SAN MATEO 8

An Jesús k'uch'ulh yu ixlakap'uch'ita

(Mr. 1:40-45; Lc. 5:12-16)

1Akxni ta'alhtajucho'olhcha an a'stitawk'a an Jesús, lhilhuwi ixch'a'o'akanta. 2Chi tichiyucha lapanak la'cha'alhcha an Jesús, wanajcha ixlakap'uch'i'ojota, chi tatso'ottanilhcha la ixlakapu, juniy:

―Jamach'alhkat Jesús, li sna ak'ink'uch'up'ut'u, ak'ink'uch'ut'ika'.

3An Jesús lats'awalalhi an ixmaka chi lakpach'apachalhcha, juniy:

―Chun, k'at'ala'a'oxit'icha.

Wa akxni wak tala'a'oxilh. 4Wa chuncha an Jesús juniy:

―Jant'u xamat'i k'a'un wa k'ap'inchicha talakasunini an sacerdote, chi k'alhip'ina'acha milha'ulan tacha lhinawlh a Moisés, para li katak'atsaa'olhi an sacerdotejnin.

An Jesús k'uch'ulh pumatam ixma'tsuku capitán

(Lc. 7:1-10)

5Akxni cha'alhcha la'acha'an Capernaúm an Jesús, ancha la'cha'alh pumatam ixcapitank'an soldadojnin de Roma, an capitán ixtapayniniycha an Jesús, 6ixjuniy:

―Jamach'alhkat Jesús, an kima'tsuku wa lakalhtukulun, p'asi ta'an'ay, wa malhcha an kincha'a'.

7An Jesús juniy:

―Ak'ana k'uch'unu'.

8Pero an capitán juniy an Jesús:

―Jamach'alhkat Jesús, jantu k'is ikt'acha'ani li k'at'anuchi an kincha'a', wa k'anawcha sta aniya li kata'oxiya, kata'oxiyacha. 9Ijk'atsay, mu iklhismanita akxni tu'u kintalhijuniy an yu palaycha xalaj'ajin. Chi kit'in akxni xamati soldado ijkuniy li ka'alh inta, an, chi li kamilh, min. Chi li tu'u iklhijuniy an kima'tsuku, ilhtuy. Xliyu iklhik'atsay li uxint'i layi ka'una'a an ta'an'at li kamakawlhcha an kima'tsuku'.

10An Jesús, lhi'a'nilhcha akxni chunchacha alha'asmatlhi, chi jajuniy an yu ixtach'a'o'ata:

―Jantu xamati masi an xalakaat'un Israel akla'cha'alh xamati yu chuncha jakiklaka'inin. 11Pero chunchacha yu katapasaya', ta ixlijalhi'ay an lakamunulhpa kata'alina lapanakni tacha ani capitán yu katat'a'ana tawlhnin an Abraham chi an Isaac chi an Jacob, an la ixlich'alhkat Dios. 12Chi apalij an yu ancha ixta'alh tawlhnin, kajamak'ankana ma'spa tan lakaputs'isni, ancha kastak laj'alhunkana chi wa xwat'at'acha kalaktasat'awkana'.

13Wa chuncha an Jesús juniy an capitán:

―K'ap'inch'o'ochicha, t'ach'a an k'iklak'a'it'i chunchacha walh.

An ixma'tsuku wa akxni ta'oxilh.

An Jesús k'uch'ulh an ixput'icha'o'olh Pedro

(Mr. 1:29-34; Lc. 4:38-41)

14An Jesús la'cha'alhi la ixcha'a an Pedro, walh an ixput'icha'o'olh Pedro ixmalh la ixputamat, wa stakcha ixch'apata yu alhp'as iskakat. 15Pus an Jesús ma'ch'apachalh, walh makawlhi an alhp'as iskakat, chi ostayacho'olhcha tsukulhcha jamaway.

16Chi akxni tats'isilhcha lhuwi jalhicha'anikalh an Jesús yu wa ixtalakpach'apay makxkay'un chi yu wa ixtala'ta'an'ay, walh wanaj jak'uch'u'olhi la ixchiwinti. 17Chunchacha tapasalh para li kawalhi tacha an ixnajunta Isaías, yu ixlichiwiniy ixchiwinti Dios, akxni nawlh: “Yucha lhi'an'olh an kinta'an'atk'an chi an kima'alh'ajnatk'an.”

Yu ixtach'a'o'aputun an Jesús

(Lc. 9:57-62)

18Mu la'ts'ini an Jesús li lhilhuwi ixla'acho'oyanikalh, pus jajuniy an ixt'alhtanan li an ixtapiktutamcha lakxkani kata'alh. 19Pumatam an yu ixtalajk'atsay lhamap'a'sin la'cha'alh, juniy:

―Maestro Jesús, wa t'anch'unch'a k'ap'ina'a akt'a'anan.

20An Jesús juniy:

―An zorrajnin talhit'ajuni ixcha'ak'an chi an ts'o'on talhit'ajuni ixpamaj'ank'an. Pero kit'in yu ikwalh isTs'alh Lapanak jantu inta ikmast'ak'ay ki'a'tsulh.

21Pumatam ixt'alhtana jumpalay:

―Jamach'alhkat Jesús, kachajcha p'ulhnaj ikti'an maknunu an kimpay.

22An Jesús alhtaylh:

―Ak'inch'a'o'acha. K'amak'awcha, kachajcha tamaknulhi ixjaninink'an an janinin.

An Jesús wanaj sa' ulalhi yu p'as ixlay xkan chi un

(Mr. 4:35-41; Lc. 8:22-25)

23An Jesús tat'atajulhcha an ixt'alhtanan an laka barco. 24Walh an lakxkan tsukulhcha lay p'as un, chi p'as xkan, wa milh, milhcha ixlayi an lakxkan, an barco ixtalak'aknuputuncha. An Jesús ilhtatay. 25Pus tala'alhi an ixt'alhtanan tamakujulh, tajuniy:

―¡Jamach'alhkat Jesús, akilama'alhtaxtuw ka aklakniyawcha!

26Yucha jajuniy:

―¿T'asu li lakt'alhananatcha? Jantu ayi mijakiklaka'intik'an.

Wa chuncha, an Jesús tayalh chi jalaj'aymalhi an un chi an alamalh, pus wanaj sa' tatawilh. 27Pus an lapanakni ixtalhi'a'niycha, ixtalajuniy:

―¿Tisiyuchacha lapanaki aniya, li masi an un chi an alamalh ta'asmatniya?

Lapanakni jamacha'an Gadara yu ixtala'apaxto'ta lakmakxkay'un

(Mr. 5:1-20; Lc. 8:26-39)

28Akxni an Jesús cha'alhcha an ixtapiktutam lakxkan, la ixlakaat'unk'ancha yu jamacha'an Gadara, japaxto'lhi ixt'uyunk'an yu ixtala'apaxto'ta lakmakxkay'un. Kampusantojo ixtaminachalh, sawalhcha ixta'at'ajnan, jantu lay k'is xamati ixpula'pusa ancha. 29Tajuniy an Jesús:

―¿Tasicha kla'ilhtuyawi Jesús, isTs'alh Dios? ¿Kilamintawcha mama'alh'ajninini masi jantuka' ixpaku'?

30Lanan ma'at an tan ixtayanalh yu'uncha, lhuw p'axnini ixta'exwayt'ajun. 31Pus tatapayniniycha an Jesús an lakmakxkay'un, tajuniy:

―Li akilatamakxtuyaw akilamakawniw ajkaputanuw an p'axnin.

32An Jesús yucha jajuniy:

―K'ap'inchi'itcha.

Pus tamakawlhcha an lapanakni, yu'uncha an p'axnincha taputanulh. Walh an p'axnin jululu ta'an'olh tan wanaj a'talhman la ixpiktu an lakxkan chi tata'aj'aju'olh talaj'aksk'anj'u'olh.

33An yu ixtalhist'ak'a an p'axnin, watukan talakats'alaj'alhi an la'acha'an, ixtalaknajuncha tani tapasalhcha. 34Pus wanaj tala'cha'an'olhi an Jesús, chi sa'cha ixtala'ts'in, chi tatapayninilhcha li kataxtucho'olhcha an la ixlakaat'unk'an.

Nu markerat:

SAN MATEO 8: tpp

Märk

Dela

Kopiera