Maatiuꞌ 7
7
Nantoong Birevire' Pote-koonaare
(Luk 6:37-38)
1“Nantoong koong-anta-koo oioi'daria' otoai Kumponinge nari' koong-antaru'neenga. 2Ai' dii'ke koong-antavererimaung-koo tee' nari' Kumponinge dii' koong-antaruriaing. Tee paaranang kompei nantoong koong-antaverimanarong Kumponinge kompui da' koong-antaruu'naang. 3Aming-koo dake nanki' daara'ma'nung-koo duta-koo oovemaunge teka daka noru'darava' da'koo duta-koo konkinarong otoing? 4Arekee' dake aa'pepeu' tee daara'ma'nung, ‘Io' nanki' moo'dampai da'koo duta-koo otoing,’ tenang daka oorarava' tee konking da'koo duta-koo otoing. 5Da' ampirinung˜, iro' tutung daka-koo moo'daravaing tee konking duta-koo ee'noko tenang daara'ma'nung-koo siraka'pei oovera moo'eai tee nanki' daara'ma'nung-koo duta-koo otoing.”
6Ee'noko Jiisuu'ke mirumiru' nauvurima aa'puu', “Kapoo' meekung mosi'nanka averereria' otoai bere'arima oki'noo'na' tairaarima busivusiriraari'neenga. Ee'noko napo' diikaang duku' pooro'anko dua'eria' otoai. Tee' nkoveriko meto' ninka nari' mee'aama more'aa'neenga.”
Kunsimarimatoaina'
(Luk 11:9-13)
7“Eentarariai aruriaina'. Besi'eriai daa'eriaina'. Kopikopi'eriai karanaang daate'deruriaina'. 8Ai' ookara nantoonge eentavarimainge tee nkavaamaung, ee'noko besi'aamainge tee daa'aamaunge, ee'noko karanaang kopikopi'aamaing teinge daate'evurimaunge. 9Dii'koo baie bauring taamang-koo eentavuko kapang avupeu'? 10Nii'noo' tavi'koo eentavuko ee boru' avupeu' tee? Otoa'. 11Tee tee dii'ke orenge diurukaa' tampa' averererimaung deeko' noru'eriaing teie Diumai paning-koo otomaunge bakei tampa' masika' avuriaing teing tee-koo eentavarimaing. 12Tee' nantoonge dii' tampa' nkoraarii'naang piarorimana' tee' nari' nkovererimaatoaing teing dii'ke, ai' teie aunge aarumoi tee boto Moosesi-nung ee'noko nakaro-nupoong urikupoong biikaang naro'ka dupeantavuri otong.”
Karanaang Kevaronta-koonaare
(Luk 13:24)
13“Muu' paninung-koo tuntoma te' ito-navarong. Teke tevaronge tuntariaing avutevu'daria', ai' tee karanaang pankaing, ee'noko taung tee beeta'nii' tee mosianung-aape bei otong, ee'noko mmau' tevaronge tumparimaung. 14Teka tevarong ito-navarong kaponavunge danto tee domaang isikung-anta-aape bei otong, ee'noko mmau' nantoonge dekopi'aamaung tevung.”
Koi'navari Ee'noko Bakaning Sinananka
(Luk 6:43-44; 13:25-27)
15“Tanatarariaing teing-koo nakaro-nupoong daang Kumponing-etaning tamparimaing-koo. Teing teing dii'anko sipisipi'koong dopa' kurumpariri poroaing, teka kuunoo' teing teing nkaunanka makosi-nanka tairo'nanka. 16Teka tee-koo biikaang sinananka-koo dii'ke tasi'pereriaing. Ai' nantoonge ee karikau' too'murintaa'po'navari-koo kavaapeu'? Ai' kiring ee nantong-koo kavaapeu'? Otoa'! 17Tee' nari' ookara koi' tampenanka-koo tee sinang tamparananka bi'umaung. Ee'noko tee-koo koi' orara-koo sinang orara bi'umaung. 18Tee-koo koi' tampara-koo orara sinang bi'uarupeu', ee'noko orara koi'koo sinang tampara bi'uarupeu'. 19Ee'noko ookara koi'nanka sinang tampara bi'uauka'ning teing nokiaarima nta'koo dua'aariaining. 20Tee'koo biikaning sinananka-koo dii'ke tasi'pereriaing teing nakaro-nupoong Kumponing-etaning deeko'.
21“Mmau'ke tee aa'maamaung, ‘Ovoring, niikaang Ovoring,’ nka teing ookara nari' tumpariauka'nung te' muu' paninung-koo, teka teing naing deeko' tee Mma' paning-koong bakaang pia siompaavaining tumpariaing. 22Napo' nantoong karingai aa'maavainge ning te'mung, ‘Ovoring, Ovoring, nii' ee dakaang miring-koo tarampeemariaruu'ning˜ napo' dakaang miring-koo ma'nari bata'arampiaruu'ninge taa'ni'antananka mmau' nkoampima?’ 23Teka ninge ee' nauarampaing teing sira'pansi, ‘Temu'keta dii' nkaning pina' noru'dampiaung. Tokoi beriai ning-ankoita dii' orara aarumo nkonuka.’”
Matauna' Ee'noko Kanu'na' Pava Kani-koo
(Luk 6:47-49)
24“Tee'koo ookara nantoong aung nkaang kara taaravaama nkoaakoo' teing teing tee-pina' naning norukasi' tee bakaang pava boia'koo dau kanivuu'nung. 25Teketa aing aa'ning pou': apo' dua'aru', doua tuuvuu', ee'noko dovinge aa'na' duparara dankampuu' tee pava, teka teva pesi'arava', kapang-koo boia'koo e'manii'nava deemparako. 26Teka teing ookara nantoong nkaang kara tamung taaravaama siompaavarukoo' teing teing tee-pina' naning kanu' tee bakaang pava tamung piisi'koo dau kanivuu'nung-pina', e'mang-antavua'. 27Ee'noko tenang teing aing aa'ning pora apo' dua'aru', doua tuuvuu', ee'noko dovinge aa'na' duparara dankampuu' tee pava, ee'noko bakei pesi'arara tuung tanuu' tee pava.”
28-29Ee'noko tenang Jiisuu'ke tee' minkuvura bakeario' nantoong karinga bakei aa'na' ta'nimpariru' tee-koo bakaang nau-anta-koo kara bakaang purinto' deempario', teing-pina' biikaning boto naunuka-pina' deea'.
Nu markerat:
Maatiuꞌ 7: nasNTpo
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1994, Wycliffe Bible Translators, Inc. All rights reserved.
