Yosua 4
4
Sangpulo dua batu dipake'deh
1Ia tonna pura ngasanmo to to-Israel llambanni Sa'dan Yordan, mangkada-Mi PUANG Allataala lako Yosua Nakua, 2“Pileii sangpulo dua tau simesa'-mesa' jio mai suku to-Israel. 3Suai napada nnangka' simesa' batu llan mai tangnga sa'dan, to nanii to imang ke'deh mbulle Patti Basse, suai napassanni joo batu ratu lako ngenan to la minii mangtenda dau bongi.”
4Natambaimi Yosua to sangpulo dua tau to mangka napilei, 5nakuanni kumua, “Male kamu' tama tangnga sa'dan to nanii ke'deh tombulle Patti Basse-Na PUANG Allataala to tasompa. Pada passan kamu' batu simesa', paganna'i sangpulo dua, pada budanna suku to-Israel. 6Na ia to batu la dipasitodo'-todo', la dinii nningaranni to apa mangka Napugauk Puang Allataala. Ia ke mekutanai to bati'mi keanu' kumua, ‘Apara battuananna joo batu dipasitodo'-todo'?’ 7la mipauanni kumua ia tonna dipalamban to Patti Basse-Na PUANG Allataala jiong sa'dan, ta'pa pajai lolong to wai sa'dan. Ia joo batu tuli la mpangngingaran to-Israel apa to mangka jaji ntee.”
8Napugaukmi joo sangpulo dua tau apa to nasuanni Yosua. Pada mpassanmi simesa' batu, pada rekenanna suku to-Israel, situru' to Napangparentan PUANG Allataala lako Yosua, namane' mbawai de' ngenan to la nanii mangtenda napatorroi jao. 9Den too batu sangpulo dua napasitodo' Yosua llan tangnga sa'dan jio to nanii ke'deh imang to mbulle Patti Basse. Ia joo batu denpa ratu lako too allo.
10Tatta' bangngi to imang mbulle Patti Basse ke'deh llan tangnga Sa'dan Yordan arannai mangka to-Israel mpugaukki sininna to Napangparentan PUANG Allataala lako Yosua, napauanni lako to-Israel susi too to mangka naparentanni Nabi Musa. Na parri-parrimi llambanni Sa'dan Yordan. 11Ia tonna lamban ngasanmo to to-Israel, mane'ri endek jiong mai sa'dan joo imang to mbulle Patti Basse-Na PUANG Allataala, nalumingka njoloan to-Israel. 12Ia to pangbaraninna suku Ruben, na suku Gad sola sitangngana suku Manasye, jolo memanmi lamban njoloan to-Israel, nasaba' susimi joo to mangka napangparentan Nabi Musa. 13Agi-agi den 40.000 muane to pada mbawa balili' lamban jio olona PUANG Allataala, mangnguju tama merrantena kota Yerikho, la parari.
14Iamo joo wattu Nanii PUANG Allataala mpamala'bih Yosua jio olona sininna to-Israel. Angge tuona nataratte'i to-Israel, susi Nabi Musa nataratte' tonna anu'.
15Mangkada-Mi Puang Allataala lako Yosua Nakua, 16“Suami to imang to mbulle Patti Basse, naendekmo jiong mai Sa'dan Yordan.” 17Nakuamo Yosua lako imang to mbulle Patti Basse-Na PUANG Allataala, “Endekmo kamu' mai.” 18Ia tonna endekmo de' randan sa'dan, lolongmi to wai, namallua' ratu de' randan sa'dan susi nnena', tonna te'dapa nalamban to to-Israel.
19Ia joo wattu tonna lamban lian Sa'dan Yordan to to-Israel tanggala' sangpulo bulan mesa'.#4:19 Bulan mesa' situru' bulanna to-Israel, agi-agi pamula tanggala' sangpulo mesa bulan tallu, ratu lako sangpulo karua bulan appa', situru' pangrekenan bulanta'. Mpake'dehmi tenda jio kota Gilgal kadellekanna kota Yerikho. 20Jiomo nanii Yosua ssuai to tau mpasitodo' to sangpulo dua batu to napassan jiong mai Sa'dan Yordan 21Nakuamo Yosua lako to-Israel, “Ia ke mekutanai to anakkami keanu' kumua apara battuananna tee batu, 22la mipebalii susi tee, iamo joo tanda dinii nningaranni kumua den nalambannii to-Israel to Sa'dan Yordan makase. 23Pauanni kumua PUANG Allataala to tasompa mpamakasei nanii lamban, susi tonna pamakasei to Tasik Teberau nalambannii, 24dikua naissenni sininna tau llan lino kumua, liwa' makuasa to PUANG Allataala, la minii too mpakala'bih PUANG Allataala to tasompa te'da anggena.”
Nu markerat:
Yosua 4: mvpAD
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Wycliffe Bible Translators, Inc. All rights reserved.