Kuyamba 3
3
Kutaza kwamunthu
1 #
Bzi 12:9; 20:2 Tsapano nyoka ikhadachenjela kuposa nyama zentse zan'thengo zidalengewa na Chawuta Mulungu. Iyo idati kwankazi, “Ko Mulungu adalewa kuti, ‘Leka kudya michelo yamiti yam'munda muno?’ ”
2Nkazi adati kwanyokayo, “Michelo yamiti yam'munda muno tingadye, 3koma Mulungu adati, ‘N'chelo wamuti uli pakati pamunda tileke kuwudya panango kuwuphata, tikawudya tin'zafa.’ ”
4Koma nyokayo idati kwankaziyo, “Mun'zafa lini. 5Pakuti Mulungu an'dziwa kuti, mukawudya maso yanu yan'zafunguka, mun'zalingana na Mulungu, kudziwa chabwino nachakuyipa.”
6Nkaziyo paadawona kuti mutiwo niwabwino kudya, pomwe kuti ukhawoneka bwino m'maso, ukhachitisa kuti munthu achenjele, adatola n'chelo wamutiwo nkudya, adapasambo mwamuna wake, iyembo nkudya. 7Pamwepo maso yawo wentse ali awili yadafunguka, adadziwa kuti akhali pezi, adabzisonela masamba yamuti wankuyu nkubvala.
8Iwo adabva n'jinchi wa Chawuta Mulungu achifamba-famba m'munda nthawe yakujenjelela chakumawulo, munthu nankazi wake adabisala Chawuta Mulungu nkati mwamiti yam'munda. 9Koma Chawuta Mulungu adachemela munthuyo nkuti kwayiye, “Uli kuponi?”
10Iye adati, “Ndabva kufamba-famba kwamukhachita m'munda, ndikhagopa, nathangwe lakuti ndikhali pezi, ndipo pandabisala.”
11Mulungu adati, “Mbani wakuwuza kuti uli pezi, ko wadya nchelo wamuti wandidakuwuza kuti uleke kudya?”
12Munthuyo adati, “Nkazi wamudandipasa ndiye adandipasa n'chelo wamutiwo, ine ndidadya.”
13 #
2 Ako 11:3; 1 Tim 2:14 Pamwepo Chawuta Mulungu adati kwankaziyo, “Ko nchinyi ichi chawachita?”
Nkazi adati, “Nyoka ndiyo yandipumphsa, ndipo pandadya.”
Kulangiwa kwamunthu na Mulungu
14Pamwepo Chawuta Mulungu adati kwanyoka,
“Nathangwe labzawachitabzi,
iwe watembelelewa kuposa bzifuwo bzentse,
pomwe kuposa bzilombo bzentse bzan'thengo.
Un'zafamba uchikwawa namimba yako,
un'zadya pfumbi,
nthawe yentse yawumoyo wako.
15 #
Bzi 12:17
Nin'zayikha chizondo pakati payiwe nankazi,
pakati pawana wake nawana wako.
An'zaphwanya nsolo wako,
iwe un'zaluma chithatha chake.”
16Kwankazi adati,
“Nin'zathimiza kuwawiwa panthawe yawumphata pathupi,
napanthawe yawun'zabala wana,
koma un'zakhala uchifuna mwamuna wako,
iye an'zakutonga.”
17 #
Ahe 6:8
Kwa Adhamu adati,
“Nathangwe lakutetekela fala lankazi wako,
pomwe nakuti udadya n'chelo wamuti
wandidakuwuza kuti,
‘Leke kuwudya,’
dziko latembelelewa thangwe layiwe,
un'zashupika kwene-kwene kuti uwone chakudya chinchoka m'mwemo, ntsiku zawumoyo wako wentse.
18Dziko lin'zakumelela minga nancheso,
iwe un'zadya chakudya chan'thengo.
19Mukaluma yapamaso pako
ndimo mun'zachoka chakudya chako,
kufikila wabwelela pantsi,
pakuti ndiko kwawudatolewa,
ndiwe dongo, un'zabwelela kudongo.”
20Munthu adapasa nkazi wake dzina lakuti Eva, pakuti ndiye akhali amayi wawanthu wentse wamoyo. 21Chawuta Mulungu adakonzela Adhamu nankazi wake chakubvala chamakanda, nkuwabvadzika.
Adhamu na Eva an'chosewa m'munda
22 #
Bzi 22:14
Tsapano Chawuta Mulungu adati, “Wonani, munthu walingana nayise, waakudziwa chabwino nachakuyipa. Anfunika lini kubvumiziwa kuchela n'chelo wamuti umpasa umoyo unsaya kumala achiwudya achikhala wamoyo kufika lini nalini.” 23Nakutenepo Chawuta Mulungu adachosa munthu m'munda wa Edheni, kuti akalime pantsi paadachoka. 24Iye adachosa munthuyo, nkuyikha makherubhi nabhemba likhang'ayima chakumabveladzuwa kwamunda wa Edheni, kuchichinjiliza njila ikhayenda kumuti wawumoyo.
Nu markerat:
Kuyamba 3: KUNDA
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Bhaibheri reChikunda © Bible Society of Zimbabwe