Tekang Kbuten 38
38
Juda ne Tamar
1Bè yóm kmoen yó, tnagak Juda yó kem dumun setwoli logi, ne mili etu bè benwu Adulam bè yóm tau boluyen Hira. 2Bè yóm knóen bè yó, wen libun Kanan tonen yóm ngà Suha libun ne yehen le du. 3Mlutut yóm libun yó ne mngà logi, ne yó boluy Juda du Ir. 4Ominen bud mngà logi bè yó Juda, yó boluyen du Unan. 5Ne tikóng bud mngà logi bè getluhen, yó boluyen du Sila. Bè yóm ksut Sila, tolo le nô bè yóm benwu boluyen Kisib.
6Tikóng deng bong Ir yóm ngaen logi twogu, omin Juda hyehen du bè yóm sotu sawang libun boluyen Tamar. 7Okóm yóm Ir, nmoen yóm tey sidek bè kton Dwata du, ne yó gónó Dwata ma klowilen. 8Ne yóm mon Juda mò ke Unan, yóm dumun sulil-lem Ir, “Yehenem Tamar, lómón yóm deng monen bè hlau tekuy gbak bè dumun sulil-lem yóm tau deng matay. Yóm gna ngaem béléen ke Ir funen.”
9Okóm lemwót bè yóm deng ketngón Unan du angat là kun du funen yóm ngà, yó nmoen ke sentungóen Tamar, là heflósen du yóm él gu béléen, mom hetdaken ebè tonok anì là mngaen mò nfun yóm dumun sulil-lem. 10Okóm yóm nmò Unan yó, tey sidek kton Dwata du, ne yó gónó Dwata ma klowilen.
11Omin Juda mon du mò ke Tamar yóm towuhen, “Muléki ebè kem tuhahem, ne béi tagad myehen efet kbong Sila yóm ngau logi mò bud yehenem.” (Yóm udélen yó, là kóen nô bè nawahen, abay se likò déke bud matay Sila, mkél bè yó kem twoguhen.) Tahu se, mulék ebè kem tuhahen Tamar.
12Nahen legen bè yó, matay yehen Juda. Tikóng deng yóm kdaw klangag Juda du, lemwót Juda lewu le ween Hira yóm tau Adulam, mógów le ebè Timna na le e nauy yó kem tau gmunting bul yó kem ubihahen. 13Wen tmulón du ke Tamar yóm deng knô tuónen logi bè Timna, nauyen yó kem tau gmunting bul yó kem ubihahen. 14Deng eles tngón Tamar deng bong logi Sila, okóm là kô dog htaba le du mò yehenen. Yó nmoen, tenlesen yóm nes libun bolu leseken anì laen dù dmilô du. Ominen myón bè kilil yóm lan husek elem benwu Inaim yóm lan mógów ebè Timna. 15Tikóng ton Juda bè yóm kiusen klohoken, hendemen libun hdóyón, abay se lenimunen lem uyóhen. 16Ominen hloni ebéléen, nbóten stungô, là kô dog dilóen du ke towuhen. Yó snólók Tamar béléen, monen,
“Hilu de bayadem dou?”
17Yó fasad Juda du, monen, “Henwitu uu ngà kambing lemwót bè yó kem ógófu.”
Yó bud snólók yóm libun yó, monen, “Gónóhu hemtahu du du yóm angat hol kdohò yóm blayem dou?”
18“Tedu se nóyóem du?” mon Juda.
Bnalà yóm libun, monen, “Blayem dou yóm tising gónón nô ilóem mung du féten ne yóm tuged nogotem.” Tahu se, blay Juda du yóm hnihen yó, ominen semtungô du ne mlutut Tamar. 19Kogolen bè yó, mulék ebè benwuhen Tamar, ne kóhen yóm nes limunen lem uyóhen, ne bud tles leseken yóm nes libun bolu, lómón yóm deng gel nmoen.
20Tikóng hfeted Juda ke ween Hira yóm tau Adulam, yóm ngà kambing tehe fasaden du, ne anì bud nwahen yó kem deng hlun suen béléen, okóm là kô bud ton Hira ke Tamar. 21Omin Hira smólók yó kem logi menwu bè yó, monen mò kul, “Gónón nô yóm libun hdóyón tehe myón bè yóm kilil lan husek bè nim benwu ni?”
Bnalà le se, mon le, “Laen dù libun hdóyón bélê me bè ni.” 22Duhen yó, bud semfulék ebè Juda Hira, ne tulónen du yóm là ktonen du, ne yóm mon yó kem tau bè yóm benwu yó laen dù libun hdóyón bè benwu le.
23Yó mon Juda, “Mò kun ne yó kem deng hlun nô béléen yó. Denge se hemwit ebéléen kambing, okóm là se tonem du. Ke bud hnebel te, déke mom knuli le tu yó kem tau.”
24Timbow deng tlu bulónen bè yó, wen tmulón du ke Juda deng mlutut Tamar yóm towuhen, ngaen bè kehdóyónen. Hetê Juda, monen, “Nwit ye hewà, ntem ye.”
25Okóm yóm igò le mit du hewà anì hnatay le, wen udél hwiten ebè tuónen, monen, “Yóm tau fun nim tising wen ilóen nô du ni, ne fun nim tuged ni, du se mà nim ngau. Dilóem kô?”
26Tódô dilô Juda kun funen ne yó monen, “Kun ktahu se yó, abay se là dnohou du yóm tehe fasadu du bè yóm tô kehyehenu du bè ngau Sila.” Okóm là kô bud sentungô Juda ke Tamar ne.
27Timbow kól bè yóm kdaw ksut ngà Tamar, lewu yóm ngaen logi. 28Bè yóm tolo kkuleng le, gna sut henmù yóm sotu ngà. Yó nmò yóm libun mwa ngà, wen tnikel hulô féten bè sigel yóm ngà yó, ne monen, “Du se gna sut.” 29Okóm bud hulék yóm ngà yó henmuen, ne mom yóm gewuhen yóm gna sut. Yó mon yóm libun mwa ngà, “Étey, kmoem du du ke gnahi hewà se kóm?” Ne yó gónó le moluy du Pérés yóm ngà sut yó. 30Ominen sut se kun yóm ngà wen tnikel hulô bè henmuen, ne yó boluy le du, Sira.
Nu markerat:
Tekang Kbuten 38: tbl
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2007, Wycliffe Bible Translators, Inc. All rights reserved.