu kilo lagi supaya jadi dua kilo. 42Kalu ada orang yang minta apa-apa pa ngoni, ngoni kase suda pa dia apa yang dia minta. Kong kalu ada orang yang mo pinjam apa-apa pa ngoni, ngoni kase pinjam suda pa dia.”

Sayang pa ngoni pe musu-musu

(Luk. 6:29-30)

43 # Im. 19:18 Yesus bilang lagi, “Ngoni so dengar aturan yang bilang bagini, ‘Ngoni musti sayang pa orang laeng, deng binci pa ngoni pe musu-musu.’ 44Tapi Kita mo bilang pa ngoni e, ngoni musti sayang pa ngoni pe musu-musu, deng ngoni musti kase berdoa pa orang-orang yang jaga siksa pa ngoni. 45Kalu ngoni biking bagitu, ngoni kase tunju, ngoni itu Bapa yang di sorga pe ana-ana. Dia yang biking matahari basinar pa orang yang bae-bae deng pa orang yang jahat. Dia me yang kase turung ujang pa orang yang biking barang yang butul deng pa orang yang biking barang yang tara butul. 46Kalu ngoni cuma sayang pa orang yang sayang pa ngoni, apa yang ngoni mo dapa? Jang ngoni baharap Tuhan Allah mo kase apa-apa pa ngoni. Tukang tagi pajak yang paling berdosa me sayang pa orang yang sayang pa dorang. 47Kalu ngoni cuma kase salam pa ngoni pe tamang-tamang, jang ngoni anggap Tuhan Allah mo pikir ngoni ini lebe bae dari orang laeng. Barang, orang-orang yang tara kanal pa Tuhan Allah me balas kase salam pa orang yang kase salam pa dorang. 48#Im. 19:2; Ul. 18:13Jadi, ngoni musti sayang pa samua orang deng sempurna, sama deng ngoni pe Bapa di sorga yang sayang pa samua orang deng sempurna.”

Nu markerat:

Matius 5: PB MMU

Märk

Dela

Kopiera