YOHANES 4
4
Samaria Gel Geb Yuba Sabdarek Yuba
1Yahudi nang edya Yohanes Pembaptis bera mek so meka dalasil bok, Yesus ak dara, nauba meka daboka nimi doro dililamla an yuba kemek. 2Ban wenyameknya nera, Yesus adya ununaʾ orok bok, alja diriga ban nang edya meka dalasik. 3Ban yuba en kemok dara, Yesus ara Yudea sokok ab loboka Galilea sokok yeilimok.
4Yesus balamok pik era Samaria soko hnoumunga garal bilimok. 5#Kej. 33:19; Yos. 24:32Pika balamookanya, Yesus ara Samaria sokok heik si Sikar heikek bilimok. Ban heik ara, Yakub bedya alja me Yusuf bek elegemok soko berem ulumok. 6Ban sokok sam ara, Yakub bedya oulyang aboka si simekaʾ den mek ulumok. Yesus alda balamookanya, hmeng umokaʾ anasa, ban mek denaʾ oulyang berem bul bilimok. Heng ara yubyek dukdukanek salek bul bilimok.
7-8Alja diriga ban nang era heikek denaʾ dekel bilimek. Dara, Samaria gel gera meka gwel yeilimok dara, Yesus adya wenhyok, ”Wei, genong o, mek ok anasa, meka gweb eleganenelem,” aboka molowok. 9#Ezr. 4:1-5; Neh. 4:1-2Dara, ban gel genedya, ”Anda Yahudi nang bok, na Samaria gel gek hekasa meka dunun aboka molonelem do?” hyok. Yahudi nim eb, Samaria nim eb, neikaʾ olokdangoka unggulumek nim ek anasa lemok. 10Gela ara ban wenhyok dara, Yesus adya alak, ”Anda Imik Neyung adya eleklesilaʾ ab, heknedya anak meka mololenggelaʾ ab, ella ulusom dara, anja alak molowanasom dara, alja dib embengaʾ unaʾ mek era eleganenggeso,” hyok.
11Dara, gel genedya Yesus ak, ”Neyung o, anda mek gwenaʾ orok, mek oulyang ara hyak lom nong ok onu anasa, hekaʾ huboka dib embengaʾ unaʾ mek ara gwebnelam do?. 12Nunja neyung Yakub bedya, ban mek denaʾ oulyang enera nuk elegosuk. Yakub beneba alba anyagan meka delemookanya, alja mab eb, alja pama beillilimokaʾ nidyaʾ ara, al anyagan delemek. Bok, anda Yakub bek sokok nenewanalamakanya, anak dubnya danalam de?” hyok. 13Yesus adya alak, ”Ban mek demeija nim era, eimik onoʾ saaboka mek ok ubnesil bok, 14nadya elegeisinya mek enyek delenya bera, eimik saaboka mek ok ubnenggunumla. Bok saaboka, nadya elegeisinya mek ek dara, alja nong lomok sam ara sob-sobaʾ yabalmorulamla mek anaso dangoka, dib embengaʾ ulmoubnaʾ eleganamla,” hyok.
15Dara, onoʾ ban gel genedya, ”Wei, neyung o, onoʾ mek ok ubnelyakanya saaboka anyagan mek sobaʾ gwel yanyek aboka, wera ban mek enyek eleganenelem,” hyok. 16Yesus adya alak, ”Anja nenya youbol bimenekanya, onoʾ anyagan yanarum,” hyok. 17Dara, ban gel genedya, ”Nara nenya orok,” hyok. Dara Yesus adya, ”Anda hyak dib nong leblam. 18Seleb liga lambadya nenya dolum bok, wen anablaboka ulurumnya bera, wera anja nenya unggulumlaʾ anasa dib leblam,” hyok.
19Yesus adya ban wenyamokaʾ eiyimookanya, ban gel genedya alak, ”Neyung o, anda hyak dib nong ununumnaʾ lenaʾanya ululamaʾ eiyinggen,” hyok. 20”Nunja neyung yab era, Imik Neyung bek ban mein enyek an giblemek bok, ugunda Yahudi nim era, Yerusalem heikek ok Imik Neyung gibnemab alalum,” hyok. 21Yesus adya alak, ”Yok yanamla sum enyek, nim adya Imik Neyung ak ara, mein enyekan gomaʾ, Yerusalem heikek ok gomaʾ, giblemnemak ara dib senewalom. 22Ugunda Samaria nim era, ugumba ella unggululumnya nek giblelum. Bok nunda Yahudi nimi numba ella ulumabnya nek, nimi blebsinaʾ damok ara, Yahudi nim ek ab yalamlaʾ anasa, numba ella ulumabnya nek giblemab,” hyok. 23”Bok eimik yanamla sum era, onoʾ al wen seleb ulumla sum eneba, Imik Neyung bek dib giblemak nim era, ganya adya gibnemak, Imik Neyung alba ulumla sok sunuwoka gibnemak. Ban anaso nimi ganya ara, Imik Neyung adya nak unu gibneneseng senelamla. 24Imik Neyung ara, ganya ok ulumlaʾ anasa, alak giblemak nim era, ganya lomok, Imik Neyung alba ulumla sok sunuwoka, unu giblemnamak,” hyok.
25Dara, ban gel genedya Yesus ak, ”Nimi blebsinaʾ dubnya, Kristus aboka si silimaknya bera, yanamlaʾ ara ella ulumna. Alda yalya dara, yokaʾ-yokaʾ nidyaʾ ara nuk neknesil,” hyok. 26Yesus adya, ”Wenyhelemnya bera nara alan. Alan anab yuba neikaʾ salanam,” hyok.
Samaria Nimi Nauba Dib Senemek Yuba
27Ban salek enyek, alja diriga ban nang era denaʾ dekel bilimekaʾ ara yek. Yesus ara gel ab yuba salarekaʾ eiyimeekanya, sikda loka dasuk. Bok sikja dara, ”Genong o, hekak senelelamakanya yeililam do?” aboka heibnenggumek. Onoʾ Yesus ak anaba, ”Hekasa anda gel ab yuba salmorum do?” aboka heibnenggumek.
28Dara, ban sum enyek ban gel gera mek hmeiya beib loboka, heikek byuukanya lebokja, 29”Ugunda nak yokaʾ-yokaʾ nidyaʾ nadya unulunanya nidyaʾ laga nenelnya benyek kemel yoululum. Alda nimi blebsinaʾ dubnya Kristus ulumla do?” hyok. 30Dara, nimi nauba sikja heikek ab goboka Yesus ak kemel bilimek.
31Wene salek enyek, alja diriga ban nang edya, ”Neyung o, wera or denaʾ seleb ulumlaʾ anasa, wera or del yabalom,” aboka alak dukaʾ lolom-lolom alamek. 32Bok alda sikenek, ”Ugumba elgom denaʾ don nak hnon ulumlaʾ anyaʾ,” hyok. 33Dara, alja diriga ban nang era, sik moumen heibdangdo balamek. ”Nimi hnon alsamba denaʾ bo yeilimak de?” aboka heibdangdo balamek. 34Dara Yesus sikenek, ”Nadya denaʾ era, nadyaʾ neyung, nak bokol yeilinyoknya bedya, alja senelamla anyek, unululul senelamlaʾ hnon, nak welelulaʾ aboka lenyok wa hnon, senenenya loboka welemna dara, wera nadya denaʾ era alan,” hyok.
35Dara Yesus sikenek, ”Walaʾ dombadya mablya dara, gwaneng denaʾ lanawanamla ara ugunda wenyalalum. Bok, nara ugunuk saaboka lebnesin, wa weblorobaʾ anyek doka daknenyak senewoka eng olomlaʾ anyek, ugunda kendululum. 36Doka daklamak nang ara, sikja deknaʾ seleb dolomak. Embengaʾ ulmoubnaʾ amba dakoka mamaklemak. Dara, eimik era doka doklomak nim eb, doka daklamak nim eb, ei-ei ganya daboka ulumnemak. 37Be hnon melemla dara, onoʾ yok nang daklamla, wenyalamak ara, dib nong. 38Nara ugunja webnenggublum wak sam doka daknelum aboka orugusin. Yok nim edya orowek seleb nauba wemekaʾ anyek, ugunda daklumaʾ adya perobaʾ doblum,” hyok.
39Dara ban gel genedya, ”Nadya nidyaʾ ulusenya laga lenel,” hyokaʾ adya nimi nauba Samaria nim era, Yesus ak dib senewoka domek. 40Dara, Samaria nimi Yesus nong ak okoka eiyimek dara, alak yeiniboka nuk pe ulunobaʾ aboka alak molomek. Anasa, Yesus ara liga penya sikja heikek gobdo mamok. 41Dara, nimi nauba ara Yesus adya neklesukaʾ anyek, sikja okoka eiyimeekanya, alak dib senewoka domek. 42Dara, Samaria nim edya ban gel genyek an, ”Anja nuk wenyasilimaʾ adya ok dib senewanggumab. Wenyok alda nun dam nang okoka heng yokaʾ bekoka eiyimabakanya, alja lelemla yuba kemabaʾ adya, alak dib senewoka doboka, alda soko nimi bleblesilnya dibaʾ ulusilaʾ ara ella ubab,” hyek.
Yesus Ara Mok Soko Dubnya Bedya Gelma Hwemok Yuba
43Yesus ara Sikar heikek liga penya mamok dara, Galilea sokok bilimok. (44#Mat. 13:57; Mrk. 6:4; Luk. 4:24”Nimi be hnon ununumnaʾ lenaʾanya bera, dam heikek nim adya gibnenggulumak,” aboka Yesus adya yok men sum enyek wenhyok). 45#Yoh. 2:23Yesus ara Galilea sokok bilimok sum enyek, nimi ganya eiya daboka alak doro diyimek. Sikda Yerusalem heikek Yahudi nang perob sum enyek ulumeekanya, Yesus adya yokaʾ-yokaʾ unulumokaʾ anyek eiyimekaʾ anasa, perobaʾ leboka Galilea yanggok dara, doro diyimek.
46 #
Yoh. 2:1-11
Dara, Yesus ara Kanaan heikek mek sirikaʾ bok anggur meka nenemok heikek onoʾ yeilimok. Kapernaum heik ara, soko dubnya bedya me neiknaʾ salamokaʾ ak malamok. 47Dara, soko damnya bera Yesus ara Yudea sokok abaʾ ara, Galilea sokok yeilimla anaʾ kemok dara, Kapernaum heikek ab nadya somogonunaʾ ulumla me era hwebnululaʾ aboka Yesus ak el bilimok. 48Dara, Yesus ara ban soko dubnya bek, ”Ugunda yokaʾ-yokaʾ lok so beknaʾ senenggomaʾ, lokol danaʾ eilinggululum dara, dib senenggululum,” hyok. 49Ban soko dubnya bedya Yesus ak, ”Neyung, nadya me anam somoganggumlya salek enyek ban men yalom,” hyok. 50Yesus adya alak, ”Anja me nera seleb meremla anasa or bilom,” hyok.
Dara, dubnya bedya Yesus lemokaʾ dib senewoka lo bilimok. 51Dara, dib lebnel senewoka pikek balamok salek enyek, alja ek wa nang alak yeiniboka, ”Neyung, anja me nera seleb merewo,” hyek. 52Dara, ”Alja hwer salek ek me nera merewo do?” aboka heisuk dara, ”Yubyek dukdukanek enyek pob ara denghyo,” hyek. 53Dara, ban me nen aljaʾ neyung bedya, Yesus ara al wenyek wenyamoʾ anasa, nadya me merewo senemok. Dara, alaʾ mabo gel e gekman Yesus ak dib senewoka domek. 54Yesus ara Yudea sokok abaʾ ara, Galilea sokok yeilimok dara, ban senenggom ununaʾ enyek penenya unumok.
Nu markerat:
YOHANES 4: LAINLC
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
