मत्ती 7
7
मी यम्बाला क्येन मातेर
(लूका ६:३७-३८, ४१-४२)
1“मी यम्बाला ठिम माकी, तमा कोन्छ्योककी साङ ख्यिराङला ठिम मिकितो। 2ख्यिरा चुक क्यानी यम्बाला ठिम किवे, तुक राङ क्यानी कोन्छ्योककी साङ ख्यिराङला ठिम किवितो। ख्यिरा मी यम्बाला चो बिन वे, कोन्छ्योककी साङ ख्यिराङला दोजोयी राङ नङ्गितो। 3ख्योरो मी यम्बी मिकला वोतुप बोप ति थोङ्गिवी, यिने च्यिला ख्योरो मिकला वोतुप दुङ्मा ति मोथोङ्नोक? 4ख्योरो मिकला दुङ्मा वोसिन चुक क्यानी मी यम्बाला ‘ख्योरो मिकला वोतुप बोप ति ङे थेन तेरुप।’ सिनी सि थुप्किवी? 5ओ, खोनक्पु! गोमाला ख्योरो मिकला वोतुप दुङ्मा ति थेन, तमा ख्योरे मिक ति ल्यामु थोङ्नी मी यम्बी मिकला वोतुप बोप ति थेन थुप्कितो।
6चाङ्मा वोतुप ति कीला मातेर, तमा ख्यिरा मुतीतिवा फक्पी दोङ्ला माक्युर। तुक क्यासिन तिवी तिवाला काङ्बी वोक्ला लेप्किवी, तमा ग्युर्नी ख्यिराङला फेकिवी।”
लोङ, छोल, डक डक ग्योप
(लूका ११:९-१३)
7“लोङ, तमा कोन्छ्योककी ख्यिराङला नङ्गितो। छोल, तमा ख्यिराङला ङ्येकितो। गोला डक डक ग्योप, तमा कोन्छ्योककी ख्यिरा थोक्ला गो बेकितो। 8च्यिलासिसिन लोङ्गुपतिवाला नङ्गितो, छोलुपतिवाला ङ्येकितो, गोला डक डक ग्यकुपतिवाला गो बेकितो।
9ख्यिरा पर्ला सी खोरो पुज्युङकी शुब्ज्याङ लाङ्सिन तीला दो तेर्किवी रो? 10याङ्ना ङ्या लाङ्सिन तीला रुल तेर्किवी रो? 11ख्यिराङ दुक्टा वोनी साङ रङगी पेजातिवाला च्यालक ल्यामु तेर शेकिवी सिसिन देवाच्येनला ज्यु वोतुप ख्यिरा पपा कोन्छ्योककी याङ खोला लोङ्गुपतिवाला मङ च्यालक ल्यामु मनङ्गिवी रो? 12मी यम्बी ख्यिराङला चुकै किशी सिरुप नो किवे, तुकै राङ ख्यिरा तिवाला की। दी ति मोशाकी ठिम ताङ कोन्छ्योककी लुङ्तेम्बातिवी बिन्दुप खक्छ्येवु येन्देन यिन।”
देवाच्येनला क्योलुप गो गच्चा
(लूका १३:२४)
13“गो गच्चा नाङ्ला शु। ङ्येलाला क्योलुप गो ति ठोल्मु वे, तमा ते डोप लाम ति जोल्हमु वे। ती तप्की ती नाङ्ला शुकुप मीतिवा बङी वे। 14यिने नाम्साङ मिशिवु मिजीला क्योलुप गो ति गच्चा ताङ ते डोप लाम ति कले वे। ती तप्की ती नाङ्ला शुकुप मीतिवा ङ्युङ्मु वे।”
दोङ्बु ताङ तीकी डेलुकी कोर्ला
(लूका ६:४३-४६)
15“लुङ्तेम्बा मेटेङ्बुतिवा नेसुर च्याङ्से देता। तिवा फिला ल्हासिन लुक दोके ल्यामु थोङ्गिवी, यिने सेम ति ज्यिवा लङ्गुप खटमु दोके गिवी। 16डेलु ल्हानी तीकी दोङ्बु हाक्कोवु दोके मीतिवी कितुप लाका ल्हानी तिवा चुकै वे सिनी हाक्कोकिवी। चुक क्यानी छेर्माङ दोङ्बी गोला गुन्डुम, याङ्ना छेर्क्योक दोङ्बी गोला अन्जीर थिवी रो? 17तुक राङ क्यानी दोङ्बु ल्यामुला डेलु ल्यामु गोर्किवी, तमा दोङ्बु मेलोवाला डेलु मेलोवा गोर्किवी। 18दोङ्बु ल्यामुला डेलु मेलोवा गोर मुथुपी, तमा दोङ्बु मेलोवाला डेलु ल्यामु गोर मुथुपी। 19चुका दोङ्बुला डेलु ल्यामु मोगोर्वे, ती दोङ्बु ति च्येनी मे नाङ्ला क्युर्किवी। 20तुक क्यानी ख्यिराङ लुङ्तेम्बा मेटेङ्बुतिवाला तिवी कितुप लाका ल्हानी राङ तिवा चुका मी यिन सिनी ङो शेकिवी।”
कोन्छ्योककी नोवाला युकुप कोर्ला
(लूका १३:२५-२७)
21“ङला ‘चोवो, चोवो!’ सिरुपतिवा तेरी कोन्छ्योककी ग्येल्खापला शुक मोछ्योकिवी, यिने देवाच्येनला ज्यु वोतुप ङे पपा कोन्छ्योककी नोवाला युकुपतिवा तिराङ कोन्छ्योककी ग्येल्खापला शुक छ्योकिवी। 22कोन्छ्योककी ठिम तोङ्गुप तिङ्मी तुजेला मीतिवी ‘ओ, चोवो! ओ, चोवो! काङ चोवोकी मिङला ङ्यिरा नम्दर माशे रो? काङ चोवोकी मिङला ङ्यिरा र्हेन्डीतिवा माशर रो? तमा चोवोकी मिङला काङ ङ्यिरा हलेवु लाकातिवा बङी माक्यावु यिन रो?’ सिनी सिवी। 23ती पेला ङ वुतुङ के ख्यिराङला ‘ओ, ख्यिराङ दुक्टा कितुपतिवा! ङे ख्यिराङला ङो राङ माशे। ख्यिराङ ङे चा नेमा ग्युक!’ सिनी सिरिन।”
खाङ्बा जोप मी नम्बा ङ्यी
(लूका ६:४७-४९)
24“सी ङे ताम्ङे थोनी ती दोके किवे, ती ति दो ग्येर्पु थ्वोनी डम्ज्यी रम्बु तिङ्नी ती खला खोरो खाङ्बा जोप रिक्पा वोतुप मी दोके यिन। 25तमा छ्यर्वा टेमु ग्यप्नी टोक्पा ग्यम वानी कशेन लुङ ग्येर्पु ग्यप्नी ती खाङ्बाला फोक्सिनाङ ती खाङ्बा ति मरम्नोक, च्यिलासिसिन ती खाङ्बा ति दो ग्येर्पु तिङ्नी ती खला जोवु तप्की यिन। 26यिने सी ङे ताम्ङे थोनी साङ ती दोके मिकिवे, ती ति पेमी खला खोरो खाङ्बा जोप मी अम्बारङ्शिङ दोके यिन। 27तमा छ्यर्वा टेमु ग्यप्नी टोक्पा ग्यम वानी कशेन लुङ ग्येर्पु ग्यप्नी ती खाङ्बाला फोक्सिमा ती खाङ्बा ति रम्नी छासे ना गाल्सुङ।”
28येशूकी ती तेरी सुङ्सिमा ते वोतुप मी माङ्छ्योक खोकी सुङला हलेवा क्यासुङ। 29च्यिलासिसिन खोकी यहूदी छ्योकी गेकेनतिवा दोके माक्यानी कोन्छ्योककी नङ्गुप ओङ्ज्येन नेमा राङ सुङ लाप नाङ्सुङ।
Nu markerat:
मत्ती 7: xsrNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2014, Wycliffe Bible Translators, Inc. All rights reserved.
