Maatiuꞌ 11
11
Jiisuu' Baa Masikung?
(11:1–16:20)
Tee Jooni Minkinara Jiisuu'koo Nia'kuu'na'
(Luk 7:18-23)
1Teketa Jiisuu'ke teing bakaning nanai'keta kenaanka barevare-nupoong tautauvurikotaa' bakearako osinanka-koo Kaaleli'nameng-kooning-koo due'ke daankinamparama nau-antavurii'naang beu'.
2-3Ee'noko Jooni Minkinara kiimata-nava'koo otoi teing kapoo'nanka Karistoo'ke nkovuko'ning taaravura teie kenaankara bakaning barevare-nupoong-koo botovuretu' tee Jiisuu'anko tee nia'urema aa'puree'naang, “Da' ee tee tavo'kuaing-koong, ai' mme' nii'nung nempampiainge?” 4Ee'noko teie aa'puretu'nung tenaanka, “Bereta nauereai tee Jooni Minkinara kapoo' dee'ke ooveresining ee'noko taaraveresining; 5Aa'noining: kaputu'nuka banteaama ookai, kau' de'doonuka nanai, oramuu'po'nupoong kiiroraa'ariri ee'noko kipaunuka taareai, boo'nuka daa'ariri, ata'oinku tampara doorenang daankianko taaravai. (Aisaia' 29:18-19; 35:5-6; 61:1)
6Ee'noko biraankearavaing tee naning ning-koo date'pari baitoaravaing, ee'noko nkaang nko-nko akovee' mare'uauka'.”
Jiisuu'ke Tee Jooni Minkinara Minkuvuma Nauvuru'na'
(Luk 7:24-35)
7Teketa Jooni Minkinara bakanaanka kara-nkara toroareko Jiisuu'ke kara-nau tutumpuru' nantoong karinga Jooni minkuvuma, ee'noko aa'puu', “Dii'ke aremurii' naning doore taaraverira mee'bora' sirakamaa'koo ooverii'naang beriko' karika'duri? Naning tunsi-paaka onou avitoitoi eeari oto' oo-koo te' beriarupeu', ape'? 8Napo' naning nepu'arama kirokaiari otomaung oo-koo beria', ape' aing? Ai' teing nantoong baarong tampenge nopa'arimaing dauraronanka biikaning-koo pava-koo oovereripeu', mee'bora' sirakamaa'koo deea'. 9Teka arekee' masika' oro' oo-koo beriko' dii', ai' narung nakaronara? Ee', tee bakei nakaronara masikung Kumponing-etaing emu' ninge naurampimang dii'. Tee tee aa'nung ookara nakaronuka-koo dau basie tee. 10Ai' aung ee'nung miru'ui Daari Meekung-koo ee' minkuari otong Kumponinge bauring Karistoo' temu' nauvuu'noo'ka aa'puma,
‘Ee aung, ninge botoampaing nkaang kara-nka da'koo uro'ke tee taung maamu-antareruaing uroitaa'.’ (Malakai 3:1)
11Masika' naurampimang dii', Jooni tee ookara nantoong tee-koo uro'ke ponto'ariru'ning-koo tee deto basi pankaing, teka ninge ee' naurampimang, enang-eta deto baata teing ninge tare-koo aroo'ariaining, bane Kumponing bakaang muu'koo miring oki'nareka', teinge tee Jooni puru'ai otoroaing. 12Teketa Jooni Minkinarai daankinang tutumpuu'noo'keta bera doong e'munung-koo basi-noo'koo tee paninung muu' tee iri'oi daa'aramang, ee'noko teing te' muu'koo kuung poromaing teing iri'oroi tee-koo pinka'arimaing. 13Ai' tee tee uripo'keta nakaro-nupoonge ee'noko Moosesi-nung botoi paninung muu' tavo'aravaina' tarampeearima˜ minkuau' bera Jooni bakaang batei-koo basi. 14Dii'ke masika-antaveriaing deeko' tee Jooni tee ee'nung Eliasi miru'ari otong Kumponinge uro'ke poo'naang tampuu'nung teinge nakaro-nupoonge minkuau'na'. 15Dii' punkang-po'nupoong deeko' enang taaraveriai!”
16Teketa Jiisuu'ke napo' aa'puu', “Dii' nantoong emu'navarang ninge aminge pa miru'dampipeu'? Dii' teing toire'pina' oro'nanka baaveroma ba'naniai turampeemaing bii'ka aa'peema, 17‘Kovi puunterorompiko konterorima neekarariarukoo'. Ai'nontu'mariko dii' birontariarukoo'.’ Tee' nari' oorarampimaung nee' tokomererimaing. 18Jooni Minkinara porai'nange taamang tovang uaini kerempuko konterorima aa'periko', ‘Tee ma'naang-po'nung.’ 19Ee'noko ning Tee Naning-naumpo' Paning-etaing mora taamanama tuaamarako napo' konterorima aa'merimaung, ‘Aung ooveriai taamang ee'noko uaini nai bauko, taakisi nkanuka ee'noko nii'ning orenge bii'maiko'ke!’ Teka Kumponinge avutevu'muresi botomuresina' sinampuko dii'ke bakaang matau tasi'periaing.”
Piaaru'nanka Bakei Teing Osi Pankeng Bere'ariaing.
(Luk 10:13-15)
20Teketa tenang Jiisuu'ke teing osi pankenanka taa'ni'antananka nkovuko ooau'ning daankiarama turampuru'nung bere'ariaruko oovurira. 21Aa'puru', “Baka'e piaaru'nuka dii' Korasin-nupoong, tora'kiriaining. Piaaru'nuka dii' Besaida-nupoong, dii' tora'kiriaininge, ai' dii' teing kapoo'nanka iri'po'ning ta'nimpaarii'nanka dii'koo nkoaru'ning ooverima bere'dariaruu'. Teinge Ju'deeaing Saidoni'nupoong ee'noko Taia'nupoonge ooaara dei namu'ke bere'aripeu' sipunge poo'arima mononopa' orarunsi-koong kurumparipeu' bere'ariru'nung-koo taa'ni'antavarima. 22Teka aa'dampimang, te'mung Kumponinge nantoong simpe'urima kiimatavuriaina'mung dii'ke dau basinoo' tora'periaing Taia' naankai Saidoni' tora'pureainoo'keta. 23Ee'noko dii' Kapaneume'nupoong deto paning-koo basirariaining-pina' daang noru'darimaing. Dii' doonko mosianung-koo sing-antaruriaining. Teing taa'ni'antananka dii'koo nkoantu'ning Sodom-namono-koo nkoantu'nung dei temono tee tee' nari' otopeu' e'mung-koo basinoo'koo. 24Teka ninge ee' naurampimang te'mung simpe' nkona'mung kiimata bakei aa'na' tora'periaining dii', teing-koo temu'nupoong oreng-koo dau basinoo', biikaang osi Sodom Kumponinge paro'uu'ning-koo.”
Manki'po'nupoonge Uaa Kompaavaina'
(Luk 10:21-22)
25Tenang ee'nang Jiisuu'ke aa'puu', “Mma' ee, tampara tantamang da' Ovoring paning-koong ee'noko kansi'koonge, dake aa'nou'nung-koo: Dake tee doorenang tampara baku'eu'nung-koo teing-koo matau-po'nupoong ee'noko noru'po'nupoong tamparimaing-koo ee'noko sira'peu' teing-koo tootoia-pina' otoromaing-koo. 26Teing nantoong piaaveri piarou'na' tee'. Ee', Mma'.”
27Ee'noko nantoong karavurima aa'puru', “Ookutunung kapoo'nanka tee Mma'ke pare'muu'nung, ee'noko naning otoa' ning Tee Bauring noru'mui otoing, Mma'ke deeko' noru'mui otong. Ee'noko napo' naning otoa' Mma' noru'ui otoing, teka ninge Bauringe deeko' noru'ansi o'nong. Ee'noko nantoong teing naing ninge Bauringe miru'arampaining-koo oro'antavanko noru'aavaing tee.
28“Ning-koo poriai dii' ookara iri' o'darima manki'dorimaing avutevu' matau siomperima pore'dorimaing, ee'noko ninge uaa-antarampiaing diikaang tanuaang. 29Ning nkaang tare-koo kuung porira ning-koo barerariai, ai' ning tee banainge oto', ee'noko domang boonko noru'mari oto'ke. Ee'noko ning-koo tee diikaang tanuaang uaa-anta komperiaing. 30Ninge tare-koo dii' aroo'dariri dei manki'doria' kuaa'doripeu' ning siomeritaa'.”
Nu markerat:
Maatiuꞌ 11: nasNTpo
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 1994, Wycliffe Bible Translators, Inc. All rights reserved.
